GENESIS 8
8
Omeva eyelu taa pwiinine
1Ndele Kalunga okwa dimbulukwa Noa noifitukuti aishe noimuna aishe ei ya li pamwe naye mongulu yomomeva. Ndele Kalunga okwa pepifa omhepo kombada yedu opo omeva a oholoke, 2osho yo eefifiya domoule womedu noikelelifo yeulu ya fitikwa, nodula inene yetilashi oya sheka. 3Ndele omeva okwa oholoka kanini nakanini kombada yedu, ndele a hovela okwooholoka pexulilo lomafiku efele limwe nomilongo nhano. 4Ndele ongulu yomomeva oya kanghama kombada yomhunda yaArarat mohani onhiheyali mefiku etimulongo netiheyali. 5Ndele omeva okwa oholoka kanini nakanini fiyo okohani onhimulongo. Mohani onhimulongo, mefiku lotete lohani, eenhele deemhunda oda monika.
6Opo nee pexulilo lomafiku omilongo nhee Noa okwa yeulula ekende longulu yomomeva, oyo a tunga, 7nokwa pitifa mo ekola. Lo ola ingaana nokutelaana fiyo omeva otaa pwiinine kombada yedu. 8Opo nee ye a pitifa mo vali onghuti, a tale ngeenge omeva a ninipala kombada yedu. 9Ndelenee onghuti inai mona onhele yokuwila i tulumukife eenyala dayo, ndele oya shuna kuye mongulu yomomeva, osheshi omeva okwa li kombada yedu alishe. Opo nee ye a nana eke laye ndele e i kwata, nokwe i eta puye mongulu yomomeva. 10Opo ye okwa teelela vali omafiku aheyali. Ndele ye okwa pitifa mo vali onghuti mongulu yomomeva. 11Ndele onghuti oya alukila kuye komatango, ndele mokanya kayo omwa li efo litalala lolumono! Opo nee Noa a shiiva nokutya, omeva okwa ninga manini kombada yedu. 12Ndele ye okwa teelela vali omafiku aheyali ndee okwa pitifa mo onghuti. Ndele yo inai alukila vali kuye.
13Momudo omutimafele ahamano naumwe, mohani yotete mefiku lotete lohani, omeva okwa dja ko kombada yedu. Ndele Noa okwa kufa ko onduda yongulu yomomeva ndele ta lengalenga, ndele edu ola kukuta.
14Mohani onhivali mefiku etimilongo mbali netiheyali edu ola li la kukuta. 15Ndele Kalunga okwa lombwela Noa, ndele ta ti: 16“Dja mo mongulu yomomeva, nye nomwalikadi woye novana voye ovamati novalikadi vovana voye ovamati pamwe naave. 17Oinamwenyo aishe ei i li pwoove, yombelela keshe, nai dje mo pamwe naave. Eedila noimuna noinamwenyo aishe ei hai linyenge kombada yedu, i shiive okumyakatala kombada yedu, nai kale i na oludalo noi hapupale kombada yedu.” 18Opo nee Noa okwa pita mo novana vaye ovamati nomwalikadi waye novalikadi vovana ovamati pamwe naye. 19Oinamwenyo aishe, aishe tai alangata, needila adishe, aishe ei tai linyenge kombada yedu, pamaludi ayo, oya pita mo mongulu yomomeva.
Omayambo aNoa nomaudaneko aKalunga
20Ndele Noa okwa tungila Omwene oaltari, ndele okwa kufa moinamwenyo aishe ya koshoka nomeedila adishe da koshoka, ndele okwa yamba omaxwikiloyambo koaltari. 21Ndele omwene okwa li e udite edimba liwa, ndele Omwene okwe lipopila momutima waye ta ti: “Ame itandi ka finga vali edu molwovanhu, osheshi omadiladilo omutima womunhu omai kokudja kounona waye. Ndele itandi ka nyonauna po vali aishe i na omwenyo ngaashi nda ningile. 22Fimbo edu li li po, efimbo lokukuna nefimbo lokuteya, outalala noupyu, okulombo nokufu, omutenya noufiku itai ka xula po.”
अहिले सेलेक्ट गरिएको:
GENESIS 8: OKYB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Oshikwanyama Bible Revised © Bible Society of Namibia, 2008, 2012.