Matthieu 9
9
Jésu aje dingem karé ke ra’n wei tonrin
(An-in Marc 2.1-12; Luc 5.17-26 tɔ)
1Jésu al kêm ngonn bato’t tel gang ba ree kêm ɓee-bò’t le’n ke kinge’n. 2An! d’unn dingem karé ke ra’n wei tonrin se tuwe dé ree se’n d’ile’n nang non Jésu’t. Loo ke è an kundekêm le dooge nè bè ɓaa, è ede dingem ke ra’n wei tonrin nga, ede nè:
– Basa, i nda kêmi káng, tede Nube ade kêm’n tin mbit dè kaiyage’t lei ɓá ta.
3An! njékɔrgir gute-nduge ke nange murin tà kêm de’t edi nè:
– Doo nè nga nede Nube kerɔte kuwe.
4Jésu ger tàgirge le de ke kêm de’t mbak. Gir’n ke nè á è deje’n de ede nè:
– Ké bain á i giri tàge ke majelé titeke bè dè ɓengre si’t wa? 5«Nube ade kêm’n tin mbit dè kaiyage’t lei»,éké «ɔse nang in dɔ i njiye.» Ké è ke ra á è tà ke loo tam’n on lé wa?
6Jésu ede dingem ke ra’n wei tonrin nè nga ede nè:
– Ɔse nang in dɔ, unn tuwe-tooi, aw kei lei. M’ra titeke bè le kade i geri titeke man ke m’ee Ngonn doo nga m’aw se tɔgmong le kɔr’n kaiyage dè dooge’t dè nang nè.
7Dingem nè nga ɔse nang in dɔ aw kêm kei le’n. 8Loo ke kosdoo-bulege an-in bè ɓaa, ɓel unde de ndàt gang dè ade ɗɔyi Nube ke njè kade dooge tɔgmong ke titeke bè nga.
Jésu ɓar Matthieu
(An-in Marc 2.13-17; Luc 5.27-32 tɔ)
9Loo ke Jésu in loon’t nè à dese ɓaa, è an dingem karé ndi kêm kei taa tirge’t. Dingem nè nga ri’n nè Matthieu. Jésu ɓar’n ede’n ede nè:
– Unn rebe goom’t.
Ke loon’t nè kuwe, è ɔse nang in unn rebe go Jésu’t. 10Matthieu ɓar Jésu le kade aw se’n kêm kei le’n use se’n nyan. Njékuwe-gir-Jésuge awi se’n nan’t. Njétaa tirge bule se njé ke d’an de ke njé ra majelége géa ndii se de nan’t tà nyankuse’t nè nga tɔ. 11Loo ke Pharisienge an-in titeke bè ɓaa, ei deji njékuwe-gir-Jésuge edi nè:
– Ké bain á njè ndó sei nyan use nyan nan’t se njétaa tirge a, se dooge ke d’an de ke njé ra majelége nga wa?
12Nè loo ke Jésu oo tà nè bè ɓaa, è tam ede nè:
– Njé ke ra de mong maj-maj nga awi ndoo njèkuge-kaje lé. Nè è njératurge á awi ndoo’n. 13Kêmkanm á m’ndige m m’aw ndoo nyankuje-mese lé. Awi, i giri tà dè tà’t nè nga an-in. Oiyo, man m’ree le ɓar njé ke an-in ra de ke njé ra nyan se dè najennge lé, nè le ɓar njé ke an-in ra de ke njé ra majelége.
Jésu tam tà ke ɔje dè kɔge kêm ɓo
(An-in Marc 2.18-22; Luc 5.33-39 tɔ)
14Ndɔ karé bè pajage le Jean reei ra Jésu’t deji nin edi nè:
– Jè se Pharisienge j’ɔge kêm jé ɓo dɔ-dɔ, nè ké bain á njékuwe-girige ɓaa ɔgi kêm de ɓo lé wa?
15Jésu tel deje de ede nè:
– Njètaa dinye kige nga, loo ke madennge ei se’n ɓai nga, ké asi ndii dann nyantosowur’t wa? Nè ndɔ ke d’a d’uwe njètaa dinye kige nè wont kɔr’n dann de’t ɓita d’a kɔge kêm de ɓo ɓai. 16Doo karé bè asekum gangtà kubu ke kige le kile’n kum è ke ndis lé. Tà kubu ke kige nga à uwe è ke ndis ɗonmin gang’n kade majelé dum ke kété. 17Doo à sur yibe nduu ke sɔl ke unn gir pà kêm sɔlge ke mari’t lé. Ke nè á bè lé ɓaa, sɔlge nè nga d’a til kade yibe nduu ule loo nang gangang-gangang a tɔ. Nè yibe nduu ke sɔl ke unn gir pà nga, maje sur’n kêm sɔlge’t ke kige’t. Titeke bè á dé joo mbak d’a ngonm’n nan maje.
