LUKA 24
24
Thawhkikna
(Mat 28:1-10; Mrk 16:1-8; Joh 20:1-10)
1Nipi ni zingsang tungin numeite in a bawl sa uh paknamtui tawi-in hanah va pai uh hi. 2Han phual a tun uh ciangin hankhuk hukna suang a kilik khia mu uh ahih manin 3a sungah tum pah uh a, ahi zongin Topa Jesuʼ luang na om lo hi. 4Amaute in lamdang sa-in a om laitakun amaute gei ah puan pak a silh mi nih hong ding vat uh hi. 5Numeite lau mahmah uh ahih manin lei lam nga-in kuncip uh hi. Tua mi nihte in, “Bang hangin misite lakah mihing zong na hi uh hiam? 6Hih lai ah om nawn lo hi; kithosak zo hi. Galilee gamah a om lai-in note kiangah thu hong genin, 7‘Mawhnei miteʼ khut sungah Mihing Tapa kipia dinga, singlamteh tungah kithatin, a ni thum ni-in hingkik ding hi,’ a cih thute phawk un,” a ci uh hi.#Mat 16:21; 17:22-23; 20:18-19; Mrk 8:31; 9:31; 10:33-34; Luk 9:22; 18:31-33
8Tua ciangin amaute in Jesuʼ thugente phawkkik uh a, 9han panin ciahkikin, nungzui sawm le khatte le midangte kiangah hih thute a gen uh hi. 10Sawltakte kiangah hih thu a gen numeite pen Magdala khuami Mary, Joanna, Jamesʼ nu Mary le numei dangte ahi uh hi. 11Ahi zongin hih numeiteʼ thugen pen thu phuahtawm bangin ngaihsun uh a, um lo uh hi. 12Ahi zongin Peter dingin hanah va tai a, han sung a et suk ciangin a kitunna puan bek na om hi. Tua ciangin amah in zong tua thupiang lamdang sa-in inn ah a ciahkik hi.
Emmaus Khua ah Paina
(Mrk 16:12-13)
13Tua ni mahin, Jesuʼ thu a zui mi nih, Jerusalem khua panin tai sagih bang a gamla Emmaus kici khua ah a pai uh hi. 14A paikawmun hih thupiangte kikumkum uh hi. 15Tua bangin kiho-in thu kikumin a om laitakun Jesu mahmah in hong naihin amaute tawh hong tonkhawm hi. 16Amau tegel in a muh hangun Jesu ahih lam thei lo uh hi. 17Jesu in, “Na lam paikawmun bang gengen na hi uh hiam?” ci-in a dong hi. Amau tegel zong din khawl pah uh a, a maisuah uh dahmai mahmah lai hi. 18Tua ciangin amau tegel sung panin Kleopas a kici pa in, “Jerusalem-a hawhte lakah tu sawng teng a tua lai-a thupiang a thei lo nang bek na hi ding hi,” ci-in a dawng hi.
19Tua ciangin Jesu in amaute kiangah, “Bang thu ahi hiam?” ci-in a dot ciangin amaute in, “Nazareth khuami Jesu tunga thupiang ahi hi. Amah pen kamsang khat hi a, Pasian le mite khempeuh in a thugen le a nasepna ah vang a nei mahmah khatin a ngaihsut uh ahi hi. 20Ahi zongin ka siampi liante uh le ka uliante un sihna thukhenna a thuak dingin Pilat tungah ap uh a, singlamteh tungah kithat hi. 21Amah pen Israel mite a hon khia ding pa hi, ci-in ka lamet uh ahi hi. Tua bang hi napi-in hih thu teng hong piang a, tu-in a thu pian zawh a ni thumna hi ta hi. 22Ko pawlteʼ sung panin numei pawl khat in lamdang ka sak uh thu hong gen uh hi. Amaute, tu zingsang tungin hanah va pai uh a, 23ahi zongin ama luang na om nawn lo hi. Tua ciangin amaute hong ciahkik uh a, vantung mite a muhna uh le tua vantung mite in Jesu a hinkik khitna thu a gennate uh hong gen sawn uh hi. 24Tua ciangin ka lawmte uh pawl khat zong hanah va pai uh a, numeiteʼ gen bang teekteekin va mu uh a, ahi zongin Jesu mu lo uh hi,” ci-in a dawng hi.
