मरकुस 6
6
अपने गाम मै ईसु मसी की बेजती
(मत्ती 13:53–58; लूका 4:16–30)
1बहाँ सै बिदा होकै ईसु अपने चेलौ के संग अपने गाम मै आओ। 2आराम कन्नै बारे दिन बौ पिराथना घर मै आओ और सिकाल लगो, और भौत से लोग सुनकै अचम्बे मै पड़कै कैललगे, “इसमै जे बात कहाँ सै आ गंई? और जौ कौन सो गियान है जो उसकै देओ गओ है? और कैसे चमत्कार के काम इसके हात सै होवै हैं? 3का जौ बौई बढ़ई ना है जो मरियम को लौंड़ा है, और का जौ याकूब, योसेस, यहूदा और समौन को भईया ना है? का जाकी बहन हमरे बीच ना रैहबैं हैं?” जिस्सै उनकै ईसु मै बिसवास कन्नै मै मुसकल भई। 4#यहून 4:44तब ईसु नै उनसै कैई, “अपने गाम, अपने टब्बर और अपने घर मै परमेसर को सन्देसो दैनै बारे को आदर ना होवै है।” 5इसताँई बानै बहाँ कोई चमत्कार को काम ना करो, बानै सिरप थोड़े से बेमारौं के ऊपर हात रक्कै बे ठीक करे। 6ईसु कै उनके अबिसवास की बजै सै बड़ो अचम्बो भओ। फिर ईसु गामौ मै लोगौ कै उपदेस देतो घूमल लगो।
अच्छी खबर के परचार के ताँई बारैह चेलौ कै भेजनो
(मत्ती 10:5–15; लूका 9:1–6)
7फिर ईसु नै बारैह खास चेलौ कै अपने धौंरे बुलाओ और उनकै दो-दो करकै भेजल लगो, और उनकै दुसट आत्माऔ के ऊपर अधकार दए। 8ईसु नै आदेस दओ कै, “बे लठिया के सिबा रस्ता के ताँई कुछ बी ना ले जाँय, ना तौ झोला, ना जेब मै पैसा। 9बे पाँऐ मै चप्पल तौ पैहर सकै हैं, पर दो कुरता ना रक्खैं। 10उसनै उनसै और बात कैई, जिस घर मै तुम जाऔ, जब तक उस गाम सै बिदा ना हो, तब तक उसई घर मै ठैरे रौह। 11#चेलौ 13:51#लूका 10:4–11अगर किसी जघै मै लोग तुमरो सुआगत ना करै, और तुमरी ना सुनै, तौ बहाँ सै चलतेई अपने पाँऐ की धूदर झार डारौ,#6:11 धूदर झाड़नै को मतलब जिसके खिलाप धूदर झाड़नी है बासै कोई मतलब ना रखनो। कै उनके खिलाप गभाई हो।” 12फिर चेला बहाँ सै चले गए, और उनौनै उपदेस दओ कै “लोगौ, पापौं और बुराईऔं सै दूर रौह और परमेसर के रस्ता मै चलौ।” 13#याकू 5:14और उनौनै भौत सी दुसट आत्मा लिकारीं, और भौत से बेमारौं के ऊपर तेल मिसलो और परमेसर नै बे ठीक करे।
जल संस्कार दैनै बारे यहून्ना की हत्तिया
(मत्ती 14:1–12; लूका 9:7–9)
14 #
मत्ती 16:14; मरकु 8:28; लूका 9:19 ईसु को नाम फैल गओ हो, और हेरोदेस राजा नै बी ईसु की चरचा सुनी, और कुछ लोगौ नै कैई कै, “यहून्ना जल संस्कार दैनै बारो मरे भए मै सै जी उठो है, इसताँई बौ जे महान चमत्कार दिखा रओ है।” 15कुछ लोग कैरए हे कै, “जौ नबी एलिया है।” कुछ और लोग बी कैबै हे कै, “जौ परमेसर के सन्देसो दैनै बारो की हाँई पुराने नबिऔ मै सै एक है।” 16पर हेरोदेस राजा नै जौ सुनो तौ बौ बोलो, “यहून्ना जिसकी खोपड़ी मैंनै कटवाई ही, बौई जी उठो है।”
17 #
