لُوقا 18
18
مَثَل العجوز و الحاكِم
1وَ عِيسَى حَجَّى لَيْهُمْ بِمَثَلْ أَشَانْ يِوَصِّفْهُمْ وَاجِبْ دَايْماً يِصَلُّوا وَ مَا يَكْسَلَوْا. 2وَ قَالْ: «فِي حِلَّةْ وَاحِدَةْ، فِيهَا حَاكِمْ وَاحِدْ وَ هُو مَا خَايِفْ مِنْ اللّٰهْ وَ مَا لَمَّاهْ بِرِضَى النَّاسْ. 3وَ فِي الْحِلَّةْ دِي، فِي عَجُوزْ أَرْمَلَةْ. وَ كُلِّ يَوْم هِي تَمْشِي لِلْحَاكِمْ وَ تُقُولْ: ‹أَنْصُرْنِي بِالْحَقّ فِي النَّادُمْ الظَّلَمْنِي.› 4وَ أَوَّلْ هُو أَبَى مَا سَوَّى لَيْهَا شَيّءْ لَاكِنْ فِي الأَخِيرْ هُو قَالْ فِي نَفْسَهْ: ‹صَحِيحْ، أَنَا مَا خَايِفْ مِنْ اللّٰهْ وَ مَا لَمَّانِي بِرِضَى النَّاسْ. 5لَاكِنْ الْعَجُوزْ دِي قَاعِدَةْ تِبَشْتِنِّي بِلْحَيْن. خَلِّي نَنْصُرْهَا أَشَانْ هِي مَا تِعَيِّينِي مَرَّةْ وَاحِدْ بِجَيِّتْهَا الْكَتِيرَةْ.›»
6وَ الرَّبّ عِيسَى قَالْ: «الْحَاكِمْ دَا نَادُمْ ظَالِمْ لَاكِنْ فَكُّرُوا فِي كَلَامَهْ. 7وَ فِي فِكِرْكُو، اللّٰهْ مَا يَنْصُرْهُمْ لِنَاسَهْ الْعَزَلَاهُمْ الْيَصْرَخَوْا لَيَّهْ لَيْل وَ نَهَارْ وَلَّا؟ يِأَخِّرْ لَيْهُمْ وَلَّا؟ 8نُقُولْ لَيْكُو هُو يَنْصُرْهُمْ عَجَلَةْ. وَ لَاكِنْ وَكِتْ إِبْن الْإِنْسَانْ يِقَبِّلْ فِي الْأَرْض، هُو يَلْقَى نَاسْ مُؤمِنِينْ وَلَّا؟»
مَثَل الفَرِيزِي و سيد الجمارِك
9وَ عِيسَى حَجَّى بِمَثَلْ لِنَاسْ وَاحِدِينْ الْيِسَوُّوا نُفُوسْهُمْ صَالِحِينْ وَ يَحْقُرُوا الْآخَرِينْ. 10وَ قَالْ: «يَوْم مِنْ الْأَيَّامْ، فِي نَاسَيْن دَخَلَوْا فِي بَيْت اللّٰهْ أَشَانْ يِصَلُّوا. الْوَاحِدْ مِنْ الْفَرِيزِيِّينْ وَ الْآخَرْ مِنْ نَاسْ الْجَمَارِكْ. 11وَ الْفَرِيزِي وَقَفْ بِطُولَهْ وَ صَلَّى وِحَيْدَهْ وَ قَالْ: ‹يَا اللّٰهْ، نُقُولْ لَيْك شُكْراً أَشَانْ أَنَا مَا بِقِيتْ مِثِلْ النَّاسْ الْآخَرِينْ. هُمَّنْ سَرَارِيقْ وَ فَسْلِينْ وَ زَنَّايِينْ. أَيْوَى، أَنَا مَا مِثِلْ نَادُمْ الْجَمَارِكْ دَا. 12أَنَا نُصُومْ يَوْمَيْن فِي الْأُسْبُوعْ وَ نَنْطِيكْ عُشُرْ هَنَا كُلَّ شَيّءْ النَّرْبَحَهْ.› 13لَاكِنْ نَادُمْ الْجَمَارِكْ وَقَفْ وِحَيْدَهْ بَعِيدْ مِنْ النَّاسْ. مَا رَفَعْ رَاسَهْ فَوْق كُلَ. وَ قَاعِدْ يُدُقّ صَدْرَهْ مِنْ النَّدَامَةْ وَ قَالْ: ‹يَا اللّٰهْ، أَرْحَمْنِي. أَنَا مُذْنِبْ.›
14«وَ نُقُولْ لَيْكُو مِنْ النَّاسَيْن دَوْل، الرَّاجِلْ التَّانِي بَسْ قَبَّلْ فِي بَيْتَهْ وَ اللّٰهْ جَعَلَهْ صَالِحْ. أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.»
