EXODUS 7
7
Moses naAron tava talifa Farao oinyengandunge
1Ndele Omwene okwa lombwela Moses ta ti: “Tala, Ame ohandi ku tula po ngaashi kalunga kuFarao, nomumwanyoko Aron ota ka kala omuxunganeki woye. 2U nokupopya alushe eshi Ame handi shi ku lombwele, nomumwanyoko Aron e nokupopya naFarao, opo a lekele Ovaisraeli va dje mo moshilongo. 3Ndele Ame ohandi ka kukutika omutima waFarao nokuhapupalifa medu laEgipiti omadidiliko ange noikumwifa yange. 4Ndelenee Farao ite ke mu pwilikina; ndele Ame ohandi ka tula eke lange kombada yaEgipiti oku shi lwifa nohandi ka pitifa mo medu laEgipiti omatanga ange, oshiwana shange Ovaisraeli momahandukilo nomomatokolo, 5opo nee Ovaegipiti tava ka shiiva nokutya, Aame Omwene, ngeenge handi yelula eke lange kombada yaEgipiti nohandi pitifa mo Ovaisraeli mokati kavo.” 6Opo Moses naAron va ninga ngaashi Omwene e va lombwela. Heeno, osho va ninga. 7Ndele omido daMoses da li omilongo hetatu, nomido daAron omilongo hetatu nomido nhatu eshi va li va popya naFarao.
8Ndele Omwene okwa popifa Moses naAron neendjovo edi: 9“Farao ngeenge ta popi nanye ndele ta ti: ‘Ulikileni oshikumwifalonga,’ opo nee ove u nokulombwela Aron: ‘Kufa onhaili yoye, u i ekele poshi moipafi yaFarao, opo yo otai ka ninga eyoka.’ ” 10Opo nee Moses naAron va ya kuFarao ndele va ninga ngaashi Omwene e va lombwela: Aron okwa ekela onhaili yaye poshi moipafi yaFarao noyovapiya vaye, ndele ya ninga eyoka. 11Opo nee Farao okwa ifana ovanongo neemhule. Ndele vo, eemhule dOvaegipiti ode shi ninga yo noupule wavo: 12keshe umwe okwa ekela onhaili yaye poshi, ndele do oda ninga omayoka! Ndelenee onhaili yaAron oya pona po eenhaili davo. 13Ndelenee omutima waFarao wa kukuta, onghee hano ine va pwilikina, ngaashi Omwene a tongele.
Ehandukilo lotete Omeva taa shituka ohonde
14Opo nee Omwene okwa tya kuMoses: “Omutima waFarao wa kukutikwa. Ye ota anye okulekela oshiwana. 15Inda kuFarao ongula inene, tala ye ota ka ya komeva. Kala ofika pomunghulo waNil u mu shakeneke. Ndele kufa meke loye onhaili ei ya shituka eyoka, 16u mu lombwele: ‘Omwene Kalunga kOvaheberi okwa tuma nge kwoove nondaka ei: “Lekela ovanhu vange, vo va shiive okulongela nge mombuwa.” Ndelenee, tala, fiyo opaife ove ino di pwilikina. 17Omwene ta ti ngaha: “Opo tuu opo oto ka shiiva nokutya, Aame Omwene.” Tala, nonhaili ei i li meke lange, ohandi denge omeva omuNil, ndele taa ka shituka ohonde. 18Noikwameva yomuNil otai ka fya, opo Nil tau ka nyika nai. NOvaegipiti otava ka kendabala ongaho okunwa omeva omuNil.’ ” 19Natango Omwene okwa lombwela Moses ndele ta ti: “Lombwela Aron: ‘Kufa onhaili, ndele yelula eke loye kombada yomeva aeshe omuEgipiti, kombada yomilonga davo nomixupwalonga nomatale neenhele adishe mwa ongala omeva, a ninge ohonde: moshilongo ashishe shaEgipiti tamu ka kala ohonde, moiyuma yoiti noyomamanya.’ ” 20Moses naAron osho va ninga ngaashi Omwene e lombwela; ye okwa yelula onhaili nokwa denga omeva e li muNil moipafi yaFarao nomoipafi yovapiya vaye. Nomeva aeshe omuNil a ninga ohonde. 21Noikwameva ya li muNil, ya fila mo. NaNil wa nyika nai, opo Ovaegipiti inava dula okunwa omeva omuNil. Nomedu alishe laEgipiti mwa li ohonde. 22Ndelenee eemhule dOvaegipiti ode shi ninga yo noupule wado, opo omutima waFarao owa kukuta. Ndele ye ine va pwilikina, ngaashi Omwene a popya. 23Ndele Farao okwa pilamena ko nokwa ya keumbo nomutima waye inau pupalekwa nande. 24Ndelenee Ovaegipiti aveshe ova xupa keembinga adishe daNil va mone omeva okunwa, osheshi inava dula okunwa omeva omuNil. 25Osho ngaha pa pita omafiku aheyali Omwene eshi a denga Nil.
अहिले सेलेक्ट गरिएको:
EXODUS 7: OKYB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Oshikwanyama Bible Revised © Bible Society of Namibia, 2008, 2012.