Lucas 12
12
Muꞌin ac̣hiꞌ dyijyity in jämꞌ yuꞌti tsanꞌ in
(Mat 10:26-27)
1Chat qui meꞌsiꞌ yejĉoij shach tyeij muntyiꞌ in, quec̣heꞌ tyeij in junꞌtum raꞌ muꞌyaꞌ in, vaj meij yútyitidyeij in. Jesús jéyaqui jịꞌchiyactyiꞌ muꞌ:
—Areꞌĉa jam raꞌ meꞌchucsebi miꞌin mọꞌ jiꞌdujraquis fariseos muꞌin, mọꞌ cạiꞌ junꞌ chuc muꞌin meꞌ tsanꞌ ac̣hiꞌ dyijyity in, jämꞌ tsanꞌ yuꞌti in. 2Jeshaꞌ mọꞌ jujmus q̂uinꞌ in jäquiꞌve raꞌ räj jorojĉanyiꞌ in, räj jijmuꞌsacsiꞌ q̂uinꞌ in jäquiꞌve raꞌ räj chị́yac in. 3Jätäjyi chuc tojmadyeꞌĉan p̂eyaqui miꞌin, jäquiꞌve raꞌ mạijĉan seꞌvac, judyeyaꞌ jedyeꞌ chuc jumves tsanꞌ p̂eyaqui acaꞌĉan miꞌin, meꞌ tsanꞌ ĉärꞌ chụiꞌdyeꞌ miꞌin, mọꞌ raꞌ muntyisyaꞌ vej seꞌvac jäquiꞌve —meꞌ jéyaqui jịꞌchiyactyiꞌ muꞌ.
Tyi buty raꞌ quijñeja tsun
(Mat 10:28-31)
4Yụ jéyac chätidyeꞌ, jam raꞌ quijnacsi miꞌin muꞌin c̣hojvinactyiꞌ miꞌin, muꞌin raꞌ ijabunacyaꞌ aꞌ in aty raꞌ jam jedyeꞌ jíbunac in. 5Yụ jéyac q̂uinꞌ tyi bu raꞌ quijñetinte miꞌin, muꞌ ramꞌ quijñetinte miꞌin Jenꞌ, ĉaĉaij na muꞌ ramꞌ jam ijacsi mọmoꞌ, chimeꞌ muꞌ vaꞌcacsequity tŝijĉan, muꞌ raꞌ quijñetinte miꞌin.
6Jeshaꞌ, miquiꞌmunsiꞌ jaijtyiꞌ in jam yaꞌiꞌ in, ĉanamꞌ jaijtyiꞌ päräꞌ ficha jịjcaiꞌ in meꞌ yaꞌiꞌ mọꞌ. Muꞌ qui namꞌ Jenꞌ jam yiris jaijtyiꞌ yaquintuiꞌ. 7Mọꞌdyes jam raꞌ noiꞌyi miꞌin, dadamꞌ muꞌ mujuꞌchaꞌ ạ̈räjjinac miꞌin, jam jeñej jaijtyiꞌ in, ọyaꞌyaꞌ maꞌjotacsi. Jämꞌ dyijtunac, paj tsanꞌ fin miꞌin joꞌnoꞌches, muꞌ räj chäyibunac juñucsiꞌ chuc mọꞌyaꞌ fin miꞌin.
Muꞌin jam ticametety Jesús in muntyisyaꞌ vej muꞌin
(Mat 10:32-33; 12:32; 10:19-20)
8Yụ Anictyity Muntyiꞌ yụ jéyac miꞌin, tyi chuc jịꞌchicaqui yụ́dyes in muntyisyaꞌ vej muꞌin, yi in, "Yụ nash Jesucristoty", meꞌdye raꞌ yụ chimeꞌ jịꞌchicaqui muꞌindyes in anjersiꞌyaꞌ vej muꞌin Jenꞌtyiꞌ. 9Tyi chuc jam jịꞌchicaqui yụ́dyes in muntyisyaꞌ vej muꞌin, yity in: "Yụ jam Jesucristoty," chiyedye raꞌ yụ chimeꞌ jam jịꞌchicaqui yụ anjersiꞌyaꞌ vej muꞌin Jenꞌtyiꞌyaꞌ in.
