Nan Ganu 1
1
Kucci vu ukula̱tosu
(N.Gn 6:8-13)
1A̱sulazuva e ɗe ta̱ Musa reve u yuwan adanshi na̱ a̱yi diga o Oogodo o Uga'asusan. Reve u damma yi, 2<<Yuwan adanshi na ama a Isra'ila vu damma le: Mantsa ma na za ro ɗu a̱a̱ ta̱wa̱a̱ A̱sulazuva na̱ kucci, u ta̱wa̱a̱ na̱ kucci vi iliyamunga ko vo oɓolo e inan ko vu mgbele ko vi ikyon.
3<<Na̱ kucci'i za vu ukula̱tosu u ɗa wi inan, u ta ca ogono a nan na ri usa̱du shi. U ta̱wa̱ na̱ a̱yi o una̱ntsu wo Oogodo o Uga'asusa'an adama wo o'wo kucci na A̱sulazuva a̱a̱ usu. 4U ta̱ kuru ukere wa̱ yi a aaci a̱ kucci vu ukula̱tosu'u, reve a̱ usuwa̱ yi a̱yi wo o'wo kucci matara mo ume mo unusu wa̱ yi. 5Vuma'a u ta paɗa moggono'o a̱ ma̱ka̱ka̱n ma̱ A̱sulazuva. Reve olobo a Haruna nan ganu a̱ ta̱wa̱ na̱ mpasa'a, reve o kyo'onu yi e eɓele a masa'a'a suru ma na ma̱ ri o una̱ntsu wo Oogodo o Uga'asusan. 6U ta muna kucci vu ukula̱tosu'u, reve wu paɗa yi mupaɗi mupaɗi. 7Reve olobo a Haruna ganu a zuwa akina a masa'a reve e gere ɗanga a akina'a. 8Reve e gere mupaɗi'i oɓolo na aaci na abaji a mani'in a ɗanga madala na ri a masa'a'a. 9Amma wu za̱'wa̱ iliya̱tsuma̱ no okotsu a̱ yi na̱ mini. Reve ganu kula̱to yi suru a masa'a. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
10<<Nna̱ kucci vu ukula̱tosu va̱ yi za vi ikyon i ɗa ko mgbele, reve u ca ogono a na a̱ ri usa̱du shi. 11U ta paɗa yi upasu wu ugana u masa'a'a a̱ ma̱ka̱ka̱n ma̱ A̱sulazuva. Reve olobo a Haruna nan ganu o kyo'onu mpasa ma̱ yi e eɓele a masa'a'a suru a̱ ka̱nda̱ruwa̱. 12Wu paɗa yi mupaɗi mupaɗi, reve ganu gere le, oɓolo na aaci na abaji a mani'in a ɗanga madala na ri a masa'a'a. 13Wu za̱'wa̱ iliya̱tsuma̱ no okotsu na̱ mini, reve ganu ta̱wa̱ na̱ a̱yi suru, a̱vu u kula̱to yi a masa'a'a. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
14<<Na̱ kucci vu ukula̱tosu a̱ tyo ya̱ A̱sulazuva'a za vu nnunu n ɗa, u ta ca muɗa ko ma̱ma̱rukuku. 15Ganu ta̱ ta̱wa̱ na̱ a̱yi a masa'a reve u punda̱ra̱ yi yinlu u mula̱ aaci'i. Reve u kula̱to yi a masa'a'a. Reve a lyawa mpasa ma̱ yi mo ocusho a̱ nge'en m masa'a'a. 16U to foɗo owofun ni ili i na i ri pe suru, reve u vari yi e eeɓele a asana a masa'a'a, uba̱ta̱ wo okomo. 17U te reme evelu a̱ yi reve u ɗa̱ra̱la̱ niyi, amma waa karala niyi shi. Reve ganu'u u kula̱to yi a masa'a'a a ɗanga na ri a madala. Kucci vu ukula̱tosu ɗa, kucci na a yuwain na akina, ili i ma̱guru ma na A̱sulazuva aa uwwusa uyo'o wa̱ yi.
अहिले सेलेक्ट गरिएको:
Nan Ganu 1: TSW
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2025 Language Development and Translation Initiative (LDTI)