YUDITƐ 9
9
Yuditɛ sambala Gale
1Do gɛ̃a wese ni, do kpo sa kɛ wa dɔ do fũ yɔmbɛ hã Gale kɔ Tɛmpɛloe tɛ Yeruzalɛmɛ i ni, nɛ Yuditɛ bili zu ɛ gbaa nɛ zu a to nù. Nɛ a ndɔ bũ do zu a vɛ̃, nɛ a yala tulu tɛ̃ a, nɛ a e saki kɛ a hi'da ti nɛ ni dɛ nza, nɛ a ma ngɔ sambala NWA Gale do nga gɛlɛ na: 2“NWA, mɔ a Gale kɛ yaa mi Simeoni dɔnggɔ zi a ni. Nɛ mɔ a mɔ ia zi du kɔya kɔ̃ Simeoni na, a gbɛ ogele winɔ kɛ wa ba zi boko nya a do nga nɛ, nɛ wa ɔ do a ni. Ogele winɔ ni wa hɔlɔ zi tulu tɛ boko nya Simeoni, nɛ wa ɔ do a, nɛ wa 'danga a, nɛ wa hã sape hã a. Mɛ owinɔ ni wa dɛa zi ni, mɛ a mɔ kɛ mɔ kɔ̃̀ gɛnɛ nɛ gɔ. 3Nɛ we duzu 'dã mɛ 'da wa ni, nɛ mɔ dɛa na, Onwanɔ 'da wa wa fe fio bolo. Tɔkɔ tɛ wa a nù dɛ ngɔ kpo mɔ ɔi kɛ wa 'danga zi boko nya Simeoni ngɔ nɛ, nɛ wa hã sape hã a ni, nɛ wa kpa tɛ mɛ 'bɔ sape. 4Nɛ mɔ dɛa na, obe Israɛlɛ wa kala owukonɔ do obe zɔnga benɔ 'da wa si do wa. Nɛ mɔ ba wala hã owinɔ 'da mɔ, kɛ wa mbɔ̀kɔ̀ tɛ wa we dɛ olo nu mɔ gɔ ni na, wa kala mɛnɔ 'da owinɔ ni olo wa. Mba gɔ, zã onya Dina nãlã zi wena we sape wa hã zi hã nu fɛlɛ wa ni, nɛ wa aka mɔ na, mɔ gala lo.
“Aa Gale, mɔ a Gale kɛ mi dɔnggɔ mɔ, mɔ gɛ́ zala mɔ tɛ we kɛ mi, wi fio wili gɛ, mi wele hã mɔ ni. 5Mɛnɔ vɛ̃ kɛ ma dɛ tɛ̃ ɛ ni, kɛnɔ ma dɛa zɛ́ tɛ̃ ɛ dati, do kɛnɔ ma dɛa tɛ̃ ɛ dɛ 'do nɛ ni, wi dɛa ma a mɔ. Nɛ mɔ a mɔ kɔ̃a na, lɛ dungu ɔ nɛ mɛ lɛ dungu sɔɛ gɛ, do kɛ lɛ nɛ dungu sɛ do 'do ni. Mɛnɔ kɛ mɔ 'dafa zi ma ni, ma hã ma dɛa tɛ̃ ɛ ni. 6Nɛ mɛnɔ vɛ̃ kɛ mɔ 'dafa zi na ma dɛ tɛ̃ ɛ ni, ma dɛa tɛ̃ ɛ do ti. Nɛ wenɔ vɛ̃ kɛ mɔ kɔ̃a na, ma dɛ tɛ̃ ɛ, do walanɔ mɔ nɛ la do ma ni, mɔ ĩ zi fala nɛ belee ia. 7Kɔ aa NWA Gale, mɔ zɔ̀, Oasiri wa tɛa do osodanɔ 'da wa vɛ̃. Wa tɛ dɛ wali ombalatanɔ do osoda kũ mbalatanɔ 'da wa, nɛ wa dɛ 'bɔ wali osoda nyanga winɔ 'da wa. Wa gbini zã wa do osɛlɛnɔ, ongelenɔ, nzabelenɔ, do olasipɛnɔ 'da wa. Nɛ wa ĩ̀ na, wi do ngawi gɔnɔ bolo, wi a mɔ ni gɔ. 8Li mɔ a NWA. Hã mɔ tómbó ngawi 'da mɔ, hã ma gbɛ kɛ 'da wa do'do. Mɔ bé dã 'da mɔ hã wa, sɛ a ngawi bole 'da wa si nù de. Wa handa na, lo faka Tɛmpɛlo santoe 'da mɔ, nɛ lo dɛ mɔ ndi dɛ fala kɛ ma hã dɔ̃lɔ̃ li hã mɔ ni, nɛ lo kala mɔ bolo we gbini do gbagala 'da mɔ dɛ nù. 9Mɔ sókó fala ngatɛ 'da wa nɛ sɔkpɔ nɛ ni, nɛ mɔ bé nɔ̃lɔ̃ zã 'da mɔ hã wa. Nɛ mɔ zɔ mi, wi fio wili gɛ, hã mɔ hã ngawi hã mi we dɛ mɛ mi handa we dɛ nɛ ni. 10Nɛ mɔ e nu mɔ 'do bɛlɛ mi nɛ tɔ̃ sɛ ma ni, takɔ mi gbɛ wa vɛ̃, ongbá do Owele lenɔ, Onwanɔ do osodanɔ wala kpo. Mɔ dɛ́ na, mi wuke iko gɛ, mi 'danga mɛnɔ wa 'dafa na, lo dɛ ma do ngatɛ vɛ̃ ni. 11Ngawi 'da mɔ ma yóló ngɔ dɛlɛ zu wele, tabi ngawi kɔ kili tɛ wa gɔ. Mɔ a Gale 'da owinɔ kɛ wa ba tɛ wa dɛ nù ni. Mɔ gala obe winɔ, nɛ mɔ yolo gba sala 'do wanɔ kɛ wa do ngawi bina ni. Mɔ fɔmɔ owinɔ kɛ wele lénggé do wa gɔ ni, nɛ mɔ kpasa owinɔ kɛ wa 'bɔ do linggamɔ kpasi bina ni. 12Gbãlã we, Gale, mɔ zélé sambala 'da mi. Mɔ a Gale kɛ baa mi dɔnggɔ zi mɔ, nɛ owinɔ ngɔ nù Israɛlɛ vɛ̃ wa dɔnggɔ mɔ. Mɔ a Nwa wele li nza do nù, nɛ mɔ a mɔ dɛa olìnɔ, nɛ mɔ a nwa ngɔ omɛnɔ vɛ̃. 13Mɔ dɛ́ na, lɛnggɛ bɛlɛ mi nɛ tɔ̃ nɛ ni, ma e dani tɛ owinɔ gɛ, nɛ ma gbɛ wa. We kɛ wa handa na, lo 'danga gba tɔkɛ 'da mɔ do Oisraɛlɛ, do Tɛmpɛlo santoe 'da mɔ, do kala Sioni, do nùi kɛ owinɔ 'da mɔ wa ɔ ngɔ nɛ gɛ. 14Mɔ dɛ́ na mɛ ni, takɔ owinɔ 'da mɔ wa ĩ na, mɔ a Gale kɛ mɔ do nganda vɛ̃, mɔ a wele ngawi, nɛ mɔ zu mɔ kpo a mɔ fɔmɔ Oisraɛlɛ.”
अहिले सेलेक्ट गरिएको:
YUDITƐ 9: NGB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ngbaka DC Bible (We Nu Gale) Version © Bible Society of the Democratic Republic of Congo, 1995.