Matyu 6
6
Waf ipe' pigiambama enis epes kwahusi
1Ipe' pindumafuma andeande'. Ina penda' waf bu'unai ipe'inai ma naep esis epesi ma seatilipa, ma sie'i ipe' epes bu'wipei ma seafela agof ipe'imi, owa'. I'i ipe' penda'am na'ama, ipe' ina anona nemaf pefa' anom amamaga bu'wami ma Ahalomepa God nape heveni, owa'. 2I'i ipe' pi'i pigiambama enis epes isima kwahusi, ipe' ine' pi'ipa enis epes, owa'. Ipe' ina penda'am si'i waf anama amam mambaso'as ma'i malogof biami mofapula alelefi batagw ma'ipas sali', owa'. Amam manda'am ifagw esis Juda sa'i basef sapeimi, anama eaf dawalegefa naep epesi seati amam sefela agof amamumi lu'um. Owa', hapaimi. Ae' a'ipipa endilisi, Epes isima safela agof amamumi ea' ma'um amama atom. 3I'i ipe' pigiambama epes isima na'amai kwahusi, ipe' pembaho'as penda'as na'ama. Lagel wa'ana nanda'ami, lagel wa'ana ina nogawam, owa'etin. 4Ipe' pembaho'am penda'am. Ama Ahalomepa ipe'inai nati amamaga amama mape mandambahi'i ea' anan atona nambimb nogwamepam ipe'.
Waf ipe' pilana penda' beten
(Lu 11:2-4)
5Maina nemaf ipe' penda' beten, ipe' ina penda'am si'i waf anama amam amama mambaso'ami ma'i malogof biam manda'anai, ma mietu etin nomon ifagw esis Juda sa'i basef sapeimi o eaf lu'unai dawalegef, ama epes seatolom, owa'. Ae' a'ipipa endilisi amam anona nemaf God ina nogwamama amam amamaga bu'wami ma waf anama, owa'etin. Epes isima satolom ea' ma'um amama atom.
6Nogota anama ipe' pi'i penda' beten, piwis ifagw nomon pewalo utagw ea' penda' betena God Ahalomepa ipe'inai, anan nape anama nandambaho'ma. Anan nati amamaga mape sandambahi'i ma nambimb neagwamipei beten. 7Afama ipe' penda' beten, ipe' ina penda' beten pi'i basef loumi atom si'i epes isima sololama Godi sanda'am, owa'. Esis sa'i sonda' beten launai ma nambimb God neame'as. Owa'etin, God ina name'as. 8Ipe' ina pila waf asasinai, hapainai. Ahalomepa God nape ilif nogawa ea' ma amamaga a'ipei. Nogota anama ipe' ata' owa' pihali'anama, anan nagawam ea'.
9Ipe' penda' beten na'ama pi'i,
‘Ahalomapa ape'inai nape heven ilif, ape' ma'i agel ine'inai nope bo'ona andeande' ma hiesi seafela agel ine'inai lu'una. 10Ape' ma'i nemaf anama bu'unai nifi'i ma epes hiesi siowis kingdom ine'inai. Waf bu'unai esis ine'isi sailana heven, ape' ma'i milana etap anae' wapoti' na'ama etin. 11Dei' ine' nese'apa gwa'aimi mondahama nemaf anae'. 12Ine' nekwahomapa waf aonai ape' manda'anai si'i ape' makwahomasa waf aonai enis epes sanda'mapanai. 13Ine' owa' nili'apa mefe'ma amamaga ahifimi meagwamba ape'i. Hapaimi. Netagahipa ma epen aonai.’ ” [Wambel ine'inai noloma pepel ine'inai noloma nafifili ine'inai, amama ine'imi atom la'ela'ef hihif. Endilisi.]
14Ea' Jisas na'ipam wapoti' na'i, “I'i ipe' pekwahomasa waf aonai enis epes sanda'mepanai, ma Ahalomepa nape heveni nekwahomepa waf aonai ipe' panda'anai wapoti'. 15I'i ipe' owa' pekwahomasa waf aonai enis epes sanda'mepanai, Ahalomepa nape heven ina nekwahomepa waf aonai ipe' panda'anai wapoti', owa'etin.
Basef amama ma anom nimeguf sokwaha gwa'aimi ma seanda' beten
16Maim nimeguf ipe' pekwaha gwa'aimi, ina penda'am si'i amam amama mambaso'mami ma'i malogof biami manda'ami ma manda' amagah amamumi awasim, owa'. Amam manda' amagah aom na'ama ma epes satolom sogawa sa'i amam mokwaha gwa'aimi. Ae' a'ipipa endilisi amam mofa'am ea' amamaga amama ma danifel amamunai. Epes isima sati waf anama amamunai, ea' ma'um amama atom. 17Maina nemaf ipe' pekwaha gwa'aimi ma penda' betena God, ipe' pesa'opa amagah penda' wel pindisa balagah ipe'imi. 18Ama enis epes ina sogawa ipe' pakwaha gwa'aimi, owa'. Penda'am na'ama ma Ahalomepa nape nandambahi'i anan atona nogawepa. Anan nati amamaga mape mandambahi'i, ma nambimb neagwamipei beten.