लूका 3:19,20 हेरोदेस राजा नै खुद अपने भईया फिलिप्पुस की बईयर हेरोदियास अपने घर मै रख लई ही, जिसके कारन सिपाईऔं कै भेजकै यहून्ना गिरप्तार करबाकै जेल मै डार दओ हो। 18कैसेकै यहून्ना नै हेरोदेस राजा सै कैई ही कै, “अपने भईया की बईयर कै रखनो तेकै ठीक ना है।” 19इसई सै हेरोदियास यहून्ना सै बैर करै ही और उसकै मार डान्नो चाँहै ही, पर बौ ऐंसो ना कर सकै ही। 20कैसेकै हेरोदेस राजा यहून्ना कै धरमी और पबित्तर आदमी जानकै उस्सै डरै हो, और उसकै बचाऐ रक्खै हो, और उसको उपदेस सुनकै भौत घबराबै बी हो, फिर बी यहून्ना की बात सुन्नी हेरोदेस राजा कै अच्छी लगै हीं। 21आखिर हेरोदियास कै ठीक मौको मिलई गओ जब हेरोदेस राजा नै अपने जलम दिन मै अपने दरबारिऔं, सैनापतिऔं और गलील मुलक के बड़े-बड़े लोगौं के ताँई दाबत करी। 22उस मौके मै हेरोदियास की लौंड़िया नै भीतर आकै नाच कै हेरोदेस और बाके संग बैठनै बारे खुस कर दए, इसताँई राजा हेरोदेस नै लौंड़िया सै कैई, “तेकै जो कुछ चँईऐ मैंसै माँग मैं तेकै दंगो।” 23और उसनै कसम खाई कै, “मैं अपनो आधो राज तक जो कुछ तू मैंसै माँगैगी मैं तेकै दंगो।”
24तब लौंड़िया नै बाहार जाकै अपनी अईया सै पूँछी, “मैं का माँगौ?”
बौ बोली, “यहून्ना जल संस्कार दैनै बारे की खोपड़ी।”
25बौ तुरन्त राजा के धौंरे दौड़ते भए आई और बोली, “मैं चाँहौ हौं कै तू अबी यहून्ना जल संस्कार दैनै बारे की खोपड़ी एक थार मै मैंकै मंगवा दे।” 26तब राजा भौत उदास भओ, पर अपनी कसम और दाबत के पौंहनेऔ के कारन बौ उस लौंड़िया कै मनैह कन्नो ना चाँहै हो। 27राजा नै तुरन्त जल्लाद भेजकै यहून्ना की खोपड़ी ले आनै को हुकम दओ। जल्लाद नै जाकै जेल मै उसकी खोपड़ी काट डारी। 28फिर बौ खोपड़ी थार मै लाकै लौंड़िया कै दे दई और लौंड़िया नै बौ अपनी अईया कै दे दई। 29तब यहून्ना के चेलौ कै इस बात को पतो चलो, तौ बे आकै उसकी लाहस ले गए और कबर मै दफना दई।
ईसु को पाँच हजार लोगौ सै जादा कै रोटी खबानो
(मत्ती 14:13–21; लूका 9:10–17; यहून्ना 6:1–14)
30तब भेजे भए चेलौ नै ईसु के धौंरे लौहटकै, जो कुछ उनौनै करो हो, और सिकाओ हो, उसकै सब बता दओ। 31फिर ईसु नै उनसै कैई, “तुम लोग मेरे संग किसी एकान्त जघै मै चलौ और थोड़ी देर आराम करौ,” कैसेकै बहाँ भौत लोगौ को आनो जानो लगो भओ हो और उनकै खानै तक की फुरसत ना मिलै ही। 32इसताँई बे किसती मै चढ़कै किसी सुनसान जघै मै अगल चले गए। 33उनकै जाते देखकै भौत से लोग पैचान गए कै बे कौन हैं। तब लोग सैहर-सैहर सै लिकरकै पैदरई उतै भाज पड़े और उनसै पैलेई बहाँ पौंच गए। 34#मत्ती 9:36ईसु नै किसती सै उतरकै एक बड़ी भीड़ देखी, और उनके ऊपर तरस आओ, कैसेकै बे उन भेड़ौ के जैसे हे, जिनको कोई गड़रिया ना हो, और बौ उनकै भौत सी बात सिकाल लगो। 35जब दिन छिपल लगो, तौ उनके खास चेलौ नै ईसु के धौंरे आकै कैई, “जौ जघै सुनसान है और दिन बी छप गओ है। 