Lucas 14
14
Jesús jiꞌchäĉajte yirity muntyiꞌ chujbity
1Yirisĉan mạyedyeꞌ jịꞌjutyitidyes, muꞌ Jesús muꞌĉan jịjcaij fariseosĉan acaꞌ muꞌ, säcsequi muꞌtum tashcheꞌ buꞌyitytum fariseo. Muꞌin na yoctyiꞌ fariseo in meij muꞌin tänꞌvevaꞌte in. 2Muꞌĉan chimeꞌ yirity muntyiꞌ chujbity. 3Jesús jéyacsi muꞌin fariseo in judyeyaꞌ muꞌin jịꞌchiyacsity yụꞌtacdyeꞌ in, yi muꞌ:
—¿Tupuj buty jiꞌchäcac areꞌreijtyiꞌ muntyiꞌ jịꞌjutyitidyesĉan mạyedyeꞌ? ¿Jätäjyiꞌ buty yụꞌtacdyeꞌ Jenꞌsiꞌ muꞌ? —meꞌ jéyacsi muꞌ Jesús.
4Muꞌin na muntyiꞌ in tyäpäꞌ muꞌin tyeij in. Chat qui muꞌ Jesús tocoꞌjete muꞌ chujbity muntyiꞌ, jiꞌchäĉajte, judyeyaꞌ jutebajte acaꞌyaꞌ muꞌ. 5Jesús jéyacsi muꞌin fariseo in:
—Jeshaꞌ, tomi noriaĉan jụijyaꞌ ĉụiꞌtyiꞌ ạvaꞌ miꞌin, paj tsanꞌ vóye jụijyaꞌ miꞌin, meꞌ tsanꞌ jịꞌjutyitidyesĉan mạyedyeꞌ cavin jäcaĉan miꞌin —jéyacsi muꞌ Jesús.
6Muꞌin fariseo in jam muꞌin junꞌ voryedyeꞌ dạqueꞌ in.
Muꞌin jiꞌvorvactyiꞌ in paj qui säcsi in
7Jesús cạvacsi säcsetity raꞌ in, anic fibiꞌyi in tashchescheꞌ bäꞌyaquis bäꞌyi in. Mọꞌdyes muꞌ Jesús jéyacsi jịꞌĉocdyes p̂eyacdyeꞌ, yi muꞌ:
8—Seꞌvaĉamꞌ, jämꞌdyeyaꞌ jiꞌvorvinac jụijyaꞌ in vämedyesyaꞌ feshta, jam raꞌ fibiꞌyi miꞌin tashchescheꞌ bäꞌyaquis bäꞌyi miꞌin. Vátyequej raꞌ atsij yirity muntyiꞌ fer buꞌyity jụijyaꞌ 9vatyquej raꞌ muꞌ jiꞌvorvinactyiꞌ jin: "Meijyeva úcheꞌ mi, paj muꞌcheꞌ uts bäꞌyi yoctyiꞌ." Meꞌ yi jin jụijyaꞌ, jiꞌtsicayin raꞌ muꞌ, chat jäquiꞌvescheꞌ qui raꞌ jịjcaij bäꞌyaquis mi. 10Mọꞌdyes jiꞌvorvinac jụijyaꞌ in, jemoñeꞌ muꞌcheꞌ chum bäꞌyi miꞌin jäquiꞌvescheꞌ bäꞌyaquis. Vatyquej raꞌ atsij muꞌ jiꞌvorvinactyiꞌ vatyquej raꞌ jin mi: "Chätidyeꞌ, muꞌcheꞌ raꞌ bäꞌyi mi tashchescheꞌ bäꞌyaquis." Meꞌ raꞌ jụijyaꞌ mi muꞌin mesayaty in timaꞌquin raꞌ in. 11Tyi chuc ĉụiꞌ mujuꞌchaꞌ yuꞌtity, muꞌ raꞌ uyaꞌyaꞌ yụꞌtac in, muꞌin na uyaꞌyaꞌ yuꞌtity in, muꞌin raꞌ mujuꞌchaꞌ yụꞌtac in —jéyacsi Jesús.
12Chimeꞌdye muꞌ Jesús jéte muꞌ jiꞌvorvetety:
—Jämꞌdyeyaꞌ yụꞌtyeyacsiyam säcsedyeꞌ muntyidyes in, jam raꞌ jiꞌvorvacsim ĉụiꞌtyiꞌ chätidyeꞌ mi, mijam penꞌdyeꞌ mi, mijam jedyeꞌtumtyiꞌ muntyiꞌ jiꞌvorvac in, ĉaĉaij muꞌindye raꞌ chimeꞌ jiꞌvorvibun in paj qui yiriꞌyaꞌ säcsi muꞌintum, mọꞌ raꞌ bijodyeꞌ mi. 13Jämꞌdyeyaꞌ yụꞌtyeyacsiyam säcsedyeꞌ muntyidyes in, damꞌdye jämꞌ muꞌindye jiꞌvorvacsi mi muꞌin ñịbety in, judyeyaꞌ täcnity in, judyeyaꞌ väiꞌväiꞌyity in, judyeyaꞌ tofety in. 14Meꞌ raꞌ chat där maꞌjoij mi, muꞌin raꞌ jam junꞌ chimeꞌjindye in jiꞌvorvin in. Jenꞌdye raꞌ soꞌmin bijodyeꞌ mi aty ayijbanꞌyaꞌ tupudyeꞌ vañinyeban raꞌ muꞌin rụijtyity in —jéte Jesús.
