लुका 2
2
येसुक् जल्म
(मत्ति १:१८-२५)
1उ बेलाइ रोमक् माहाराजा अगस्तसे#२:१ माहाराजा अगस्तसे: मुल भासाइ कैसर अगस्तसे लेख्ल रहेला ओक्राक् पुराय राज्जेभोरिक् जम्मा मानुसलकक् गिन्ति#२:१ मानुसलकक् गिन्ति: रोम सामराज्जेक् जम्मा देसलक् आउँ पर्देसलकक् सासन कर्बाक् नियम बानाबालाइ या सुधारक् लागि खास बिबरन लेबाक्नि कर्बाक् काम। कर्बाक्नि नाउँ लेखाबाक हुकुम देलक्। 2यि जम्माहिंसौ पैल्हाकर्ल मानुसलकक् गिन्ति रैल्हकुन्। उ बेलाइ कुरेनियस सिरिया पर्देसक् बारा-हाकिम रैल्हक्। 3जम्मा मानुसलक् आफ्निक्-आफ्निक् नाउँ लेखाबाक्नि बाज्या-बाराजुलकक् पुर्खाक् सहरै जाइलुहुन्।
4उ बेलाइ योसेफसेहे गालिलक् नासरत बाज्ल सहरइ बसै। उहेसैर्हे उ नासरतक्भटे राजा दाउदक् सहर बेथलेहेमै जाइलक्, किसाबुने उ दाउदक् खलकिहिंक् सन्तान रैल्हक्। 5योसेफक्सङ्हिं मरियमक् बिहाउ कर्बाक् कहिन् छिनाल सैर्हे ओहिं मरियमलाइ आको आफ्निहिक्सङ्हिं लेहिन् जाइलक्। उ बेलाइ मरियमक् धिंर्ह् रैल्हकुन्। 6उखर्हा बेथलेहेमिहिंमा भेलटाकै मरियमक् छाउरा पाबाक् बेथा लाग्लकुन्। 7आउँ ओहिं आफ्निक् जेठो बेटायक जर्मालक् तसौ ओक्रालाइ लुगाक् फाल्साइसम् सेर्पिबानाइ गाइ-गोठक् ढोनमाहा सुतालकुन्। किसाबुने उखर्ह्वाइ कुन्हुँ घरलकै बस्बाक् ठाउँ नहिंपाइलुहुन्।
स्वर्गोदुत आउँ भेंरा चह्र्वा
8बेथलेहेम सहरक् लज्जिकै चौरिमाहा चह्र्वालके भेंरालक् गोठाहिन् रातेभोरि बस्ल रैल्हुहुन्। 9परमपर्भुक् स्वर्गोदुत उखर्ह्वाक्ठालाइ देख्वार पोर्लोक् आउँ परमपर्भुक् उँजत उखर्ह्वाक् चारौपाखा चम्कलकुन्। यि देखिहिन् भेंरा चह्र्वालक् डरे थर्थराबा ठाल्लुहुन्। 10तसौ स्वर्गोदुते उखर्ह्वालाइ बोल्लाहा, “बुन् डराहो! किसाबुने मुँइ जम्माय मानुसलकलाइ आनन्द कारालाहार एक्दमे खुस्सिक् खभर लेहिन् तोहोराठालाइ आइल रहम्ना। 11यटे सुनह, दाउद जर्मल सहरै आजु तोहोराखर्ह्वाक् निम्ति मुक्ति देलाहार राजा जर्मल रहैस्। उहेय परमेस्वरे चुन्ल खिरिस्ट पर्भु हो। 12तोहोराखर्हाइ बालखलाइ फाल्साइसम् सेर्पल आउँ गाइ-गोठक् ढोनइ सुताल भेंटाहोला आउँ यिहेभटे तोहोलेके ओक्रालाइ चिन्भा पारहला।”
13उहे बेलाइ ओर्को आको धेरेक्कुर स्वर्गोदुतलक् ओछि देख्वार पोर्लुहुन् तसौ परमेस्वरक् पर्सन्सा कर्तिहि उखर्ह्वाइ यन्हिं गित्काबा ठाल्लुहुन्,
