Matiə 19
19
He kuur thɩmɩɩr
(Mar 10:1–12)
1Ɔbɔɔkɛ Jeju mɩɩnɩ thɩmɩaakɛ dɩɩ pɩ, a ther Galile a jal Jude khʋra, Jʋrdɛ̃ mɩɩr iiro. 2Dɩ tibil jɔjʋɔ tə̃tə̃tə̃ kɔɔ kpaaraarɛ, dɩ le a kpɛɛ wɩ khoo.
3Dɩ jɔfʋ bʋ dʋdarasɔ pʋɔraarɛ dɩ wa‐n fifiləə ayɩ: Hʋɛ hale dɩ tibil na faa ɔɔ khɛr gãgã dɔɔraakɛrakɛ a yɩɩraanɩ ya? 4Dɩ birse wi: Na kɔɔ yɩɛ Thãgbaa sɛbɛra, dɩ “kuun na khɛr thɩ̃ Tidaar kɔɔ cʋʋ caca fʋ paaraa”?#Jən 1:27; 5:2 5Mee a kɔɔ sor ayɩ: “Gɛr dɔ kɩrʋ dɩ kuun na lee kha na ɔɔ thɩ na ɔɔ nɩ, sɩ a ɓã kha na ɔɔ khɛr, wɛr yenyɔ n gbɛbɩ wɩ do tibil bɩɛl.”#Jən 2:24 6Gɩ do mɛ̃ wa do yenyɔ bã, sɩ wɩ coore kha a do bɩɛl. Gɛr gɩ gɩrɛ Thãgba coornɩ dɩɩ do bɩɛl, tibil na‐n lee ga. 7Dɩ wɩ bulee wo ayɩ: Dɩ a thale gɩ, mɔ̃gɩdo sɩ dɩ Mʋɩjɩ kɔɔ ˈlaa hʋɛ ayɩ: “Kuun n hana ɔɔ khɛr he kuur sɛbɛ sa weaa a faa?”#Dət 24:1–4; Mat 5:31 8Dɩ birse wi ayɩ: Anɩdara khiinoni dɔ kɩrʋ dɩ Mʋɩjɩ kɔɔ ˈlaa hʋɛ nɩ wea anɩ khɛrsɔ na faa. Sɩ caca fʋ paar, ga kɔɔ ha thakaˈ. 9Sɩ mɩ so narɛ, tibil wo tibilikɛ na faanɩ ɔɔ khɛr, sɩ ga do kũu kpɩɩ ƴaalɛ ga, sa bir he khɛ kpɩɩ, khɛ kpɩɩ ƴaal sopugo a cʋʋ.#Mat 5:32; 1 Kor 7:10–11
Kpakpaar toore
10Dɩ ɔɔ kpãkpãadara sʋʋraa aa: Dɩ ado thale thɩɛna na ha kuun na khɛrra, gɩ baarrakɛ dɩ tibil na he khɛraˈ. 11Dɩ birse wi: Tɩbɩla fɛʋ na tu thɩmɩɩrɩkaˈ, sɩ wɩrɛ dɩbara wɩ hanɩ punone. 12Gɩdonɩ wɛ hale kɛ awɩ nɩsɔ kɔnɩnakɛ dɩ wɩ do kʋ̃bʋʋ, sɩ wɛ hale wo kɛ tɩbɩla cʋʋnɩ dɩ wɩ do kʋ̃bʋʋ. Wɛ hale wo ƴũ fãgadaar doda donɩ nɔɔ dɩ wɩ too kpakpaar. Gɛr gɩ ʋrɛɛkɛ punoneni a na tu thɩmɩɩrɩkɛ, a to.
Mɔ̃ Jeju dɛɛnɩ bɩsanana nyɛ̃ɛ a bɔna wɩ
(Mar 10:13–16; Lu 18:15–17)
13Dɩ tɩbɩla kɔɔ gbaar bɩsã bii a pɔna Jejura a dɛɛnɛ war nyɛ̃ɛ sa bɩɛlnɛ Thãgba pɛ war. Sɩ kpãkpãadara kɔɔ phaanɛ wɩrɛ pɔna wɩnɩ. 14Dɩ Jeju sor: Nɩ dɔ bɩsã bii na‐n ɩ̃ mar, na‐n pɩɛr waˈ. Gɩdonɩ wɩrɛ hɔnɩ bɩsana, wɛr ƴũ fãgadaar do mana. 15Dɩ a dɛ̃ɛ warɛ nyɛ̃ɛ sa the le a jal.