Jịꞌĉocdyes p̂eyacdyeꞌ därsiꞌ feshta
(Mat 22:1-10)
15Chimeꞌdye muꞌ yirity mesayaꞌ bäꞌyity aty seꞌvepteyaꞌ p̂eyacdyeꞌ muꞌ, muꞌ yi jéte Jesús:
—Där raꞌ maꞌjoij in muꞌin sitiyaꞌ Jenꞌyaꞌ in ayoꞌbuꞌyedyesyaꞌ muꞌ, judyeyaꞌ säcsi muꞌtum in —yi muꞌ muntyiꞌ.
16Yi Jesús jéte:
—Muꞌyaꞌ jiquej yirity muntyiꞌ yụꞌtyety därsiꞌ feshta, daiꞌ muntyiꞌ jiꞌvorvacsi paj qui muꞌtum säcsi in. 17Aty jäꞌmiiꞌtyiꞌyaꞌ mọꞌ säcsedyeꞌ, muꞌ yụꞌtyety jutaqui úñity muꞌ jéyacsequi muntyiꞌ in. Yi muꞌ: "Jeshaꞌ tsun, a nash jäꞌmiiꞌtyiꞌ säcsedyeꞌ." 18Muꞌin na jam jụjte in, päcäꞌ mọmoꞌ dyijyi in. Muꞌ yirity jéte: "A nash yaꞌij yụ yiris jac, jemoñeꞌ tashcheꞌ chum cạvequeꞌ jac yụ, där tsanꞌ otej jam qui namꞌ tupuj yụ", jéte. 19Chiyidye yoctyiꞌ: "Yiriꞌtac yaꞌij yụ vóye in, jemoñeꞌ jịꞌĉojtajquiqui yụ, där tsanꞌ otej jam qui namꞌ junꞌ yụ", meꞌ jéte. 20Yoctyiꞌ chimeꞌ chiyidye muꞌ: "Q̂uinꞌdyemꞌ nash vämi yụ, där tsanꞌ otej jam qui namꞌ junꞌ yụ", jéte. 21Caꞌñibun muꞌ úñity, jébajte ayoꞌ muꞌ, jam tyuꞌ caꞌ jụjyi in. Mọꞌ muꞌ jịꞌfajqueꞌ ayoꞌ, jéyaqui úñity muꞌ: "Tạij quivijjeyacseca, räj raꞌ socorꞌjeꞌ mi mọꞌ caye in bäꞌyedyes, quevacsi ram jụꞌñity jụꞌñity chuc ñịbety in, judyeyaꞌ täcnity in, judyeyaꞌ tofety in, judyeyaꞌ muꞌin väiꞌväiꞌyity in", joꞌmemety raꞌ tucsi mi paj qui atsij säcseti in. 22Meꞌdye muꞌ úñity. Aty atsijban muꞌ jébajte ayoꞌ muꞌ: "Aty chiquebiye p̂eyacdyeꞌ mi, tacaꞌ qui namꞌ mọꞌyaꞌ vav", jéte. 23Quivij muꞌ ayoꞌ jéyaqui úñity muꞌ: "Tạij quivij mi, räj raꞌ socorꞌjeꞌ caye mi bäꞌyedyeꞌĉansiꞌ in judyeyaꞌ räj mọꞌin majmi chimeꞌ in, quevacseva yoctyiꞌ in, ferdyeꞌyaꞌ tucseva paj qui sät tŝọiꞌ in yụ́sĉan acaꞌ in. 24Yụ jéyac, muꞌin tashcheꞌ jiꞌvorvactyiꞌ tsanꞌ in mijam raꞌ yirity yụ́tum säcsi in", yi muꞌ ayoꞌ —jéyacsi Jesús.
