लूका 8
8
ईसु की सेवा कन्नै बारी बईयरैं
1इसके बाद ईसु सैहर-सैहर और गाम-गाम मै परमेसर के राज की अच्छी खबर को परचार सुनातो भओ, फिरल लगो और उसके बारैह चेला बी संग हे। 2#मत्ती 27:55,56; मरकु 15:40,41; लूका 23:49उसके संग कुछ बईयरैं बी हीं, जिनकै बानै बेमारिऔ और दुसट आत्माऔ सै छुटकारो दिब्बाओ हो। इनमै मरियम मगदलनी नाम की एक बईयर ही जिसकै सात दुसट आत्माऔ सै छुटकारो मिलो हो। 3और हेरोदेस को इन्तजाम कन्नै बारो भन्डारी खोजा की बईयर योअन्ना, संग मै सुसन्ना और भौस्सी बईयरैं बी हीं, जे बईयरैं अपनेई पैसौ सै ईसु और बाके चेलौ की सेवा करै हीं।
बीज बोनै बारे की दासतान
(मत्ती 13:1–9; मरकुस 4:1–9)
4जब सैहर-सैहर सै आकै लोगौं की बड़ी भीड़ ईसु के धौंरे इखट्टी होती जा रई ही, तौ बानै उनसै एक दासतान कैई, 5“एक किसान अपने बीज बोनै लिकरो। जब बानै बीज बोए तौ कुछ बीज मैड़ मै पड़े और पाँऐऔं के नीचे खूँदे गए, और आसमान के पंछिऔ नै बे चुंग लए। 6कुछ बीज पथरीली जमीन मै गिरे, जब बे जमे तौ नमी ना मिलनै सै मुरझा गए। 7कुछ बीज कटीली झाँड़िऔं मै गिरे। और झाँड़िऔं नै संग-संग बढ़कै बे दबा लए। 8कुछ बीज अच्छी जमीन मै गिरे, बे जमकै सौ गुना फल लाए,” इतनो कैनै के बाद बौ ऊँची अबाज सै बोलो, “जिसके सुन्नै के कान हौं बौ सुन ले।”
(मत्ती 13:10–17; मरकुस 4:10–12)
9उसके चेलौ नै बासै पूँछी, कै “इस दासतान को अरथ का है।” 10ईसु नै उनसै कैई, “तुमकै परमेसर के राज के भेदौं की समज देई गई है, पर औरौं कै दासतानौ मै सुनाओ जावै है, जिस्सै बे देखते भए बी ना देखैं, और सुनते भए बी ना समजैं।
बीज बोनै बारी दासतान को अरथ
(मत्ती 13:18–23; मरकुस 4:13–20)
11 “इस दासतान को अरथ जौ है, बीज परमेसर को बचन है। 12मैड़ मै गिरे भए बीज बे लोग हैं, जो बचन सुनै हैं, तब सैतान आकै उनके मनौ मै सै बचन लिकार ले जावै है कै कहीं ऐंसो ना हो कै बे बिसवास करैं और मुक्ति पाँऐ। 13पथरीली जमीन मै गिरे भए बीज बे लोग हैं, जो बचन सुनतेई बाकै खुसी सै मानै हैं, पर जड़ ना पकड़ै हैं, बे कुछई टैम तक बिसवास करैं हैं और मुसीबत के टैम मै बे बहक जावै हैं।
14 “कटीली झाँड़िऔं मै गिरे भए बे लोग हैं, जो बचन सुनै हैं, पर अग्गे चलकै बे चिन्ता और धन और जिन्दगी के सुख विलास मै फसकै दब जावै हैं और पकनै के ताँई कोई अच्छे फल ना लाबैं हैं। 15पर अच्छी जमीन मै गिरे भए बे लोग हैं, जो बचन सुनकै उसकै अच्छे और सच्चे मन सै मानै हैं, और अपने धीरज के मारे बे फल लाबैं हैं।
दिया की दासतान
(मरकुस 4:21–25)
16 #
मत्ती 5:15; लूका 11:33 “दिया पजारकै कोई बी बाकै बरतन सै ना ढकै है, नाई खटिया के नीचे रक्खै है, पर बौ बाकै आरे मै रख देवै है, जिस्सै भीतर आनै जानै बारे बाको उज्जेरो देख सकैं। 17#मत्ती 10:26; लूका 12:2ऐंसो कुछ बी लुको भओ ना है, जो परकट ना होगो और ऐंसी कुछ बी गुप्त बात ना है, जो जानी ना जाऐ और परकट ना हो। 18#मत्ती 25:29; लूका 19:26इसताँई चौकस रैहऔ, कै तुम किस रीती सै सुनौ हौ, कैसेकै जिसके धौंरे कुछ है, उसई कै और दओ जागो और जिसके धौंरे कुछ ना है, बासै बौ बी ले लओ जागो, जिसकै बौ अपनो समजै है।”
