Matta 28
28
Ta̱za Yesu nyyai a̱yabyen
(Markut 16:1-10; Luka 24:1-12; Yohana 20:1-10)
1A̱sa̱ba̱t u na̱ bu seyak, a̱shong a̱ntson ka̱tuk Ladi, Maryamu Magadaliya bu Maryamu a̱yring u a̱ nat cyang ryak a. 2Ka̱baram ba̱cincong ka̱byen ka a̱ nwa zun ba̱gingang, a̱pfong A̱gwam Ka̱za a̱ kyrek nyyai Tazwa a̱ bu yrik kpang ka̱nu ryak ji a̱ sak zan a̱ wrak a̱n swrang. 3A̱ yin dyi di ka̱krong nza ni, ba̱tro nu ba a̱ sai ba̱kinkyai da̱ a̱bvwo ni. 4Ba̱nyet cam ka̱nu ryak ba a̱ hok ka̱wun a̱pfong Ka̱za ka a̱ trim a̱ si kwei di nkom ni.
5A̱pfong Ka̱za nu a̱ hywa di ba̱nyring iya, “Yi ryok hok ka̱wun ba, n bvwo Yesu a̱mi yi cat, a̱tuba nu ba ku teyang tazwa ka̱teyang ka ni. 6A̱n shyi kyi ba. Ba ka̱n ku shyek dani di na̱ yin hywa ni. Yi ba i ryi ka̱bvwa ka na̱ yin myyi ni. 7Se yi gha naat si tyyei kpikpit ba̱nyet tssup nu na i hywa da̱ mba, ‘Ba ka̱n ku shyek nyyai a̱yabyen na̱ sook ka̱son nyin a̱ naat Galili. Yi naat si ku ryi ka̱ yemi.’ ” A̱pfong Ka̱za nu a̱ bo hywa da̱ mba, “Yi ryok bring kyang a n ya tyyei ni ba.”
8Ba wwon ryak a ba ahwa, ka̱wun ka ba̱ ya ma ndya mba na na bo sai, a̱ tyong a̱ naat a̱ si tyyei ba̱nyet tssup nu ba.
9Bu i ka̱baram Yesu a̱ ba̱ shya a̱ hywa da̱ mba, “Ka̱za a̱ ya wwon nda.” Ba nyyai a̱ bu pyyem a̱tak nu na a̱ ku kok ntong. 10Na̱ hywa da̱ mba, “Yi ryok hok ka̱wun ba. Yi nat si tyyei ba̱wumbeyang nzuk ba ba krang a̱ nat Galili. Ba naat a̱ si n dyi ka̱ yemi.”
Ba̱nyet cam ryak ba a̱ brek a̱ nat a̱ si tyyei
11Ka̱ram ka ba̱nyring ba ban drok a̱ naat ni, nsoja nzaan na cam ryak a ni i brek si nwa ka̱nkrang ka a̱ tyyei ba̱cecet ba̱gado Ka̱za ba sa̱rei kyang a yya ni. 12Ba̱cecet ba̱gado Ka̱za ba a̱ mon bu ba̱nekwo ba̱nyet Yahuda ba a̱ rop ka̱nu a̱ wrak nsoja iya krum ba̱gingang 13a̱ hywa da̱ mba, “Yi na tyyei ba̱nyet ba di yi shyi nda a̱ta̱tuk, ba̱pfong nu ba a̱ ba a̱ bu ku yyi. 14Ki gwamna nu a̱ hok, zi bvwo kyang a zi ni ku tyyei na̱ shim a̱n wi ya tyyi ka̱bvung ni.”
15Nsoja na i sook krum ji a̱ shim kyang a ba ba̱ tyyei ni. Rot a̱mi hat ka̱pfun kyang a ba̱nyet Yahuda ba ba ryat ni ku yemi.
Yesu a̱ mon bu ba̱pfong nu ba
(Markut 16:14-18; Luka 24:36-49; Yohana 20:19-23; Npfong 1:6-8)
16Ba̱pfong nu ba swak ba̱ a̱yring a̱ nat tazwa ntsok Galili ka, ka̱bvwa ka Yesu na̱ yin ba̱ tyyei ba nat ni. 17Ba si ku ryi a̱ ku kok ntong, ma ba̱yanyet mba a̱ hwa da̱ nu ba. 18Yesu a̱ shek a̱ ba shishrek ba̱ mba a̱ bu hywa da̱ mba, “Ba n dyi sa̱rei cet Tazwa bu ka̱byen. 19Rot a̱mi se yi nat di ba̱nyet ba sa̱rei i ka̱sa ka si ba̱ brak ba yet na̱won pfong nzuk, i ba̱ yya baptisma ka̱yat diyrek A̱tyyi bu Ka̱won bu Tswa Ka̱za, 20i ba̱ zzek ba tssup sa̱rei truwang ji n ka̱n ya ryi ni. Se yi bvwo n shyi ba̱ nyin kozan ka̱ram n si tat a̱ngbom ka̱ram u.”
अहिले सेलेक्ट गरिएको:
Matta 28: kaj
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011, Wycliffe Bible Translators, Inc. All rights reserved.