Start 4
4
Adam An Eve Get Kids
1Den Adam sleep togedda wit his wife Eve, an she born one boy. She give um da name Cain. She tell, “Da One In Charge wen help me. Dass how come I get dis boy.” 2Laytas, she born anodda boy, dass Abel, Cain braddah. Wen dey come big, Abel come one sheep an goat farma, an Cain come one dirt farma.
Cain An Abel Make Present Fo God
3Had one time, Cain harves some a da tings dat grow from da land wen was ready, an he bring um fo make one present fo show respeck fo God, Da One In Charge. 4#Heb 11:4Same ting fo Abel, he take some a da firs bebe sheeps dat born from his sheeps. He kill da bebe sheeps an cut out da bestes part a da meat fo make dat his present fo show respeck fo Da One In Charge. Da One In Charge like wat Abel give him. 5But Da One In Charge like Abel mo den Cain, an he neva kea fo da present Cain wen give him. So Cain come plenny huhu, an look mad.
Da One In Charge Tell Cain Fo Watch Out
6Da One In Charge tell Cain,
“Eh! How come you stay huhu lidat?
How come you make mad face?
7If you do wass good,
Den you can stay good inside.
But if you no do wass good,
Den jalike da bad kine stuff
Stay wait right dea
Fo take ova you.
Jalike one wild animal
Stay wait by da door fo kill you.
But you gotta take charge
An no let da bad kine stuff take ova you!”
Cain Murda His Braddah Abel
8 #
Matt 23:35; Luke 11:51; 1John 3:12 Laytas, Cain tell his braddah Abel, “Eh! We go country side!” Wen dey ova dea, Cain murda his braddah Abel.
9Afta dat, Da One In Charge aks Cain, “Wea yoa braddah Abel? Wea he stay?”
Cain tell um, “I donno. You tink I da guy suppose to take kea my braddah an watch wea he go, o wat?”
10 #
Heb 12:24
Da One In Charge tell, “Wat you wen do?! You wen murda yoa braddah, an now, his blood stay ova dea on top da groun, jalike he stay call out to me fo pay you back. 11Az why I wen put kahuna on top you awready so da land no can grow stuff. But you, I goin make shua dat you no can even work da groun no moa! Dat groun, jalike da mout open fo soak up da blood from yoa braddah wen you murda him. 12Wen you try fo work da groun, da groun no goin give you back notting good. You no goin get one place fo live. From now, you gotta jus go from one place inside dis world to anodda place!”
God Make Cain Go Way
13Cain tell Da One In Charge, “Da way you stay punish me, mo plenny den I can handle! 14So den, today you goin throw me outa da land an no let me work da groun no moa, an no let me stay by you, aah?! I gotta jus go hide! Goin be lidis: I gotta jus go one place inside dis world to anodda, an anybody dat meet me, bumbye dey like kill me!”
15Da One In Charge tell Cain, “No ways! Dey no goin kill you! Cuz I promise, anybody kill you, I goin kill seven a dea guys fo pay um back.” Den Da One In Charge put one spesho mark on top Cain body fo show he kapu fo him, so if whoevas meet Cain, dey know dey not suppose to kill um. 16Den Cain go way from da place wea Da One In Charge stay. He go da land dey call “Da Homeless Land” fo live ova dea, from Eden to da east.
Da Peopo Dat Come From Cain
17Den Cain come togedda wit his wife, an she born one bebe. She born one boy, an she give um da name Enok. Laytas, Cain start fo build one town wit wall, an he give da town da same name Enok, jalike his boy. 18Irad come from Enok, an Mehujael come from Irad, an Methuselah come from Mehujael, an Lamek come from Methuselah.
Lamek
19Lamek, he marry two wahines, dea names Adah an Zillah. 20Adah, she born one bebe, Jabal. All da guys dat live inside tents an take kea cows an sheeps an goats lidat, dey jalike Jabal dea ancesta guy. 21He get one braddah name Jubal. All da guys dat play da small kine harp an da flute, dey jalike Jubal dea ancesta guy. 22Da odda wife Zillah, she wen born one bebe too, name Tubal-Cain. He da guy make all kine tool from bronze an iron. Tubal-Cain get one sistah, Naamah.
23One time, Lamek talk big to his two wifes:
“Eh, Adah an Zillah! Lissen up!
You guys my wifes, so lissen wat I tell you!
Had one guy dat go bus me up.
I wen kill um.
No matta az ony one boy bus me up,
If somebody hurt me, I goin kill um!
24Da One In Charge wen tell, anybody dat kill Cain,
Da One In Charge goin kill seven a dea guys fo pay um back, aah?
Kay den, somebody kill me, Lamek,
Seventy-seven a dea guys goin get kill!”
Adam Get Anodda Boy
25Adam, he wen come togedda wit his wife one mo time. She born one boy, an she give um da name Seth, dat soun kinda like “give,” dea language, cuz she tell, “God give me one mo boy fo take da place afta Abel, da one Cain wen kill.” 26Afta dat, had anodda boy dat wen born fo Seth. Seth give um da name Enosh. Dat was da time wen da peopo firs start fo aks Da One In Charge fo help um cuz dey know wat kine god him.
अहिले सेलेक्ट गरिएको:
Start 4: HPB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©2020 Hawaii Pidgin Bible Ministries
hawaiipidginbible.org
Hawaii Pidgin Bible बारे थप जान्नुहोस्