Mota̱a̱ 39
39
A̱tugu a Tsuganu
1Na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini mo ushili san ɗaɗa a yuwain a̱tugu a sa'ani o uɗavu adama o ulinga a̱tsuma̱ A̱a̱'isa̱. Reve a yuwan a̱tugu a akiza adama a Haruna, cine A̱sulazuva a dammai Musa. 2U yuwan ta̱ epo na̱ a̱punda̱ a zinariya na̱ za mini ma̱ bulu nu ushili u ma̱ɗiya̱ na̱ mini mo ushili san na̱ a̱punda̱ o okoro a sa'ani o upundu. 3Reve a ruma zinariya wo o'wo vile vile, reve a paɗa yi a̱punda̱ a̱punda̱ adama u linga na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini mo ushili san na̱ a̱punda̱ o okoro a sa'ani upundu, ulinga wu za na gurai lon. 4Reve a yuwaan epo ili yu usa̱ga̱dosu a̱ nlyungu ma̱ yi, za na o ɓoloi na̱ mɓa̱nga̱ n re ma̱ yi, adama a̱ nla̱ yi. 5Gbakala vu uɗavu wu za na gurai u da̱na̱ ta̱ ili i ta̱ uɓoluloi na̱ a̱yi a yuwan niyi tsa̱ yi, a yuwan yi ta̱ na̱ a̱punda̱ a zinariya na̱ mini ma̱ bulu nu ushili u ma̱ɗiya̱ na̱ mini mo ushili san na̱ a̱punda̱ o okoro a sa'ani upundu, cine A̱sulazuva a dammai Musa. 6A tara ta̱ atali e ikebe e re a na a̱ tsu ɗe onis, reve a ɗana ɗe zuva le ala a̱ muwun ma Isra'ila, cine za na tsu she'en atali e ikebe tsu ɗana uzuwu wu ukere zuva le. Reve waru u zuwa le pe a̱tsuma̱ e mekpete mo uɗavu u zinariya. 7Reve wu ɓama le a mupaɗi mu nlyungu e epo wo o'wo atali o ucuwusan e ekere a̱ muwun ma Isra'ila, cine A̱sulazuva a dammai Musa.
Apaɗi o umuna u ma̱ka̱ka̱n
8Reve u yuwan apaɗi o umuna u ma̱ka̱ka̱n e epod. Reve u yuwan yi na̱ a̱punda̱ oroci e epod, na̱ a̱punda̱ a zinariya, na̱ mini ma̱ bulu nu ushili u ma̱ɗiya̱ na̱ mini mo ushili san oɓolo na̱ a̱punda̱ o okoro a sa'ani upundu, ulinga wu za na gurai ulingaꞌa ulobonu lon. 9Apaɗi o umuna u ma̱ka̱ka̱'a̱n washin wa̱ yi nu uga'an wa̱ yi u da̱na̱ ta̱ una̱ta̱, inci kucci kucci, reve a̱ kutsulu yi ure. 10Reve e gere ɗe daru na̱shi va atali e ikebe zuva va̱ yi. Udaru wu ufaru u da̱na̱ ta̱ na̱ karniliya na̱ tofas oɓolo na̱ zumurudu. 11Udaru we ire e gere ta̱ kirisolat, na̱ sapiya na̱ diyamon. 12Udaru wa ta'atsu e gere ta̱ yasi na̱ agat na̱ ameti. 13Udaru wa̱ na̱shi e gere ta̱ berili na̱ onis na̱ yasfa. Aatali suru a zuwa yi ta̱ e mekpete ma zinariya. 