PIANCILNA 9
9
Noah tawh Pasianʼ Thuciamna
1Pasian in Noah le a tapate thupha pia a, amaute tungah, “Pung unla, tampi pha-in, leitung dim un.#Pian 1:28 2Note pen leitung ganhing khempeuh, huihlak vasa khempeuh, lei lak ah a bokvak khempeuh le tuipi ngasa khempeuh in hong kihta-in hong zahtak ding uh hi. Noteʼ khut sungah tuate hong kipia hi. 3A nungta a gamtang peuhmah, note adingin an hi ding hi. Kung hing khempeuh ka hong piak bangin na khempeuh zong note kong pia hi. 4A nuntakna ahi a sisan pen a sa tawh na nekhawm kei bek ding uh hi.#Siam 7:26-27; 17:10-14; 19:26; Thkna 12:16,23; 15:23 5Mi khatpeuh in hong thah leh ama tungah sihna dan ka pia ding hi. A hong that ganhing peuhmah ka that dinga, a mipihte a that mi peuhmah gim ka pia ding hi. 6Mi a that peuhmahte pen, midangte in amah that ding hi. Bang hang hiam cih leh Pasian in ama lim bangin mi bawl hi.#Pian 1:26; Pai 20:13
7“Note, pungin khang unla, leitungah tampi tak piang khia-in, tampi pha-in khang un,” a ci hi.#Pian 1:28
8Tua ciangin Pasian in Noah le amah tawh a om a tapate kiangah, 9“En un, note le noteʼ khit a na suanlekhakte uh le, 10note tawh a om nuntakna a nei peuhmah, vasate, innsate, note tawh a om leitung gamsa peuhmah, teembaw sung panin a paikhia zahzah peuhmah tawh ka thuciamna ka kipsak hi. 11Nuntakna a nei khempeuh, tuiciin tawh susiakik ngei nawn loin, leitung a susia dingin tuiciin ka tunsakkik ngei nawn loh nadingin note tawh ka thuciamna ka kipsak hi,” a ci hi. 12Tua ciangin Pasian in, “Hih pen, kei le note le note tawh a om nuntakna a nei khempeuh kikalah mailam khang tawntung ah thuciamna lim ahi hi. 13Meii sungah ka sakhituihup ka kaisak a, tua pen kei le leitung kikalah thuciamna lim hi ding hi. 14Vantungah meii kong kaisak ciangin meii sungah sakhituihup a kimuh leh, 15kei le note le nuntakna a nei khempeuh tawh ka thuciamna ka phawk ding hi. Tuite pen, nuntakna a nei khempeuh a susia ding tuiciin suakkik ngei nawn lo ding hi. 16Meii sungah sakhituihup a om ciangin keimah in ka en dinga, kei le leitungah a om nuntakna a nei khempeuh tawh tawntung thuciamna ka phawk ding hi,” a ci hi. 17Pasian in Noah kiangah, “Hih pen, kei le leitungah a om nuntakna a nei khempeuh tawh ka kipsak sa thuciamna lim ahi hi,” a ci hi.
Noahʼ Zukhamna
18Teembaw sung panin a paikhia Noahʼ tapate, Shem, Ham le Jafeth ahi hi. Ham pen Kanaanʼ pa ahi hi. 19Hih Noahʼ tapa thumte panin leitung buppi mi tawh hong kidim hi.
20Noah pen lo kho masa pa hi a, amah in leenggui lo khat a bawl hi. 21Amah in leenggahzu ne-in kham a, a puanbuk sungah bangmah silh loin a lum hi. 22Kanaanʼ pa Ham in a pa guaktangin a omna mu a, a pualam a om a sanggam nihte kiangah a gen hi. 23Tua ciangin Shem le Jafeth in puan khat la-in amau tegelʼ liangko tuakah baang uh a, a nung leh lamun pai-in a pa uhʼ guaktang omna a khuh uh hi. Amaute in maingat lo uh ahih manin a pa uh guaktang omna mu lo uh hi. 24Noah a zukhamna panin a pilvan ciangin ama tungah a tapa Hamʼ gamtatna thei a, 25amah in,
“Kanaan in samsiatna ngah ta henla,
a sanggamteʼ sila hi tahen.
26 Topa ka Pasian in
Shem thupha pia henla,
Kanaan, ama sila hisak hen.
27Pasian in Jafeth pungsak henla,
Shemʼ puanbukte sungah
amah tengsak hen.
Kanaan
ama sila hisak hen,”
a ci hi.
28Tuiciin a tun khit ciangin Noah kum za thum le kum sawm nga nungta hi. 29Noahʼ khan sungteng pen kum za kua le kum sawm nga hi a, tua ciangin amah a si hi.
अहिले सेलेक्ट गरिएको:
PIANCILNA 9: TBR17
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Tedim Bible © Bible Society of Myanmar, 2017.