मत्ती 6
6
च्यिहम्बा ताङगेन्गी तेहन्दाला सुङदेन
1 “जेम्बु पेहती तेह, ख्याया़ मिहया़ला तेन्ज्येला छ्या़-छ्येपा पेहचेन माहतेन। मिहन्सीमाना स्यिहङगामला ज़्य़ू नाङगेन ख्याया़गी याहप्च्येन आबागी ख्याया़ला च्याहगा च्यिॱआङ नाङज्ये म़ेह।” #मत्ती २३:५
2 “ओ़ह सोङबे ख्याया़गी मिहया़ला च्यिॱआङ तेर्केमु रोहवा-लीङ माहफु, दि ल़ेहमुनी यिहन्दो तेन्गे मिहया़गी गा छो़खाङ दाङ लाहमया़ला मिहया़गी या़हबु माज्यु म़ेदी पेहकें। तेहम्बाराङ ङाह ख्याया़ला माएँ, खुङया़गी राहङगी च्याहगा ज्योर सिहन्दी येह। 3ओ़ह सोङबे सुज्यीला तेर्केमु ख्याया़गी योबा लाहक्पागी तेरक्यो योमा लाहक्पागी क्यी़ह माहन्ज्योर्च्यु। 4तेर्केमु खाजुम्बा पेहती तेर ओहले खाजुम्बा पेहती तेर्केमु ज़ी़ नाङगेन किन्ज्यो याहपगी ख्याया़ला च्याहगा नाङज्ये येह।”
सोल्वाङ ताप्केन्गी तेहन्दाला लोप्च्युङ
(लूक ११:२-४)
5 “ख्याया़ सोल्वाङ ताप्केमु यिहन्दो तेन्गे मिहया़गी ल़ेहमु पेहती सोल्वाङ माहताप। खुङया़नी लेहमेन मिहया़गी थोङज्यु म़ेदी छो़खाङ दाङ लाहमगी सहर-सुहरया़ला लाहङदी सोल्वाङ ताप्च्ये सेम पेहकें। तेहम्बाराङ, ङाह ख्याया़ला माएँ, खुङया़गी ज्योर कोहएँगी राहङगी च्याहगा ज्योर सिहन्दी येह। #
लूक १८:१०-१४
6ख्येदी सोल्वाङ ताप्केमु राहङगी ङ्याहल-खाङ नाहङला स्य़ूहदी कोह क्याहप्ती स्यिहङगामकी याहप्च्येन आबाला सोल्वाङ ताप्तोङ। ख्येगी खाजुम्बाला पेहक्योगी ल़ेह ज़ी़ नाङगेन याहपगी ख्येला च्याहगा नाङज्ये येह।”
7 “ओहले सोल्वाङ ताप्केमु लेहमेन क्यिहपागी मिहया़गी ल़ेहमु मिहया़गी थे़ज्यु म़ेदी क़े छ्यिम्बु-छ्यिम्बु तेन्दी सोल्वाङ माहताप। खुङया़नी ओ़ह ल़ेहमुराङ पेहती सोल्वाङ ताप्ना च्यी़राङ किन्ज्योगी सेन नाङगेन म़ेदी साम्लु ताङगे। 8ओ़ह सोङबे ख्याया़ खुङया़गी ल़ेहमु माहबे च्यिबेमाना लाङगे म़ेदी तोहङलेराङ ख्याया़ला च्यि से़हगी कोहपु येह माएँ ताम स्यिहङगामला ज़्य़ू नाङगेन्गी ख्याया़गी किन्ज्यो याहपगी ङोह ख्येन नाङगे। 9यिहॱनाङ ख्याया़गीदी दि ल़ेहमु म़ेदी सोल्वाङ ताप्तोङ–”
“ओ़ स्यिहङगामला ज़्य़ू नाङगेन ङ्यिहगी याहप्च्येन आबा,
राहङगी छेन नाम्पार-ताहक्पा ओहङज्यु।
10 राहङगी क्याहल्सी डुप्च्यु,
राहङगी थु स्यिहङगामला तेहन्दा डुप्क्यो ल़ेहमुराङ दि जाम्बुलीङॱलाङ तेहन्दा डुप्च्यु
11 ङ्यिहमा टाहङमा कोहएँगी तोप्च्या ङ्यिहला तिहरीङॱआङ नाङदोङ।
12 ङ्यिहगी पेहक्यो तिहक्पाया़ स्या़बा नाङदोङ,
