Luc 9
9
Sesu garumi digumi di bebingitsi ne bebingitsi bebeye
1Sesu negugukige digumi di bebingitsi ne bebingitsi be bebeye, abevege ndure ne dinyange di gusanze menyuni mabi, ne ngudu yi gubeluse bibedu. 2Vane, abambile re «Yendanu mu mimbu menzusu gwenenenze musamu bulongu bu Nyambi ne gwenebeluse bibedu.» 3Sesu ne gwambile bebingitsi bandi nesi begwende gumuvevilu re «Nuyabonge kepagere givave, nesi duvengu, nesi pengi, nesi giguye, nesi doli, nesi ngoye beye. 4Kepagere ndagu yi yenu nugwingene, tsagenanu gu ndagu yine kwange ne ve nugwendile. 5Mbure tsyotsu tsi batu be gubuse re nutsageni gu ndagu tsi awu, ve nuguvudugile gu ndagu yine, kukumunanu difufundu di byeru bi enu. Gubebigise re Nyambi agu betabulile bubanze.» 6Bebingitsi be Sesu bende mu mbili mimbu mi musyengi Galile. Bene nenzange musamu boti. Mbure tsyotsu tsi awu bendange bekwene labisange bimage negubeluse bibedu.
Erode akadumi Sesu
7Vane, Erode, ngowu yi Galile ne gulu mambu ne bimage bi Sesu vagange asekuyabange dyambu ne pundu. Pikile gutsyemuge, mbare bemosi bambilange gukyelu Sesu re «San amarambuge gu dufu.» 8Befimbe bambilange re «Eli amakunde labene.» Bane gwandi re «Mubigitsi wu gulu amakunde rambuge gu dufu.» 9Tumbe Erode akekwe kwambilange re «Nitabuse muru Sambatisete. A mutu nye wune wunyagulu wadyanzi mambu me bimage mane?» Akukebange gumwene.
Sesu lise toseni yiranu tsi batu
10Bilumbi bi Sesu negugabuge gu muvevilu wu yawu bende, bese mwambile mambu motsu me yawu bevage mu mimbu. Sesu negubebonge, bende ve mbure yi gukeme yi sandi batu beli ve mbeke yadi yi Betsayide. 11Mbili batu neguyabe re Sesu magwende bemubinge. Sesu bevagere: «Ruganu gusegulu musamu bulongu bu Nyambi.» Botsu bebelange Sesu kubebeluse. 12Tsisige, bilumbi bi andi negubambeme nandi, negumwambile re «Gabuse batu nonge bekwende mu mimbu ne mipindi mi mumbeke beku dile mbure guningilile ne biguye. Mbare vave duve kumu.» 13Sesu negubambile re «Bevegyanu yenubeni biguye.» Tumbe yawu negwambile re «Dukane pembi yiranu ne bisonzi bibeyi. Kabe dwendi yetubeni gwesumbe biguye bi batu botsu?» 14Vane, gube gotsu toseni yiranu tsi batu, Sesu negwambile bebingitsi bandi re «Betsagenisyanu mu milongu mi megumi meranu me bebagele.» 15Bevage neve ayambilile betsagenise batu botsu. 16Sesu negubonge pembi tsyeranu ne bisonzi bibeye, negugengise gu yulu negugabusile Nyambi diboti gukyelu biguye. Atabule pembi tsyeranu ne bisonzi birini. Negubivege bebingitsi bandi beku gabile batu botsu. 17Batu botsu neguye negukure. Gukunde salilu digumi diponzi ne ponzi beye tsibase ne birini bi pembi ne bisonzi.
Pyere magwambile re Sesu Kirisete mwobutsi wu Nyambi tsebyatse
18Wisi mosi, wu Sesu lembange vike, bebingitsi bandi babe vembeke andi. Negumane lembe abivule re «A batu botsu bagwambile re menu re nye?» 19Yawu botsu bagule re «Wu Sambatisete, bemosi re ndyayu wu Eli, befimbe re ndyayu wu mubigitsi wumosi wugulu warambuge gu dufu.» 20Sesu negubivule re «A yenu, menu re nye?» Pyere negumwagule re «Ndyayu wu Kirisete mwobutsi wu Nyambi tsebyatse.»