14Atali kupa ne ejere a̱ da̱na̱ ta̱ lo, aatali suru o una̱ wa aala a̱ ta̱ wo olobo a Isra'ila. Aatali suru ni iɗana tsu uzuwu wu ukere wa aala a̱ ta̱ wu gundo kupa ne ejere'e. 15Reve a yuwan apaɗi o umuna a̱ ma̱ka̱ka̱'a̱n akani a zinariya can umungu tsa amunga. 16A̱vu a yuwan mukpete n re n zinariya na̱ nkawani n re n zinariya reve a̱ nla̱ nkawani n re'e a̱ nge'en n re ma zuva m mapaɗi ma̱ ma̱ka̱ka̱'a̱n. 17Reve o oto akani e re a zinariya a̱tsuma̱ a nkawani n na n ri a̱ nge'en n re ma zuva va apaɗi a̱ ma̱ka̱ka̱n e epod'u. 18Reve o ɓolo kosu re mamunga'a na akani'i a̱ mukpete n re n zinariya'a, tsundolo tsa ɗa o ɓolo nle e elime a apaɗi a̱ ma̱ka̱ka̱n e epod'u. 19Reve a yuwan nkawani n re n zinariya, aza a na a̱ nla̱i o kosu re na̱ a̱tsuma̱ m mapaɗi m ma̱ka̱ka̱n m epod'u. 20Reve a̱ da̱shi yuwan nkawani n re n zinariya, reve a̱ nla̱ le ne elime za̱la̱ mupaɗi n re mu nlyungu m epod'u zuzu nu uga'asatan na̱ mapaɗi ma̱ ma̱ka̱ka̱n gon gbakala vu uɗavu vi ikyun epod'u. 21A̱vu a̱ nla̱la̱i apaɗi a̱ ma̱ka̱ka̱n na̱ nkawani ma̱ yi na̱ nkawani m epod'u na amunga a̱ mini ma̱ bulu, o ɓolulo niyi na̱ gbakala vu uɗavu u sa'ani lo'on adama mapaɗi ma̱ ma̱ka̱ka̱n u sa̱katsa̱ e epod'u wan, cine A̱sulazuva a dammai Musa.
A̱tugu a tsuganu o ro
22Reve u yuwaan epod'u utugu wu uga'an wu uɗavu u mini ma̱ bulu suru, 23nu uba̱mu u na o oto a aaci, tso uba̱mu wu utugu wu uga'an a̱vu a̱ guma̱ uba̱mu'u a̱ ka̱nda̱ruwa̱ adama u kara wan. 24E elentsu o utugu'u za̱la̱, a yuwan ta̱ a̱la̱ta̱ a ɗanga muwun m peme n na a̱ tsu ɗe ruman na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini mo ushili san na̱ a̱punda̱ o okoro a sa'ani upundu. 25A̱vu waru a yuwan lingi na̱ zinariya can reve a sataralai lingi'i na̱ ɗanga muwun m peme a̱ ka̱nda̱ruwa̱ elentsu o utugu'u suru. 26Reve e gere lingi'i na̱ ɗanga muwun m peme usatarulai a̱ ka̱nda̱ruwa̱ e elentsu o utugu na a yuwain adama o ulinga wa̱ a̱ga̱nda̱'a̱, cine A̱sulazuva a dammai Musa. 27A yuwan ta̱ waru mukoɗi ma̱ a̱tugu na̱ a̱punda̱ o okoro a sa'ani upundu adama a Haruna no olobo a̱ yi, 28no okokolo o okoro a sa'ani, na̱ nlezu mo okoro a sa'ani, a̱vu waru a yuwan okoɗi a acaka a̱ a̱punda̱ o okoro a sa'ani upundu. 29A̱vu waru a yuwan gbakala na̱ a̱punda̱ o okoro a sa'ani na̱ a̱punda̱ a̱ mini ma̱ bulu nu ushili u ma̱ɗiya̱ na̱ mini mo ushili san ulinga wu ukere, cine A̱sulazuva a dammai Musa.
