လက် 24
24
လွင် ဇဝ် ယေဆူ ဝီ ယိတ့် ဝီ အိမ်
1ဟဲ့ ဇမ် ဆီငဲ ဝါယ် ဆီငဲ ဒီလှဝ်၊ ဆိန့်ဝး စေဝ်၊ ဂေ အီဘိုန့် တွိုန် ဘော ဟာဝ် ဇမ် ဒူင် ကွယ် ကာဒဝ် ဘာရေဝ်။ ဂေ မိူဝ် ဂူင့် ဆီနမ် ပဲ့ ဟဲ့ ရဲန် အုန် ဂေ ခါ အာတ့်။ 2ဒေါ ဟဲ့ တး ဇမ် ဂေ ဒူင် တွိုန်၊ ဂေ ဘော ယိုဝ်၊ မာဝ် တာင် ပီ ဘ့လေး ဂေ နာ အာတ့် မာလုဝ်း ကာဒဝ် ဘာရေဝ်၊ တဲး န့ ကာဘိတ် ရိတ်၊ အာဝ် ဟူ မိုဝ်း။ 3ဒေါ ယိုဝ် ဂေ ကာဒဝ် ဘာရေဝ် ဟဲ့ န့ဝိုဝ်း ပါယ် တီ၊ ဂေ ဘော လိုပ် နာ ခဲင်။ ဂေ ယွတ်၊ ယီ တူ ယိုဝ် ဒုဝ် ဘူင့် ဇဝ် ယေဆူ။ 4ဂေ ဘော အာမ် ကာဆဝ်။ ဂေ တာ ယိုဝ် အီမာယ် အာ ဝီ ဟဲ့ ကွယ် ဒီ အာတ့် ဂေ။ ခြိုင် ဂါယ် ဟဲ့ လုယ် ရာဝ်။ 5ဂေ အီဘိုန့် ဘော ယုဝ် ကာဆဝ်။ ဂေ ဘော ခြိုပ်ခြဝ်။ ဒေါ ကြိုပ် ဂေ ပါယ် တီ၊ အီမာယ် ဂါယ် တွိုန် တဝ်း ဒီ ဂေ၊ “မှဝ် န့ ပါယ် ပီ တး ဟြေတ့် ဘေ ဒူအီ အိမ် ဒူင် ကွယ် ဒူအီ ယမ် နီ။း 6ဒူအီ ပီ ဟြေတ့် ဘေ တီ၊ အန် တူ ကွယ် ဒီ နီ။ အန် ဟဲ့ ဝီ ယိတ့် ဝီ အိမ်။ ဘေ လုဝ် လှုဝ်း ဂြုဝ်း ပီ တဝ်း အန် ဒီ ဘေ ဒေါ ဆီ ကွယ် ရိုမ် အန် ဒူပ် ဘေ ခဲင် အိူင် ဂါလီလေ။ 7အန် ဟဲ့ ဒွိုမ် တဝ်း ဒီ ဘေ၊ ‘ဂေ ဒီ အာပ် ဒူအီ အီ ဟဲ့ ဘဲန် ဂွန် ဒူအီ၊ တဲး ဂေ ဒူအီ မိုဝ်း မှာပ် ပွိုန် ဒီ အိုပ် အန်။ ဂေ ဒီ ငဝ်း ယမ် အန်၊ ဒိုက် အန် ဒီ ရွင့် ကာဝဲ့။ ဟီ နုဝ့် အူယ် ဆီငဲ၊ အန် ယီ ဒီ ဝီ ယိတ့် ဝီ အိမ်။’” 8ဒေါ အန် တီ ဂေ အီဘိုန့် တွိုန် ဝီ လှုဝ်း ဂြုဝ်း ပီ ဒွိုမ် ကာလာင် ဇဝ် ယေဆူ ဒီ ဂေ။
9ပန် တီ ဂေ ဝီ လေး ခဲင် ကာဒဝ် ဘာရေဝ်၊ ဟာဝ် ကာလာင် တူတ့် ပီ ယိုဝ် ဂေ တွိုန်၊ တဲး ဂေ ဒီဘဲ ဇဝ် ယေဆူ ဂိုဝ် ဒီ အူ ဝီ ဘော ဂေ ဂိုက် ဇဝ် ယေဆူ ဒွန် အီ ကော နပ် တူတ့် လွင် အန် တီ။ 10ဂေ အီဘိုန့် အီ ကာလာင် လွင် အန် တီ ဒီ ဂေ ဒူအီ တွိုန်၊ န့ မုး နာင် မာရီ အီ တး မိူင် မာက်ဒါလာ၊ ဘော နာင် ယုဝ်ဟာနာ၊ ဘော နာင် မာရီ အီ မုး မာ အာယာကူပ်၊ ဘော အီဘိုန့် အီ ဟဝ် အီ ကွယ် ရိုမ် ဒူပ် ဂေ။ 11ဂေ ဒီဘဲ ဇဝ် ယေဆူ ယီ ထာင်၊ အီဘိုန့် ဂေ တီ ကာလာင် ဂြုဝ်း ပီယေန့်။ ခုဝ်၊ ဂေ မိူဝ် တူ ညှိုမ် ပီ ခဲ ဂေ။ 12အာပေတာရူ ယီ ယိတ့် ကာဘ့လဲပ် ဟာဝ်၊ တး ဇမ် ဒူင် ကွယ် ကာဒဝ် ဘာရေဝ် တွိုန်၊ မုတ် ယွတ် နာ ခဲင်။ အန် ယိုဝ် ဘိက် ပီ ကာဘန် ဂေ ဒုဝ် ဘူင့် ဇဝ် ယေဆူ။ ဟဲ့ ဟွတ့်၊ အန် ဝီ ဝေန့် ဘော အာမ် ကာဆဝ် လွင် အန် တီ။#24:12 ဘပ် ဒေါ ဂုဝ် မင် မျုဝ် အာဝ် မိုဝ်း ကာဘက် နီ
လွင် ဒီဘဲ ဇဝ် ယေဆူ အာ ဝီ ဟာဝ် ဒူပ် န့တေန့်
13ဆီငဲ အန် တီ၊ န့ ယီ မိုဝ်း ဒီဘဲ ဇဝ် ယေဆူ အာ ဝီ၊ ဂါယ် ဟာဝ် ဒူပ် န့တေန့် အီ ဟာဝ် မိူင် အေမာအု။ မိူင် တွိုန် ဂါယ် မိူင် ယေရူဆာလဲမ်၊ ခြာဝ် န့တေန့် ကာတူင့် ကာဘက် အာ နာရီ။#24:13 ခဲင် ဘပ် ဘြိမ် န့ တဝ်း 60 ဆာထာဒီယာ အီ ဘဲန် မွက် 7 လွှက့် 14ဒေါ ဟာဝ် ဂါယ်၊ ဂါယ် ဘော လာယ် ကာမွုန် လွင် ဆာဒါင် ဒွန် မျုဝ် ပဲ့ ဟဲ့ ယိုဝ် ဂါယ် ဒေါ အာ အူယ် ဆီငဲ အီ ပွုန် တး။ 15ဒေါ လာယ် ကာမွုန် ဂါယ် ပါယ် တီ၊ ဇဝ် ယေဆူ တး ဇမ် ဒူင် ကွယ် ဂါယ် ဘော ကာလာင် ဒီ ဂါယ်။ အန် ဘော စုး ဒီ ဟာဝ် ရိုမ် ဒူပ် ဂါယ်။ 16ဂါယ် ဘော ယိုဝ် အန်၊ ဂါယ် ယီ တူ နပ်၊ အန် မုး ဇဝ် ယေဆူ။
17ဇဝ် ယေဆူ ဒီမွှတ် ဂါယ် တဝ်း၊ “လွင် မာဆေ ပီ လာယ် ကာမွုန် ဘာယ် ဒေါ ဟာဝ် ဘာယ် ဒူပ် န့တေန့် နီ။း” ဒူအီ အာ ဝီ တွိုန် ဘော ဂိူတ် အူ ကာစန်၊ န့ လိုဝ်း၊ ဂါယ် မိုဝ်း နဝ်း က့လိုဝ်။
18ဒူအီ အူ ဝီ အီ စိူဝ် အာခါလေအုဝ်ဖာ၊ အန် တဝ်း၊ “ဒူအီ ဘော မိူင် ခဲင် မိူင် ယေရူဆာလဲမ် ဟဲ့ နပ် လွင် အန် တီ။ ဟဲ့ မှာန်၊ မဲ အူ ဝီ မုး ခဲတ့် အီ တူ နပ် လွင် ဒွန် မျုဝ် ပဲ့ ဟဲ့ ဘူင် ဂေ အာ အူယ် ဆီငဲ အီ ဟဲ့ ပွုန် တး။း”