Mɔ̃ Jeju mɩɩnanɩ lẽle kuun
(Mar 10:17–31; Lu 18:18–30)
16Le tibil bɩɛl tɔ pɔ a bule Jeju ayɩ: Dɩɩrdaar, anye dɔ thɩ̃ bʋɔɔkɛ teananɩ ɩ̃ cʋɛ a ˈlɛ yire khorr? 17Dɩ Jeju birsee: Mɔ̃gɩdo dɩ fa‐n bule mi gɩrɛraakɛ bʋɔnɔnɩ? Bɩɛl dɩbara haanle kɛ bʋɔnɔnɩ. Ado fɩ‐n ƴaalɛ fɩ ˈlɛ yire khorr, na hɩnɛ Thãgbaa jɔfʋsɔ. 18Dɩ bulee: Gɩmɔ̃ɔ jɔfʋ? Dɩ Jeju birsee aa: “Fa‐n kʋ tibiləˈ, fa‐n hana khɛ kpɩɩ ƴaalaˈ, fa‐n hana kũu kpɩɩ ƴaalaˈ, fa‐n yuəˈ, fa‐n sõso pɛ tibiləˈ,#Thɩɩ 20:13–16; Dət 5:17–20 19na cɔ afɩ thɩ na afɩ nɩ, dɩ na na dakha afɩ ˈwalãkha tibil mɔ̃ fɩ‐n nanɩ afɩbara.”#Thɩɩ 20:12; Dət 5:16; Lev 19:18 20Dɩ daɓolbirile sʋʋraa: Mɩ kɔɔ mãa nɩ ga jɔfʋraale fɛʋ nũu, anye sɛ mɩ cʋʋrɛra ˈlo? 21Dɩ Jeju sʋʋraa: Ado fɩ‐n ƴaalɛ fɩ bʋɔnɔ a ka, jala dolone gɩrɛ fɩ hananɩ, a gba hana bɔdara, dɩ mɛ̃ fa ˈlɛ lẽle thɩ̃ɛ Thãgbaa dʋɔ, agɩpɩ fɩ ɩ̃ fa‐n kpa mar. 22Ɔbɔɔkɛ daɓolbirile nɩɛnɩ ga thɩmɩɩle, a gbure ƴɩɛ da‐n kɔna, gɩdonɩ lẽledaar gɩ na sobɔr.
23Dɩ Jeju so ɔɔ kpãkpãadarara ayɩ: Sobɔr mɩ so nar, ƴũ fãgadaar dɩ lʋʋn khɩɩrɛ lẽlera. 24Mɩ bire ma‐n ˈloro wo: Nyɔɔmɛɛ lõokɛ a na lonɩ mɩsɩmɩ kaarra, ka yɔɔrɛ jɔ lẽlee Thãgba fãgadaar dɩ lõ. 25Mɔ̃ kpãkpãadara nɩɛnɩ gele, nʋɔ kpaa wɛr jɔɔ ka, dɩ wa‐n so ayɩ: Dɩ a thale gɩ, amɛ na punonenakɛ a na ˈlɛ taarɛ? 26Dɩ Jeju hɩɩn wɩ sa so war: Ado tɩbɩlala wer gɩ, thɩ̃ punonaa ga, sɩ Thãgba wer, ɔr n punone thɩ̃ɛ fɛʋ.
27Le Pɩɛr gba thɩmɩa a sʋʋraa: Dɩ hɩnɛ, sɛrɛ sɩ faarɛ thɩ̃ɛ fɛʋ sɩ sa‐n kpa far, anye sa yɩrɔ gɩrɛ kper? 28Dɩ Jeju birse wi: Sobɔr mɩ so nar, ado mɛr tibili Bikuunna gɩ, ɔbɔɔkɛ thɩ̃ɛ na birni na wɛbɩ ga‐n do daphaa, dɩ ma too ɩ̃ i dʋbɩ too paraakɛ dɔnɩ fãga too paar, nɛrɛɛkɛ kɔɔ kpaanɛ marnɩ na toore dakha fãga too pa yʋɔr yenyɔra, sɩ na‐n kɩɩlna Ɩjɩrayɛl ca yʋɔr yenyɔ.#Mat 25:31; Lu 22:30 29Dɩ tibil wo tibilikɛ ɩ̃ i na donɩ nɔɔ dɩ na faarɔ ɔɔ cɔ, a ɔɔ õkuunsɔ wɛ, a ɔɔ õkhɛrsɔ wɛ, a ɔɔ thɩ gɩ, a ɔɔ nɩ gɩ, a ɔɔ bɩsãsɔ wɛ, a ɔɔ lɛ gɩ, a na ˈlɛr thɩ̃ɛ jɔɔ a na ˈlɛna yire khorr dakha. 30Sɩ tibil jɔjʋɔɔkɛ dɔnɩ ƴɛ kʋla, wɛr na fien na do sɩka pɩra, sɩ sɩka pɩra jɔɔ n fi wɩ do ƴɛ kʋla.#Mat 20:16; Lu 13:30
अहिले सेलेक्ट गरिएको:
Matiə 19: LOBIRI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Society of Burkino Faso 1985.