Carij cäc̣häꞌchuc Jesús
(Mat 10:37-38)
25Meijquejĉoij miꞌi muꞌ Jesús anic shach muntyiꞌ in cäc̣häꞌchute in. Camanꞌyi jéyacsi muntyiꞌ in:
26—Tyi chuc mạꞌjeꞌ cäc̣häꞌchun jụijyaꞌ yụ in, jemoñeꞌ muꞌ mujuꞌchaꞌ mạꞌjin yụ, paj qui uyaꞌyaꞌ mạꞌjeyaqui ĉụiꞌtyiꞌ jenꞌ muꞌ, judyeyaꞌ tseꞌ muꞌ, p̂en muꞌ, ạvaꞌ muꞌ judyeyaꞌ vojity muꞌ judyeyaꞌ chimeꞌ uyaꞌyaꞌ ĉụiꞌ mạꞌjiti muꞌ. Tyi chuc uyaꞌyaꞌ mạꞌjintyiꞌ yụ, jam tupuj cäc̣häꞌchun yụ. 27Chimeꞌdye jam vemetety jụijyaꞌ muꞌ crosh paj qui meꞌ buꞌyi jịjcabun ñịbedyes yụ,#14:27 Cạvevaꞌ Lucasches sánacdyeꞌ capítulo 9 versículo 23, p̂eyevaꞌ mọꞌĉansiꞌ mụijyasĉansiꞌ sánacdyeꞌ. jam meꞌ jụijyaꞌ muꞌ, muꞌ raꞌ jam tupuj cäc̣häꞌchun yụ. 28Jeshaꞌ, miꞌin pạrej dyijyi jämꞌtiñeꞌ raꞌ därsiꞌ acaꞌ jụijyaꞌ, ¿jam adac tashcheꞌ jiꞌdyijviti miꞌin jämꞌ juñucsiꞌcheꞌ chuc raꞌ yaꞌiꞌ paj qui ijac mọꞌ acaꞌ miꞌin? 29Jam meꞌ jụijyaꞌ, meꞌ mọmoꞌ ĉụiꞌ tiyacchutiñeꞌyaꞌ yụꞌtiñeꞌ cach buꞌyiꞌcheꞌ, meꞌ tsanꞌ meꞌ buꞌyiꞌ jam qui namꞌ tupuj ijaijyaꞌ miꞌin. Muntyiꞌ cavinactyiꞌ jụijyaꞌ in dyijsacbunac raꞌ in acaꞌ miꞌin. 30Yi raꞌ in: "Uts muntyiꞌ meꞌ tsanꞌ tiyacchuiꞌtyiꞌ acaꞌ jämꞌtyeꞌ, mijam qui namꞌ junꞌ ijaiꞌ muꞌ", yi raꞌ in. 31Meꞌdye chimeꞌ muꞌyaꞌ jụijyaꞌ yirity ayoꞌ seꞌvaquity junꞌ chuc yoctyiꞌ atsij ayoꞌ daiꞌtyiꞌtum väc̣häꞌtyity muꞌ, päräꞌ quiꞌtac mir in, meꞌsiꞌ rụiꞌcuꞌ väc̣häꞌtyity muꞌ. Jambiꞌdyemꞌ shupqueti in jambiꞌdyemꞌ tiyacchuiꞌ chuti in, tashcheꞌ chum muꞌ muꞌyaty ayoꞌ jiꞌdyijviti, areꞌ tupuj jiꞌpenacsi in, vatyquej raꞌ jam, ĉaĉaij na muꞌtyiꞌ väc̣häꞌtyity uyaꞌyaꞌ in, yiriꞌtac mir mọmoꞌ in. 32Aty chịj jụijyaꞌ jam raꞌ junꞌtacsi jiꞌpenacsi yoctyiꞌ väc̣häꞌtyity in, meꞌ ĉútiyaꞌ, tacaꞌdyemꞌ moch muꞌin in, cavin raꞌ jutete muntyiꞌ muꞌ jiꞌrebacsi, paj qui jämꞌjitive in paj qui aty jam jedyetuij in. 33Meꞌdye raꞌ miꞌin chimeꞌ jiꞌdyijviti miꞌin, areꞌ yụ mạꞌjeꞌ cäc̣häꞌchutiĉaꞌ jụijyaꞌ miꞌin, areꞌ jam. Jemoñeꞌ jam dyijtutiñeꞌ ĉụiꞌsiꞌ jedyeꞌ miꞌin paj qui cäc̣häꞌchutiĉaꞌ yụ miꞌin —jéyacsi muꞌ Jesús.
Cäc̣häꞌchutety Jesús jeñej buꞌyi jicoj
(Mat 5:13; Mar 9:50)
34Mọꞌ jicoj anic jämꞌ, meꞌ jụijyaꞌ tsabacjoiꞌ, jam raꞌ junꞌ caꞌñibunꞌ mijam raꞌ cuvij jesecjobanꞌ. 35Mọꞌ aty jam jedyedyes shupquiꞌ, mijam jacdyes pịñitucdyes cätidyeꞌ atsvun, jemoñeꞌ qui vaꞌcac mọmoꞌ. Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ —jéyacsi muꞌ Jesús.
अहिले सेलेक्ट गरिएको:
Lucas 14: CAS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright 2017 Nuevo Testamento en Chimane
Jen'si' P̂eyacdye'