21Sesu negubevege dinyange re, nuyagwambile dyambu dine kepagere mutu. 22Negukunde bambile re «Nonge menu Mwane Mutu akengi veveni, aguvinu ne bivunde bi dibundu, bi bevegitsi be pagu ne bi migage mi Moyise. Nonge batu bemuboki, wisi mureru agurambuge gu dufu.»
Nevu babingili Sesu
23Vane, ayambile batu botsu babe: «Pasi re gu mutu warondi mbinge, abusi binge mambu me yandi beni garondi guvage. Ayibi akike wisi wotsu gu gusindile mukengu kwangene gu dufu, abingi nzile yi menu nyavyogili.» 24Mbare kepagere mutu warondi bandekene monyu andi ve butambe agutsyemuse monyu yi mwendu ne mwendu. Tumbe kepagere mutu wapagili gitu, wasise mambu motsu me butambe gukyelu ami, agudenge monyu yi mwendu ne mwendu. 25Pasi re mutu ane mbili meboti me bulongu mu butambe, tumbe gere a sandi ne monyu mwendu ne mwendu, pasi re amafu meboti mane mekine musumbu? Nesi. 26Kepagere mutu wu gunyulu gisoni, wugulu ndongi tsi ami gisoni menu gwami Mwane Mutu nzagumusinge ve nigurugile ne bundumbe bu ami, bu taye ami ne bu byanze bi Nyambi. 27Nyanwambili bureti, batu bemosi be vave, nesi begufu begube mbeyi ve bundumbe bu Nyambi bugurugile mu bulongu.
Gidimu gi Sesu gyakaluge
28Sesu ne gumane gwambile bebingitsi bandi, tsufu ginane neguvyoge, abonge Pyere, San ne Sake, bepande gu mukongu gwelembe. 29Ve Sesu lembilange, ginengu gi andi negukaluge gidimu bidwaru bi andi bikube ne dufugu duneni dwabangi. 30Vane ne vane, batu bebeyi belabene bekwambilange nandi, Moyise ne Eli, 31mu bundumbe bu Nyambi. Bambilange ne Sesu neve agumanine gidyanzu gi Nyambi murumine mu butambe, ve agusegufilu gu Serisalem. 32Pyere ne bembatsi bandi beningile gyelu gineni. Negurambuge, belabe Sesu akavedemi ne bundumbe bu andi ne batu babeyi ve mbeke andi. 33Gigumbi gi Moyise ne Eli bepasugile ne Sesu, Pyere negumwambile re «Fumu, dinonge re dubyanu vave. Durungi anu mesambe mereru. Dimosi di agu, dimosi di Moyise, dimosi di Eli.» Tumbe ve yandi yambilange nane aseyabange di ayambilange. 34Ve Pyere yambilange, dimungi dikutsebefugemine yawu botsu. Bebingitsi be Sesu bekugangu ne mune wome. 35Gu gari dimungi gukulunu dyufi dikwambile re «Awuwu, mwane ami wu menu nzesale mugobisi anu mulilu anu.» 36Dyufi di Nyambi ne gulunu, bebingitsi be Sesu bekulabe Sesu masale vike betsibige minu, beseyambile kepagere mutu gigumbi gine motsu me yawu belabe.
Sesu gabelusi mwane wune dinyuni dibi
37Wise ne gutsamuge, Sesu ne bebingitsi bandi bareru besunde gu mukongu gubabe. Mbili batu beruge gusemubengusene. 38Vane, vegari mbili batu bevingilange Sesu, gube mutu wamuge veveni: «Mulonzi kokolu tsi agu, gengise mwane ami dikike. 39Ve dinyuni dibi dyamugangilingi, akwamugange, akutabugange nyambu, divusi divudugange gu munu. Disamusisi mbangu mbangu, dikumutsungulange. 40Nzelembige bebingitsi bagu re besanzi dinyuni dine, tumbe besarungule.» 41Sesu ne gwagule ne kabu re «Dilale di batu besavagili Nyambi gitu, batu babi. Kwange ne gigumbi gye? Nigubange nenu, nigunusindile? Bege mwane agu gunu.» 42Gigumbi gi mwane bambemange ne Sesu, dinyuni dibi negumuberuse vetsi, negumutabuse nyambu. Sesu negukenine dinyuni dibi, negudisanze mu mwane wune. Mwane negubeluge. Sesu negumusambule taye andi. 43Batu botsu babe vane bekumame neve Sesu belusile mwane wune, ne ndure neni yi Nyambi.