14“सेब्भुइसौ उप्रै स्वर्गोइ बस्लाहार परमेस्वरलाइ जइजइ भेउस् आउँ पिर्थिबिमा जुन् मानुसलकक्सङ्हिं परमेस्वर खुस्सि रहैस्,
उखर्ह्वालाइ सान्ति भेउस्।”
15तसौ स्वर्गोदुतलक् स्वर्गोइ फर्किहिन् जाइलुहुन् आउँ चह्र्वालके आफ्नि सङ्-सङ्मा बाज्लुहुन्, “लु, असौ हामि परमपर्भुइ बाज्ल कहिन् बेथलेहेमै दिठाबा जाहुँक्।”
16उखर्हा दग्रा-दग्रि कर्ते जाइलुहुन्। ओछि उखर्हाइ मरियम, योसेफ आउँ बालखलाइसेहे गाइ-गोठक् ढोनमाहा सुताहिन् धर्ल भेंटालुहुन्। 17चह्र्वालके बालखक् बिसइमा उखर्ह्वालाइ बोल्लो कहिन् जम्मा मानुसलकलाइ सुनालुहुन्। 18उ कहिनलक् सुन्लाहार जम्मायजेना छक्क पोर्लुहुन्। 19मरियमेसेहे यि जम्मा कहिन् भिट्रक् मनै गुनिहिन् मनिहिंमा धर्लक्। 20भेंरा चह्र्वालक् स्वर्गोदुतलके बोल्लोहिंक् परौ सुन्बा आउँ देख्बा पाइटे रामाइ-रामाइ परमेस्वरक् महिमा आउँ पर्सन्सा कर्ते फर्कलुहुन्।
बालखक् नाउँ येसु धर्ल
21आठ-दिनक् दिनै बालखलाइ परमेस्वरे इस्राएलिलकलाइ देल नियमक् अनुसार खतनाक्#२:२१ खतनाक्: बालखक् सरिलक् टुप्पाक् भागक् छाला काटिहिन् घुघाबाक् कामलाइ खतना बाजेला। यि सेहे परमेस्वरे अब्राहामलाइ देल आग्या हो। जम्माय यहुदि मानुसलकक् पुर्खर जर्मल बालखलकलाइ आठ दिन पुग्नेसौ खतना कर्बा पोरेथ्। चलन पुरा कर्लटाकै ओक्राक् नाउँ येसु धरिदेलिहिंक्, यि नाउँसेहे येसु माँइकक् पेटइ आबाइसौ पैल्हेहि स्वर्गोदुते धर्बाबोल्ल रैल्हाहा।#लेबि १२:३; लुका १:३१
मन्दिरमाहा येसुक् बाल अर्पन
22मोसाइ देल परमेस्वरक् नियमइ बाज्लहिक्परौ जख्नि उखर्हाक् चोंखो भेबाक् दिन#२:२२ चोंखो भेबाक् दिन: यहुदि अइमाइलके बाच्चा जर्मानेसौ चालिस दिन पुग्नेसौ माटेन् मन्दिरमाहा जाबा पाथ, आउँ मोसाक् नियम अनुसार भोग चार्हाबा पाथ। पुग्लाहा, येसुक् माँयक आउँ बापिहिके ओक्रालाइ यरुसलेमक् परमेस्वरक् मन्दिरै अर्पन कर्बा लेग्लिहिंक्, 23किसाबुने परमपर्भुक् नियमै लेख्ल रहेला, “जम्माहिंसौ आगारि जर्मल जेठो पुर्खर छाउरालकलाइ परमेस्वरमाहा पबित्र ठान्हेला।”#प्रस्थान १३:२,१२ 24उहेरङ् करिहिन् परमपर्भुक् नियमै बाज्लहिक् ठिकन् घुग्घुक् अथबा पर्वाक एक्जोर बाच्चा आको भोग चार्हाबा पोर्लाहार चलन रैल्हकुन्।#लेबि १२:६-८