30A̱vu a yuwan makpata mo okokolo ma zinariya can, reve a yuwan ɗe iɗana tsi iɗana i mazuwa mo ukere, <<AKIZA A̱ TYO E EKERE A̱ A̱SULAZUVA.>> 31Reve a̱ nla̱a̱ yi mamunga ma̱ mini ma̱ bulu adama a̱ nla̱ yi zuva vo okokolo'o, cine A̱sulazuva a dammai Musa.
Musa ka̱lyuwa̱ ta̱ Oogodoꞌo
32Tsundolo tsa ɗa o kotoi ulinga wa̱ A̱a̱'isa̱ wo Oogodo o Uga'asusan suru. Aza a Isra'ila a yuwan ta̱ cine A̱sulazuva a dammai Musa suru tsoyi. 33Reve a̱ ta̱wa̱a̱ Musa no Oogodo a agalaci'i: A̱a̱'isa̱'a̱ oɓolo ni itana yu ulinga ya̱ yi suru, na̱ nkoroto na akpata a̱ nge'en a̱ yi na aɗanga a̱ yi oɓolo na atsura a̱ yi na̱ nda̱na̱ta̱ ma̱ yi. 34A̱ ta̱wa̱a̱ ta̱ waru na aapalutsu o ukwan we eleme a̱ a̱giri'i na a yuwain na̱ mini ma̱ shili na aapalutsu o una̱ntsu na̱ kwan vu ugbamu nu umuna wu una̱ntsu. 35Reve waru a̱ ta̱wa̱a̱ na Akpati a Nzuwulai oɓolo na̱ a̱shuwutsu e le, ni ikpa̱ta̱tsu yu uba̱ta̱ u matara mo ume mo unusu, 36na apada, ni itana ya̱ yi suru, no opopofu a na a Tawai. 37A̱ ta̱wa̱a̱ ta̱ waru na̱ wisawatan u fitila u zinariya can ni ifitila ya̱ yi, oɓolo ni itana yu ulinga suru na̱ mani'in ma̱ zetun adama a madaɓa me ifitila'a. 38A̱ ta̱wa̱ ta̱ waru na̱ masa'a ma zinariya na̱ mani'in mo utsusun, na̱ a̱tsuka̱ a̱ ma̱guru oɓolo nu umuna wu una̱ntsu wo oogodoꞌo, 39na̱ masa'a ma na a yuwain na̱ rumushili, nu uzatsuwata wu rumushili oɓolo na aɗanga a̱ yi ni itana yu ulinga ya̱ yi suru, na aasa'atsu ni ikyun ya̱ yi. 40A̱ ta̱wa̱a̱ ta̱ waru na amuna o ukowo, na atsura a̱ yi na̱ nda̱na̱ta̱ ma̱ yi oɓolo nu umuna wu una̱ntsu u ma'uwaa o ukowo'o: na amunga ni irumu ya̱ yi, oɓolo ni itana yu ulinga suru a̱tsuma̱ Oogodo a agalaci, Oogodo o Uga'asusan. 41A̱ ta̱wa̱a̱ ta̱ na̱ a̱tugu o uga'an a na a ɗavai adama a̱ a̱ga̱nda̱ a̱tsuma̱ a̱ A̱a̱'isa̱'a̱, na̱ a̱tugu a akiza a Haruna ganu oɓolo na̱ a̱tugu a̱ muwun ma̱ yi mo olobo adama o ulinga u le u tsuganu.
42Cine A̱sulazuva a dammai Musa suru ne ɗa aza a Isra'ila a yuwain ulingaꞌa suru tsoyi. 43Ana Musa ka̱lyuwa̱i ulinga u na aza a Isra'ila a yuwain suru, a̱vu we ene aza a Isra'ila a yuwan ta̱ ulingaꞌa cine A̱sulazuva a dammai tsoyi. Ɗaɗa gba u zuwaa nle aba'un.
अहिले सेलेक्ट गरिएको:
Mota̱a̱ 39: TSW
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2025 Language Development and Translation Initiative (LDTI)