Kutoma 1
1
Kulengwa kwa pyonsene
1Pakutomaletu Mulungu adalenga kudzulu na dziko yapansi.#1.1 Pakutomaletu…dziko yapansi: penu Pakutomaletu pidalenga Mulungu kudzulu na dziko yapansi; penu Pidatoma Mulungu kulenga kudzulu na dziko yapansi. 2Dziko yapansi ikhali nkhabe kuoneka kwache, pontho pakhali nkhabepo chinthu na chibodzi chene. Mdima ukhali padzulu pa madzi akuzwika ale adazungulira dziko yapansi, pontho Mzimu wa Mulungu#1.2 Mzimu wa Mulungu: penu Mphamvu za Mulungu; penu Mphepo yakubulukira kuna Mulungu; penu Mphepo yakugoswa. akhambuluka-mbuluka padzulu pa madzi. 3Tenepo Mulungu adalonga mbati, “Mbakukhale cheza.” Tenepo cheza chidaoneka.#2Akor. 4.6. 4Mulungu adaona kuti chezacho chikhali chadidi, tenepo adasiyanisa cheza na mdima. 5Mulungu adathula chezacho masikati, mdima adauthulambo mosiku. Mosiku udagwanda, machibese mbafika; yeneyo ikhali nsiku yakutoma.
6Tenepo Mulungu adalonga mbati, “Mbapakhale chakulekanisa madzi, towera madziwo akhale pambuto ziwiri.”#2Pet. 3.5. 7Natenepo Mulungu adalenga chakulekanisa madzi chile, mbalekanisa madzi a pansi na madzi a kudzulu. Ipyo pidakhaladi tenepo. 8Mulungu adathula chakulekanisa madzicho “Thambo.” Mosiku udagwanda, machibese mbafika; yeneyo ikhali nsiku yachiwiri.
9Tenepo Mulungu adalonga mbati, “Madzi a pansi pa thambo mbagumanyike pambuto ibodzi, towera nthunda ioneke.” Ipyo pidakhaladi tenepo. 10Mulungu adathula nthunda ile, “Dziko yapansi,” pontho adathula madzi adagumanyikana ale, “Bara.” Tenepo Mulungu adapiona kuti pikhali pyadidi. 11Tenepo Mulungu adalonga mbati, “Dziko yapansi mbibale mtundu onsene wa pyakumera, pile pyakukhala na ngala, pontho miti yakubala nsapo zakukhala na nthanga.” Ipyo pidakhaladi tenepo. 12Natenepo dziko yapansi idamera mtundu onsene wa pyakumera, pile pyakukhala na ngala, pontho miti yakubala nsapo zakukhala na nthanga. Tenepo Mulungu adapiona kuti pikhali pyadidi. 13Mosiku udagwanda, machibese mbafika; yeneyo ikhali nsiku yachitatu.
14Tenepo Mulungu adalonga mbati, “Mbakukhale pyakumwinikira kuthambo kusiyanisa mosiku na masikati, pontho kuonesa kutoma kwa nsiku, ndzidzi wa chaka,#1.14 ndzidzi wa chaka: penu Maphwando achipembedzo. na pyaka; 15pontho mbapigake kuthambo kupereka cheza kudziko yapansi.” Ipyo pidakhaladi tenepo. 16Natenepo Mulungu adalenga pyakumwinikira pikulu-pikulu piwiri, dzuwa kuti itonge masikati, pontho mwezi kuti utonge mosiku. Iye adalenga pontho nyenyezi. 17Mulungu adaikha pyakumwinikirapi kuthambo kuti pimwinikire dziko yapansi, 18kutonga mosiku na masikati, pontho kusiyanisa cheza na mdima. Tenepo Mulungu adapiona kuti pikhali pyadidi. 19Mosiku udagwanda, machibese mbafika; yeneyo ikhali nsiku yachinayi.
20Tenepo Mulungu adalonga mbati, “M'madzi mbamuinjipe na pinthu pyamoyo pya mtundu na mtundu, pontho mbalame zizinji mbazimbuluke padzulu pa dziko yapansi.” 21Natenepo Mulungu adalenga nsomba zikulu-zikulu za m'bara, pinthu pyamoyo pyonsene pyakukhala m'madzi na mbalame za mtundu onsene. Tenepo Mulungu adaona kuti pikhali pyadidi. 22Mulungu adatsanzayisa pyonsenepyo mbapanga pyakulengwa pyonsene pya m'madzi kuti pibalane na kuinjipa m'bara, pontho adapanga mbalame kuti ziinjipe padziko yapansi. 23Mosiku udagwanda, machibese mbafika; yeneyo ikhali nsiku yachishanu.
24Tenepo Mulungu adalonga mbati, “Padziko yapansi mbapakhale nyama zamtundu na mtundu, zakufuyiwa, zam'tsanga na zakukambadza zene, pontho zikulu na zing'ono zene.” Ipyo pidakhaladi tenepo. 25Mulungu adalenga nyama zonsene zam'tsanga malingana na mtundu wawo, nyama zonsene zakufuyiwa malingana na mtundu wawo, pontho na nyama zonsene zakukambadza malingana na mtundu wawo. Tenepo Mulungu adapiona kuti pikhali pyadidi.
26Tenepo Mulungu adalonga mbati, “Tendeni tisasanye anthu akulandana na ife, pontho akukhala ninga ife. Iwo anatonga nsomba, mbalame, na nyama zonsene zakufuyiwa, zam'tsanga,#1.26 nyama zonsene zakufuyiwa, zam'tsanga: Chakuthumbusula chinango chibodzi chakale chalonga penepi; m'Chiheberi muna nyama zakufuyiwa na dziko yonsene yapansi. pontho na zakukambadza padziko yapansi.”#1Akor. 11.7. 27Natenepo Mulungu adalenga anthu akulandana na iye; mukulandana na Mulungu iye adalenga anthu. Iye adaalenga mamuna na mkazi,#Kut. 5.1, 2. #Mt. 19.4; Mk. 10.6. 28tenepo adaatsanzayisa mbalonga kuna iwo mbati, “Balanani mbamuinjipe. Dzazani dziko yonsene yapansi kuti mukhale na utongi padzikoyi. Ndikukupasani utongi pana nsomba zonsene, mbalame zonsene, na nyama zonsene za mtundu na mtundu padziko yapansi pano. 29Ndikukupasani pyakumera pyonsene pyakukhala na ngala padziko yapansi, pontho miti yonsene yakubala nsapo zakukhala na nthanga kuti mudye. 30Mbwenye kuna nyama zonsene zam'tsanga, mbalame zonsene, pontho pyakukambadza pyonsene padziko yapansi, chinthu chonsene chamoyo mwenemo, ndapereka maudzu na masamba a pyakumera kuti pikhale phoso yawo.” Ipyo pidakhaladi tenepo. 31Mulungu adayang'ana pana pyonsene pidasasanya iye mbaona kuti pikhali pyadidi. Mosiku udagwanda, machibese mbafika; yeneyo ikhali nsiku yachitanthatu.
अहिले सेलेक्ट गरिएको:
Kutoma 1: SenaMw
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Bible Society of Malawi