25उ बेलाइ सिमियोन बाज्ल मानुस यरुसलेमै बसइ। उ धर्मि मानुस रैल्हक् आउँ परमेस्वरक् सेवा करइ। ओहिं इस्राएलिलकलाइ बाँचालाहार मानुसक् पैंदा दिठाहिन् बस्ल रैल्हक् आउँ पबित्र आत्मा ओक्राक्ठालाइ रैल्हकुन्। 26परमपर्भुइ पाठाल मुक्ति देलाहार खिरिस्टलाइ नहिं देख्बासौ तुँइ नाँमोरोस् बाजिहिन् पबित्र आत्माइ ओक्रानि आगारिय जानाल धर्लकुन्। 27पबित्र आत्माइ चालाहिन् सिमियोन परमेस्वरक् मन्दिरमाहा जाइलक्। उहे बेलाइ परमेस्वरक् नियम पुरा कर्बाक्नि मरियम आउँ योसेफ आको बालख येसुलाइ लेहिन् परमेस्वरक् मन्दिरमाहा आइलुहुन्। 28सिमियोने बालख येसुलाइ कोख्लामाहा लेहिन् परमेस्वरक् पर्सन्सा कर्तिहि यन्हिं बाज्लक्,
29“अ परमपर्भु, तोरा आफ्निक् कहिन् पुरा कर्ल रहस्ला,
असौ मुँइ तोरा चाकरलाइ सान्तिसौ मोर्बाक्नि दे।
30किसाबुने तुँइ पाठाल मुक्ति देलाहारलाइ मुँइ आफ्निक् आँखे देखम्बे,
31तुँइ ओक्रालाइ सेब्भ्रोउ जातक् मानुसलके देखुस् बाजिहिन् पाठाल धर्सिला,
32उहेय ओर्को जम्मा जातक् मानुसलकलाइ तोरा पैंदा देखालाहार उँजत भेओगे,
आउँ उहेय तोरा इस्राएलि जातलकक् महिमा कारालाहार भेओगे।”#यसैया ४२:६; ४९:६; ५२:१०
33बालखक् बिसइमा सिमियोने बाज्ल कहिन् सुनिहिन् ओक्राक् माँयक आउँ बापेक् दङ् पोर्लुहुन्। 34सिमियोने उखर्हालाइ आसिक् देहिन् येसुक् माँइकलाइ बोल्लकुन्, “यटे सुन्, इस्राएलमाहा धेरे मानुसलकलाइ बाँचाबाक् आउँ नास कर्बा बाजिहिन् परमेस्वरे तोरा बेटाहिरलाइ चुन्ल धरैस्। यि उहे परमेस्वरे देखाल चिन्हो बन्ल रहैस्, जक्रालाइ थुप्रोहि बिरोध करिहिन् आफ्निक् मनक् बिचार खोलोट्थ्ला। 35तसौ तोरा हिर्दाया तरवाले छेंर्लक् परौ पिराइ छिया-छिया भेस्ला।”
36परमेस्वरक् मन्दिरै हन्ना नाउँ भेल एक्जेना बुढ्रि अगमबादिनि रैल्हक्। उसेहे आसेर खलकक् फनुएलक् बेटेक रैल्हक्। बिहाउ भेल सात बर्सहिंमा उ बिध्वा भेल रैल्हक्। 37आउँ उ चौरासि बर्स जट्का पुग्ल रैल्हक्। उसेहे परमेस्वरक् मन्दिरिहिमा पाराथ्ना आउँ बर्त बसिहिन् रातदिन परमेस्वरलाइ पुजिहिन् बसै। 38ओहिं आको मरियम आउँ योसेफक् छेंओइ जाहिन् परमेस्वरलाइ धन्यबाट चार्हालक् आउँ यरुसलेमक् छुट्काराक् लागि पैंदा दिठालाहारलकलाइ येसुक् बिसइमा सुनाटे बुल्लक्।
मरियम आउँ योसेफ नासरतै फर्कलुहुन्
39परमपर्भुइ देल नियमे बोल्लोक् परौ कर्बा पोर्लाहार जट्का सेब्भ्रोउ काम करिसक्नेसौ योसेफ आउँ मरियम येसुलाइ लेहिन् गालिलक् आफ्निहिंक् नासरत बाज्ल सहरै फर्कलुहुन्।#मत्ति २:२३ 40बालख येसु बर्टे जाहिन् बल, बुद्धि आउँ ग्यानमाहा भोर्टे जाइलक् आउँ परमेस्वरक् अनुग्रह ओक्राक् उप्रै पोर्लो रैल्हकुन्।