10Tyi chuc ac̣hiꞌ p̂iyin yụ in yụ Anictyity Muntyiꞌ yụ, Jenꞌ tupuj vayacjeyacsebi juchaj muꞌin, muꞌin na ac̣hiꞌ p̂eijbitety in Jenꞌsiꞌ Ạꞌedyeꞌ muꞌ, Jenꞌ raꞌ jam tupuj vayacjeyacsebi juchaj muꞌin.
11A na raꞌ jiꞌmeꞌtyinacyaꞌ ayoꞌyaꞌ jụijyaꞌ in, meꞌ tsanꞌ vajmuꞌyadyeꞌĉantyiꞌyaꞌ ayoꞌ in, meꞌ tsanꞌ bäꞌyedyeꞌĉantyiꞌyaꞌ ayoꞌ, jam raꞌ cajotyiti miꞌin junꞌ chuc raꞌ ñutsjiti p̂eyacdyeꞌyaꞌ miꞌin, 12ĉaĉaij na Jenꞌsiꞌ Ạꞌedyemꞌ mọꞌ raꞌ ñútyinac chimeꞌ raꞌ mọꞌdye soꞌminac p̂eyacdyeꞌ miꞌindyes.
Anic itŝity dyijyedyeꞌ muꞌ jedyeꞌtumtyiꞌ muntyiꞌ
13Yirity muntyiꞌ daiꞌtyiꞌĉantyiꞌ in voryi jéte muꞌ Jesús:
—Jịꞌchiyacsity, yụ jéye, jíbutiꞌ ram vojity yụ paj qui muꞌ jiꞌchetiyin yụ jenꞌvunsiꞌ jedyeꞌ tsun.
14Vorjete Jesús:
—Jam nash yụ yụꞌtac paj qui yụ jịꞌcäts yụꞌtyeyac jacchesyaꞌ jedyeꞌ, mijam jiꞌchetety joꞌmes yụ.
15Chimeꞌdye Jesús jéyacsi muntyiꞌ in:
—Jam raꞌ fer mạꞌjetiñeꞌ jacches jedyeꞌ miꞌin. Mọꞌ jacches jedyeꞌ meꞌ tsanꞌ daiꞌ meꞌchutiñeꞌ miꞌin, jam qui namꞌ mọꞌ maꞌjodyeꞌ soꞌminac miꞌin.
16Chat qui muꞌ Jesús yụꞌtyeyacsi jịꞌĉocdyes p̂eyacdyeꞌ, jéyacsi:
—Muꞌyaꞌ jiquej yirity muntyiꞌ jedyeꞌtumtyiꞌ, anic daiꞌ shupquiꞌ cätidyeꞌ vädacdyeꞌ muꞌ. 17Chat qui dyijyi muꞌ muntyiꞌ ĉojtyiꞌĉan muꞌ yi: "¿Junꞌ bu raꞌ q̂uinꞌ yụ? Jam tyuꞌ raꞌ junaꞌ jämꞌjeyaqui yụ ọij därsiꞌ vädacdyeꞌ yụ. 18Meꞌ ĉa yụ, yụ raꞌ vanaijjeyacseban acaꞌ yụ jämꞌ yụꞌtacdyes yụ, dadamꞌ qui raꞌ utuꞌmun jämꞌ yụꞌtacseban yụ, paj qui tupujyiꞌ vädacdyeꞌ yụ judyeyaꞌ yocsiꞌ jedyeꞌ yụ chimeꞌ. 19Chat qui raꞌ yụ ĉụiꞌ jíti: Atyuꞌ u jam jayej jedyeꞌ meꞌchuiꞌ yụ aty jämꞌ yụꞌtac yụ. Aty jam yiris raꞌ jedyeꞌ jayejjotaqui yụ. Daiꞌ raꞌ yómodyeꞌ yäjquiꞌ jedyeꞌ yụ. Tupuj ĉụiꞌ mọmoꞌ jịꞌjutyitiij, säcsi qui ramꞌ jịjcaij yụ, maꞌjoij qui raꞌ bäꞌyi yụ", yi muꞌ muntyiꞌ. 20Muꞌ na Jenꞌ jam meꞌ yi, jajiti: "Anic mis itŝiꞌ dyijyedyeꞌ, q̂uinꞌ raꞌ ọij yómos säñi mi. Jadyic raꞌ maꞌjotaqui daiꞌsiꞌ jedyeꞌ mi, yoctyiꞌ qui raꞌ maꞌjotyibun in", jajiti Jenꞌ. 21Meꞌdye raꞌ chimeꞌ tyi chuc dụriꞌñety jedyeꞌ ĉụiꞌdyes in, meꞌ tsanꞌ meꞌ ñịbeꞌ qui namꞌ Jenꞌsiꞌyaꞌ vej in —jéyacsi Jesús.
