Matyu 16
16
Far Ti Ɗama i Shok na Fo
1Myan shini ndai, Farisiyawa hu Sadukiyawa si yes kyel i Yeso, ɓa si mbas ti lul nyai, u kofus ɗama i shok na fo nin ta fit.
2Yeso matussi ni, “Na ango ti mas, hu nyai, ‘Kyel ti wa rinya ii muɗesi, ɓurti ri' cujwu ya,’ 3na a tamwen hu ni, ‘Kwai si wa shwaiti foon i uvuta, ɓurti ri' cujwu ɗak kikyau hwak.’ Hu shang ngga' i lak ti mute i ri' kiga', ɗak hu pwan mba ti ɗamam i shok na fo i myan i waya moti. 4Unai matussi ni, waya mufwashi hu mu zuruk! Hu far ti ɗing ti ɗama i shok na fo. Si wa kofsu ti ɗama nin kwa, si wa kofsu ii mashit Jona je.” Unai Yeso honus ta kyeli wis.
Hong i Farisiyawa hu i Sadukiyawa
5Myan ima si pis ta ɓwai mandek i yiiri, fe i ro ames si nitima ti folok. 6Yeso nyus, “Shingat hun ta si hong i Farisiyawa hu Sadukiyawa.”
7Si at si mai hai shak asussi, si ni, “Lak mai a ɓurti ka nitima ti foloki.”
8Yeso shang aɗeng ima si laki, lulus ni, “Hun som fati mulut ndyong! Ami kin hu findel si ɗiyai amu nyai, hu yes ti folok kwa ya? 9Hu ma ɗiri ta maɓing wi yes mwashi haa? Hu mbe' folok hara ɓurti ɗufal nggal hara haa? A cet awen hu suɓut ya? 10Ahun myan ima i cu ti ɗufal nggal ɓaras ti folok pyoron, a cet awen hu suɓut ya? 11Ami kin tyo hai ti maɓing i shangi nyai, i ma findel si folok hai kwa ya? Shingat hun ta si musut i hong i Farisiyawa hu Sadukiyawa.” 12Ɗak si ka'i nyai, ma findel a si hong ima si shwai ta folok wi kwa, a si kofiti i Farisiyawa hu Sadukiyawa.
Pita Lak ni Yeso a Kristi
13Myan ima Yeso wa ta ta' ti Kaisarya Filipi, Yeso lul fe i ro ames ni, “Ɗufal si lai ti Al i Maɗufal ii we ya?”
14Si matussi si ni, “Shini si ni a Jwon Mabatisma, shini si ni a Iliya, shini si ni a Yeremya, shini si ni a andek ta saa ti som i shit.”
15Lulus ni, “Hun hu ni yin aweya?”
16Siman Pita matussi ni, “A ha a Kristi, Al i DeeƁwe mapweti.”
17Yeso matussi ni, “Disyo' si ha hai, Siman al i Jona, a maɗufal kofa aɗeng mai kwa, a Dee i kyel fit. 18I ma laksa, a ha a Pita, afung ima i wa ta' ti cot amen i hai. Andok i mot, ndok u rafat ya kwa. 19I wa fasa mabuɗi i kaitat i fit. Shak aɗeng ima ha no' na naya si wa no'i ta fit, aɗeng ima ha hwet ya na naya, si wa hweti ya ta fit.” 20Unai ti' fe i ro ames ra, kan si lak ɗeng nyai yis a Kristi kwa.
Yeso Lak Mot Ames
21Tasi myan ani, Yeso fur lak ti fe i ro ames nyai, a kanggang u wa Yerushalima u wo shum hyang ta ra i tabwa', hu mbai i kocokak, hu som kofiti si anggut hai. A kpang si forus, mwen mataat u luk fit ti mupwet.
22Pita dulus tasi ɓwai, fur mbyar sussi nyai, “DeeƁwe u ngga ya, a Deembai! Mai aɗengi ma wa wisa kwa fweng.”
23Yeso hatat lak Pita ni, “Herana ya nati ha Shatan! Ha, a afung ti bukat na kyel amen. Ha ha mbe' ti a ɗamam i DeeƁwe kwa, a ɗamam i ɗufal kek.”
24Unai Yeso lak fe i ro ames ni, “Na ɗeng yis ɓweti yes kyel amen, a kpang u ɓwinggil haisus, u zan shanggam ames u koltifai asuni. 25Ɓurti shak maɗufal ima wis mupwet ames, ma wa duni. Maɗufal ima dun mupwet ames ɓursun ma wa wisi. 26Ahun ami mii ɗat i maɗufal na wis shak naya, ɗak dun mupwet ames ya? Ahun ami maɗufal ma wa fai ii foi mupwet ames ya? 27Al i Maɗufal ma wa yes tasi cinjangat i Dees hu som lu' ames, ma wa tal ti ɗufal ro ima masi shak. 28I ma laksu mwawei, shini ima si mangrai nanati mwashi, si wa ɗing ti Al i Maɗufal yis yes ta kaitat ames tawe, ɗak si mot.”
अहिले सेलेक्ट गरिएको:
Matyu 16: AlisIRonNT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© Wycliffe Bible Translators, Inc. and © The Nigeria Bible Translation Trust 2018