TAUNET 11
11
Teekseetap Babel
1Ki ng'alaali ng'wony komugul kutit agenge ak ng'alaalet agenge. 2Ak ye kingo ta kobendi kong'etee kong'asiis, konyoor atebweet eng' emetap Shinar, ak ki meny olooto. 3Ki ng'alaaljigei anyun icheegei kole, “Ong'eetyee keyai ak kebeel matubaruk kobelogis.” Ki poisyee matubaruk ne kita koik, ak meneet ne kita ng'enda. 4Yeityo komwachigei kole, “Obwa keteekyigei nganaseet ak keteech koot ne kooi ne togostoi parak, ne itei kimonjogunnyi parak kipsengwet, si keyaigei keegu che taagunotiin, si mata keyeste eng' ng'wony komugul.” 5Ki choorgei Kamuktaindet ne Toroor konyo kooro nganaseet ak teekseet ne kooi ne ki togosta kwo parak, ne kiga koteech weeriigap piik. 6Ki le Kamuktaindet ne Toroor, “Ogeero, agenge pichu ak ko po tugul kutit agenge, ak kagotoi koyai kiy ne uu ni. Ma mi kiy ne tos etee icheek si ma yai kiy ne machei. 7Ongebe, kechoortegei anyun ak kitoiye kutusweekwak si mata kogasyin icheegei eng' ng'alaalet!” 8Ko uu nooto anyun, koiyestaat `Kamuktaindet ne Toroor icheek koyom ng'wony komugul; ak kimeto icheek teekseetap nganaseet. 9Ki kiguure nganasanooto Babel, amu ki itoiye yooto Kamuktaindet ne Toroor kutusweek che po ng'wony komugul; ak ki iyeesta `ineendet icheek koyom ng'wony komugul.
Piik che po Ooreetap Shem
10Chu isubi komwaiwech agobo ortinwegap Shem; ye kingo po Shem kenyiisyek pogol, ko ki sich Arbaksat eng' kenyiit ne po aeng' kogagobata maraneet. 11Ki meng'iis Shem kenyiisyek pogol muut ye kingo kagosich Arbaksat, ak ki sich weeriik ak tiibiik.
12Ki meng'iis Arbaksat kenyiisyek sosom ak muut, kosich Shelah. 13Ki meng'iis Arbaksat kenyiisyek pogol ang'wan ak somok ye kingo kagosich Shelah, ak ki sich weeriik ak tiibiik.
14Ki meng'iis Shelah kenyiisyek sosom, kosich Eber. 15Kotar Shelah kenyiisyek pogol ang'wan ak somok ye kingo kagosich Eber, ak ki sich weeriik ak tiibiik.
16Ki meng'iis Eber kenyiisyek sosom ak ang'wan, kosich Peleg. 17Ak ki tar Eber kenyiisyek pogol ang'wan ak sosom ye kingo kagosich Peleg, ak ki sich weeriik ak tiibiik.
18Ki meng'iis Peleg kenyiisyek sosom, kosich Reu. 19Ki tar Peleg kenyiisyek pogol aeng' ak sogool ye kingo kagosich Reu, ak ki sich weeriik ak tiibiik.
20Ki meng'iis Reu kenyiisyek sosom ak aeng', kosich Serug. 21Ak ki tar Reu kenyiisyek pogol aeng' ak tisap ye kingo kagosich Serug, ak ki sich weeriik ak tiibiik.
22Ki meng'iis Serug kenyiisyek sosom, kosich Nahor. 23Ak ki tar Serug kenyiisyek pogol aeng' ye kingo kagosich Nahor, ak ki sich weeriik ak tiibiik.
24Ki meng'iis Nahor kenyiisyek tiptem ak sogool, kosich Tera. 25Ak ki tar Nahor kenyiisyek pogol ak taman ak sogool ye kingo kagosich Tera, ak ki sich weeriik ak tiibiik.
26Ki meng'iis Tera kenyiisyek tamanwogik tisap, kosich Abram, Nahor, ak Haran.
Iyoteetap Tera
27Chu ko ortinwegap Tera; ki sich `Tera Abram, Nahor, ak Haran, kosich `Haran Lot. 28Ki me Haran eng' taitap kwandanyi Tera eng' emet ne ki kisikyin, eng' Ur emetap Kaldeik. 29Ki itunis Abram ak Nahor. Chebyosetap Abram ko ki kiguure Sarai, ak ne po Nahor keguure Milkah, cheptap Haran, kwanitap Milkah ak Iska. 30Ki sonen Sarai; ki ma kotinyei lakwa. 31Ki imut `Tera weeriinnyi Abram, ak Lot weeriitap weeriinnyi Haran, ak Sarai kwondap weeriinnyi Abram. Ki pa tugul emetap Ur ne po Kaldeik, koba agoi emetap Kanaan, ak ye kingo it Haran, komeny olooto. 32Peetuusyegap sabeetap Tera, ko ki kenyiisyek pogol aeng' ak muut; ak ki me ineendet eng' Haran.
Nu geselecteerd:
TAUNET 11: KALDC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kalenjin Revised Bible Catholic Edition © Bible Society of Kenya, 2015.