ADECHHÜ 31
31
Jakob na Laban wina Bvükesa
1Jakob na Laban tsathu na hati khi keben zaya, “Jakob na ikhang ba keben tsüdila khuyadha. Ma ikhang ba ji tsüdi pi ma keben sayadha.” 2Laban na kheni ti ma tuwi ma mmi nmezala kesa tsü muya. 3Tsaseng wi Apvüwa na ma wi kiza, “Nba nu nshilithu yyi wi tsü wa nenglo. Hi no ssiden.”
4Tsalina Jakob na Rachel nu Leah manyi na ghola ma aneni hie keten lli wi ma metulo cichi. 5Ma manyi wi khi, “Nshinyi ba na kheni ti ituwi ammi nmeza ladha kesa hi muyadha; isala iba Anyiza na hi ssiden. 6Hi kekhang tsüdi pi nshinyi ba kekuli sa kesa nshinyi na chüben. 7Tsü miwi ma hi mechua nu ikutimen tagha tughu kemili cüle. Isala Anyiza na ma yala ileben sa nmeshü thsü. 8Laban na ‘Aneni kinaqhethu tsüdi tsüna nkutimen,’ isa khithu anenithu tsüdila ma zza kinaqhe ca cü. Ma ‘Aneni hethihesa tsüdi tsüna ikutimen,’ isa khithu anenithu tsüdila ma zza hethihesa ca cü. 9Anyiza na nshinyi ba sahangthu khupi hi cüdha.
10“Anenithu kejigü tsüwi hi iman wina aneni süpon jigü kebenthu tsüna hethihesa, kishenki, nu kinaqhe tsüti mule! 11Anyiza nyilowa na aman wina hi ccüneng nu khi, ‘Jakob!’ Hi ma luneng ‘Hi hewi benle.’ 12Ma khi, ‘Ghangchilo, aneni süpon jigü kebenthu tsüdi hethihesa, kishenki, nu kinaqhe. Hi ha yala tsüti sa thsüa, kepaghenanye Laban na nmiwi mangwa sagho khe hi muyadha. 13#Ade 28.18-22. Hi Anyiza, Bethel wi ntuwi gho nu no alon pi meshenkeben kesü sa sheng nu oliv deli pi tsü miwi keshushachi nu sametha chi, nu hi wi kekishen kesü kesawa tsü. Khili shagha kidenya nu no kepvügha yyi wi tsü wa nenglo.’ ”
14Rachel nu Leah manyi na Jakob luneng “Ciwi ishinyi na ishinyi ba keben ghongkeya mangla nmidha. 15Ma ishinyi pi asang ti sa. Ma ishinyi ghan pi jeü nu ishinyi men apisa tsü sen khidha. 16Anyiza na ishinyi ba wi keben khuya kesa ha tsüdila ikhang ji nu ikhang tsangathu ji sadha. Anyiza na mangwale no kiza khe tsüti salo.” 17-18Tsalina Jakob na Kanaan yyi wi ma ba wi wa nengle kidenya. Ma tsangathu nu ma wubvü keni pi sunsiesa miwi chiya, nu ma sahangthu tsüdi ssiya nu Mesopotamia wi keben mukeya tsüdi khuya nu wa. 19Laban na ma khaghaneni ssen han wa nu ma nkemi jü Rachel na ajjen wi ma ba theghi cenpvü tsü ghanfüya. 20Jakob na ma bvü tendha le pi Laban nkizala ma mechua. 21Ma keben tsüdi khuya nu kaghaji bvüa. Ma wa Eufrat Ghaku khhakaya nu Gilead diyyi yikha wi wale lentsen chia.
Laban na Jakob Jügü Kewa
22Jakob na bvüdha le kesa ghanan kecheng seng wi nyu na Laban kiza. 23Ma ma nyithu ssiya nu Jakob jügü wa ghanan tagü wi Gilead diyyi yikha wi ma jügüya. 24Tsü ghaja Anyiza na aman wina Laban tuwi gho nu khi, “Kiden-keshaya nu ajüh nkemehai lela mangla khipi Jakob npateqhe lalo.” 25Jakob na wa ayikha kesü wi kemnanpen sanu ben, nu Laban na ma nyithu ssinu Gilead diyyi yikha wi ben.
26Laban na Jakob wi khi, “Mangkesa na no hi mechu nu ingathu pi aghi wi ghankeya nzathu ti sala ssibvü ten nu? 27No mangkesa na hi mechu nu hi nkizala kuthi bvü nu? Keujüla no hi kiza lethu harp nu tamborin pi akhwisa nu anonkeghe sala no kesun pi bvü thsü kesale. 28No hi yala inga keni nu manyi ngathu kimang nu kemehai sa walo la kiza meya thsü. Tsüwa tsüna kejüphon kekuli le! 29Hi no patena ya kemehai kekhang ben, isala khija nba Nyiza na hi kiza nu khi, ‘Kiden-keshaya nu ajüh nkemehai lela mangla khipi Jakob npateqhe lalo.’ 30No nba jjen wi wha neng mvu ntsa kesalina bvükesa tsü hi chüben, isala no mangkesa na itheghi cenpvü kezhü tsü ghanfüya nu?”
31Jakob na khineng “Hi kemeshen no hi wina n-nga keni ssi nengya benshe kesa hi messile. 32Isala keujüla anyi kesü ncenpvü kezhü tsü sen keten muya lethu ma pi shü thsülo. Hewi inyithu nyon kemu wi ha ntsanqai tsü bha nanlo nu nji muya lethu khuyalo.” Rachel na Laban cenpvü kezhü tsü ghanfüya kesa tsü Jakob na nchü.