Amamaga bu'wami netamam nimbe'am otaga ilif
(Lu 12:33-34)
19Ipe' ina petama amamaga bu'wami atom ipe'imi pewa'aniam etap anae', owa'. Enis sakowalefi sapisila ifagw sawis sakowalopam, sopafowa motopa'am monda'am aom, waimba nasagiham. 20Dei' ae' a'ipipa pewa'ania amamaga bu'wami ipe'imi mo'omepa gani heven ilif. Anama bamagufi sopafowa ina mototopa'am ea' waimba ina nasagiham, owa'etin endilisi. Ea' sakowalefi ina suwis sokowalopam, owa'. 21Maina wambel amamaga bu'wami ipe'imi ma'oma, ea' wambel anama atona anona nemaf ukup ipe'imi wapoti' meapoma.
Alop si'ina howalana
(Lu 11:34-36)
22Naep nomon ukup ipe'ipi si'i lama alop si'ina ipe'inai. I'i ukup ipe'imi bo'om mope, ea' alop si'ina ipe'inai howalana. 23I'i ukup ipe'imi aom, nambimb alop ipe'inai akutina hi'ilana. Ea' na'ama etin, i'i lam amama mape ukup ipe'imi nomon akutim, anona nemaf owamb anama ea' lu'una endilisi.
Enin epen ina nanda' maol andeande'ma amam agufumi biam, owa'.
(Lu 16:13)
24Ina enin epen la'ifina nanda' maol nihapila maol biefina amam dambami biam, owa'etin. Na'ama okom nila anona, anona nesambalona. Ea' anan neme' basefa anona, anona nowa' alafugahana. Ea' na'ama etin, ipe' ina la'ifipa pepe owina God noloma wiga hianai moni hianai, owa'etin.
Ukup iwanim nomonas matamea hiahias
(Lu 12:22-31)
25Ea' ae' a'ipipa a'i ipe' ina ukup matamea hiahiama ambagof ipe'imi pi'i, ‘Ape' ata' mea' main? Ea' mea' embel maim?’ Owa'. Ipe' ina ukup motamea ma alop ipe'inai pi'i, nambimb ape' monda' main mombaho' alop ape'inai? Ambagof afa'imi ina gwa'aimi atom. Ea' alop ina luwaguf atom, owa'. 26Ipe' ukup mopoma amiguf. Amiguf ina manda' aof mawa gwa'aimi maim, owa'. Amiguf amam ifagw owa'etina mowa'ani gwa'aimi mo'oh, ea' mowa'aniam mofa'am ma'oh ifagw gwa'aimi emi, owa'etin. Ea' Ahalomepa ipe'inai nape heveni, anan nase'am gwa'aimi. Ea' ipe' epes pikila' amiguf amama endilisi. 27Ipe' nambimb emi la'ifina nomonas notanea nawis niwatania anona nemaf wapoti' ma ambal ananinai nope nogota laona wapoti'? Owa'etin. 28Dei' maina nomonas ipe'imi matamea safe' endilisi ma luwaguf maim? Ipe' ata' ukup mopoma afis main salo ande'. Esis sataga salo lu'wis sa'imama? Esis ina sanda' maol, ina sanda' luwaguf maim, owa'etin. 29Dei' ae' a'ipipa fowa' gani anona aman amamaga hiamunai Solomon nanda' sosaf hianai ma luwaguf ananimi, ea' sosaf ananinai ina bo'ona si'i afis amama, owa'etin. 30A'e, otalef amama dei' ata' malo aof ama naman etef sotopa'am sokwahom mefe' nif. Otalef amama awami God nofalo'mam. Ea' ipe' amam nematawa pikila' otalef amama. Ea' dei' ipe' pembale'efa basef Godi, bale'ef ipe'inai ina la'ifina, pegawa endilisi anan numafipa wapoti'. 31Ea' ipe' ina ukup motamea hihif endilisi pi'i, ‘Nambimb ape' mea' main? Mea' embel eti? Monda' luwaguf eti?’ Na'ama owa'. 32Epes sape etapi sololama Godi ukup matamea mafe' endilisi ma sogolopam amamaga amama hiami. Ea' Ahalomepa ipe'inai nape heveni anan nogawa ea' amamaga amama a'ipei. 33Ipe' ata' ukup mili' pegolopa waf bu'unai noloma piwis kingdom Ananinai pili', nese'epa amamaga amama ipe' wapoti'. 34Ea' ipe' ina nomonas mopoma amamaga meataga naman, owa'. Nemaf namanifi fendapoma naman atef, ama amamaga amama meataga naman. Amamaga nimanimi matagama nimeguf deindei mandahama nimeguf atona etin. Ipe' ine ukup motamea mefe', owa'.
अहिले सेलेक्ट गरिएको:
Matyu 6: aojF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2013, Wycliffe Bible Translators, Inc. All rights reserved.