المسيح بارك العيال
15وَ النَّاسْ قَاعِدِينْ يِوَدُّوا عِيَالْهُمْ الصُّغَارْ لِعِيسَى أَشَانْ هُو يَلْمَسْهُمْ لِيِبَارِكْهُمْ. وَ تَلَامِيذَهْ شَافَوْهُمْ وَ هَرَجَوْهُمْ. 16لَاكِنْ عِيسَى نَادَى الْعِيَالْ وَ قَالْ لِتَلَامِيذَهْ: «خَلُّوا الْعِيَالْ يَجُوا لَيِّ وَ مَا تَدْحَرَوْهُمْ أَشَانْ مَمْلَكَةْ اللّٰهْ هَنَا النَّاسْ الْمِثِلْهُمْ. 17وَ نُقُولْ لَيْكُو الْحَقّ، نَادُمْ أَبَداً مَا يَدْخُلْ فِي مَمْلَكَةْ اللّٰهْ كَنْ مَا يَقْبَلْهَا مِثِلْ وِلَيْد صَغَيَّرْ.»
الشَيْخ الغني
18وَ نَادُمْ وَاحِدْ مِنْ الْكُبَارَاتْ سَأَلْ عِيسَى وَ قَالْ: «يَا الْمُعَلِّمْ الْعَدِيلْ، وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟» 19وَ عِيسَى رَدَّ لَيَّهْ وَ قَالْ: «مَالَا تُقُولْ أَنَا عَدِيلْ؟ وَاحِدْ بَسْ عَدِيلْ وَ هُو اللّٰهْ. 20أَكِيدْ، تَعَرِفْ الْوَصَايَا الْبُقُولُوا: <مَا تَزْنَى وَ مَا تَكْتُلْ دِمَّةْ وَ مَا تَسْرِقْ وَ مَا تَشْهَدْ بِكِدِبْ وَ كَرِّمْ أَمَّكْ وَ أَبُوكْ.>»#18:20 الكلام دا تلقوه في خُروج 20:12-16.
21وَ الرَّاجِلْ قَالْ: «مِنْ أَنَا صَغَيَّرْ، نِتَابِعْ كُلَّ الْوَصَايَا دَوْل.» 22وَ وَكِتْ عِيسَى سِمِعْ كَلَامَهْ دَا، هُو قَالْ: «شُغُلْ وَاحِدْ لِسَّاعْ قَصَّرْ لَيْك. بِيعْ كُلَّ شَيّءْ الْعِنْدَكْ وَ أَنْطِي تَمَنَهْ لِلْمَسَاكِينْ وَ مِثِلْ دَا، تَلْقَاهْ قِدَّامَكْ. وَ تَعَالْ تَابِعْنِي.»
23وَ وَكِتْ سِمِعْ كَلَامْ عِيسَى دَا، هُو بِقِي حَزْنَانْ أَشَانْ هُو غَنِيْ بِلْحَيْن. 24وَ عِيسَى شَافْ وِجْهَهْ وَ قَالْ: «الدَّخُولْ فِي مَمْلَكَةْ اللّٰهْ قَاسِي لِلنَّاسْ الْعِنْدُهُمْ مَالْ كَتِيرْ. 25بَتَّانْ نُقُولْ لَيْكُو، دَخُولْ الْجَمَلْ فِي قَدّ الْإِبْرَةْ هَيِّنْ مِنْ دَخُولْ سِيدْ الْمَالْ فِي مَمْلَكَةْ اللّٰهْ.» 26وَ النَّاسْ السِّمْعَوْا الْكَلَامْ دَا قَالَوْا: «كَنْ مِثِلْ دَا، يَاتُو يَقْدَرْ يَنْجَى؟» 27وَ عِيسَى رَدَّ لَيْهُمْ وَ قَالْ: «الشَّيّءْ الْقَاسِي لِلنَّاسْ، مَا قَاسِي لِلّٰهْ.»
