Luka 22
22
Vutumbe vwakutsiya Yesu
(Mateo 26:1-5; Mako 14:1-2; Yowano 11:45-53)
1 #
Kut 12:1-27
Ciwano cakulya Makende Akujeneka Musima cakele muyehi, cije vatumbula ngwavo Ciwano ca Pasovala. 2Co vakulunu va vaka-kukombelela na valongisi va majwi a Lishiko vakele na lyova lya vanu, co vesekele kuwana ngila imo yakutsiya Yesu mu vushweke.
Yundasa atava kwenda Yesu vungungu
(Mateo 26:14-16; Mako 14:10-11)
3Co Satana wakovelele muli Yundasa, uje vatumbwile Isikalyote, umo wa vaje likumi na vavali. 4Ngecivene, Yundasa waile nakwendeka kuli vakulunu va vaka-kukombelela na vamyata va vaka-kunyunga Njuvo ya Shukulu Kalunga kuwana ngila muka yakenda Yesu vungungu ngeci avaneye. 5Co vakevo vavwaelelele, valizivasanene nendi kumwana vimbongo. 6Co Yundasa watavele, co washangumukile kushakezeka ngila imo yaivwa yakwenda Yesu vungungu kujeneka vanu kuyizivuka.
Yesu alivwaesela kulya ku Ciwano ca Pasovala
(Mateo 26:17-25; Mako 14:12-21; Yowano 13:21-30)
7Litangwa lyetele a simbu ya Ciwano ca Makende Akujeneka Musima, litangwa lije vatsiile vana va vimanga vakulya a Ciwano ca Pasovala. 8Yesu watumine Petulu na Yowano ngwendi, “Yeni mukavwaesele cimweja Ciwano ca Pasovala ngeci tukalye.”
9Co vamwihwile ngwavo, “Kulijo ushaka ngeci tukacivwaeseleko?”
10Co wavakumbulwile ngwendi, “Omo mukakovela mu nganda, mukaliwana na munu nambata njava yakutekwila mema. Mukaveni nakweta kuje ku njuvo kwakakovela, 11endekeni kuli vavenya njuvo ngweni, ‘Mulongisi natutumu kuli yove ngwendi mulili ulikuli kwakalila Ciwano ca Pasovala na vandongisi vendi?’ 12Co akamimwesa mulili wakama akamwa ya njuvo, vanauvwaesa cimweja, co mukatuvwaesele vyuma vyoshe.”
13Co vaile vawanene vyuma vyoshe ngwe mwavalekele Yesu, vavwaesele vyakulya vya Ciwano ca Pasovala.
Mesa ya Mwene
(Mateo 26:26-30; Mako 14:22-26; 1 Kolinte 11:23-25)
14Omo simbu yetele, Yesu watumbamene ku mesa amo na miluwa likumi na vavali. 15Co wendekele kuli vakevo ngwendi, “Njashakele manene kulya eci Ciwano ca Pasovala amo neni simbu kanda njiyande! 16Omwo njimileka ngwange, kutunda lelo kunjikacili lalo kuvanga noo cinalumbunuka mwamuvwa mu Vumwene vwa Njambi.”
17Co Yesu wanonele nganja ya vinyu, wakandelelele kuli Njambi, co wendekele ngwendi, “Tambuleni nganja eyi mulishumwine akati keni, 18njimileka ngwange, kutunda lelo kunjikanu lalo vinyu evi kuvanga noo Vumwene vwa Njambi vunaija.”
19Co wanonele lalo likende, wakandelelele kuli Njambi, co walipazwile wavanenelyo ngwendi, “Eli linapu muvila wange uvanaana omwo yeni. Lingeni eci mukunjanuka yange.” 20#Njele 31:31-34 Omo vanamanesa kulya wavanene nganja wendekele ngwendi, “Eyi nganja inapu cikumiiyo caciha ca Njambi civanakolesa na maninga ange aje anetikila ali yeni.
21 #
Mya 41:9
“Oloni kengeni, ou anjenda vungungu ali amo nange kuno ku mesa! 22Muna Munu akatsa ngwe muje mwanayongola Njambi, oloni ngongo yendi uje amwenda vungungu!”
23Co miluwa vashangumukile kulihozola akati kavo ngwavo iyajo akalinga cuma eci.
