GENESIS 32
32
Jakob ta shakene novaengeli
1Jakob okwa twikila olweendo laye novaengeli vaKalunga ve mu shakeneka. 2Ye, eshi e va mona, okwa ti: “Olo etanga lovakwaita vaKalunga!” Ndele ye okwa luka onhele ei Mahanaim.
Jakob te lilongekidile okushakeneka Esau
3Ndele Jakob okwa tuma ovatumwa komesho kumumwaina Esau moshilongo shaSeir medu laEdom. 4Ndele okwe va lombwela eendjovo edi: “Omu na okulombwela Esau, tamu ti: ‘Omwene wetu ota ti ngaha: Jakob, omupiya woye, ota ti: “Onda kala omunailongo puLaban, noko nda kala fiyo opaife, 5ndele ame onde lilikolela eengobe neendongi, eedi noikombo novapika ovalumenhu novakainhu, ndele ohandi shi shiivifile omwene wange, opo ndi filwe onghenda momesho aye.” ’ ”
6Ndele ovatumwa va aluka kuJakob ndele tava ti: “Fye otwa ile kumumwanyoko Esau, ndele ye ote uya e ku shakeneke novalumenhu omafele ane pamwe naye.” 7Opo nee Jakob okwa tila unene nokwa kwatwa koumbada, ndele ye okwa tukula ovanhu ava va li puye nosho yo eedi noikombo neengobe neengamelo meenhanda mbali. 8Osheshi ye okwa diladila: “Esau ngeenge okwa tondokele monhanda imwe ndele te i hanauna po, onhanda ikwao otai i onhapo.”
Eilikano laJakob
9Ndele Jakob okwa tya: “Akutu, Kalunga katate Abraham naKalunga katate Isak! Akutu Omwene, Oove wa lombwela nge: ‘Shuna koshilongo sheni nokepata leni, ndele Ame ohandi ku ningile ouwa.’ 10Ame inandi wanena onghenda aishe noudiinini aushe Ove we u ningila omupiya woye. Osheshi ame onda tauluka Jordan ndi na odibo aike, ndele paife onda ninga eenhanda mbali. 11Xupife nge meke lamumwameme, meke laEsau, osheshi ame ohandi mu tila, ye ote uya okudipaa nge, nooina pamwe nounona vavo. 12Oove mwene wa tile: ‘Oshili Ame ohandi ke ku ningila ouwa nokuhapupalifa oludalo loye li fike pefuta, lo itali dulu okuvalwa molwouhapu walo.’ ”
Jakob ta tumine Esau omilongelo
13Ndele ye okwa kala ko oufiku. Ndele moinima ei e kwete a kufa mo omilongelo damumwaina Esau: 14oikombo oikadi omafele avali noikombo oindume omilongo mbali, eedi omafele avali neemhedi omilongo mbali, 15eengamelo eenyali omilongo nhatu novana vado, eengobe eedidi omilongo nhee, neemhedi omulongo, eendongi eenghadi omilongo mbali noundongwena omulongo. 16Nokwe di yandja kovapiya vaye, keshe ongudu tai likalele nokwa lombwela ovapiya vaye: “Tetekelei nge komesho, nopokati kongudu nongudu napa kale onhele.” 17Opo nee ye okwa lombwela ou wotete ndele ta ti: “Mumwameme Esau ngeenge te ku shakeneke ndele te ku pula ta ti: ‘Ove owalyelye noto i peni, noimuna oyo to shingi, oyalyelye?’ 18Opo nee u na okunyamukula: ‘Oyo oyomupiya woye Jakob. Yo omilongelo te di tumine omwene waye Esau, ndele tala, ye mwene ote tu shikula.’ ” 19Ndele ye okwa lombwela yo omutivali nomutitatu naaveshe ava va shinga eengudu doimuna, ndele ta ti: “Osho ngaha mu na okunyamukula Esau ngeenge tamu mu mono, 20nye mu na okutya: ‘Tala, omupiya woye Jakob ote uya yo, te tu shikula.’ ” Osheshi ye okwa diladila: “Ame onda hala oku mu handukulula nomilongelo edi tadi tetekele nge, osheshi ame ohandi ka tala oshipala shaye, pamwe ta ka fila nge onghenda.” 21Osho hano ngaha omilongelo de mu tetekela, ndele ye mwene okwa kala oufiku monhanda.
Okukondja kwaJakob naKalunga
22Ndele oufiku tuu ou okwa penduka ndele ta tauluka okamulonga kaJabbok pamwe novalikadi vaye vavali novapika vaye vavali novana vaye omulongo naumwe. 23Ndele ye okwe va kufa nokwe va taulukifa omulonga, nosho okwa twala ko aishe ei kwa li e i na. 24Ndele Jakob ye aeke okwa kala ko. Nomulumenhu umwe okwa kondja naye fiyo eluwa la tenda. 25Ndele winya eshi a mona nokutya, ite mu te, okwe mu denga ponho, ekipa lonho yaJakob ola domoka, ye eshi ta kondjo naye. 26Opo nee winya ta ti: “Efe nge, osheshi eluwa la tenda.” Ndelenee ye ta nyamukula: “Itandi ku efa, fimbo ino nangeka nge noupuna.” 27Ndele winya okwe mu pula: “Oove lyelye edina loye?” Ndele ye okwa nyamukula: “Aame Jakob.” 28Opo nee winya ta ti: “Ove ito ka ifanwa vali Jakob, ndelenee Israel. Osheshi ove wa kondja naKalunga novanhu, ndele wa dula.” 29Opo nee Jakob ta pula ta ti: “Lombwele nge edina loye!” Ndele Winya okwa nyamukula: “Omolwashike to pula edina lange?” Ndele opo tuu opo Winya okwe mu nangeka noupuna. 30Onhele ei Jakob okwe i luka Penuel, osheshi, ngaashi a tile: “fye naKalunga otwa talafana oshipala noshipala, nonande ongaha,” ame onda xupa ndi na omwenyo. 31Hano ye eshi a pitilila puPenuel, etango ola pita. Ndele ye okwa shongola monho. 32Onghee hano ovana vaIsrael ihava li olufipa lomonho, nomifipa odo tadi yukilile monho fiyo onena eli. Shaashi ye okwa denga Jakob monho, polufipa lonho.
अहिले सेलेक्ट गरिएको:
GENESIS 32: OKYB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Oshikwanyama Bible Revised © Bible Society of Namibia, 2008, 2012.