Mutendeko 4
4
Kayini na Abelu
1 Adamu wakamumanya Eva muwoli wakhe ndipo wakaŵa na nthumbo. Iyo wakababa mwana mwanarume na kumuthya zina lakuti Kayini, pakuti wakati, “Na wovwiri wa Fumu ndapokera mwana mwanarume.” 2Ndipo wakababaso munung'una wakhe Abelu. Abelu wakaŵetanga mberere na mbuzi, ndipo Kayini wakaŵa wakulima minda. 3Ghakati gharutapo mazuŵa ghanji, Kayini wakiza na vuna ya mu munda na kupereka kwa Fumu. 4Abelu nayoso wakatora twana twakwamba kubabika twa mberere na mbuzi, wakakoma na kutorako vigaŵa vya mafuta na kupereka sembe. Ndipo Fumu yikakondwa na Abelu na chakupereka chakhe,#Heb 11.4 5kweni kuti yikakondwa nayo Kayini chara nanga nchakupereka chakhe. Ntheura Kayini wakaphya chomene mtima, ndipo chisko chakhe chikaŵa chakukwiya. 6Ndipo Fumu yikati kwa Kayini, “Kasi waphyirachi chomene mtima, ndipo chisko chako chawirachi? 7Usange ungachita makora, kasi ungapokelereka chara? Ndipo usange ukureka kuchita makora, kwananga kukukhazga pa muryango. Kwananga kukukhumba iwe, kweni ukwenera kukuthereska.”
8Sono Kayini wakati kwa Abelu munung'una wakhe, “Tiye, tirutenge ku thengere.” Para ŵakaŵa ku thengere, Kayini wakawukira Abelu munung'una wakhe na kumukoma.#Mat 23.35; Luk 11.51; 1 Yoh 3.12
9Ndipo Fumu yikati kwa Kayini, “Kasi munung'una wako Abelu walinkhu?”
Iyo wakati, “Nkhumanya chara. Kasi ine ndine msungiliri wa munung'una wane?”
10 Fumu yikati, “Kasi wachitachi? Kulira kwa ndopa za munung'una wako kwandifika ine kufumira pasi pa charu.#Heb 12.24 11Sono iwe ndiwe wakutembeka na wakuchimbizgika pa charu cheneicho chamwa ndopa za munung'una wako mweneuyo wamukoma na woko lako. 12Para ukulima charu, kuti chikupengeso vipambi vyakhe chara. Uti uŵenge wakuyingayinga waka mu charu.”
13Kayini wakati kwa Fumu, “Chilango chane nchikuru kuruska nkhongono zane. 14Wonani, mwandichimbizgira kuwaro kwa charu muhanya uno. Ndipo nditi ndiwoneke chara pa maso pinu. Nditi ndiŵenge wakuyingayinga waka mu charu. Ndipo yose uyo wandisangenge wati wandikome ine.”
15Ndipo Fumu yikati kwa Kayini, “Chara! Munthu yose uyo wati wakome iwe, wati wawezgekere nduzga kankhonde na kaŵiri.” Ndipo Fumu yikaŵika chimanyikwiro pa Kayini, mwakuti yose uyo wamusanga wareke kumukoma. 16Ntheura Kayini wakafumapo panthazi pa Fumu na kuya kakhara mu charu cha Nodi, ku mafumiro gha dazi kwa Edeni.
Ŵa mphapu ya Kayini
17Kayini wakamumanya muwoli wakhe, wakaŵa na nthumbo ndipo wakababa Enoki. Kayini wakazenga msumba na kuwuthya zina la mwana wakhe Enoki. 18Sono Enoki wakababa Iradi. Iradi wakababa Mehuyayele, ndipo Mehuyayele wakababa Metushayele, ndipo Metushayele wakababa Lameki. 19Lameki wakatora ŵanakazi ŵaŵiri, yumoza wakaŵa Ada, ndipo munyakhe wakaŵa Zila. 20Ada wakababa Yabala. Iyo wakaŵa wiskewokuru wa awo ŵakukhara mu mahema ndipo ŵali na vyakuŵeta. 21Zina la munung'una wakhe likaŵa Yubala. Iyo wakaŵa wiskewokuru wa wose awo ŵakulizga ŵabango na fyoliro. 22Zila wakababa Tubala Kayini. Iyo wakaŵa mufuzi wa viteŵetero vyose vya mkuŵa na vya chisulo. Mudumbu wa Tubala Kayini wakaŵa Naama.
23Sono Lameki wakati ku ŵawoli ŵakhe,
“Ada na Zila, pulikani mazgu ghane.
Imwe ŵawoli ŵa Lameki, tegherezgani ku mazgu ghane.
Ine ndakoma munthu,
chifukwa iyo wangundipweteka.
Ndakoma nadi muwukirano yura,
chifukwa iyo wangunditimba.
24Usange Kayini wakuwezgekera nduzga kankhonde na kaŵiri,
nadi Lameki ŵamkumuwezgera nduzga kwakuyana na 77.”#Mat 18.22
Seti na Enoki
25Adamu wakamumanyaso muwoli wakhe, ndipo wakababa mwana mwanarume na kumuthya zina lakuti Seti, chifukwa wakati, “Chiuta wandipaso mwana munyakhe mu malo gha Abelu, pakuti Kayini wakamukoma.” 26Kwa Seti nako kukababikaso mwana mwanarume, ndipo wakamuthya zina lakhe Enoshi. Pa nyengo iyo ŵanthu ŵakamba kusopa zina la Fumu.
Nu geselecteerd:
Mutendeko 4: Tumbuka
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible Society of Malawi