ओ़हठी पेहतीराङ ङ्यिहगीॱआङ ङ्यिहला टाह पेहकेनया़ला स्या़बा तेर्ती येह।
13 ङ्यिहला ङ्याहम-छेला छ्यि च्य़ू माहनाङ,
यिहॱनाङ ङ्येहम्बालेगी थार च्य़ू नाङदोङ।
(च्यिबेमाना क्याहल-खाप, ओङ दाङ ज़िज्यिद नाहम्स्यी किन्दु राहङदीराङ यिहन, आमेन #६:१३ आमेन : माएँदी हिब्रू दाङ ग्रीक तामला “यिहम्बा, ओ़ह ल़ेहमुराङ ओहङज्यु!” म़ेदी माक्यो यिहम्बा। ओहले “यिहम्बा, ओ़ह ल़ेहमुराङ यिहम्बा!” माएँदीॱआङ ह्अ कोहएँ। दि आङ-टा़हङकी केच्यादी माहङबु ल़ेहमु ग्रीक बाइबलला प्री़हदी म़ेह। )”
14 “च्यिबेमाना ख्येला टाह पेहती तिहक्पा पेहकेनया़ला ख्येगी स्या़बा तेर्सीमाना स्यिहङगामला ज़्य़ू नाङगेन्गी ख्येगी किन्ज्यो याहपगीॱआङ ख्येला स्या़बा नाङज्ये येह। #
मर्क ११:२५,२६ 15यिहॱनाङ ख्याया़गी लेहमेनया़ला स्या़बा मेहतेर्सीमाना किन्ज्यो याहपगीॱआङ ख्याया़गी पेहक्योगी तिहक्पा स्या़बा नाङज्ये म़ेह।”
ङ्युङने तेहकेन्गी तेहन्दाला सुङदेन
16 “ख्याया़ ङ्युङने तेहकेमु यिहन्दो तेन्गेन मिहया़गी ल़ेहमु छेन्दा नोङदी माहतेह। च्यिबेमाना मिहया़ला ङ्युङने तेहती येह म़ेदी तेन्ज्येला खुङ राहङगी छेन्दा नोङदी तेहकें। तेहम्बाराङ ङाह ख्याया़ला माएँ, खुङया़गी राहङगी च्याहगा ज्योर सिहन्दी येह। 17यिहॱनाङ ख्याया़दी ङ्युङने तेहकेमु राहङगी गो़ला नुम की़दी तोहङबा ठी़दी तेहतोङ। 18ओ़ह ल़ेहमु पेहती ङ्युङने तेहकेमु, मिहया़गी मिहम्बा, यिहॱनाङ ख्याया़ राहङगी मी़गी मेहथोङगेन किन्ज्यो याहपकी च्यी़राङ ख्ये सुगीॱआङ माहथोङबा पेहती ङ्युङने तेहक्यो ज़ी़ नाङज्ये येह ओहले ख्येला च्याहगा नाङज्ये येह।”
स्यिहङगामला सी़ कोहकेन्गी क्युह-नोहर
(लूक १२:३३-३६; १६:१३)
19 “दि जाम्बुलीङला राहङगी तेहन्दाला क्युहया़ सी़दी मा़हज्या। देला सी़ ज़्या़क्योगी क्युहया़ला बु क्याहप्कें, चेगी साहएँ, कुमेन स्योरके। #
याक ५:२,३ 20राहङगी तेहन्दाला स्यिहङगामला क्युह-नोहर सी़दे ज़्यो़। स्यिहङगामलानी बुॱआङ मेहक्याहप्कें, चे़गीॱआङ मेहसाहएँ ओहले कुमेनॱआङ मेहस्योर्केन। 21च्यिबेमाना, ख्याया़ राहङगी क्युह-नोहर का़हला येहबा, ओ़हलाराङ सेम छ्या़गे।”
22 “ज़ुबुगी लो मी़ यिहम्बा। ओ़ह सोङबे ख्येगी मी़ साल्बु येहसीमाना ज़ुबु थाम्ज्यीराङ क्या-साङे ओहङगे। 23यिहॱनाङ का़हलेॱआङ ख्येगी मी़ साल्बु मे़हसीमाना ज़ुबु थाम्ज्यीराङ ना़-जुबे ओहङगे। ओ़ह ल़ेहमुराङ ख्येगी सेमला येहकेन्गी क्या-साङेदी ना़-जुबे डोसीमाना तोहरोङ ओ़हदी काहजे माहङबु ना़-जुबे डोवा!”
