Mutendeko 3
3
Kwananga kwa munthu
1Sono njoka yikaŵa yiryarya chomene kuruska vinyama vyose vya mu thengere, ivyo Fumu Chiuta wakalenga. Ndipo njoka yikati kwa mwanakazi, “Kasi Chiuta wakayowoya nadi kuti, ‘Mureke kurya vipambi vya khuni lirilose la mu munda’?”#Uvu 12.9, 20.2
2Mwanakazi wakati ku njoka, “Tingarya vipambi vya makuni gha mu munda. 3Kweni Chiuta wakati, ‘Mureke kurya vipambi vya khuni ilo liri pakati pa munda nanga nkhuchikhwaska, mzire mufwe.’ ”
4Kweni njoka yikati kwa mwanakazi, “Muti mufwenge chara. 5Chiuta wakumanya kuti para muryenge vipambi ivi, maso ghinu ghati ghajurikenge, ndipo muti muŵenge nga ndi Chiuta, kumanya uweme na uheni.”
6Ntheura para mwanakazi wakawona kuti vipambi vya khuni vikaŵa viweme kurya, na kuti vikaŵa vyakukondweska ku maso, ndiposo vyakukhumbikwa kupa munthu mahara, wakatorako vipambi vinyakhe na kurya. Wakamupako mufumu wakhe uyo wakaŵa nayo, ndipo nayo wakarya. 7Ntheura maso gha wose ŵaŵiri wuwo ghakajurika, ndipo ŵakamanya kuti ŵali nkhule. Penepapo ŵakasona mahamba gha chikuyu na kujipangira vyakuvwara.
8Na mise kukati kwatima, iwo ŵakapulika kwenda kwa Fumu Chiuta mu munda. Munthu yura na muwoli wakhe ŵakabisama mukatikati mwa makuni kuti Fumu Chiuta wareke kuŵawona. 9Kweni Fumu Chiuta wakamuchema munthu wakati, “Kasi uli nkhu?”
10 Adamu wakazgora wakati, “Ndangumupulikani mukwenda mu munda, ndipo ndanguŵa na wofi, pakuti ndanguŵa nkhule. Ntheura ndangubisama.”
11Chiuta wakamufumba wakati, “Kasi ndi njani wangukuphalira kuti uli nkhule.” Kasi warya chipambi cha khuni ilo nkhakulangula kuti ureke kurya?
12Munthu yura wakati, “Mwanakazi mweneuyo mukandipa kuti wakharenge nane ndiyo wakandipa vipambi vya khuni, ndipo nkharya.”
13Ndipo Fumu Chiuta wakati ku mwanakazi, “Kasi nchichi icho wachita?”
Mwanakazi wakati, “Njoka yikandipusika ndipo nkharya.”#2 Kor 11.3; 1 Tim 2.14
Chiuta wakupereka chilango
14Ntheura Fumu Chiuta wakati ku njoka,
“Pakuti wachita ichi,
ndiwe wakutembeka kuruska vyakuŵeta vyose,
ndiposo kuruska vikoko vyose vya mu thengere.
Uti ukhwaŵenge na nthumbo yako,
ndipo uryenge fuvu,
mazuŵa ghose gha umoyo wako.
15Nditi ndiŵike urwani
pakati pa iwe na mwanakazi,
pakati pa mphapu yako na mphapu yakhe.
Iyo wati waphwanyenge mutu wako,
ndipo iwe uti urumenge chitende chakhe.”#Uvu 12.17
16Chiuta wakati ku mwanakazi,
“Nditi ndiŵike suzgo yikuru pa iwe
pakutora nthumbo,
ndipo uti ubabenge ŵana mu vyakuŵinya.
Ndipouli, uti ukhumbenge mufumu wako ndipera,
ndipo iyo wati wakuwusenge iwe.”
17Sono Chiuta wakamuphalira Adamu kuti,
“Iwe ukapulikira mazgu gha muwoli wako,
ndipo waryako chipambi cha khuni
ilo nkhakulangula kuti ureke kuryako vipambi vyakhe.
Sono charu chatembeka
chifukwa cha iwe.
Na vyakuŵinya vya kutokatoka kwako
ndimo uti usangirenge chakurya
mazuŵa ghose gha umoyo wako.#Heb 6.8
18Charu chikumezgerenge minga na nthura,
ndipo uti uryenge vyakumera vya mu thengere.
19Na mavuchi pa chisko chako
ndimo uti usangirenge chakurya,
usuke uwerere ku dongo,
pakuti ndiko ukatoreka.
Iwe ndiwe fuvu,
ndipo uti uwererenge ku fuvu.”
20Sono Adamu wakathya muwoli wakhe zina lakuti Eva,#3.20 Eva: Mu chiHebere zina lakuti “Eva” na kuti, “ŵamoyo” ghakuyana waka mu kapulikikwiro. chifukwa iyo ndiyo wakaŵa nyinawo wa ŵamoyo wose. 21Fumu Chiuta wakanozgera Adamu na muwoli wakhe vyakuvwara vya vikumba, na kuŵavwarika.
Adamu na Eva ŵakufumiskika mu munda
22Ndipo Fumu Chiuta wakati, “Wonani, munthu waŵa nga ndi yumoza wa ise, kumanya uweme na uheni. Ndipo sono wareke kuzomerezgeka kutoraso chipambi cha khuni la umoyo, na kurya, na kuŵa na umoyo kwa muyirayira.”#Uvu 22.14 23Ntheura Fumu Chiuta wakaŵafumiska mu munda wa Edeni, kuti ŵalimenge dongo ilo wakatorekamo. 24Wakamuchimbizgira kuwaro munthu yura. Ku mafumiro gha dazi kwa munda wa Edeni wakaŵika ŵakerubi ndiposo na lupanga lwa moto ulo lukazgokeranga kosekose, kujara nthowa yakuya ku khuni la umoyo.
Nu geselecteerd:
Mutendeko 3: Tumbuka
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible Society of Malawi