Mak 5
5
1Goki ɣet ne bar lɔŋti, pan de Gadarai. 2Na wen ye bii bei riɛi, go dai rɔm kene ran nɔŋ jɔŋ rac te de rɛŋ, 3ran ye ceŋ te de rɛŋ: ku ye ciɛn ran ye ye kan leu ne der, liu, ne cak ya joth; 4ee ye dai rek ne luɔŋ ku ne joth, ku ye ke tueny, ku dhoŋ luɔŋ kɔth: ku ye ciɛn ran ye naŋ riɛr bi ye cɔk loi nom. 5Ku ye ceŋ te de rɛŋ ku kur nhiim akolriɛc, wɔkɔu ku akol, ye coot, ku ye rɔt gɔɔp ne kur. 6Go Yecu ŋem temec, go riŋ ku door, 7ku coot ne ror dit, jiɛm, Ye ba ŋo loi wɔ yin, Yecu, yin ye Wen de Nhialiny Dit Areet? Yin ya yɔɔk ne rin ke Nhialic, duɔne ɣa luc. 8Ne ke cen e yɔɔk, Ye bar bei, yin jɔŋ rac, ne raan guɔp. 9Ku thiec, Ye cɔl rinku de? Go yɔɔk, Ye rincie acɔl Duut; ne ke juec wɔ. 10Go Yecu lɔŋ areet duɔeke bike ciɛc wei baai. 11Ku kee nɔŋ dun diit de kuɔl nyuɛth ne kuur lɔɔm. 12Goki lɔŋ, jamki, Yi ciɛce wɔ ne kuɔl gup, buk lɔ ne keyic. 13Go ke yɔɔk bik lɔ. Go jak rac bɛn bei, ku leki ne kuɔl gup: go duut riŋ le tiɛlaŋ bɛɛr, aake ye bianabur rou, goki lɔ mou bɛɛr. 14Go kɔc eke nyuɛɛth ke kat, ku le lɛk kɔc ke pan dit, ku piny ebɛn. Goki bɛn bik ke ci tuɔl bi ŋem. 15Ku biki enɔŋ Yecu, ku ŋemki ran war ci jɔŋ rac dɔm ne rɛɛr, ne ceŋ alɛth ku ci nom jal loi, yen man e nɔŋ guɔp duut: goki riɔc areet. 16Go kɔc wen ci e ŋem goki ciɛr keek ye ke ci lony enɔŋ ran de jɔŋ rac, ku kuɔl. 17Goki cak ne lɔŋ bi jal pinyden. 18Ana ye leer riɛi, ke ran wen nɔŋ jɔŋ rac lɛŋ en bi tɔ kene yen. 19Go cuɔk gam, ku yook, Ye lɔɔr panduɔn tenɔŋ mɛɛthku, ku lɔ lɛke keek kadit ci Bɛnydit ke luɔi yin, ku kac de piɔu enɔŋ yin. 20Go lɔ, ku ciɛk ke ne lek ne Dekapoli ne kadit ci Yecu ke loi enɔŋ yen: go raan ebɛn gai.
21Na ci Yecu bar bɛɛr tɛɛm lɔŋti, ke dun dit gueer enɔŋ yen: ku tɔ ne bar lɔɔm. 22Go randiit toŋ de luaŋ de gueer bɛn, ran cɔl Jairo; ana ye ŋem en, ke cuɛt rɔt piny ne yenom, 23ku lɛŋ areet, jiɛm, Ye nyan thindie amuɔn wei: yen yin laŋ, ba bɛn ba yiciin kan en, bi pial ku bi piir. 24Go lɔ kene yen; ku biɔth ne dun dit, ku leki ke japki.
25Ku tiik ee tɔ, ee nɔŋ riɛm ye kueer ne yeguɔp ne run keethiɛr ku rou, 26ku ci gum ne tit juec, ku ci kake kedhia riap, ku ci kɔn ŋuan, ku ye riɛm lɔ ke jɔp rɔt, 27te cen ka loi Yecu ke piŋ, ke bɔ ne yekɔu, ku jiɛk alanhde. 28Jiɛm, Ye na jak alanhde abac, ke ɣan bi pial. 29Go riɛm dai lɔ ŋou; ku yeguɔp ne ci pial ne yebenye. 30Go Yecu dai nyic, ke riɛrde ci jaal ne yeguɔp, go rɔt wel ne duutic, ku jiɛm, Ye yeŋa ci alanhdie jak? 31Go kɔcpiocke yɔɔk, Yi kɛne yedun diit jiɛp yine ŋem, yin jam, Wu yeŋa ci ɣa jak? 32Go yenyin caath bi ran ci ekene loi ŋem. 33Go tiik riɔc, ku lethe, anyic ke ci luɔi yen, go bɛn ku cuɛt rɔt piny enom, ku lek yith kedhia. 34Go Yecu yɔɔk, Ye nyane, gamdu ee yi luɔk; lɔr ne dɔɔr, ku piale guɔp ne benydu.
35Ana ye ŋoot ke jam, ke raan bɔ ɣon de randiit de luaŋ de gueer, jiɛm, Ye nyandu ee thou: yeŋo dɛ mec yin Dupioc piny? 36Go Yecu wel cuɔk piŋ, ku yook randiit de luaŋ de gueer, Ye duk riɔc, tom gam. 37Go kɔc jai kɛlke ke bi ye biɔth, aye Petero, ku Jakob, ku Jɔn manhe de Jakob keek kepɛc. 38Goki bɛn ɣon de randiit de luaŋ de gueer, go ajaak piŋ, kene kɔc juec dhiau ku wuɔi dit. 39Wen ci lɔ ɣot, e ke yook ke, Ye yeŋo cɔɔl we wuɔi dhiɛu we wuɔla? Meth aken thou, anin. 40Goki dɔl ne buɔi. Go ke cɔk jiɛl, ku cɔk wun e meth kene man ku kɔc eke tɔ kene yen cɔk lɔ ɣot kene yen te tɔ meth thin. 41Go Yecu meth dɔm ciin, ku yook, Ye Talitha kumi; te luele yen ne thoŋda, ke ye, Nya, yin ya yɔɔk, Ya jɔt rɔt. 42Go nya rɔt dai jɔt, ku ciɛth, ee ye runkeek ke dit thiɛr ku rou. Goki jal gai areet. 43Go ke cok lom thook kɛlke bi ran dɛ nyic: ku jiɛm ye yine meth ke ciɛm.
Nu geselecteerd:
Mak 5: LEKJOT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© British and Foreign Bible Society 1940, 2017
Meer informatie over Lek Jot de Jecu Kritho 1940