19“မာဆေ န့ မုး။း” ဇဝ် ယေဆူ ဝီ ဒီမွှတ် ဂါယ်။ ဂါယ် ဝီ တဝ်း၊ “န့ မုး လွင် ပဲ့ ဟဲ့ ဘူင် ဒူအီ ဒီ အာယေဆူ၊ အီ တး မိူင် နာဆာရေတ့်။ အန် ဟဲ့ မုး ဒူအီ အီ ဘျာန် ဂြုဝ်း ဇဝ်ဖြာ။ အန် ဟဲ့ ဘူင် နာ မွှိုမ် အာမ် ကာဆဝ် ဘော ကာလာင် ဂြုဝ်း အီ မိုဝ်း ပွုန် တာင် ပီ ဒွါ ဇဝ်ဖြာ ဒီ အန်။ ဒူအီ ဘောကာဂ့လျီတ် ဟဲ့ နပ် လွင် အန် တီ။ 20န့ ဘော မုး ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ကာညာ အီ အိုပ် မိူင်၊ ဂေ ဟဲ့ အာပ် အန် ဒီ ဒူအီ ဟဝ်၊ တဲး ဂေ ဘော ငဝ်း ယမ် အန်။ ဂေ မိူဝ် တဲး အန် ယမ် ဒဲင် ရွင့် ကာဝဲ့။ 21ခါ အာတ့် ယေ ဒီဘဲ အန် ဟဲ့ ထာင် အန် ဒီ ချွတ် ဂေ ဒူအီ အီဆာရေလ။ အာတိုဝ် ဟဲ့ ပွိုန် အူယ် ဆီငဲ ဝါယ် ငဝ်း ဂေ ဒီ အန်။ 22န့ ယီ မိုဝ်း ဂေ အီဘိုန့် ခဲင် ဖိုင် ယေ မင် အီ၊ ဂေ ဘော တဝ်း နာ မွှိုမ် အာမ် ကာဆဝ် ဒီ ယေ။ ဆိန့်ဝး စေဝ် ဒေါ လေး ဟာဝ် ဂေ ဒီ ဘာရေဝ်၊ 23ဂေ တူ ယိုဝ် ဒုဝ် ဘူင့် အန်။ ဂေ ဝီ ဝေန့် ကာလာင် လွင် အန် တီ ဒီ ယေ။ ဂေ တဝ်း၊ ဂေ ဟဲ့ ယိုဝ် အာမူ အာမာတ် ဇဝ်ဖြာ အီ တဝ်း၊ အန် ဟဲ့ ဝီ ယိတ့် ဝီ အိမ်။ 24ဂိုက် ယာယ် မင် အီ ဘော လိုပ် ခဲင် ကာဒဝ် ဘာရေဝ်၊ ဂေ ဘော ယိုဝ် တူတ့်၊ ဟဲ့ ပီ ပီ တဝ်း ဂေ အီဘိုန့် တွိုန်။ ဂေ ယီ တူ ယိုဝ် ဒုဝ် ဘူင့် အန်။” ဂါယ် ဟဲ့ ဟွတ့် တဝ်း ပါယ် တီ ဒီ ဇဝ် ယေဆူ။
25ဒေါ အန် တီ ဇဝ် ယေဆူ တဝ်း ဒီ ဂါယ်၊ “အိုယ်၊ ဘေ အာမျုဝ် ဒူအီ ဟဲ့ ရိုဝ် ကာဆဝ်၊ နဝ်း ဘေ အာဝ် ငှိုယ် ညှိုမ် ဂြုဝ်း ပီ ဒွိုမ် တဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ။ 26ဘာယ် တူ နပ်၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် ဟဲ့ လုဝ် ခမ် ဒုက် ပါယ် တီ။ ဟဲ့ ဟွတ့်၊ အန် ဒီ ပွိုန် အာဖုင် ဒင်ခုဝ် အန်။” 27ပန် တီ ဇဝ် ယေဆူ စုး ဒီ ကာလာင် တူတ့် ဒွန် မျုဝ် ပီ ဒဲမ် အုန် ခဲင် ဘပ် ဇဝ်ဖြာ လွင် အာဆာက် အန်၊ အူ ဆိန့် ဒေါ ဒဲမ် ဒါ အာမုဝ်ဆဲ ကော ဇမ် ပီ ဒဲမ် ဂေ ဒူအီ အီ ဘျာန် ဂြုဝ်း ဇဝ်ဖြာ ဒွန် အီ၊ အန် ဝီ ကာလာင် တူတ့် ဒီ ဂါယ်၊ တဲး ဂါယ် နပ်။
28ဒေါ တး ဇမ် ဂါယ် ကာတတ် မိူင် ဒီ ဟာဝ် ဂါယ်၊ ဇဝ် ယေဆူ ညိုင်ရာင် ဒီ ဟာဝ် ကာလုဝ်း မိူင် တီ။ 29ဂါယ် ယီ မှာန့်၊ တဲး အန် ကွယ် ရိုမ် ဒူပ် ဂါယ် ခဲင် မိူင် တီ။ ဂါယ် တဝ်း၊ “တဲး မဲ ကွယ် ရိုမ် ဒူပ် ယာယ်၊ ဆီငဲ မိူဝ် ဒီ ဂေတ့်။ ပြဲ မိူဝ် ဟဲ့ ရိန် ဒီ အပ်။” ဟဲ့ ဟွတ့် ကာလာင် ပါယ် တီ၊ ဇဝ် ယေဆူ ဘော ဟာဝ် ကွယ် ရိုမ် ဒူပ် ဂါယ်။
30ဒေါ ကွယ် အန် ခဲင် ကာင် ဂါယ်၊ အာတ့် ဟူမ် ရိုမ် ဂေ၊ ဇဝ် ယေဆူ ဒိုဝ်း ခါမုန်၊ ဒါင် ဂုင် ဂေဇူ ဒီ ဇဝ်ဖြာ၊ ဘော ကာဘက် ခါမုန်၊ ဒွါ ဂေ ဟူမ်။ 31ဒေါ အန် တီ န့ ပီ ငါယ် ဂါယ် ဟဲ့ ဘ့လာင်။ ဂါယ် ကော နပ် အန် မုး ဇဝ် ယေဆူ။ ဒေါ အန် တီ ဇဝ် ယေဆူ ယီ ဟြာယ် ဒူင် ကွယ် ဂါယ်၊ အာဝ် ဟူ ပွိုန် ယိုဝ် အန်။ 32ဂါယ် ယီ လာယ် ကာမွုန်။ ဂါယ် တဝ်း၊ “မှဝ်၊ ဒေါ ကာလာင် အန် ဂြုဝ်း၊ ဒေါ ဟာဝ် အာယ် ဒူပ် န့တေန့်၊ ဒေါ မာနုဝ် အန် လွင် ဘပ် ဇဝ်ဖြာ တဲး အာယ် နပ်၊ န့ ဟဲ့ ဘဲန် နဝ်း ခူယ် ဘော ဘ့လိူင် ဒီ နဝ်း။”
33ဝါယ် အန် တီ ဒူအီ အာ ဝီ တွိုန်၊ ဂါယ် ဝီ ဝေန့် ဇမ် ခဲင် မိူင် ယေရူဆာလဲမ်။ ဂါယ် ကာတုန့် ဂေ ဒီဘဲ ဂိုဝ် ဒီ အူ ဝီ အီ ကွယ် ရိုမ် ဒူပ် ဒူအီ ဟဝ်။ 34ဂေ ဝီ တဝ်း ဒီ ဂါယ်၊ “န့ ဟဲ့ မှာန် အာခါခ်ု၊ အန် ဇဝ် ဟဲ့ ဝီ ယိတ့် ဝီ အိမ်။ ဟဲ့ မုး၊ အာဆီမူန် ဟဲ့ ပွိုန် ယိုဝ် အန်။” 35ဒေါ အန် တီ ဂါယ် အာ ဝီ ဝီ စုး ဒီ ကာလာင် ပီ ယိုဝ် ပီ ထူမ် ဂါယ် ဒေါ ဟာဝ် ဂါယ် ဒူပ် န့တေန့် တွိုန်။ ဂါယ် ဘော ခဲ လွင် ဟဲ့ နပ် ဂါယ် အန် မုး ဇဝ် ယေဆူ ဒေါ ကာဘက် အန် ခါမုန်၊ ဒွါ ဒီ ဂါယ်။
လွင် ဇဝ် ယေဆူ ကာပ့လုး ဒီ ဒီဘဲ အန်
36ဒေါ ကာလာင် ဂါယ် လွင် အန် တီ၊ ဇဝ် ယေဆူ ကာပ့လုး တး ဒီ ကာတဲ ဂေ။ အန် တဝ်း ဒီ ဂေ၊ “တဲး ဘေ မိုဝ်း နဝ်း ဂျီတ်။”
37ဂေ ယီ ဟဲ့ ကာစွာ ဘော ယုဝ် ကာဆဝ်။ ဂေ ထာင်၊ ဂေ ဟဲ့ ယိုဝ် ကာပြဝ်။ 38ဇဝ် ယေဆူ ဝီ တဝ်း ဒီ ဂေ၊ “မှဝ် န့ ပါယ် ပီ တူ ညှိုမ် ဘေ။း မှဝ် န့ ပါယ် ပီ မိုဝ်း ဘေ နဝ်း ကာလိင် ကာလဲ။း မှဝ် န့ ပါယ် ပီ ထာင် ဘေ ပါယ် တီ။း 39တဲး ဘေ ယွတ် ဒဲ အုဝ် ဘော ပ့လဝ် အုဝ် နီ၊ တဲး ဘေ နပ်၊ န့ မုး အုဝ်။ တဲး ဘေ ပါ ဒုဝ် အုဝ် နီ၊ တဲး ဘေ နပ်၊ ကာပြဝ် တူ မိုဝ်း ယင် ပီ အုဝ်။”
40အန် ဟဲ့ ဟွတ့် တဝ်း ပါယ် တီ၊ အန် ဘော ဘျ တဲး ဂေ ယွတ် ဒဲ ဂေ ပ့လဝ်။#24:40 ဘပ် ဒေါ ဂုဝ် မင် မျုဝ် အာဝ် မိုဝ်း ကာဘက် နီ 41ခုဝ်၊ နဝ်း ဂေ ဟဲ့ ဒါခိုယ် ဘော အာမ် ကာဆဝ်။ ဂေ ကော ဟူ ဝီ ညှိုမ် ငါယ် ဂေ။ ဒေါ အန် တီ ဇဝ် ယေဆူ ဝီ တဝ်း၊ “ဘေ မိုဝ်း ပီ ဒီ ဟူမ် ဒွါ ဒီ အုဝ်။း” 42ဟဲ့ ဟွတ့်၊ ဂေ ဝီ ဒွါ မာဂါ ဂိုမ် ဒီ အန်၊ တဲး အန် ဟူမ် အူ ဒုဝ်။ 43ဇဝ် ယေဆူ ဒိုဝ်း ဟူမ် မာဂါ တီ၊ တဲး ဂေ ဒွန် အီ ယိုဝ်။
44အန် တဝ်း ဒီ ဂေ၊ “ဒေါ ကွယ် ရိုမ် အုဝ် ဒူပ် ဘေ၊ အုဝ် ဟဲ့ ဒွိုမ် ကာလာင် ဒီ ဘေ လွင် ပီ ဒဲမ် အုန် ဂေ ဒူအီ ခဲင် ဘပ် ဇဝ်ဖြာ လွင် အုဝ်။ ဒွန် မျုဝ် ပီ ဒဲမ် ဒါ အာမုဝ်ဆဲ အုန် ခဲင် ဘပ် ဒါရာ ဇဝ်ဖြာ ဘော ပီ ဒဲမ် ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ပီ ဒဲမ် အုန် ဂေ ဒီ ဘပ် ပီ မှုဝ် ထမ်၊ ခဲ့ ပီ ဒဲမ် ဂေ လွင် အုဝ်၊ န့ ဒီ ဘဲန် တူတ့် ခဲ့ ပီ တဝ်း ဂေ တီ။”
