Juan 8
8
Meꞌtaquis p̂en
1Jesús mụcuꞌcheꞌ jịjcaij Orivocheꞌ. 2Nojno pamꞌ caꞌñibun Jenꞌsiꞌyaꞌ acaꞌ jijtuban, ñur tŝọ́tyete muntyiꞌ in. Jesús p̂utsquenꞌyi tiyacchuiꞌ jịꞌchiyacsi.
3Pạrej atsij fariseo in judyeyaꞌ jịꞌchiyacsity yụꞌtacdyeꞌ Jenꞌsiꞌ in, tuiꞌ in yiris p̂en, mọꞌ täjjeꞌsiꞌ in meꞌtacvaꞌjoiꞌsiꞌ sonꞌtum. Runꞌquenꞌjeꞌ yụꞌtyeꞌ in muntyisyaꞌ vej muꞌin. 4Jéte in muꞌ Jesús:
—Jịꞌchiyacsity, ọij p̂en täjjeꞌ tsun meꞌtacvaꞌjoiꞌ sonꞌtum. 5Mọꞌ yụꞌtacdyeꞌ yuꞌtyiyisinꞌsiꞌ jiquej muꞌ Moisés yiꞌ ijac raꞌ meꞌsis p̂en in, farajnac ca raꞌ mijyaꞌ in. ¿Jätäjyi mi u, tupuj buty meꞌjeyac ọij p̂en? —jéte in.
6Mọꞌ dyijyedyeꞌ muꞌin mạꞌjeꞌ jịꞌĉojte in muꞌ Jesús, quevbite p̂eyacdyeꞌ in areꞌ raꞌ cäjsis jiꞌshupqueꞌ p̂eyacdyeꞌ, paj qui tupuj jiꞌmeꞌte ayoꞌyaꞌ in. Muꞌ na vụduiꞌyi mọmoꞌ sánaqui c̣hirijriyamꞌ jaccheꞌ. 7Yejĉoij jéte in, chijämꞌ quichyeban jéyacsi qui:
—Tyi chuc itŝity jụijyaꞌ juchaj, paj muꞌ tashcheꞌ farajtyeꞌ mijyaꞌ ọij p̂en —jéyacsi Jesús.
8Cuvij muꞌ vụduiꞌyi Jesús sánaĉan jaccheꞌ. 9Aty yi seꞌveteyaꞌ in cäts qui yirityityij jọban in, tashan ishoꞌyaijtyiꞌ jọban in. Meꞌĉandye räꞌeban in, mọꞌdyety p̂en tacyaꞌ runꞌquenꞌjetaque in yirisdyety. 10Quichyeban muꞌ cuvij Jesús, jeꞌ mọꞌ p̂en:
—¿Junaꞌ jịjcaban u in muꞌin jiꞌmeꞌtyintyiꞌ yụ́yaꞌ in? ¿Jam caꞌ yirity soꞌmin vaꞌtacdyeꞌ in? —jeꞌ Jesús.
11Vorjete mọꞌ p̂en:
—Jam yirity, Jịꞌchiyacsity.
Vorjeꞌ Jesús:
—Yụ chimeꞌ jam raꞌ soꞌmeye vaꞌtacdyedyes, tạij mi jam raꞌ cuvij täjbanꞌ juchaj mi —jeꞌ.
Jesús mạijchucsity jacchety muntyiꞌ in
12Jesús quivij jịꞌchiyacsi muntyiꞌ in, jéyacsi:
—Yụ nash mạijchucsity jacchety muntyiꞌ in, tyi chuc cäc̣häꞌchuntyiꞌ yụ in, muꞌin raꞌ jam tojmadyeꞌĉan bäꞌyi in, muꞌin raꞌ meꞌchuiꞌ in tsạꞌchucsis mạijyis —jéyacsi.
13Fariseo jéte in:
—Mi nash ĉụiꞌ mọmoꞌ yi p̂iijti tyi chuc mi, jam méquiꞌ yaꞌiꞌ mọꞌ p̂eyacdyeꞌ mi —jéte in.