Ngonn le Jairus ke dinye se dinye ke mese tal rann’t
(An-in Marc 5.21-43; Luc 8.40-56 tɔ)
18Loo ke Jésu ndi à ede de tàge nè nga bè-bè ɓai ɓaa, ngar dè kei kebe nan ree ngɔr ke rann’t ɔse keje’n nang ede nè:
– Tà ngonn’m ke dinye tête nyonk ɗarinè ɓai, i ree ile ji dènn’t ɓaa, à tel ndikumgajer ɓai.
19Jésu se njékuwe-girnge in-in kalang awi goon’t. 20An! dinye karé bè ke mese an-in rann’t ase ɓal dɔg-gidé-joo ngein jêke^-jêke^ go Jésu’t ree ɔde tà kubu le’n ke rann’t. 21Dinye nè nga tam kêmn’t ede nè:
– Ke nè á m’ɔde tà kubu ke rayé’t kuwe lêm ɓaa, ratur nè nga à ɔr dèm’t.
22Loo ke Jésu tur goo’n an’n ɓaa, ede’n ede nè:
– Yaa, i nda kêmi káng tede kundekêm lei aji ɓá ta.
Ke loon’t nè kuwe ratur le dinye nè nga ɔr dènn’t.
23Loo ke Jésu ree tee kêm kei le ngar dè kei kebe nan pan ɓaa, è an gos têbege se doobulege noin jik-jik. E ede de ede nè:
24– Utei ra si kɔke, tede ngonn ke dinye nè nga wei lé ɓai, nè tò ɓi karè.
Nè dooge ngoin kum de dè Jésu’t.
25Loo ke Jésu ade dé rɔ dooge nata ɓá ɓaa, è aw kei go ngonn ke dinye’t nè nga, lá ji’n uwe. Ke loon’t nè kuwe ngonn ke dinye nè ɔse nang karkat in dɔ. 26Sertà nè oso se loo mbit-mbit kêm ɓeekon’t nè nga.
Jésu ade njékumtɔge joo an-in loo
27Loo ke Jésu ɔte loon’t nè le kaw ɓaa, njékumtɔge joo tami tà se ndu ke bòi beng ndoléi goo’n edi nè:
– Ngonnkà ngar David, an kumtondoo le jé kɔkrɔ karè.
28Loo ke Jésu aw tee kêm ɓéee ɓaa, njékumtɔge nè nga agi ngɔr ke rann’t. E deje de ede nè:
– Ké sei giri titeke m’a m’ase ra nyan ke sei deji man nga wa?
Dé tel d’ile’n dè’t d’ede nè:
– Oiyo Kuwe-ɓee, i asekum ra kuwe.
29E á Jésu ule ji’n ɔde’n kum de ede nè:
– Maje kade Nube ra se si se go kundekêm le si.
30Ke loon’t nè kuwe, kum de an loo njai-njai. Jésu ndeje ndej-ndej ede nè:
– Adi tà nè nga tee tà si’t ade doo karé bè oo lé.
31Nè loo ke njékumtɔge ke joo nè undei loo teei ɓaa, mbɔr bè kuwe adi kɔbe Jésu oso se loo mbit-mbit kêm ɓeekon’t nè nga.
Jésu aje dingem karé ke ndil ke majelé ɔge’n tam tà
32Loo ke a in-in le kawi ɓaa, dé ree se dingem karé ke ndil ke majelé ɔge’n tam tà ra Jésu’t. 33Loo ke Jésu rɔ ndil ke majelé kɔke kêm dingem’t nè ɓá ɓaa, ke loon’t nè kuwe dingem nè nga unn gir tam tà yàr-yàr. Ndil doobulege tee an-in soin-soin ade tami edi nè:
– Ndɔ karé doo an nyan ke titeke bè kêm ɓeekon ke Israel nga ndan lé ɓai.
34Pharisienge tami edi nè:
– E takul ngar le ndilge ke majelé á è rɔ’n ndilge ke majelé nè nga kɔke.
Jésu an kumtondoo le kosdoo-bulege
35Jésu aw se kêm ɓee-bòge se ngann ɓeege malang ndó dooge nyan kêm kei kebe nange’t le de. E ile mber Tà ke Maje ke ɔje dè Konɓee le Nube ade de a, è ɔr ratur ra njératurge’t se njé ke kêl ra de wei tonrin a tɔ. 36Jésu an kumtondoo le doobulege tede ɔri yàl-yàl a, awi dè nan’t ɗɔtɔtɔ asenan se batege ke njékul dege gotoi bè a tɔ. 37Go’t gugu Jésu ede njékuwe-girnge ede nè:
– Ko ke kum sa è ngain nè njé saange á di lé ɓai. 38Bè ɓaa, ɔji tà se Kuwe-ɓee ke njè ko le kade ule njé sa koge loo sa ko’t le’n.
अहिले सेलेक्ट गरिएको:
Matthieu 9: GUL04
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Magtub Mann-ra ke Kige ©Alliance Biblique du Tchad, 2004