33Laban na Jakob nithsüjjen wi bha wa; tsaseng wi Leah nithsüjjen wi bha, nu maghale keni nithsüjjen wi bha lela ma cenpvü kezhü tsü mu meya. Tsaseng wi ma Rachel nithsüjjen wi du. 34Rachel na acenpvü kezhüwa tsü khuya nu pi sunsiesa miwi ajula kesü wi chi nu ma miwi donkiya. Laban na nithsüjjen maben wi bha lela tsü mu meya. 35Rachel na ma ba wi khi, “Hi ntuwi nkeshagha ghena imiwi nleben nminu lalo, kepaghenanye hi hajü asha kaghapen nzayen tsü saben.” Laban na bha lela ma theghi cenpvü kezhü tsü mu meyala.
36Jakob na ma leben minuya nu Laban wi kiza, “Hi mangwa sazzi theng nu? Hi kesami mangwa ben nu no aghepvüla hi jügüten nu? 37Khili no itsanqai tsüdila shu nandha, nji ntsanqai mangwa kebenla muya nu? Tsüpi n-nyi nu inyithu tuwi chi nu mathu ya ishinyi thowa na meshon khe khi thsülo. 38Hi amapi ngwe no gweghe bendha; nkhaghaneni nu n-nenithu ya ncasa thsü, nu hi n-neni jawi asüpon kesüla npathi dsale. 39Khathansha wi aghangsa nkemehai na gho aneni ghan khe hi tsü sen nu no wi ngho isala hi ketanla kededi tsü pvüyaden. Nyu na ghanan le ghaja lela atsanqai ghanfüya lethu no tsü men hi wi khie yaden. 40Aghanan aghani kisa nu aghaja kese ghena matsü kejon wi hi ketizensa nu jen meya. 41Hi amapi ngwe no gweghe keben chuli tsüti sale. Hi amapi taghamejü no kekuli sa nu n-nga keni melli — nu amapi tugho nsahangthu noncca. Tsü miwi la no ikutimen tagha tughu kemili cüle. 42Keujüla ibathu Nyizawa, Abraham nu Isak Nyiza tsüna hi ssisen nten lethu no hi kemissü kesun pi bvü thsüa kesale. Isala Anyiza na igükeccü nu hi kekuli mu kesalina khija no kha chidha.”
Jakob nu Laban Manyi Ajühcenkeya
43Laban na Jakob wi khineng “Nza ha keni ha inga; manyi tsangathu la iji, nu asahangthu la iji; nu no mu-kebenthu tsüdila ijile. Isala hi mangla inga keni nu manyi tsangathu khenya nkeben lina, 44no ssinu ajühcen le ben. Ishinyi ajühcenkeya zensu wina alon pi sheng na.”
45Tsalina Jakob na alon kesü pieya nu pi meshenkeben sale kesalina sheng. 46Ma ma nyithu kiza nu alon pahan saghu pi apen ghe thsüa. Tsaseng wi mathu na apen keghe kete witsü dsajjü. 47Laban na tsü nyan pi Jegar Sahadutha#31.47: Jegar Sahadutha: Anyan hawa ha Aramaik jüh wina “abhon kesü na ithu kiza neng kechi.” le ci, nu Jakob na tsüpi Galeed#31.47: Galeed: Anyan hawa ha Ibri jüh wina “abhon kesü na ithu kiza neng kechi.” le ci. 48Laban na Jakob wi kiza, “Apenkezhü ha nansü nten na ishinyi jüwi chüza saden.” Tsalina apen tsü nyan pi Galeed cia. 49Laban na kheneng khi, “Ishinyi zighe keben ha Apvüwa na ma nyon pi ishinyi ghang kebenwa salo.” Tsalina apen tsü nyan pi Mizpa#31.49: Mizpa: Anyan hawa ha Ibri jüh wina “ciwi na kehie pen.” cia. 50Laban na khineng “Keujüla no inga keni nkhichinyuwa nyelela nza kepa wi yalethu hi nchü lela Anyiza na ithu muben kesa meshenyalo. 51Hi ishinyi jüwi alon hapi apenghe theng, nu hewi meshenkeben lon na ben. 52Alon penghe ketheng nu meshenben le kesa lon keni qho ishinyi jüwi chüza saden. Hi khiela alon penghe ketheng ha thenkeghe gho no ssikaghashen nben, no la meshenkeben lon ha thenkeghe gho hi ssikaghashen yishü. 53Abraham Nyiza nu Nahor#31.53: Abraham... Nahor: Abraham na Jakob baqhai nu Nahor na Laban baqhai Nyiza na ishinyi jühkaghakhi ben.” Tsaseng wi Jakob na ma ba Isak kinyi ketenwa Anyiza nyan wina khishi kechi ha niele kesalina kishen. 54Ma ayikha ciwi asahang kesü pi ahhansha sa nu ma nyithu ci pi dsajjü thsü. Mathu na dsajjüya theng nu tsü ghaja ayikha ciwi ben wa. 55Laban na ghanenwa mitu na shagha ma nga keni nu ma nga ngathu kimang nu sawegü pi mathu cü, nu mathu teshi theng nu ajjen wi wha neng.
Nu geselecteerd:
ADECHHÜ 31: RENGNBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.