14Vorjeyacsi Jesús:
—Jam nash meꞌ, meꞌ tsanꞌ ĉụiꞌ jịꞌchicaqui yụ, yaꞌiꞌ qui namꞌ p̂eyacdyeꞌ yụ, ĉaĉaij na yụ chịj junatyiꞌ chuc atsij yụ, judyeyaꞌ chịj chimeꞌdye yụ junaꞌ chuc raꞌ jịjcaij yụ. Miꞌin na jam junꞌ chịj junaty chuc yụ jijtuij mijam chimeꞌ chịj miꞌin junaꞌ chuc raꞌ yụ jịjcaij. 15Miꞌin na vaꞌve dyijtutiĉaꞌ yụ miꞌin, mạꞌjeꞌ vaꞌtacdyeꞌ soꞌmitiĉaꞌ yụ miꞌin ĉaĉaij na jam chäyitiĉaꞌ yụ miꞌin, junaty chuc yụ jijtuij. Yụ na jam q̂uinꞌ meꞌ vaꞌtacdyeꞌ soꞌmacsi muntyiꞌ in. 16Yụ qui namꞌ vaꞌtacdyeꞌ soꞌmacsiyaꞌ, rụijsisyaꞌ dyijyedyeꞌ soꞌmacsi yụ, ĉaĉaij na jam yụ mọmoꞌ soꞌmacsi, muꞌ Jenꞌ jutintyiꞌ yụ, muꞌ ñútyin yụ. 17Mọꞌ yụꞌtacdyeꞌ cạtiñes miꞌin yiꞌ: päräꞌ p̂eyaqui jịꞌchicaqui jụijyaꞌ in, vaj yiꞌdye in, mọꞌ p̂eyacdyeꞌ yaꞌiꞌ muꞌin, yiꞌ yụꞌtacdyeꞌ. 18Meꞌdye yụ́siꞌ chimeꞌ yaꞌiꞌ p̂eyacdyeꞌ ĉaĉaij na tsun päräꞌ chimeꞌ. Yụ ĉụiꞌ jịꞌchicaqui tyi chuc yụ, judyeyaꞌ Jenꞌ yụ chimeꞌ muꞌ jutintyiꞌ yụ, muꞌ chimeꞌ jịꞌchicaqui, meꞌ meꞌ qui mọꞌ yaꞌiꞌ p̂eyacdyeꞌ —jéyacsi Jesús.
19Chat qui jéte in:
—¿Junaꞌ Jenꞌ um?
Vorjeyacsi Jesús:
—Mijam chäyitiĉaꞌ yụ miꞌin tyi buty yụ, chidyemꞌ Jenꞌ u yụ maꞌyity jam chäyibutiĉaꞌ u miꞌin. Chäyitiĉaꞌ jụijyaꞌ yụ miꞌin, a vuty chimeꞌ chäyibutiĉaꞌ Jenꞌ yụty u miꞌin —jéyacsi Jesús.
20Muꞌĉan muꞌ Jesús jịꞌchiyacsi Jenꞌsiꞌĉan acaꞌ muꞌ, yóĉandyemꞌ yụꞌtacĉan querec̣ha u. Meꞌ tsanꞌ meꞌ jéyacsi Jesús, jam qui namꞌ ĉärꞌte in ĉaĉaij na jambiꞌ ayij tupudyeꞌ muꞌ.
Jesús jéyacsi: "Jam raꞌ junꞌ dacdyiĉaꞌ yụ miꞌin"
21Jesús quivij jéyacsi:
—Yụ raꞌ jọban, miꞌin qui na ramꞌ tsanꞌ quivjudyiĉaꞌ yụ miꞌin, jam qui na ramꞌ junꞌ daĉudyiĉaꞌ yụ miꞌin, ĉaĉaij na raꞌ juchajtum säñi miꞌin, mọꞌdyes qui raꞌ jam junꞌ chaꞌshitiĉaꞌ yụ miꞌin, yócheꞌdyemꞌ raꞌ jịjcabancheꞌ yụ u —jéyacsi Jesús.
22Judío yi jítidyeij in:
—¿Jätäjyiꞌ p̂eyacdyeꞌ umꞌ? Areꞌ raꞌ ijati ĉụiꞌ, yoj yi na muꞌ: "Mijam raꞌ junꞌ chaꞌshitiĉaꞌ yụ miꞌin, yócheꞌdyemꞌ raꞌ jịjcabancheꞌ yụ u", yi muꞌ —yi jítidyeij in.
23Vorjeyacsi Jesús:
—Miꞌin úchety mọmoꞌ muntyiꞌ miꞌin, yụ qui namꞌ mạyedyeꞌchety, miꞌin jacchety muntyiꞌ, yụ jam jacchety muntyiꞌ. 24Meꞌ meꞌ qui yụ meꞌ jéyac yi: "Miꞌin raꞌ juchajtum säñi." Anicdye raꞌ meꞌ, jam anicjibutiĉaꞌ yụs p̂eyacdyeꞌ jụijyaꞌ miꞌin, mọꞌ yiꞌ tyi buty yụ,#8:24 Griegosĉan p̂eyacdyeꞌ ọij yiꞌ YỤ́DYE NASH YỤ, yiꞌ Exodo 3:14. Meꞌ muꞌ Jesús jịꞌchiqueyacsi anictyity Jenꞌ muꞌ. meꞌ raꞌ juchajtum säñi miꞌin —jéyacsi.