ईसु के भईया और बाकी अईया
(मत्ती 12:46–50; मरकुस 3:31–35)
19तब ईसु की अईया और बाके भईया उस्सै मिलनै आए, पर भीड़ के मारे बाके धौंरे तक ना पौंच सके। 20लोगौ नै ईसु सै कैई, “कै तेरी अईया और तेरे भईया बाहार खड़े हैं और तेसै मिलनो चाँह रए हैं।” 21बानै जबाब दओ, “मेरी अईया और मेरे भईया बेई हैं, जो परमेसर को बचन सुनै और बाकै मानै हैं।”
ईसु के दुआरा आँधी कै रोकनो
(मत्ती 8:23–27; मरकुस 4:35–41)
22फिर एक दिन ईसु और बाके चेला किसती मै चढ़े, और बानै उनसै कैई कै, “आऔ, झील के पल्ली पार चलैं” 23जब किसती चल रई ही, तौ बौ सो गओ। तब झील मै भयंकर आँधी तोफान आ गओ और किसती पानी सै भरल लगी और बे खतरा मै पड़ गए। 24चेलौ नै ईसु के धौंरे आकै बौ जगाओ, और कैई, “ओ सुआमी, ओ सुआमी, हम डूब रए हैं।” तब ईसु नै उठकै आँधी और पानी की लहरौं कै डाँट लगाई और बे थम गंई, और सब सान्त हो गओ। 25तब बानै अपने चेलौ सै कैई, “तुमरो बिसवास कहाँ है?” पर बे डर गए, और अचम्बे मै पड़कै आपस मै कैललगे, “जौ कौन है? जो आँधी और पानी कै बी हुकम देवै है, और बे बाको हुकम मानै हैं?”
दुसट आत्मा सै घिरे भए को छुटकारो
(मत्ती 8:28–34; मरकुस 5:1–20)
26फिर बे किसती सै उतरकै गिरासेनिओ के देस मै पौंचे, जो झील के पल्ली पार गलील के सामने है। 27ईसु जैसेई जमीन मै उतरो, बा सैहर को दुसट आत्माऔ सै घिरो भओ एक आदमी बाके धौंरे आओ। जो भौत दिनौ सै ना तौ लत्ता पैहरै हो और ना घर मै रैहबै हो, बौ कबरौं मै रैह करै हो। 28बौ ईसु कै देखकै चिल्लाओ, और उसके सामने गिरकै ऊँची अबाज मै बोलो, “हे परमपरधान परमेसर के लौंड़ा ईसु, मैंकै तेसै का काम! मैं तेसै बिनती करौं हौं, मैंकै ना सता।” 29कैसेकै ईसु दुसट आत्माऔ कै उस आदमी सै लिकर जानै को हुकम देरओ हो। कैसेकै दुसट आत्मा बाकै बेरमबेरा चिपट जावै हीं और बस मै रखनै के ताँई लोग बाकै साँकरौ और बेड़िऔ सै बांध देवै हे, फिर बी बौ इन बंधनौ कै तोड़ देवै हो और दुसट आत्मा बाकै बिराने मै भजाऐ फिरै हीं। 30ईसु नै दुसट आत्मा सै पूँछी, “तेरो नाम का है?” बानै कैई, “सैना” कैसेकै भौत सी दुसट आत्मा बामै चिपटी पड़ी हीं। 31बे उस्सै बिनती कर रई हीं कै बौ उनकै कुन्ड मै जानै को हुकम ना दे। 32बहीं पहाड़ मै सूअरौ को एक बड़ो झुन्ड चुंग रओ हो, दुसट आत्माऔ नै ईसु सै बिनती करी कै बौ उनकै सूअरौ मै जान दे, ईसु नै बे जान दंई। 33तब दुसट आत्मा उस आदमी मै सै लिकरकै सूअरौ मै जा समाई और बौ झुन्ड ढलान मै सै लुढ़कते भए झील मै जा गिरो और डूबकै मर गओ। 34जौ देखकै सूअर चुंगानै बारे भाज गए और उनौनै इसकी खबर सैहर और गामौ मै फैला दई। 35तब लोग जो कुछ भओ हो उसकै देखनै लिकरे और ईसु के धौंरे आए। और उनौनै उस आदमी कै जिसमै सै दुसट आत्मा लिकरी हीं सान्ति सै लत्ता पैहरे भए ईसु के चरनौ मै बैठे भए देखो। बाको दिमाक एकदम सई हो, इस्सै बे सबई डर गए। 36जिनौनै जौ सब अपनी आँखौं सै देखो हो, उनौनै लोगौ कै बताई कै किस तरै बौ दुसट आत्मा को सताओ भओ आदमी कैसे अच्छो भओ हो। 