TOBITƐ 8
8
1Nyɔngɔmɛ nɛa we e ma, nɛ nde 'da fala ɔ nù ma wia ia, nɛ wa kã Tobi dɛ 'da Sara kɔ tɔa ɔi i. 2Kɔ a nɛa we le nɛ, nɛ ta zu a gba ngɔ we kɛ anzɛ Rafaɛlɛ tɔ̃a hã a ni. Nɛ a fĩ nu koe 'da a, nɛ a ba lã sila kɔyɛ, do 'bunggulu a, nɛ a fi ma li kalĩ we kɛ wa dɔ do yɔmbɛ ni. 3Nɛ fala tɛ nɛ unu, nɛ ma ndaka 'dã hi wi ni, nɛ a yu do zã bũ gɛ gbaa dɛ ngɔ nù Ezipeto. Nɛ anzɛ Rafaɛlɛ ndaka 'do a, nɛ a kpa a, nɛ a ɛnzɛ a dɛ di ni.
Sambala ba ngba wi 'da Tobi do Sara
4Baa Sara do naa a, wa la Tobi kɔ tɔa ɔi i do'do, nɛ wa hɔ nza, nɛ wa kpe nu tɔa. Nɛ Tobi kulu ngɔ ngɔ mɔ ɔi, nɛ a tɔ̃ hã Sara na: “Kɛnɛ mi, mɔ kúlú ngɔ hã lɛ sambala NWA, nɛ lɛ aka a na, a ĩ 'bako hã lɛ, nɛ a zɔ mɔ tɛ lɛ.” 5Nɛ Sara kulu ngɔ, nɛ wa bɔa nɛ, wa ma ngɔ sambala NWA takɔ a zɔ mɔ tɛ wa. Nɛ Tobi sambala na:
“Aa NWA Gale 'da oyaa lɛ,
e kɔ lɛ dɔnggɔ mɔ!
E kɔ wa dɔnggɔ zu li mɔ
kɔ sabɛlɛ do sabɛlɛ!
E kɔ mɛnɔ tɛ li nza do nù gɛ vɛ̃,
ma dɔnggɔ mɔ ndɔti nɛ bina!
6Mɔ do tɛ mɔ, mɔ dɛa zi Adamu,
nɛ mɔ dɛa Eva hã a na,
a ba a do kɛnɛ a,
nɛ a gbaka a.
Nɛ wa kua owinɔ nù gɛ vɛ̃.
Mɔ tɔ̃a zi na: ‘Ma wè na, wi wili 'bana zu a kpo iko gɔ. E kɔ lɛ dɛ ngba a wi gbaka a, kɛ a wia kɔ̃ do a ni hã a.’ 7Aa NWA, mɔ ĩ na, mi sàkà Sara we duzu wɔ tɛ̃ a iko gɔ, nɛ nde mi saka a we kɛ mi dɛ olo nu mɔ. Kɔ mɔ kɔ̃, nɛ mɔ ĩ 'bako hã lɛ, nɛ mɔ dɛ na, lɛ dɛ gbɛlɛ dɛ tɛ ngba lɛ.” 8Tobi sambala ni do'do, nɛ wa bɔa nɛ wa kɔ̃ “Amɛ”, 9nɛ wa ɔ nù.
10'Dɔkɔlɔ tũi nɛa we nyɛlɛ nɛ, nɛ Raguɛlɛ kulu ngɔ, nɛ a sa mɔ hã Owi dɛa tonɔ 'da a, nɛ a tɔ̃ hã wa na, lo nɛ hã lo zã kɔ̃ zunu. Mba gɔ, a lengge zi na, mbe gɔ nɛ Tobi a fe sɛ, nɛ owinɔ wa mɔmɔ sɛ lɛ, nɛ wa dã sɛ lɛ. 11Wa zã kɔ̃ɛ gbaa kɔ ma ia, nɛ Raguɛlɛ kpolo tɛ̃ a nu tɔa i, nɛ a sa mɔ hã kɛnɛ a, 12nɛ a tɔ̃ hã a na: “Mɔ tómbó mbe wuko dɛa to kpo, kɔ a nɛ, hã a zɔ tabi Tobi 'bana do tunu li a nde. Kɔ fala kɛ a fe fia, nɛ lo mi sɛ a do tɛlɛ tɛ kɛ na wele tɛ ĩ̀ fala nɛ gɔ ni.” 13Nɛ wa sa mɔ hã wuko dɛa to kpo, nɛ wa ba mwinda hã a, nɛ wa hũi nu tɔa ɔi. Wuke ni lia, nɛ a kpa wa, nɛ nde yala nɛa ngɔ wa bɔa nɛ. 14A zɔa ni, nɛ a hɔ nza, nɛ a tɔ̃ hã Raguɛlɛ do kɛnɛ a na, Tobi 'bana do tunu li a.