25Chat qui jéte in:
—¿Tyi ĉaĉaij mi u?
Vorjeyacsi Jesús:
—Jam mụiꞌ jéyac jiquej. 26Tupuj tsanꞌ daiꞌ jéyac junꞌ chuc miꞌin, tupuj jéyac junꞌ chuc raꞌ vaꞌtacdyeꞌ soꞌmeyac. Mọꞌ qui namꞌ jiꞌchäyitidyeꞌ jịꞌchiyacsis yụ, mọꞌ soꞌminsiꞌ yụ muꞌ jutintyiꞌ yụ, muꞌ nash anic rụijtyity —jéyacsi Jesús.
27Muꞌin na jam chiquete in p̂eyeyacsiyaꞌ p̂eijte Jenꞌ muꞌ. 28Quivij p̂eyaqui Jesús jéyacsi:
—Aty raꞌ yuꞌtiĉaꞌyaꞌ soncheꞌ miꞌin, yụ Anictyity Muntyiꞌ yụ, chat q̂uinꞌdyemꞌ raꞌ chäyitiĉaꞌ yụ miꞌin tyi buty yụ. Jam ĉụiꞌsiꞌ dyijyedyeꞌ meꞌchuiꞌ yụ, mọꞌ mọmoꞌ jịꞌchiyacsiij yódyesdyemꞌ soꞌminsiꞌ Jenꞌ u yụ, mọꞌ jéyacsi yụ junꞌ chuc Jenꞌ jin yụ. 29Muꞌ jutintyiꞌ yụ yejĉoij penꞌdyetun yụ, mijam méquiꞌ farajjin yụ Jenꞌ yụ, räjĉan chiquete yụ maꞌjotyibun qui dyijyedyeꞌ yụ —jéyacsi Jesús.
30Seꞌveptemꞌ p̂eyacdyeꞌ in, daiꞌ vatyquej anicyi muꞌcheꞌ in.
Muꞌin Jenꞌtyiꞌ ạvaꞌ in judyeyaꞌ muꞌin ayotuiꞌtyiꞌ juchaj in
31Jesús jéyacsi muꞌin judío in anicjetety in:
—Chäquibutiĉamꞌ jụijyaꞌ yụs p̂eyacdyeꞌ miꞌin, meꞌ raꞌ chat anictyity cäc̣häꞌchutiĉaty yụ shupqui miꞌin, 32judyeyaꞌ raꞌ chị́yetiñeꞌ anicsis p̂eyacdyeꞌ mọꞌ raꞌ jiꞌc̣honnac miꞌin meꞌchunacsiꞌyaꞌ q̂uinꞌ —jéyacsi Jesús.
33Vorjete in:
—Tsun vóshiꞌ muꞌ Abrahamvuntyiꞌ, jam tsun junꞌdyeyaꞌ úñity buꞌyi. ¿Junꞌ dash mi yi "c̣hoñi raꞌ miꞌin" jítiĉaꞌ tsun miꞌin? —jéte in.
34Vorjeyacsi Jesús:
—Yụ jéyac: tyi chuc juchaijtyiꞌ in, muꞌin nash úñity juchaty in. 35Muꞌin úñity in jam taĉan buꞌyi ayosĉan acaꞌ in, ĉaĉaij na muꞌin jam ạvaꞌ muꞌ. Muꞌ na ạvaꞌ muꞌ taĉan raꞌ räjĉan. 36Muꞌ Jenꞌtyiꞌ Ạvaꞌ muꞌ jiꞌc̣honnac jụijyaꞌ miꞌin, anic raꞌ c̣hoñi miꞌin, ạvaꞌ raꞌ yụꞌtac miꞌin. 37Chị́yeyac miꞌin, miꞌin nash vóshiꞌ Abrahamvuntyiꞌ muꞌ. Meꞌ tsanꞌ meꞌ, miꞌin qui namꞌ dyijyi mạꞌjeꞌ ijatiĉaꞌ yụ miꞌin, ĉaĉaij na jam junꞌ mạꞌjetiñeꞌ jụjjibutiĉaꞌ jiꞌchäyitidyeꞌ yụs miꞌin. 38Mọꞌ mọmoꞌ jịꞌchiyacsi yụ mọꞌ soꞌminsiꞌ Jenꞌ yụ. Meꞌdye miꞌin chimeꞌ chiquetinte ĉụiꞌtyiꞌ jenꞌ buꞌyity miꞌin —jéyacsi Jesús.