Sesu mayabise dufu ne durambugu du andi du dufu
Gigumbi gi batu bemamange mambu me Sesu vagange, negwambile bebingitsi bandi re 44«Yenu, yulu anu dikengi dyambu di nyanwambili: Menu Mwane Mutu nigusaku mu mekake me batu bapini.» 45Tumbe bebingitsi be Sesu beseyulungu dyambu di yandi yambilange. Mbare disumu di dyambu dibange disweme gu yawu. Bedumange gumwivule disumu di dyambu dine.
A givunde nye?
46Vane, bebingitsi be Sesu bekusosange gu guyabe givunde vegari awu. 47Sesu neguyabe pikile tsi mirime mi awu, negubonge mwane mugegi amubege ve mbeke andi. 48Sesu negubambile re «Kepagere mutu wabandekeni mwane mugegi gukyelu ami, mebeni agabandekeni. Wotsu wambandekeni agabandekeni gwandi mutu wusetume. Mbare wotsu wu mugegi vegari yenu botsu yandi re givunde.»
Mutu wusa nuvini ayi mutu enu
49San negwambile Sesu re «Fumu, duselabe mutu wasanzi menyuni mabi ne ngudu yi dine di agu. Dusemugandise mbare a sandi mu dibundu di etu.» 50Sesu negumwambile re «Nuyamugandise, mutu wusanuvini giburu gi enu.»
Dimbu di Samari dibuse Sesu
51Gigumbi gi tsufu tsi Sesu gupande gu yulu negugogule, Sesu akube ne dibagi digwende gu Serisalem. 52Arume gu wusu andi bilumbi. Negwende, bingene gu dimbu di Samari gwetsonzige ndagu ne tugu yi Sesu ne bebingitsi bandi. 53Tumbe betsige be dimbu dine bekubuse re Sesu atsageni gu dimbu di awu mbare ayendange gu Serisalem. 54Bebingitsi be Sesu, Sake ne San, negulabe nane bekwambile re «Fumu, warondi re dwivuli Nyambi re asunzi ruvi du yulu dukusebenyenze?» 55Sesu negugeluge gu yawu, negubesyembe. Abambile re «Nune mbele yi gupikile nane.» 56Sesu ne bebingitsi bandi bende gu dimbu dinzusu.
Batu barondi binge Sesu
57Ve Sesu yendilange ne bebingitsi bandi, mutu kubambene nandi negumwambile re «Mbure tsyotsu tsi ndyayu wugwende, nigukubingange.» 58Sesu negumwagule re «Bibagu bene midunge mi baningilili, nyoni bene mubu. Tumbe Menu Mwane Mutu nzane mbure yi guningilile.»
59Negwambile mutu wufimbe: «Mbingi.» Mutu wune negumwagule re «Fumu, kinzise nikyetsige taye ami.» 60Tumbe Sesu negumwambile re «Sise batu bene menyuni mafu gwetsige bibindi bi biburu bi awu. Ndyayu yende gwenenze musamu wu bundumbe bu Nyambi.»
61Mutu mosi gwandi negumwambile re «Fumu, nigukubinge, tumbe wukinzise nikyelagile biburu bi ami.» 62Sesu negumwagule re «Pasi mutu amapakile gidyanzu ayakunde gengise nzime munongu mosi ne mutu wa pakili mbinge. Pasi re amakunde pikile monyu andi yi gulu gidyanzu gi andi gisagube giboti gu bulongu bu Nyambi.»
अहिले सेलेक्ट गरिएको:
Luc 9: SWJ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES