Matthieu 3
3
Mane nameekéda Jean‐Baptiste
(Bono na Marc 1:1–8, Luc 3:1–18, Jean 1:19–28)
1Gô ndéô nene Jean‐Baptiste amaviga eekéda gô tsenge émagasani éndé gô Judée. 2Ameekéda mbe: Koani mitéma mianyô mbe nôngaba wene mônongo oma gôébégô ôkumu aNzambé ôweseyi na gôndé wa n’anyô. 3Esaïe môpandôédi ambeego amatasa maNzambé amavovo mbe:
Ogi amôma ôamugana gô tsenge émagasani mbe:
Baani nzéa éaKumu
Tsimamédani buedi nzéa yedi.
Mômane amaamuganani te amuene Jean.
4Jean amaata madego mamagomu na miyo mianyama étetu mbe chameau. Amaataka v’oninge édata éagégôbôkô. Amaaka te tônda na ômbo. 5Asi Jérusalem, na dôta asi tsengene nyetso aJudée na ane amadigaa gô kôbangô ambéyi étetu mbe Jourdain, amakea na gôndé Jean. 6Gô mabégô maô mabévani môma na môma ameeséda amuene va pingô yoma na amadiia bateme gô mbéne étetu mbe Jourdain.
7Vameena Jean pingô yApharisien na yAsadducéen ahviga gôébatésu, amavovo n’ahngô mbe: Anye nôgono na mbigé. ?Nômenya mbe nôngabusuga ôpisa aNzambé ôvigani‐a? ?Nôékédu nane na ndaa? 8Gabôta géétété samôsôba miônda miedi miamisôba, anye kusédani ésima éamisôba étubéda mbe nômakoa mitéma gôéba wene mônongo oma. 9Anye nôanyepeda anyene mbe: we te ana aAbraham. Nônatasa gô éne. Okô Nzambé anyôngéyiô ana aAbraham, andé na ngudi yekoa mataé mema maka ana aAbraham. 10N’atsatsee géwangéô géka va mitamba mieetété. Eététée éetso ésabôta miônda miamisôba éngawangô na éngagunyu gô soto. 11Me nanôbatésa na meba gôétubéda mbe anye nôkoi mitéma mianyô. Ivô gô ngimami gôviga muene anganôbatésa na Gédidi SaNzambé na soto. Ngudi yedi diôtéa dine yami. Gétôkôtôkô ôgoeyee, géôté môtsé.#3:11 G’ôgi aô Jean amagunya tsava éapondu. Me te gétôkôtôkô. Angô te môtsé. Ivô tsaba pengo gétôkôtôkô. Nandé ti gô tsina asangô. 12Angô te mônongovo ga môma ookôa pôtô anganôtôa étutu na angakétéga pôtôye gô magobo.#3:12 Jésus amateta mibiemie na étutue. Ivô angatumba étutue gô soto géseemakani.
Jean‐Baptiste amabatésa Jésus
(Bono na Marc 1:9–11, Luc 3:21–22)
13Jésus amanôtôga gô Galilée gôékea na gô mbéyi étetu mbe Jourdain. Amakea na gôndé Jean gôébatésu n’edi. 14Ivô Jean amakanéga émôkina mbe: Me nandé na ngudi yeviga gôébatésu n’ewe. ?Ivô éwe yôviga gôébatésu n’ami‐a? 15Jésus amaabéa angô mbe: Ebaké vita nane. Tôéndé te éne étôtômu na Nzambé.
Na Jean asiombé ékina. 16Vamabatésu Jésus, amakusa gô mbéyi. Na vane, ôbee ômatatôga na Jean ameena Gédidi SaNzambé gésuma ga ménga na vandé Jésus. 17Ogi ômookanô ôvovo g’ôba mbe: Odôô te muanami amôtôma amiso. Me namônyôngéô na nzoo na gô môtéma.
अहिले सेलेक्ट गरिएको:
Matthieu 3: TSV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Alliance Biblique du Gabon (Bible Society in Gabon) 1983