39Vorjete in:
—Tsun nash vóshiꞌ muꞌ Abrahamvuntyiꞌ, muꞌ nash jenꞌ buꞌyi tsun —jéte in.
Vorjeyacsi Jesús:
—Jam nash meꞌ miꞌin, Abrahamtyiꞌ ạvaꞌ jụijyaꞌ miꞌin, a vuty cäc̣häꞌchubibajtinte u dyijyedyeꞌvun muꞌ jiquej. 40Miꞌin na, meꞌ tsanꞌ jéyac rụijsis jiꞌchäyitidyeꞌ soꞌminsiꞌ yụ muꞌ Jenꞌ, miꞌin qui namꞌ dyijyi mạꞌjeꞌ ijatiĉaꞌ yụ miꞌin. Muꞌ na Abraham jiquej jam muꞌ meꞌ jämꞌtaqui. 41Miꞌin na cäc̣häꞌchuqui dyijyedyeꞌ jenꞌ buꞌyitysiꞌ miꞌin junꞌ chuc dyijyedyeꞌ muꞌsiꞌ —jéyacsi Jesús.
Judío jéte in:
—Tsun jam muñejĉantyiꞌ naꞌi, yirity mọmoꞌ jenꞌ tsun, muꞌ mạyedyeꞌchety —jéte in.
42Vorjeyacsi Jesús:
—Anictyity Jenꞌtyiꞌ ạvaꞌ jụijyaꞌ miꞌin, a vuty yụ mạꞌjitiĉaꞌ u miꞌin, ĉaĉaij na yụ Jenꞌyaty atsij, q̂uinꞌ aty úcheꞌ yụ. Yụ jam ĉụiꞌsiꞌyaꞌ dyijyedyeꞌ atsij yụ, Jenꞌ jutin yụ. 43¿Junꞌ dash meꞌ jam chäquibutiĉaꞌ yụs p̂eyacdyeꞌ miꞌin jätäjyiꞌ chuc mọꞌ? Yụ raꞌ jéyac junꞌ buty meꞌ miꞌin, ĉaĉaij na jam mạꞌjeꞌ seꞌvibutiĉaꞌ yụs p̂eyacdyeꞌ miꞌin, mọꞌ tuiꞌsiꞌ yụ. 44Sọyoty ayoꞌ, muꞌ Satanás, muꞌ nash jenꞌ miꞌin, meꞌ meꞌ qui meꞌ Satanássiꞌ dyijyedyeꞌ meꞌchubitinte miꞌin, junꞌ chuc muꞌ mạꞌjeꞌ meꞌ jämꞌtaqui miꞌin. Muꞌ yacchutidyeꞌ jiquej tạꞌcatydye ujacsity, judyeyaꞌ väväjñity chimeꞌ, fạ́quety rụijsis p̂eyacdyeꞌ. Mọꞌ mọmoꞌ meꞌchuiꞌ räjĉan väñädyeꞌ ĉaĉaij na mọꞌ mọmoꞌ ĉojtyiꞌĉan muꞌ. Mumꞌ jiꞌshupquety väñädyeꞌ ĉaĉaij na meꞌtyitydye. Tyi chuc väñäijtyiꞌ in, muꞌin ạvaꞌ muꞌ, 45meꞌdyes miꞌin jam junꞌ anicjibutiĉaꞌ p̂eyacdyeꞌ yụs miꞌin, meꞌ tsanꞌ rụijsis jiꞌshupqueyeyac p̂eyacdyeꞌ yụ, miꞌin qui namꞌ jam anicyi yụ́cheꞌ miꞌin. 46¿Tyi buty chäyibun juchaj yụ? Mijam yirity, ĉaĉaij na itŝiꞌ juchaj yụ. Rụijsis tsanꞌ p̂eyacdyeꞌ jiꞌshupqueyeyac yụ, uts na jam méquiꞌ seꞌvibutiĉaꞌ miꞌin. 47Tyi chuc Jenꞌtyiꞌ in muꞌin seꞌvepte p̂eyacdyeꞌ in. Miꞌin jam Jenꞌtyiꞌ miꞌin, mọꞌdyes jam junꞌ mạꞌjeꞌ seꞌvaqui miꞌin —jéyacsi Jesús muꞌin judío in.