Vimata ali uje napu wakama kutuvakana
24 #
Mat 18:1; Mak 9:34; Luk 9:46 Co kwakele vimata akati ka vandongisi ngwavo iya umo akati kavo napu wakama. 25#Mat 20:25-27; Mak 10:42-44 Co Yesu wendekele kuli vakevo ngwendi, “Vimyene va vaka-kujeneka kukulaela vali na nzili ali vanu vavo, co vaka-kushika valinakuvatumbula ‘Vasamba va Vanu.’ 26#Mat 23:11; Mak 9:35 Oloni eyi kesi ikeyo ngila akati keni, oloni woshe uje wakama akati keni napande kupwa wamundondo, co ntwama yeni napande kupwa ngwe ngamba. 27#Yow 13:12-15 Iya wakama? Uje natumbama kukulya indi uje amwana vyakulya? Ngwetu uje natumbama kukulya ikeye wakama ndi? Oloni yange njili akati keni ngwe muka-kumipangela.
28“Yeni munakala nange mu tuyando twange twoshe, 29ngwe mwananjana Tate moko yakushwana, neni lalo njikamyana moko yakushwana. 30#Mat 19:28 Yeni mukalya nakunwa nange mu Vumwene vwange, co mukatumbama a matanda nakusompa miyati likumi na ivali ya Isalele.
Yesu endeka ngeci Petulu akamuvyana
(Mateo 26:31-35; Mako 14:27-31; Yowano 13:36-38)
31“Simoni, Simoni! Satana nalombo ngeci amyeseke yeni voshe, kwangununa vavavwa ku vavavi ngwe muka-kulima mwakaangununa tiliku ku lijungu. 32Oloni yange njinakulombelela Simoni, ngeci kukulaela kwove kesi kuhwe. Co omo ukatenguluka nakwiluka kuli yange, unapande kukatakamesa vakweni.”
33Co Simoni wamukumbulwile ngwendi, “Mwene, njinalivwaesa laja kuya mu kamenga nakukatsa nove!”
34Yesu wamukumbulwile ngwendi, “Mwa vushunga Petulu njikuleka ngwange, vutsiki vuno vene simbu kanda ndemba atambeke, ukanjivyana visimbu vitatu ngwove kuunjizivuka.”
Lipakumuna, ngonga, na moko ya mukwale
35 #
Mat 10:9-10; Mak 6:8-9; Luk 9:3; 10:4 Yesu wehwile vandongisi vendi ngwendi, “Muje njamitumine kujeneka lipakumuna, ngonga nambe vin̄aku mwajenekele cuma cimo ndi?”
Co vamukumbulwile ngwavo, “Embwe! Kutwajenekele cuma cimo cai.”
36Yesu wendekele kuli vakevo ngwendi, “Oloni simbu ino ou ali na lipakumuna nambe ngonga napande kwambata, co woshe kesi na mukwale napande kulandesa kazaku kendi alande moko ya mukwale. 37#Isa 53:12 Omwo njimileka ngwange visoneka vije vyendeka ngwavyo, ‘Vamulavelele amo mu luvinda lwa vaka-kutsiya,’ co vinapande kulingiwa ali yange, omwo vije vivasonekele ali yange vilinakusholoka kupwa vya vushunga.”
38Co vandongisi vendekele ngwavo, “Mwene, kenga! Kuno kuli vimoko vya mikwale vivali!”
Co wavakumbulwile ngwendi, “Mukemwo kunahu!”
Yesu alombela a Munkinda wa Oliveta
(Mateo 26:36-46; Mako 14:32-42)
39Yesu watundile mu nganda, co waile, ngwe mwakele nakulinga, waile ku Munkinda wa Oliveta, co vandongisi vendi vamukavele. 40Omo wetele kuje wavalekele ngwendi, “Lombeleni kutewa mukakovela mu vyeseko.”
41Co wavashondolokele kamandondo watsikamene, co walombelele, 42ngwendi, “Tate, nga ushaka, nganja eyi ya kayando itunde kuli yange. Kesi ngwe mwaya cizango cange embwe, oloni cizango cove cilingiwe.” 43Co kangelo watundile mwilu washolokele kuli ikeye mukumutakamesa. 44Co omwo a tuyando twakama walombelele manene, co litukuta lyendi lyafwile ngwe maninga andwekelele asi.#22:44 CO KANGELO...ANDWEKELELE ASI: Kunungulula kumo mavesi 43-44 aimo.
45Omo wakatukile kutunda kukulombela, waile kuli vandongisi vendi wavawanene vanalala tulo, omwo vazeyele na vusiwa. 46Wendekele kuli vakevo ngwendi, “Omwo vika munalala? Indukeni mulombele, kutewa mukakovela mu vyeseko.”
Yesu vamukwata
(Mateo 26:47-56; Mako 14:43-50; Yowano 18:3-11)
47Omo Yesu wakele nakwendeka navo, mbunga ya vanu vetele, Yundasa umo wa vaje likumi na vavali watwamene kulutwe lwavo. Co washwenyele kuli Yesu nakumutsemba. 48Oloni Yesu wendekele kuli ikeye ngwendi, “Yundasa kuma wenda Muna Munu vungungu nakumutsemba ndi?”