37तब गिरासेनिओ परदेस के आस पास के सब लोग डर गए, इसताँई ईसु सै बिनती करी, कै हमरे हिंया सै चलो जा, तब ईसु बापस जानै के ताँई किसती मै चढ़ गओ। 38जिस आदमी सै दुसट आत्मा लिकरी हीं बौ ईसु सै बिनती करल लगो, कै मैंकै अपने संग रैहन दे, पर ईसु नै बाकै बिदा करकै कैई, 39“अपने घर मै लौहट जा और लोगौ सै कैह दे, कै परमेसर नै तेरे ताँई कैसे बड़े काम करे हैं।” बौ जाकै सैरे सैहर मै सबसै कैतो फिरो, कै ईसु नै मेरे ताँई कैसे बड़े काम करे।
मरी भई लौंड़िया और बेमार बईयर
(मत्ती 9:18–26; मरकुस 5:21–43)
40अब देखौ जब ईसु लौहटो तौ भौत से लोगौ नै बाको सुआगत करो, कैसेकै बे सबई बाको पैंड़ो देख रए हे। 41और देखौ, याईर नाम को एक आदमी जो पिराथना घर को मुखिया हो, आओ, और ईसु के पाँऐऔं मै गिरकै उस्सै बिनती करल लगो, कै मेरे घर चल। 42कैसेकै उसकी कम सै कम बारैह साल की इकलौती लौंड़िया ही, और बौ मरनै बारी ही।
जब ईसु बाके घर जा रओ हो तौ रस्ता मै चारौ लंग सै भीड़ उसके ऊपर गिरी जावै ही। 43और एक बईयर नै जिसकै बारैह साल सै खून बहनै को रोग हो, जिसनै अपनी सैरी दौलत बैदौ-हकीमौ के पीछे खरच कर दई ही तौबी किसी के हात सै ठीक ना हो सकी ही। 44बानै पीछे सै आकै ईसु के लत्ता को एक धोरो छूँ लओ, उसई टैम बाको खून बहनो रुक गओ। 45तब ईसु नै पूँछी, “मैं किन्नै छुँओ?” जब सब मुकरल लगे, तौ पतरस नै कैई, “हे मालिक, सबई लोगौ नै तौ तू घेर खाओ है और तेरे ऊपर गिरे जावै हैं।” 46पर ईसु नै कैई, “किसी नै मैं छुँओ हौं कैसेकै मैंनै जान लओ है कै मैंसै सकति लिकरी है।” 47जब उस बईयर नै देखो, कै मैं छिप ना सकौ हौं, तब बौ डरती काँपती भई आई और उसके पाँऐऔं मै गिरकै सब लोगौं के सामने बताओ, कै मैंनै किस बजै सै तू छुँओ, और मैं कैसे उसई टैम ठीक हो गई। 48ईसु नै बासै कैई, “बेटी, तैनै बिसवास करो इसताँई तू ठीक हो गई है, सान्ति सै चली जा।”
49ईसु जौ कैई रओ हो कै, पिराथना घर के मुखिया याईर के हिंया सै कोई जौ कैनै आओ, “तेरी लौंड़िया मर गई है। अब गुरू कै और कसट मत दे।” 50पर जौ सुनकै ईसु नै याईर सै कैई, “मत डर, सिरप बिसवास रख, तौ बौ बच जागी।” 51जब ईसु उस घर मै आओ तौ बानै अपने संग पतरस, यहून्ना, याकूब और लौंड़िया के अईया-अब्बा के अलाबा और कोई बी अपने संग भीतर ना आन दए। 52और सब उस लौंड़िया के ताँई रोबा-राट कर रए हे। पर ईसु नै कैई, “मत रोबौ, बौ मरी ना है पर सो रई है।”
53पर लोगौ नै उसकी हसी उड़ाई, कैसेकै बे जानै हे कै लौंड़िया मर चुकी है। 54पर ईसु नै बाको हात पकड़ो, और जोर सै कैई, “ऐ लौंड़िया उठ!” 55तब बाके पिरान लौहट आए और बौ उसई घड़ी उठकै खड़ी हो गई, फिर ईसु नै हुकम दओ “कै बाकै कुछ खानै कै देओ जाय।” 56बाके अईया-अब्बा दंग रैह गए, पर ईसु नै आदेस दओ कै हिंया जो भओ है, बाके बारे मै किसी सै मत कैईयो।
अहिले सेलेक्ट गरिएको:
लूका 8: TKB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
New Life Compute Institute [NLCI] - CC BY-NC-ND 4.0