45ပန် တီ အန် ဝီ ကာလာင်၊ တဲး န့ လိုဝ်း ဆီဖဝ် အန် ဒီ နဝ်း ဂေ လွင် ပီ ဒဲမ် ခဲင် ဘပ် ဇဝ်ဖြာ။ 46အန် တဝ်း ဒီ ဂေ၊ “ဟဲ့ မုး၊ ပီ ဒဲမ် ဒူအီ ခဲင် ဘပ် ဇဝ်ဖြာ။ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် လုဝ် ခမ် ဒုက်။ ဟဲ့ ဟွတ့်၊ အန် ဒီ ယမ်။ ဝါယ် အန် တီ အူယ် ဆီငဲ၊ အန် ဒီ ဝီ ယိတ့် ဝီ အိမ်။ 47ဘေ ယီ လုဝ် ဒိုဝ်း ပွုန် အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဟဲ့ ဟွတ့်၊ ဆာဒါင် လွင် ဒူအီ ဟဲ့ ပွိုန် ဝဲန် နဝ်း ဘြိမ် ဂေ၊ ဘော ဆာဒါင် လွင် ဇဝ်ဖြာ ဂဝ်း ဝဲန် မှာပ် ဒူအီ၊ ဘေ လုဝ် ကာလာင် ဒီ ဒူအီ ဒွန် မျုဝ်။ ဘေ ယီ လုဝ် စုး ဒီ ကာလာင် ခဲင် မိူင် ယေရူဆာလဲမ် ဒီ အာတ့်၊ ဟဲ့ ဟွတ့်၊ ဘေ လုဝ် ဟာဝ် ဒွန် ပ့လုဝ့်။ 48ဘေ မုး ဒူအီ အီ ဟဲ့ ယိုဝ် ဒွန် မျုဝ်၊ ဘေ မိူဝ် လုဝ် ကာလာင် ဒီ အီ ဟဝ် လွင် အန် တီ။ 49ကာဒိက် ဆတ်ဇာ ပီ ဒွါ ဂုန့် အုဝ် ဒီ ဒူအီ၊ အုဝ် ဒီ ဒွါ ဒီ ဘေ။ ဘေ ယီ လုဝ် ကွယ် ခဲင် မိူင် နီ၊ နှဝ့် အာခြာဝ် ဒီ ဒွါ ဇဝ်ဖြာ ပွုန် အန် ဒီ ဘေ။”
လွင် ဇဝ် ယေဆူ ဟုဝ့် ဂါင်ဟြာဝ်
50ဝါယ် အန် တီ ဇဝ် ယေဆူ ယဲတ့် ဒီ အာတ့် ဂေ၊ ယဲတ့် ဂေ လေး ခဲင် မိူင် တွိုန် တး ဇမ် ရဝ် ဘေထာနီ။ ဒေါ အန် တီ အန် ဘော စုဝ့် ဒဲ အန်၊ မွင့်ကာရာ တဲး ဒီ ဂေ။ 51ဒေါ မွင့်ကာရာ တဲး အန် ဒီ ဂေ၊ အန် လေး ဒူင် ကွယ် ဂေ။ ဇဝ်ဖြာ ယီ ဒိုဝ်း အန် ဟုဝ့် ခဲင် မိူင် ဂါင်ဟြာဝ်။ 52ဂေ ဘော ကြိုပ် ဇဝ် ယေဆူ။ ဟဲ့ ဟွတ့်၊ ဂေ ဝေန့် ခဲင် မိူင် ယေရူဆာလဲမ်။ နဝ်း ဂေ ယီ ဒါခိုယ် ကာဆဝ်။ 53ဒွန် ဆီငဲ ဂေ ကွယ် ကာဇု ခဲင် ဟုဝ် ဇဝ်ဖြာ၊ အိူပ် ဇဝ်ဖြာ ဆေဆေ။
अहिले सेलेक्ट गरिएको:
လက် 24: pce
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023, Wycliffe Bible Translators, Inc. All rights reserved.