49Omo vandongisi vaje vakele amo na Yesu vamwene vije vyalingiwile, vendekele ngwavo, “Mwene, tulwe na mikwale yetu ndi?” 50Co umo wavo wavatwile litwi lya ku cilyo lya ndungo ya Muka-kukombelela Wakama.
51Oloni Yesu wendekele ngwendi, “Likele!” Co wakwatele litwi lya uje munalume nakuliilwisilako lalo.
52Asinoni Yesu wendekele kuli vakulunu va vaka-kukombelela na vamyata va vaka-kunyunga Njuvo ya Shukulu Kalunga na vakulunu vaje vezile nakumukwata ngwendi, “Kuma munaija na mikwale na vimbweti ngwe nji lipwepwe ndi? 53#Luk 19:47; 21:37 Njakele neni mu Njuvo ya Shukulu Kalunga a litangwa na litangwa, kumwesekele kunjikwata. Oloni eyi ikeyo simbu yeni yakupanga, omo nzili ya lisusulungu ilinakushwana.”
Petulu avyana Yesu
(Mateo 26:57-58,69-75; Mako 14:53-54,66-72; Yowano 18:12-18,25-27)
54Vakwatele Yesu, co vamutwalele ku njuvo ya Muka-kukombelela Wakama, co Petulu wamukavele munima wakele alyala kamandondo. 55Vamo vavwekele tuhya mukati ka cipango vakele nakwota tuhya, co Petulu nendi watumbamene navo. 56Omo ngamba umo wamumbanda wamwene Petulu natumbama kuje ku tuhya, wamukengele shwii, co wendekele ngwendi, “Munalume ou lalo wakele amo na Yesu!”
57Oloni Petulu wavyanene ngwendi, “Ove munakazi, yange kunjimuzivuka!”
58Omo kwetile kasimbu kakandondo munalume weka lalo wamwene Petulu, co wendekele ngwendi, “Nove lalo uumo wavo!”
Oloni Petulu wakumbulwile ngwendi, “Embwe, kesi yange!”
59Omo kwetile kasimbu lika, co munalume weka lalo wendekele na nzili ngwendi, “Ou munalume wakele amo na Yesu vene, omwo nendi lalo kaNgalileya!”
60Oloni Petulu wamukumbulwile ngwendi, “Ove munalum yange kunjizivuka evi ulinakwendeka!”
Co aje vene, omo wakele nakwendeka, ndemba watambekele. 61Co Mwene watengulukile wakengele kuli Petulu, co Petulu wanukile ngeci Mwene wamulekele ngwendi, “Simbu ndemba kanda atambeke vutsiki vuno vene, ukanjivyana visimbu vitatu ngwove kuunjizivuka.” 62Co Petulu watuukile anja walilile manene.
Yesu vamushendumuna nakumupupa
(Mateo 26:67-68; Mako 14:65)
63Vanalume vaje vanyungile Yesu vamushendumwine nakumupupa. 64Vamukutile nanga ku mesho, co vamwihwile ngwavo, “Tuleke! Iya nakupupu?” 65Co vendekele vyuma vyavingi vyakumushaula.
Vasompa Yesu ku mesho a munga
(Mateo 26:59-66; Mako 14:55-64; Yowano 18:19-24)
66Co omo kwakile, vakulunu, na vakulunu va vaka-kukombelela, na valongisi va majwi a Lishiko vakungulukile amo, co vanenele Yesu ku munga yavo. 67Co vamwihwile ngwavo, “Tuleke, yove Wakuvwavesa ndi?”
Co wavakumbulwile ngwendi, “Nambe nga njimileka ngwange yange, kumwasa kunjikulaela, 68co lalo nga njimihula cihula cimo, kumwasa kunjikumbulula. 69Oloni kutunda lelo nakutwala kulutwe Muna Munu akatumbama ku livoko lya cilyo lya Njambi Muka-nzili yoshe.”
70Co voshe vamwihwile ngwavo, “Kuma yove u Muna Njambi ndi?”
Ikeye wavakumbulwile ngwendi, “Omo mumunendeka mukemwo vene.”
71Co vamukumbulwile ngwavo, “Vikajo lalo tucishakezekela vukaleo vweka? Yetu vavenya tunalizivila laja vije vyanendeka!”
अहिले सेलेक्ट गरिएको:
Luka 22: MBB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The Bible in Mbunda ©The Bible Society of Zambia, 2006