36लोगौ कै बिदा कर, जिस्सै बे आस पास की बस्तिऔं और गामौ मै जाकै खानै के ताँई कुछ खरीद लैं।” 37ईसु नै उनकै जबाब दओ कै, “तुमई उनकै खानै कै दो” उनौनै उस्सै कैई, का हम दो सौ दिनार#6:37 एक दिनार की कीमत एक दिन की डिहाड़ी ही तौ दो सौ दिनार कमानै के ताँई एक आदमी कै 8 महीना लगै हे। की रोटी मोल लैं, और उनकै खबाऐं? 38ईसु नै पूँछी, “जाकै मालूम करौ तुमरे धौंरे कितनी रोटी हैं?” उनौनै पतो लगाकै कैई, “हमरे धौंरे पाँच रोटी और दो मच्छी हैं।” 39तब ईसु नै उनकै हुकम दओ कै, “सबकै हरी घाँस मै लैन की लैन सै बैठा दो।” 40तब बे सौ सौ और पचास-पचास के समू मै बैठ गए। 41और ईसु नै बे पाँच रोटी और दो मच्छी लंई, और सुरग की ओर देखते भए धन्नबाद करो और रोटी तोड़-तोड़कै चेलौ कै दे दंई, कै लोगौ कै परसते जाँय, और बे दो मच्छी बी सम्मै बाँट दंई। 42और सबनै खाँई और रज गए। 43और फिर उनौनै बची भई रोटिऔं और मच्छिऔं सै भरकै, बारैह पल्ला उठाए। 44रोटी खानै बारे सिरप आदमिऔ की गिनती पाँच हजार की ही।
ईसु को पानी मै चलनो
(मत्ती 14:22–33; यहून्ना 6:15–21)
45तब ईसु नै तुरन्त अपने चेला किसती मै चढ़ाए, कै बे उस्सै पैले बैतसैदा सैहर मै चले जाँय, जब तक कै बौ लोगौ कै बिदा करै। 46ईसु लोगौ कै बिदा करकै पहाड़ मै पिराथना कन्नै चलो गओ। 47और जब साँज भई, तौ किसती झील के बीच मै ही, और ईसु इकलो जमीन मै हो। 48और जब ईसु नै देखो, कै उनकै किसती चलानै मै बड़ी मुसकल हो रई है, कैसेकै हवा उनके खिलाप चल रई ही, तौ तड़के इन्धेरे पड़े ईसु झील मै चलते भए उनके धौंरे आओ, और उनसै अग्गे लिकर जानो चाँहै हो। 49पर उनौनै ईसु कै झील मै चलते देखकै समजो कै भूत है, और चिल्ला पड़े, कैसेकै सब बाकै देखकै घबरा गए हे। 50ईसु नै तुरन्त उनसै कैई, “हिम्मत रक्खौ, मैं हौं, डरौ मत।” 51तब बौ उनके धौंरे आकै किसती मै चढ़ो और हवा थम गई, इस्सै चेला हैरान रैह गए, 52चेला इसताँई हैरान रैह गए हे कै बे उन रोटिऔं के चमत्कार के बारे मै ना समजे हे, कैसेकै उनके मन कठोर हो गए हे।
ईसु को भौत से बेमारौं कै ठीक कन्नो
(मत्ती 14:34–36)
53और झील के उस पार गन्नेसरत मुलक मै पौंच कै उनौनै किसती किनारे लगा दई 54जब बे किसती सै उतरकै बाहार आए तौ लोग ईसु कै पैचान गए। 55फिर बे लोग आस पास के सैरे मुलक मै दौड़े, और जहाँ कहीं ईसु को पतो चलै हो, बहाँ बे खटियौ मै पड़े सब बेमारौं कै ले आवै हे। 56और जहाँ कहीं बौ गामौ, सैहरौं या बस्तिऔं मै जावै हो, तौ लोग बेमारौं कै बजारौं के चौराहौं मै रखकै ईसु सै बिनती करै हे कै बौ उनकै अपने लत्ता को पल्लोई छूँ लैन दे, और जितने उसकै छूँवै हे बे सब ठीक हो जावै हे।
अहिले सेलेक्ट गरिएको:
मरकुस 6: TKB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
New Life Compute Institute [NLCI] - CC BY-NC-ND 4.0