ADECHHÜ 28
28
1Isak na Jakob cichi nu sawegü pi ma cü nu ma kiza, “No Kanaan nyi ghala meya lalo. 2Shagha nu Mesopotamia wi njja bawa Bethuel jjen wi wa nu ciwi njja baghawa Laban nga ghala kesü yayalo. 3Kekhang ntsa Nyiza ya sawegü pi no cü nu nshicü kejon benya thsü, isanu no mizzatentithu kejon ba sayaden! 4#Ade 17.4-8. Ma sawegü pi Abraham kecü ti pi no nu nshicübvüghathu la kecüwa salo, nu no khili hang keben Anyiza na pi Abraham kecü yyi ha ya keyawa sa.” 5Isak na Jakob kesun pi Mesopotamia wi Arameya nyi Bethuel tsawa, nu Jakob nu Esau manyi jja Rebaka baghawa Laban jjen wi wa thsüa.
Esau na Awubvü Kepa wi Keya
6Isak na Jakob kesun pi Mesopotamia wi awubvü bha wa thsüdha le kesa Esau na zaya. Isak na sawegü pi Jakob cü nu ma Kanaan nza meya lalo kekhi tsü la Esau na zaya. 7Jakob na ma ba nu ma jja jühkina nu Mesopotamia wi wa. 8Esau na ma ba Isak na Kanaan nzathu n-nenle kesa tsü chüya. 9Tsalina ma wa Abraham tsawa Ishmael nga Lebaioth tssüggüwa Mahalath yaya.
Bethel wi Jakob Man Keman
10Jakob na Beersheba teshi nu Haran kaghapi wi wa. 11Aghani na du keten wi ma kemetha pen wi ghoya nu ciwi mnan wa. Ma alon kesü khupi ma mchen saya nu jen wa. 12#Jhn 1.51. Ma aman wina abenlen kesü ayyi wina ki tang cu keben, nu nyilothu na tsü miwi ki nu dugho keben mu. 13#Ade 13.14,15. Nu Apvüwa na ma kete #28.13: ma kete; nyelela ciwi wi ngan nu khi, “Hi Apvüwa, Abraham nu Isak Nyizawa. Hi no khili jen keben ayyi hapi no nu nshicübvüghathu cüden. 14Nshicübvüghathu na sha pi ayyinikhu ti saben. Mathu na bvüzighe sen nu acüla, agha, nidu, nu nishu tsüdi wi waben, nu hi no nu nshicübvüghathu miwi na sawegü pi mizzatenti tsüdi cüben.#28.14: nu hi no... cüben; nyelela mizzatenti tsüdila hi wi hi sawegü pi no nu nshicübvüghathu kecü ti sawegü pi mathu la cülo khieben. 15Meshenyalo, no khiewa wa khe hi no ssiden nu no khweden, nu hi no ssinu ayyi hawi gho nengden. Hi no wi khichi ketheng tsüdi npi kesacen chu hi no teshi nben.”
16Jakob na jencan shagha nu khi, “Apvüwa na hewi ben! Ma apen hawi ben lela hi tsü nchü!” 17Ma messiya nu khi, “Ha khatila qhethiketen kesa pen dha nu! Ha Anyiza jjen sabenla metsi, nu khweti-jenka sha sen nu tang wi ki benla metsi.”
18Jakob na ghanenwa mitu na shagha alon pi ma mchen kesa tsü pi meshenkeben kesü sala sheng. Tsaseng wi ma oliv deli pi tsü miwi zügüchi nu sametha pi Anyiza wi chi. 19Ma apen tsü nyan pi Bethel#28.19: Bethel; Anyan hawa ha Ibri jüh wina “Anyiza jjen”. ciya. (Anyuti tsüwa tsüna kuti wi pi Luz le khi.) 20Tsaseng wi Jakob na Anyiza wi kishen; “Keujüla no hi kijünyi wa keten wi ha hi ssinu hi khwe nu kedsakejjü nu athsümeni pi hi cü lethu, 21nu kemehaisa gho iba jjen cu nengya lethu hi no pi iNyiza saden. 22Hi meshenkeben lon sheng ketheng pen ha wina no kinyiden, nu no pi hi kecü alentagha wi gishü tagha wi kesü pi no cüden.”
Nu geselecteerd:
ADECHHÜ 28: RENGNBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.