Jenꞌ ĉọjcacsi ạvaꞌ muꞌ
(Mat 6:25-34)
22Jesús jéyacsi jịꞌchiyactyiꞌ muꞌ:
—Jam raꞌ cajotyetiñeꞌ miꞌin jedyeꞌ chuc raꞌ jebetiñeꞌ tsạꞌ buꞌyedyes miꞌin, mijam raꞌ dyijtutinte quịꞌsiꞌ miꞌin jedyeꞌĉan chuc raꞌ cofjibun miꞌin. 23Jenꞌ mạꞌjeꞌ paj qui jam mọꞌ mọmoꞌ dyijtutiñeꞌ miꞌin säcsedyeꞌ judyeyaꞌ quịꞌsiꞌ, Jenꞌdyes mọjoꞌchaꞌ jemonac. 24Cạvacsejamꞌ jaijtyiꞌ in, jam junꞌ yiriꞌ cätiꞌ in mijam vädaĉan in, mijam jämꞌ yụꞌtaquiꞌ acaꞌĉan säcsedyeꞌ mọꞌin. Muꞌ qui namꞌ Jenꞌ mạyedyeꞌchety räjĉan jiꞌsäcsacsi. Dadamꞌ miꞌin mujuꞌchaꞌ muꞌ mạꞌjinac miꞌin, jam jeñej mọꞌin jaijtyiꞌ in. 25Chimeꞌdye miꞌin, meꞌ tsanꞌ fer dyijyiyaꞌ miꞌin, mijam qui namꞌ junꞌ ñutsjeyaqui sänꞌdyeꞌ miꞌin, paj tsanꞌ yiris hora tsạꞌ buꞌyetaquiyaꞌ miꞌin. 26Anicdye meꞌ, miꞌin jam tupuj jämꞌ yụꞌbajtiñeꞌ jam carijsis jedyeꞌ, mọꞌdyes jam raꞌ cajotyetiñeꞌ yocsiꞌ jedyeꞌ in.
27Jam raꞌ cajotyetinte quịꞌsiꞌ miꞌin. Jeshaꞌ mọꞌ däräꞌ jámetumsiꞌ in, meꞌ tsanꞌ jam carijtaquiꞌ in mijam p̂anaquiꞌ quịꞌsiꞌ in, mọꞌin qui namꞌ in anic mọjoꞌchaꞌ jäjämun quịꞌsiꞌ mọꞌin, mijam muꞌ meꞌ ayoꞌtyiꞌ quịꞌsiꞌ joꞌmety Salomóntyiꞌ jiquej. Meꞌ tsanꞌ mujuꞌchaꞌ jämꞌ yuꞌti yaꞌijtyiꞌĉan quịꞌsiꞌ, jam qui namꞌ yiris cätstyeꞌ, mọjoꞌchaꞌ mọꞌin jäjämun in. 28Muꞌ Jenꞌ meꞌ jịꞌquiiꞌ mọꞌ däräꞌ, jam men meꞌ buꞌyis, cavin jiꞌcoꞌshayac jornoĉan, dadamꞌ raꞌ miꞌin mujuꞌchaꞌ jämꞌ jiꞌquinac muꞌ Jenꞌ, meꞌ tsanꞌ damꞌ mọmoꞌ anicjetinte miꞌin, muꞌ qui namꞌ ĉujcanac miꞌin. 29Mọꞌdyes jam raꞌ cajotyiti miꞌin mijam raꞌ dyijtutiñeꞌ jedyeꞌ chuc raꞌ jebetiñeꞌ säcsedyeꞌ, 30ĉaĉaij na räj ọij jedyeꞌ in fer dyijtuiꞌ muꞌin jam anicjetety Jenꞌ in. Muꞌ na Ạvatunactyiꞌ miꞌin, muꞌ nash chäyinac jedyeꞌ chuc jemontiñeꞌ miꞌin. 31Miꞌin na dyijtumac Jenꞌ, muꞌsiꞌ dyijyedyeꞌ cäc̣häꞌchubimac, meꞌ raꞌ muꞌ ayoꞌbuꞌyi miꞌindyes, chat qui raꞌ soꞌmac miꞌin räj jedyeꞌ chuc jemontiñes ọ́cheꞌ jaccheꞌ.
