Genesis 11
11
Cha'anil latsub'al ton b'a Babel
1-2Yajni ch'ak wajuke ja kristyano b'a stojol wax jak ja k'ak'u sta'awe jun loman yaman b'a slujmal Babilonia ti'xa ch'ak kanuke tiw ja k'ak'u jumasa jawi, spetsanile junxta ja sk'umale'i, 3-4Ja'yuj ti yala sb'aje ye'nle ita'a:
—Laj tojb'estik jun chonab' sok jun cha'anil latsan ton b'a oj k'ot man satk'inal. Jel niwan oj iljukotik cho mi oj b'ob' wajkotik saktantan b'a tuktukil chonab', xchiye.
Ti'xa k'e stul'e yi ja a'tela. B'a wax makuni ja toni, lagriyoxa ya'we ochuk, ye'n sk'u'luneje jaxa b'a wax makuni semento chab'ek' ya'we ochuk. 5Yajni ko yil ja Dyos ja jas wa'ne stojb'esjeli, 6Ti yala'a:
—Yuj ja junxta yiljele cho junxta ja sk'umale'i, ja'yuj k'e'ta sk'u'luke ja a'tel iti. Jaxa ya'n mi ma' oj timjuke yuj ja jas oj sk'u'luke'i. 7La kokotik la jomtik ja slo'ile'i, b'a jach' mixa oj yabye sb'ej ja jas oj yal sb'aje'i.
8-9Man tiwi, ch'ak a'ji spil sb'aje yuj ja Dyosi, jaxa ye'nle'i, ti ya'we tek'an ja ya'tele'i. Ch'ak tukb'esjuk yi'e ja sk'umale yuj ja Dyosi, b'a jach' mixa oj yabye sb'ej ja jas oj yal sb'aje'i. Ja'yuj ja chonab' jawi, a'ji sb'i'iluk Babel.#11:8-9 Ja Babeli: Wax yala b'a hebreo jom olomil.
Ja yintil jumasa ja Semi
10Ja b'i'ilal iti, ja yintil jumasa ja Semi:
Ja Semi, ay yi'oj jo' tajb'e jab'il (100) ja k'ak'u manxi ja yunin Arfaxadi. Ja iti, ek'to chab' jab'il ja k'ak'u b'ut' ya'lel ja lu'umi. 11Tsa'an cho ajyito tuk yuntikil kerem sok ak'ix ja k'ak'u manxi ja Arfaxadi, ja Semi, ajyito sak'anil jo'e syen jab'il (500).
12Ja Arfaxadi, ay yi'oj jun tajb'e sok jo' lajune jab'il (35) ja k'ak'u manxi ja yunin Selahi, 13cho ajyi tuk yuntikil kerem sok ak'ix. Tsa'an yuj ja manxi ja Selahi, ajyito sak'anil chane syen sok oxe jab'il (403) ja Arfaxadi.
14Ja Selahi, ay yi'oj jun tajb'e lajune jab'il (30) ja k'ak'u manxi ja yunin Eberi, 15cho ajyi tuk yuntikil kerem sok ak'ix. Tsa'an yuj ja manxi ja Eberi, ajyito sak'anil chane syen sok oxe jab'il (403) ja Selahi.
16Ja Eberi, ay yi'oj jun tajb'e sok chan lajune jab'il (34) ja k'ak'u manxi ja yunin Pelegi. 17Cho ajyi tuk yuntikil kerem sok ak'ix. Tsa'an yuj ja manxi ja Pelegi, ajyito sak'anil chane syen jun tajb'e sok lajune jab'il (430) ja Eberi.
18Ja Pelegi, ay yi'oj jun tajb'e sok lajune jab'il (30) ja k'ak'u manxi ja yunin Reuji, 19cho ajyi tuk yuntikil kerem sok ak'ix. Tsa'an yuj ja manxi ja Reuji, ajyito sak'anil chab' syen sok b'alune jab'il (209) ja Pelegi.
20Ja Reuji, ay yi'oj jun tajb'e sok lajchawe jab'il (32) ja k'ak'u manxi ja yunin Serugi, 21cho ajyi tuk yuntikil kerem sok ak'ix. Tsa'an yuj ja manxi ja Serugi, ajyito sak'anil chab' syen sok juke jab'il (207) ja Reuji.
22Ja Serugi, ay yi'oj jun tajb'e sok lajune jab'il (30) ja k'ak'u manxi ja yunin Nahori, 23cho ajyi tuk yuntikil kerem sok ak'ix. Tsa'an yuj ja manxi ja Nahori, ajyito sak'anil chab' syen jab'il (200) ja Serugi.
24Ja Nahori ay yi'oj jun tajb'e b'alune jab'il (29) ja k'ak'u manxi ja yunin Terahi. 25Cho ajyi tuk yuntikil kerem sok ak'ix. Tsa'an yuj ja k'ak'u manxi ja Terahi, ajyito sak'anil jun syen sok b'alun lajune jab'il (119) ja Nahori.
26Ja Terahi, ay yi'oj ox tajb'e lajune jab'il (70) ja k'ak'u manxi ja yuntikil jumasa iti, Abram, Nahor sok Haran.
Ja yintil jumasa ja Terahi
27Ja b'i'ilal iti, ja yintil jumasa ja Terahi:
Ja Teraji, ja state ja Abrami, ja Nahor sok ja Harani.
Ja Loti, ja stat ja Harani, 28Ja Harani, ti cham b'a Ur yuj ja caldeo jumasa, cho ja'ni b'a manxi. Ja k'ak'u chami, sak'anto ja stati.
29-30Ja Abrami, nupani sok jun ixuk sb'i'il Sarai, ja ixuk jawi, mix b'ob' yil sat untikanel.
Jaxa Nahori, nupani sok jun ixuk sb'i'il Milca, ja Milca ja stat ja Harani. Ja pilan yunin ja Harani sb'i'il Isca.
31El ja Terah b'a Ur yuj ja caldeo jumasa, ti waj b'a Canaan, jaxa yajni k'ot b'a Harani, ti'xa kan tiw sok ja yunin Abrami, sok ja yij Loti, sok ja yalib' Sarai. 32Ti cham tiw ja Terahi, ja k'ak'u chami ay yi'oj chab' syen sok jo'e jab'il (205).
अहिले सेलेक्ट गरिएको:
Genesis 11: YABD
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Sociedad Bíblica de México 2021