24 “सुज्यीगीॱआङ ताहक्पु ङ्यी़ला स्याहप्तो स्युह मी़हखुएँ। च्यिबेमाना खोगी च्यी़ला चोक्पा पेहच्ये येह ओहले राहङसाला या़हबु पेहच्ये येह च्यिबे मासीमाना च्यी़गी माक्योगी ताम खोगी ङ्यिहन्ज्ये येह ओहले लेहमेनदीला ची़नाङ पेहच्ये म़ेह। ओ़ह ल़ेहमुराङ ख्याया़गीॱआङ किन्ज्यो दाङ क्युह ङ्यिकालाराङ स्याहप्तो स्युह मी़हखुएँ।”
तुहङाल माहबे
(लूक १२:२२-३१)
25 “ओ़ह सोङबे ङाह ख्याया़ला माएँ, च्यि साहज्ये, च्यि थुङज्ये, च्यि केहन्ज्ये म़ेदी तुहङाल माहबे। च्यि साहज्ये स़ेह म़ेदी मिहली छ्यिम्बु, केहन्ज्ये स़ेह म़ेदी ज़ुबु छ्यिम्बु मिहम्बा ले? 26नामला हुर्केन च्यिहबीया़ला त़ेदोङ, खुङगी नाह सेन ताप्के, नाह डु तुहएँ, नाह चाहङला रूगे। यिहॱनाङ, स्यिहङगामला ज़्य़ू ना़गेन ख्याया़गी किन्ज्यो याहपगी खुङया़ला साहज्ये नाङदेराङ येह। च्यि ख्याया़ ओ़ह च्याह-च्यिहवाया़ म़ेदीनी ज्यिबुराङ चा़ छ्यिम्बु मिहम्बा ले? 27ख्याया़ नाहङला सुज्यीगीॱआङ तुहङाल पेहती राहङगी छे याहम्बीज्यीॱआङ रिहङबु ज़ो ख़ूएँ ले?”
28 “ओहले च्यि केहन्ज्ये म़ेदी च्यिबे तुहङाल पेहकें? रिहगी लिली मेहन्दोया़ काह-ठि पेहती छार्कें दु त़ेदोङ, खुङया़नी ल़ेहॱआङ मेहबेएँ, केहन्ज्येला काप्च्याया़ॱआङ मे़हथाएँ। 29यिहॱनाङ ङाह ख्याया़ला माएँ, सोलोमन क्याहल्बु ङ्याम्बु ओ़ह ल़ेहमु ते़ङेन क्युह-नोहर येहतीॱआङ खो ओ़ह मेहन्दोया़ चेबा ज़ाप मा़हखुबा येहकें।#१ राज १०:४-७; २ लुहक ९:३-६ 30तिहरीङ स्यार्ती नाहङबार येहदी मेहला क्युर्केन्गी चाया़लानी किन्ज्योगी दि ल़ेहमु जेती ज़ाप नाङगेन मानानी च्यि किन्ज्योगी ख्याया़ला केहन्गेन्गी काप्च्या मेहनाङगे ले? के, ख्याया़गी यिह-छ्य़े?”
31 “ओ़ह सोङबे च्यि साहज्ये, च्यि थुङज्ये, च्यि केहन्ज्ये म़ेदी तुहङाल माहबे। 32किन्ज्योला ङोह मे़हस्येएँगी लेहमेन क्यिहपागी मिहया़गी गा दि रोहवा तुहङाल पेहती तेहकें। दि थाम्ज्यीराङ ख्याया़ला कोहकें म़ेदी स्यिहङगामला ज़्य़ू नाङगेन ख्याया़गी याहपला थुयी़ येहबा। 33यिहॱनाङ तोहङले किन्ज्योगी क्याहल्सी छोल्दोङ ओहले किन्ज्योगी काया़ डुप्तोङ ओहले किन्ज्योगी दि थाम्ज्यीराङ ख्याया़ला पा़हदी नाङज्ये येह। 34ओ़ह सोङबे नाहङबारकी तेहन्दाला तुहङाल माहबे, च्यिबेमाना नाहङबारकी ङ्यिहमागी राहङगी तुहङाल राहङराङ पेहकें। तिहरीङगी तुहक्पु तिहरीङलाॱराङ दाङस्यी येह” म़ेदी येशूगी सुङ नाङसीन।
अहिले सेलेक्ट गरिएको:
मत्ती 6: HYLM
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023 (Active), Wycliffe Bible Translators, Inc. All rights reserved.