Jämꞌ yuꞌtidyes mạyedyeꞌches
(Mat 6:19-21)
32Jam raꞌ noiꞌyi miꞌin yụs oveca miꞌin, meꞌ tsanꞌ jam daiꞌ miꞌin, ĉụiꞌsiꞌyaꞌ dyijyedyeꞌ muꞌ, muꞌ Jenꞌ aty rụij yuꞌtyinac paj qui muꞌyadyety miꞌin ayoꞌbuꞌyedyeꞌĉandyety raꞌ muꞌ. 33Mọꞌdyes jiꞌmincaqui raꞌ ĉụiꞌsiꞌ jedyeꞌ miꞌin, chat qui raꞌ querec̣ha ñịbeꞌjeyacsi miꞌin muꞌin jayejjotaquity jedyeꞌ in, dụriꞌñetiñeꞌ raꞌ mạyedyeꞌcheꞌ jedyeꞌ miꞌin. Mọꞌ mọꞌches jedyeꞌ räjĉan raꞌ meꞌ buꞌyiꞌ, mijam raꞌ junꞌ mọtsiꞌ, muꞌcheꞌ itŝij méquiꞌ shishiꞌaty in, mọꞌcheꞌ raꞌ jam tạbaiꞌ jedyeꞌ chimeꞌ. 34Tyi chuc jaccheꞌ dụriꞌñeꞌ jedyeꞌ in, mọꞌ mọmoꞌ muꞌin dyijtuvaꞌqueꞌ ĉojtyiꞌĉan muꞌin, muꞌin na mạyedyeꞌcheꞌ dụriꞌñeꞌtyiꞌ jedyeꞌ in, mọꞌ muꞌin dyijtuiꞌ in ĉojtyiꞌĉan muꞌin.
Dyij buꞌjamꞌ räjĉan atsijban nash raꞌ Jesucristo
35Jäꞌmiiꞌtyejamꞌ, cäbushamꞌ judyeyaꞌ raꞌ jäñäꞌ mạijyis miꞌin, meꞌ buꞌyi raꞌ bisvaꞌdyiĉaꞌ yụ miꞌin. 36Meꞌ raꞌ miꞌin jeñej buꞌyi úñity in bisajtety ayoꞌ muꞌin, ĉọ́quety vämedyes feshta. Aty venchubanyaꞌ muꞌ, fayebanyaꞌ chụiꞌdyeꞌyaꞌ, q̂uinꞌdyemꞌ ramꞌ vanacjeyebajte in. 37Jämꞌ där muꞌin úñity in dạcacseshanyaꞌ ayoꞌ muꞌin tsạꞌ buꞌvaꞌjoij in. Yụ jéyac anicsis p̂eyacdyeꞌ, muꞌ ayoꞌ muꞌin anic raꞌ jämꞌjeyacsi, muꞌ raꞌ jiꞌbäꞌyacsi raꞌ mesayaꞌ judyeyaꞌ raꞌ jiꞌsäcsacsi. 38Där jämꞌ muꞌindyes in dạcacseshan tsạꞌ buꞌyi in, paj tsanꞌ menyaꞌ venchubanyaꞌ, paj tsanꞌ nạijjoquiꞌve jụijyaꞌ. 39Cạvevac miꞌin, yirity muntyiꞌ chịj jụijyaꞌ junꞌ quiꞌ chuc raꞌ venchuij muꞌ shushuꞌaty acaꞌyaꞌ muꞌ, jam raꞌ junꞌ memꞌ cạvete paj qui javanchubuti acaꞌ muꞌ judyeyaꞌ jashuꞌatuti. 40Meꞌdye miꞌin chimeꞌ jam chịj miꞌin, yụ raꞌ junꞌsiꞌ raꞌ ĉụiꞌ mọmoꞌ atsijban yụ Anictyity Muntyiꞌ yụ, mọꞌdyes raꞌ jäꞌmiiꞌtyi miꞌin. Junꞌsiꞌ raꞌ ĉụiꞌ mọmoꞌ atsijban yụ, aty jam dyijtubunyaꞌ yụ in, q̂uinꞌdyemꞌ raꞌ atsijban yụ.