बालख येसु परमेस्वरक् मन्दिरै जाइल
41येसुक् माँयक आउँ बापेक् बर्स्याउनि छुट्काराक् दिन बाज्ल पाबन मानाबालाइ यरुसलेम जाथ।#प्रस्थान १२:१-२७; ब्यबस्था १६:१-८ 42येसु बार्ह बर्स भेलबेलाइ येसुलाइ सङ्हिं लेहिन् उखर्हाक् चलन अनुसार पाबन मानाबा जाइलुहुन्। 43पाबन मानाहिन् सकिबानाइ उखर्ह्वा घर फर्कलुहुन्। येसुसेहे यरुसलेमिहिमा बस्लक्, तर यि कहिन् ओक्राक् माँयक-बापिहिके थाहाय बोइने पाइलुहुन्। 44येसु ओक्राक् कुन्हुँ सङ्लकक्सङ्हिं आइतिहि रहैस् ना बाजिहिन् ठान्हिबानाइ उखर्ह्वा दिन भोर्कोक् पैंदा हिंठ्लुहुन्। बियार पोरिहिन् सकेटौ नहिंआइल देखिहिन् आफ्नि मानुसलक् आउँ सङ्लकक् ठालाइ रहैस् ना बाजिहिन् ओक्रालाइ खोज्लिहिंक्। 45बेटायथालाइ कच्छुहु आको नहिं पाइनेसौ उखर्हाइ ओक्रानि खोज्बा फेरि यरुसलेमक्पाखा जाइलुहुन्। 46खोज्ते-खोज्ते तिन दिनमाहा बल्बलि उखर्हाइ ओक्रालाइ परमेस्वरक् मन्दिरै भेंटालिहिंक्। येसु धर्म-गुरुलकक्सङ्हिं बसिहिन् उखर्हाक् कहिन् सुन्तिहि आउँ सोर्तिहि बस्ल रैल्हक्। 47ओक्राक् ग्यान-बुद्धि आउँ ओहिं कहिनलकक् जुबाप देल देखिबानाइ जम्माय छक्क पोर्लुहुन्। 48ओछि बेटाहिकलाइ ओरङ् कर्ल देख्ते येसुक् माँयक-बापेक् आको छक्क पोर्लुहुन्। तसौ मरियमे बेटाहिकलाइ बोल्लोकुन्, “मोरा छाउरा! तुँइ यि किस् कर्ल? दिठाउ तोरा बापेर आउँ मुँइ ताराहि लागिबानाइ तोरालाइ कछ्-कछि खोज्ते बुल्ल।”
49तसौ येसुइ यरङ् बाजिहिन् जुबाप देलाहा, “तोहोराखर्हाइ मोरानि किसा खोजहला? मुँइ आफ्निक् बाबाक् घरै भेबापोर्लाहार बाज्बाक् कहिन् किस् तोहोरालाइ थाहा नहिं रैल्हाहार ते?” 50भेटौ ओहिं बोल्लो कहिन् मरियम आउँ योसेफे बुझ्बाय बोइने पार्लुहुन्।
51ओक्राक्पाछु माँयक आउँ बापिहिकक्सङ्हिं येसु नासरतै फर्कलक्, आउँ बाप्पो-महँटारक् आग्या मानिबानाइ बस्लक्। ओक्राक् माँयक मरियमेसेहे यि जम्मा कहिन् नहिंबिस्राहिने मनिहिंमा धर्लक्। 52येसुसेहे परमेस्वरक् आउँ मानुसक् दोहोभटेकोक् अनुग्रह पाहिन् देहिमा आउँ बुद्धिमा बर्ह्टे-बर्ह्टे जाइलक्।#१ समुएल २:२६; हितोपदेस ३:४
अहिले सेलेक्ट गरिएको:
लुका 2: DEWZ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2024 (Active), Mother Tongue Translators Society and Wycliffe Bible Translators, Inc. All rights reserved.