Mak 13
13
1Ana ye jiɛl ne yekalu, ke thiec ran toŋ de kɔcpiocke, Ye Dupioc, ŋem cɔɔk de keekurka ku cɔɔk de keeɣootka! 2Go Yecu jam, Ye ca keeɣoot ditka ŋem? acin kuur toŋ bi doŋ ne kuur dɛ nom, ci bi thuɔr piny.
3Ana ye nyuuc ne kuur de Olip nom ne biak beer yekalu, ke thiec yi Petero ku Jɔn ku Andereya thiecki neluɔɔŋ, 4Yi lɛke wɔ, ye na bii keekake tuɔl? ku bi ŋo bɛnden nyuɔth, bii keekake jal ya yith kedhia? 5Go Yecu ke gɔl ne jiɛm, Ye ŋɛmka roth duɔke raan bi we math. 6Juaac abi bɛn ne rincie, ku ye jam, Ye ɣan eke ye; ku bik juaac ya math. 7Na yaka tɔɔŋ piŋ, ku thook ke tɔɔŋ, ke we duɔka nhiim liap: keekaka aabi bɛn kan dhiil, ku kol ciɛn aŋoot. 8Jure ke jure aabi ɣeet, ku ceŋ ke ceŋ: ku kabi naŋ aluɛkluɛk ne ɣɔn kɔk; ku pawɛɛr: keekake kedhia aaye gɔc de diɛɛr.
9Demka roth: aabi we ya yiɛn luk; ku we bi ya dui ne luek ke gueer yic; ku we bi ya kɔɔc ne gabanai nhiim ku meleek ne ɣɛn, bi ya lekden. 10Ku welpiath aabike kan dhiil ne lek juɔr ebɛn. 11Na yiki we laar ne lukic, ku yiki we dɔm, ke we duɔka ye leeth ne ke bak ya luel: ke bi ya yiɛn week etɛɛn, ke jiɛm we: ne ke cene we e bi ya jam, ee Jɔŋdiit Lajik. 12Ku ŋɛk abi manhe ya yiɛn thou, ku meth ke wun; ku ye mith teer kene kɔcken, bik ke cɔk thou. 13Ku we bi ya maan ne raan ebɛn ne rincie: ku ran ci rɔt bi ya wek athook kek, ke yeneka bi luɔk.
14Yen na ŋɛmka keman ne man cie thɔɔŋ ne kaac te cie tede, (ne ye raan nyic ran ye ciir), ke ne kɔc tɔ ne Judaya riŋ ne kur nhiim: 15ku ne ran tɔ ne ɣot nom, ne ce lɔ piny, ku leer bi kake lɔ nap bei ɣot: 16ku ne ran tɔ domic ce dhuk ciɛn bi alanhde lɔ loom. 17Abi naŋ dhieu enɔŋ diar liac ku diar tiakke ne keeakolke! 18Yaka lɔŋ kɛlke bi bɛn muɔi. 19Keeakolke aabi ya akol ke jiɛth de piɔu, ne ken kan bɛn ɣɔn ciɛke piny ne Nhialic agut ci emane, ku kaci kɔn bɛr ya tɔ. 20Ne Nhialic ken nin cɔk lik, ee te cin ran ci luɔk: ee cɔk nin cɔk lik ne ke de lɔɔckeek ci ke lɔc. 21Na yook raan week, Ye ŋɛmka, Kritho eke; ku ye yenekaa tii, ke duɔka gam: 22Krithoi ke adhom ku nebii ke adhom aabi tuɔl, ku kaabi cit ku kagɛike nyuɔth, bik kɔc yɛc wei, aɣet kɔc cike lɔc, te leu kek yen. 23Yaka roth ŋem: we ca lɛk kaŋ kedhia emane e ke ŋoot wei.
24Keeakolka, te cii jiɛth de piɔu thok, ke akɔl abi cuɔl ecut, ku pɛɛi aci bi ya ruɛr, 25ku kuel aabi ya loony piny nhial, ku riir ye tɔ nhial aabi met. 26Ku jɔlki Wen de raan ŋem ne bɔ ne piolic ne riɛr dit, ku nuɔm dit. 27Ku kabi malaikaike tooc bik kɔckeek cike lɔc kuɔt yic ne yom ye yic ŋuan, ne piny thok ebɛn alɔgut nhialic.
28Piɔcka ne parabol de ŋaap: te ci kerke thook kul, ku nyook yith, e kanyiɛcka lan ci ruer thiɔk; 29yenekee cɔɔkduɔn eya, na yaka keekake ŋem kedhia e ke bɔ, ke nyiɛcka lan cen thiɔk, aɣet ɣoot thook. 30We ya yɔɔk neyic, Ya yekuane aci bi jaal, aŋoot kekake kedhia e ke ken bɛn. 31Nhial ku piny aabi nyaai: ku welcie aaci bi nyaai. 32Acin ran toŋ nyic yekole ku thaa, agut malaikai ke pan nhial, aɣet Wa, ee Awa yetok. 33Yaka roth ŋem, yaka tiit ku yaka lɔŋ: we kuc kol ben bɛn. 34Acit ran ci keny pan dɛ, ku nyiɛŋ ɣonde piny, ku tek aluɛkke riɛr ku luɔi, ŋɛk ne luɔide, ku ŋɛk ne luɔide, ku yook metit bi ya tiit. 35Yen yaka tiit, ne kuny kuc we te bii bɛny de ɣot bɛn, lan ben bɛn thei, ka ne wɛɛric, ka ne ciu de ajith, ka ne run; 36kɛlke na bii ke bi we yok ne nin. 37Ke ca lɛk we, alɛk raan ebɛn, Ya yaka tiit.
Nu geselecteerd:
Mak 13: LEKJOT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© British and Foreign Bible Society 1940, 2017
Meer informatie over Lek Jot de Jecu Kritho 1940