Rụijtyity úñity judyeyaꞌ ac̣hiꞌyity
(Mat 24:45-51)
41Pedro yi jéte Jesús:
—Jịꞌchiyacsity, ¿tyídyes buty ọij p̂eyacdyeꞌ q̂uinꞌ? ¿Areꞌ räjtumdyes in, areꞌ tsundyes mọmoꞌ?
42Jesús voryi:
—Tyi chuc dyijyedyeꞌtumtyiꞌ úñity chiquetety ayoꞌ muꞌ, muꞌdyes raꞌ ọij p̂eyacdyeꞌ. Muꞌ ayoꞌ muꞌ jayuꞌtity paj qui ĉọjcapte acaꞌ muꞌ paj qui muꞌ räjĉan mạyedyeꞌ soꞌmacsi säcsedyeꞌ yoctyiꞌ úñity in. 43Muꞌ ayoꞌ muꞌ aty caꞌñibunyaꞌ där muꞌ maꞌjoban úñity muꞌ jadaquishun jụijyaꞌ ayoꞌ muꞌ yejĉoij chiquepte p̂eyacdyeꞌ muꞌ. 44Meꞌ jụijyaꞌ muꞌ, muꞌ ayoꞌ mujuꞌchaꞌ qui raꞌ jayuꞌti paj qui räj jedyeꞌ ĉọjcapte. 45Jam na meꞌ jụijyaꞌ muꞌ úñity, yocve dyijyi jụijyaꞌ muꞌ, yi jụijyaꞌ muꞌ: "Jambiꞌ raꞌ atsijban ayoꞌ tsun." Tiyacchuiꞌ yoctyiꞌ jịꞌñibeꞌcacsi úñity muꞌ judyeyaꞌ úñis muꞌ judyeyaꞌ säcsedyeꞌyaꞌ yíyaꞌ judyeyaꞌ tyédyeꞌyaꞌ yíyaꞌ chimeꞌ shuꞌquevaꞌjoij. 46Yódyesdyemꞌ mạyedyeꞌ jam bisajte u mijam chịj, mọꞌ raꞌ mạyedyeꞌ venchuban vátyequej raꞌ c̣honꞌyeban, fersiꞌ raꞌ vaꞌtacdyeꞌ jasoꞌmiti, muꞌĉan raꞌ vaꞌcac yóĉandyemꞌ vaꞌcac u in muꞌin jam anicjetety Jenꞌ in.
47Yirity úñity meꞌ tsanꞌ chị́yeptety jụijyaꞌ p̂eyacdyeꞌ ayos jụijyaꞌ muꞌ, jedyeꞌveij chuc muꞌ, jam qui namꞌ chiquepte p̂eyacdyeꞌ jụijyaꞌ, anic raꞌ fersiꞌ vaꞌtacdyeꞌ soꞌmac muꞌ. 48Muꞌ na úñity jam chị́yeptety jụijyaꞌ p̂eyacdyeꞌ ayos muꞌ, meꞌ tsanꞌ mọꞌyaꞌ vaꞌtacdyedyes juchaj jụijyaꞌ muꞌ, soꞌmac raꞌ vaꞌtacdyeꞌ damꞌ qui na mọmoꞌ. Tyi chuc soꞌmactyiꞌ Jenꞌyaꞌ jụijyaꞌ in paj qui daiꞌ chị́yeꞌ jedyeꞌ in, jemoñeꞌ paj qui muꞌin fer carijtaqui Jenꞌdyes in. Tyi chuc dadamꞌ fer soꞌmac Jenꞌyaꞌ jụijyaꞌ in, muꞌin dadamꞌ chị́yeꞌtyiꞌ in, jemoñeꞌ paj qui muꞌin dadamꞌ mujuꞌchaꞌ carijtaqui Jenꞌdyes in.