Jambiꞌ naꞌi Abrahamvun aty tạꞌcaty muꞌ muꞌyaꞌ Jesús
48Judío jéte Jesús in:
—Anic rụij yi tsun jiꞌjäcyac mi yi tsun: mi jeñej buꞌyi Samariaĉantyiꞌ muntyiꞌ, sọyoꞌtumtyiꞌ mi —jéte in.
49Vorjeyacsi Jesús:
—Jam nash yụ sọyoꞌtumtyiꞌ muntyiꞌ. Yụ nash irijyity Jenꞌcheꞌ, miꞌin chat fáquitiĉaꞌ yụ miꞌin. 50Yụ jam jemoñeꞌ timaꞌcacdyeꞌ muntyis muꞌin. Jenꞌ na mạꞌjeꞌ paj qui yụ timaꞌcac, muꞌ raꞌ vaꞌtacdyeꞌ soꞌmacsi tyi chuc jam irijyity yụ́cheꞌ in. 51Yụ jéyac: tyi chuc chäquibun p̂eyacdyeꞌ jụijyaꞌ yụ in, muꞌin raꞌ jam cạveꞌ sänꞌdyeꞌ in —jéyacsi Jesús muꞌin judío in.
52Vorjete judío in:
—Q̂uinꞌ chat anic jorojĉan mi sọyoꞌtumtyiꞌ muntyiꞌ, ọij p̂eyacdyeꞌ mi jorojĉanjin tsun. Yoj na ĉaĉaij säñi Abrahamvun räjtumdye jasoꞌmitity p̂eyacdyeꞌ Jenꞌ jiquej in. Uts na meꞌ yi jítiĉaꞌ tsun miꞌin: "Tyi chuc chäquibuntyiꞌ p̂eyacdyeꞌ yụ in, muꞌin raꞌ jam cạveꞌ sänꞌdyeꞌ in", yi mi. 53¿Fer buꞌyi buty ĉúti mi, uyaꞌyaꞌ muꞌ Abrahamvun vóshiꞌvun tsun jiquej? Yoj na ĉaĉaij muꞌ säñi Abrahamvun, chisäñidye muꞌin in räj jasoꞌmitity p̂eyacdyeꞌ Jenꞌ in. ¿Tyi buty ĉúti mi? —jéte in.
54Vorjeyacsi Jesús:
—Timaꞌquiti ĉụiꞌ jụijyaꞌ yụ, a vuty fibiꞌ shupquiꞌ timaꞌcacdyeꞌ u yụ. Jam meꞌ, Jenꞌ timaꞌquin yụ, muꞌ jiꞌjäctintety miꞌin yíyaꞌ miꞌin: "Muꞌ nash Jenꞌ tsun", yi miꞌin. 55Meꞌ tsanꞌ meꞌ jétinte miꞌin, jam qui namꞌ chị́yetinte miꞌin, yụ na jämꞌ chị́yete. Yi yụ jéyac jụijyaꞌ "Yụ jam chị́yete", a vuty väväjñity shupqui u yụ, yojdyemꞌ miꞌin u. Yụ na chị́yete muꞌ judyeyaꞌ chiquepte yụ p̂eyacdyeꞌ muꞌ. 56Abrahamvun vóshiꞌvun miꞌin anic där maꞌjoij ĉaĉaij na cavibun raꞌ tupudyeꞌ yụ, junꞌ chuc raꞌ atsij yụ, aty muꞌ cạveꞌ, mọꞌ där maꞌjoij muꞌ —jéyacsi muꞌ Jesús.
57Jéte judío in:
—Mijambiꞌ ĉanamꞌ quiꞌtac yómodyeꞌ tyiti mi, uts na yi mi: "Yụ cạvete Abrahamvun jiquej" —jéte in.
58Vorjeyacsi Jesús:
—Yụ anic jéyac, itŝijdyemꞌ jiquej muꞌ Abrahamvun, aty yụ tạꞌcaty muꞌyaꞌ#8:58 Ọij yiꞌ YỤ́DYE NASH YỤ, yoj yiꞌdyemꞌ Exodo 3:14, meꞌdye yiꞌ chimeꞌ Juan 8:24. Meꞌ muꞌ Jesús jịꞌchiqueyacsi anictyity Jenꞌ muꞌ. —jéyacsi muꞌ Jesús.
59Muꞌyatydye tapjete mij in, mạꞌjeꞌ tsanꞌ farajñete mijyaꞌ Jesús in. Caminve muꞌ shupqui Jenꞌsiꞌĉantyiꞌ acaꞌ muꞌ, jọban qui muꞌ.
अहिले सेलेक्ट गरिएको:
Juan 8: CAS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright 2017 Nuevo Testamento en Chimane
Jen'si' P̂eyacdye'