25Tua ciangin Jesu in amau tegel kiangah, “Bangzah takin hai a, bang dingin kamsangteʼ thugen um thei lo na hi uh hiam? 26Khris in minthanna a ngah nadingin hih bang teng a thuak ding kisam hi lo ahi hiam?” a ci hi. 27Tua ciangin Jesu in Lai Siangtho sungah ama thu a kigennate khempeuh, Moses laibu a kipanin kamsangteʼ laibu khempeuh a khiatna a gen hi.
28Tua khua a tun uh ciangin Jesu a paisuak ding bangin hong om a, 29ahi zongin amau tegel in kho-in, “Tu-in nitak lam hi ta a, ni tum dektak ahih manin ko tawh hong tam khawm in,” a ci uh hi. Tua ahih manin Jesu zong amaute tawh a tam hi. 30Amaute tawh an ne dingin a tut ciangin Jesu in anlum la a, Pasian tungah lungdamna a koh khit ciangin balnenin amaute a pia hi. 31Tua laitakin a hak tawm bangin Jesu ahih lamtak mu-in thei uh a, ahi zongin amauʼ muhna panin Jesu a mang pah hi. 32Amau tegel in, “Lampi ah i pai kawmin Lai Siangtho khiatna hong gen laitakin i lungsim hong lawpsak mahmah hi mah lo ahi hiam?” a kici uh hi. 33Amau zong thakhatin ding pahin Jerusalem ah paikik uh a, nungzui sawm le khatte le a dangte na kikhawmin, 34“Topa hingkik khin takpi hi. Simon kiangah na kilak khinzo hi,” ci-in a kigengen laitak uh a tuak uh hi. 35Tua ciangin tua mi nihte in zong a lam pai laitak uh a thupiang teng le anlum a balnen ciangin Topa ahih lamtak a theihnate uh a gen uh hi.
Jesu, A Nungzuite kiangah Kilang
(Mat 28:16-20; Mrk 16:14-18; Joh 20:19-23; Sawl 1:6-8)
36Amaute hih thu kikumin a om laitakun thakhat thu-in Jesu mahmah amaute lakah hong dinga, “Nopna ngah ta un,” ci-in amaute a hopih hi. 37Ahi zongin amaute lau-in liing lawng gawp uh a, sikha a mu hi ni, ci-in a ngaihsun uh hi. 38Tua ciangin Jesu in amaute kiangah, “Bang hangin lungmang a, bang hangin lungka na hi uh hiam? 39Ka khut le ka khete en un; kei mahmah ka hi hi. Hong lawng unla hong thei un. Tu-a keima neih bangin sikha in pum le tak nei ahi hiam?” a cih khit ciangin 40a khut le a khete a lak hi. 41Amaute nuam lua kisa-in lamdang sa-in um zo lo phialin a om laitakun, “Nek theih khat peuhpeuh na nei uh hiam?” ci-in a dot ciangin 42amaute in zong ngasa haankeu khat pia uh a, 43Jesu in saangin amauteʼ muhin a ne hi.
44Tua ciangin Jesu in amaute kiangah, “Tu-a thupiang khempeuh pen note tawh kong om khawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi. 45Tua ciangin Lai Siangtho sung thu a theih nadingun a lungsim uh honsak a, 46amaute kiangah, “Khris in sihna thuakin, a ni thum ni-in sihna panin hingkik dinga, 47Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi. 48Note pen hih thu khempeuh a thei teci na hi uh hi. 49Ka Paʼ hong ciam sa thu, note tungah kong pia ding hi. Ahi zongin vantung panin tua vangliatna na ngah mateng uh hih Jerusalem khuapi ah na ngak un,” a ci hi.#Sawl 1:4
Vankahna
(Mrk 16:19-20; Sawl 1:9-11)
50Tua ciangin Jerusalem khua sung panin Bethany khua gei ciang amaute paipih a, tua lai panin a khut laam to-in amaute thupha a pia hi. 51Amaute thupha a piak laitakin amaute kiang panin pai khia-in vantungah amah a kila to hi.#Sawl 1:9-11 52Amaute in amah bia uh a, lungdam mahmah in Jerusalem khua ah a ciahkik uh hi. 53Tua ciangin Pasian tungah lungdamna a ko dingin biakinn ah a pai tawntung uh hi.
अहिले सेलेक्ट गरिएको:
LUKA 24: TBR17
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Tedim Bible © Bible Society of Myanmar, 2017.