Jam cäts dyijyi Jesúscheꞌ muntyiꞌ in
(Mat 10:34-36)
49Yụ úcheꞌ atsij jaccheꞌ tsäquiꞌsis tuiꞌ yụ, jeñej tŝij jiꞌjäꞌñes yụ, faraj vuꞌ caꞌ meꞌĉandye coꞌshaiꞌ. 50Därsiꞌ raꞌ ñịbedyes jịꞌĉojtyeꞌ yụ, aty fer dyijtuti atsvun yụ junꞌ quiꞌ chuc raꞌ cạ̈tsiꞌ. 51Meꞌ buty ĉútiĉaꞌ yụ miꞌin yụ atsij úcheꞌ jaccheꞌ paj qui jämꞌjitive jacchety muntyiꞌ in, meꞌ buty ĉútiĉaꞌ yụ miꞌin. Jam, jam meꞌdyes atsij yụ. Yụ nash atsij jam jämꞌjititydyety muntyiꞌ in. 52Yụ́dyes raꞌ pạrej muntyiꞌ in jam raꞌ jämꞌjiti in ĉụiꞌtyiꞌtum chätidyeꞌ muꞌin, chibinyity raꞌ chätidyeꞌ in fáquiti raꞌ in päräꞌyirtytum in. 53Pạrej raꞌ muntyiꞌ in jam raꞌ jämꞌjiti ĉụiꞌtyiꞌtum ạvaꞌ in, ạvaꞌ raꞌ chimeꞌ muꞌin jam raꞌ jämꞌjiti ĉụiꞌtyiꞌtum jenꞌ muꞌin. Meꞌdye raꞌ chimeꞌ p̂en in, pạrej raꞌ jam jämꞌjitiꞌ ạvaꞌtum in, pạrej raꞌ mọꞌin ạvaꞌ mọꞌin jam jämꞌjitiꞌ tseꞌtum in. Pạrej raꞌ p̂en in jam jämꞌjitiꞌ jäiꞌtum in, judyeyaꞌ raꞌ mọꞌin jäiꞌ mọꞌin chimeꞌ jam jämꞌjitiꞌ yayaꞌdyeꞌtum mọꞌin.
Jịꞌĉocdyes muntyidyes in
(Mat 16:1-4; Mar 8:11-13)
54Chimeꞌdye muꞌ Jesús jéyacsi muntyiꞌ in:
—Cạvetiñeꞌ jụijyaꞌ miꞌin dyicbaꞌbadyeꞌ yócheꞌdyemꞌ jịjcaijcheꞌ tsun u, yi miꞌin: "Añeiꞌ toꞌ raꞌ", yi miꞌin, meꞌdye anic. 55Chimeꞌdye jụijyaꞌ jätisve vaꞌqueshan tyiꞌmu, yi miꞌin: "Anic raꞌ coshyebanꞌ",#12:55 Israelve anic junꞌyi jätisvety tyiꞌmu. yi miꞌin, anicdye meꞌ. 56Anic ac̣hiꞌ dyijyity miꞌin, jämꞌ yuꞌti tsanꞌ miꞌin. Anic chị́yetiñety joꞌmes jacches jịꞌĉocdyeꞌ judyeyaꞌ mạyedyeꞌches, Jenꞌsiꞌ qui namꞌ jịꞌĉocdyeꞌ jụijyamꞌ jam méquiꞌ chị́yebitinte miꞌin, junꞌ chuc aty cạ̈tsiꞌ yụ́dyes sánacdyeꞌ q̂uinꞌ.
Yụꞌtac junꞌ chuc raꞌ jämꞌjiti fạ́cacdyetytum miꞌin
(Mat 5:25-26)
57¿Junꞌ dash jam ĉụiꞌ dyijyi miꞌin jedyeꞌ chuc rụijsis jụijyaꞌ judyeyaꞌ jedyeꞌ chuc jam rụijsis? 58Jeshaꞌ yirity muntyiꞌ atsij jụijyaꞌ jiꞌmeꞌtyinac ayoꞌyaꞌ jụijyaꞌ, aty canac jụijyaꞌ ayoꞌyaꞌ, cavintum quevvac paj qui jämꞌjiti muꞌtum miꞌin, jambiꞌdyemꞌ ayoꞌyaꞌ venjoij miꞌin. Jam meꞌ jụijyaꞌ miꞌin väc̣häꞌtyityyaꞌ chum raꞌ yuꞌtyinac in, chat qui raꞌ jäquiꞌve ĉärꞌyejoij ĉärꞌtaquisĉan miꞌin. 59Yụ jéyac muꞌ raꞌ jam junꞌ jiꞌshupquinac junꞌ quiꞌ chuc tas jiyaꞌdyeyac.
अहिले सेलेक्ट गरिएको:
Lucas 12: CAS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright 2017 Nuevo Testamento en Chimane
Jen'si' P̂eyacdye'