15Raguɛlɛ nɛa we zele ni, nɛ a sambala Gale, kɛ a li nza i ni na: “Aa Gale, e kɔ winɔ vɛ̃ kɛ sila wa a sa ni, wa dɔnggɔ mɔ. E kɔ wa dɔnggɔ mɔ kɔ sabɛlɛ do sabɛlɛ! 16Mi hã iɔ̃nae hã mɔ, we kɛ mɔ hã yangga hã mi, nɛ 'dã mɔ kpo hɔ gɔ. Mɔ bia dia zã 'da mɔ hã lɛ, nɛ mɔ gala lɛ. 17Aa nwa, mɔ zila sambala 'da lɛ, nɛ mɔ ĩ 'bako hã kpo benɔ lɛ kua wa gɛ. Ngangga gɛ mɔ kɔ̃, nɛ mɔ be dia zã 'da mɔ hã wa, nɛ mɔ fɔmɔ wa. Mɔ dɛ na, wa kpa dia dungu kɔ dungu nza 'da wa.” 18Raguɛlɛ sambala ni do'do, nɛ a ba nu a hã Owi dɛa tonɔ na, wa mi zuni dati kɛ na fala sa ni.
Gbalimɔ dɔ ba ngba wi
19'Do nɛ, nɛ Raguɛlɛ tɔ̃ hã kɛnɛ a na, a dɔ mapa dɛlɛ wena. Nɛ Raguɛlɛ nɛa kɔ ba'de 'da a i, nɛ a saka wili ngɔmbɔ bɔa, do wili bata nalɛ, nɛ a ba nu a hã owi dɛa tonɔ na, wa gbɛ wa, hã wa gi wa we gbalimɛ. 20A sa mɔ hã Tobi, nɛ a tɔ̃ hã a na: “Mɔ kɔ̃, nɛ mɔ tɛ́ si do ti gɔ, mɔ ɔ mbe do lɛ pɔsɔ bɔa, hã lɛ nyɔngɔ mɔ, nɛ lɛ nɔ dɔ̃ do mɔ. Mɔ dɛ ni, sɛ a ma hã yangga hã be zɔnga be 'da lɛ, olo gili 'bakonɔ a kpa zi ni de! 21Nɛ 'do nɛ, nɛ mɔ kala sɛ kpo mbe bɔa kɔ kpamɛnɔ 'da mi, nɛ mɔ si do ma dɛ 'da baa mɔ i do dia nɛ. Kɔ fala kɛ lɛ do kɛnɛ mi, lɛ fe, nɛ mɔ dungu sɛ 'bɔ ngɔ tala kpamɛnɔ kɛ ma 'bana ni. Mɔ ɔ́ do kpã sila! Yolo do sɔɛ gɛ, mi a baa mɔ, nɛ kɛnɛ mi a naa mɔ. Lɛ kɔ̃a gɛnɛ mɔ ɔ nɛ kɛ lɛ kɔ̃a do gɛnɛ kɛnɛ mɔ ni. Be 'daa, mɔ gbini zã mɔ do lɛ!”
अहिले सेलेक्ट गरिएको:
TOBITƐ 8: NGB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ngbaka DC Bible (We Nu Gale) Version © Bible Society of the Democratic Republic of Congo, 1995.