28وَ بُطْرُسْ قَالْ: «وَ أَنِحْنَ خَلَّيْنَا كُلَّ خُمَامْنَا أَشَانْ نِتَابُعُوكْ.» 29وَ عِيسَى قَالْ لَيْهُمْ: «نُقُولْ لَيْكُو الْحَقّ، أَيِّ نَادُمْ الْخَلَّى بَيْتَهْ أَوْ مَرْتَهْ أَوْ أَخْوَانَهْ أَوْ وَالْدَيْنَهْ أَوْ عِيَالَهْ فِي شَانْ مَمْلَكَةْ اللّٰهْ، 30يَلْقَى كَتِيرْ مِنْهُمْ زِيَادَةْ فِي الزَّمَنْ الْحَاضِرْ. وَ فِي الْآخِرَةْ، يَلْقَى الْحَيَاةْ الْأَبَدِيَّةْ.»
تالِت مرّة المسيح حجّى بمَوْته
31وَ عِيسَى طَرَّفْ التَّلَامِيذ الْأَتْنَا عَشَرْ وَ حَجَّى لَيْهُمْ وِحَيْدهُمْ وَ قَالْ: «شِيفُوا. أَنِحْنَ مَاشِينْ لِمَدِينَةْ الْقُدُسْ. وَ هِنَاكْ كُلَّ شَيّءْ الْأَنْبِيَاء كَتَبَوْه فِي إِبْن الْإِنْسَانْ يِتِمّ. 32يِسَلُّمُوهْ لِلْمَا مُؤمِنِينْ وَ يِشَّمَّتَوْا لَيَّهْ وَ يِعَيُّرُوهْ وَ يِبَزُّقُوا فَوْقَهْ. 33وَ يَجْلُدُوهْ وَ يَكْتُلُوهْ. وَ لَاكِنْ فِي الْيَوْم التَّالِتْ هُو يَبْعَثْ.» 34وَ لَاكِنْ تَلَامِيذَهْ مَا فِهْمَوْا شَيّءْ مِنْ الْكَلَامْ دَا. كَلَامَهْ دَا مُلَبَّدْ مِنْهُمْ وَ مَا عِرْفَوْا مَعَنَى كَلَامَهْ.
المسيح شفى نادم عمْيان
35وَ وَكِتْ عِيسَى قَرَّبْ لِحِلَّةْ أَرِيحَا، عَمْيَانْ وَاحِدْ قَاعِدْ تِحِتْ جَنْب الشَّارِعْ وَ هُو قَاعِدْ يَشْحَدْ صَدَقَةْ مِنْ النَّاسْ. 36وَ الْعَمْيَانْ سِمِعْ حِسّ هَنَا النَّاسْ الْكَتِيرِينْ الْمَاشِينْ فِي الدَّرِبْ وَ سَأَلَاهُمْ وَ قَالْ: «شُنُو الْحَرَكَةْ دِي؟» 37وَ قَالَوْا لَيَّهْ: «عِيسَى الْمِنْ النَّاصِرَةْ مَاشِي فِي الدَّرِبْ دَا.» 38وَ هُو بَدَا يِعِيطْ وَ يُقُولْ: «يَا عِيسَى! يَا إِبْن دَاوُدْ! أَرْحَمْنِي!» 39وَ النَّاسْ الْمَاشِينْ قِدَّامْ عِيسَى هَرَجَوْه وَ قَالَوْا لَيَّهْ: «أَسْكُتْ!» لَاكِنْ الْعَمْيَانْ قَمَّ يِعِيطْ بِزِيَادَةْ وَ يُقُولْ: «يَا إِبْن دَاوُدْ، أَرْحَمْنِي!»
40وَ عِيسَى وَقَفْ وَ أَمَرَاهُمْ لِلنَّاسْ أَشَانْ يِجِيبُوا لَيَّهْ الْعَمْيَانْ. وَ وَكِتْ الْعَمْيَانْ جَاءْ قَرِيبْ، عِيسَى سَأَلَهْ وَ قَالْ: 41«تِدَوْر أَنَا نِسَوِّي لَيْك شُنُو؟» وَ الْعَمْيَانْ قَالْ: «يَا سَيِّدْنَا، نِدَوْر نِشِيفْ!» 42وَ عِيسَى قَالْ: «خَلَاصْ، شِيفْ! إِنْتَ لِقِيتْ الْعَافَيْ بِسَبَبْ إِيمَانَكْ.» 43وَ طَوَّالِي عُيُونَهْ أَنْفَتَحَوْا وَ قَمَّ يِتَابِعْ عِيسَى وَ قَاعِدْ يَشْكُرْ اللّٰهْ. وَ وَكِتْ كُلَّ النَّاسْ شَافَوْه، شَكَرَوْا اللّٰهْ كَتِيرْ.
अहिले सेलेक्ट गरिएको:
لُوقا 18: ع.د.ت19
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
La Bible en arabe tchadien © Alliance biblique du Tchad, 2019