MATEO 4
4
Gucladzy bêndzab ntzoo Jesúz ni ne me
(Mr. 1:12-13; Lc. 4:1-13)
1Luxu güiyno xiSpirt Dioz Jesúz lo yu-bihdzy ru nehx nu meññ, lehdy güieꞌ bêndzab bâḻ beeiy nquihly me Jesúz ntzoo mod-ne me.
2Güyuꞌ Jesúz uga cuarent dzé no cuarent guiaal no nehx güdahgü me mbehty, no byluxu bylahn me. 3No biahd bêndzab lehdy güieꞌ bâḻ stzoo Jesúz mod-ga me lee. Ra me Jesúz:
―Bâḻ ulihbu Xiiñ Dioz lii, ptzoo mdad gac guie-rieꞌ yahc paṉ.
4Ra Jesúz bêndzab:
―Lo Guehtzy ru queꞌ xtiidz Dioz neu: “Dac‑e nunzy no paṉ rbahñ meññ, zehg rbahñ meññ no gyre diidz ni rnii Dioz.”#4:4 Dt. 8:3
5Luxu güiyno bêndzab Jesúz ciuda-Jerusaléṉ ni rahc cuent lee Dioz, no gülepy me lee ihqy idoró to ru ma guia, 6no ra me Jesúz:
―Bâḻ ulihbu Xiiñ Dioz lii, güyubeꞌ lo yu; porni lo Guehtzy ru queꞌ xtiidz Dioz neu:
Cshahl Dioz x‑ángel me ni gyla yahc lii.
Glesy yâme lii lo ña yâme,
lehdy di ctzuné guie nieꞌy.#4:6 Sal. 91:11-12
7Ra Jesúz leeme:
―Zegahc‑e lo Guehtzy ru queꞌ xtiidz Dioz neu: “Di gnabiꞌ behch lo Dioz ni rtzoo mdad lii nunzy par güieꞌy bâḻ ctzoo me ni neꞌy.”#4:7 Dt. 6:16
8Gyzac güiyno bêndzab leeme ihqy to dahñ ni modni nsuu par bluu leeme nter guiedzylie ru rtzoo meññ mdad no gyre ni rsahc ni nu lou, 9no ra me Jesúz:
―Naa gdedyaꞌ lii gyre nirieꞌ yahc bâḻ guisshibyiꞌ dloꞌn no gzacbeeiyiꞌ naa.
10Ra Jesúz leeme:
―Byruu de neꞌ, bêndzab, porni lo Guehtzy ru queꞌ xtiidz Dioz neu: “Bzacbeeiy Dioz ni rtzoo mdad lii, no ptzoo nunzy ni ne me.”#4:10 Dt. 6:13
11Byluxu, byrusytzu bêndzab de ru zu Jesúz; no biahd yahc x‑ángel Dioz bidguiacno yâme Jesúz.
Guzlo Jesúz xtziiñ me Galilea
(Mr. 1:14-15; Lc. 4:14-15)
12Hor-bieññ Jesúz güluꞌ yâme Juaṉ lidzyguiib, za me lo ṟegioṉ-Galilea; 13per nehx biaꞌn me Nasaret, mazyg zia me guiedzy ni le Capernaum, ni nu coo nisdoo, lo ṟegióṉ ni le Zabulóṉ no Neftalí. 14Guhcu ze lehdy guhc ni bzaa profet-Isaíaz:
15Ṟegioṉ-Zabulóṉ no ṟegioṉ-Neftalí,
ñaz-ru ria coo nisdoo, stiby chehsh guiagü-Jordáṉ,
Galilea, ru nu meññ-nehx meññ-Isṟael.
16Meññ-nu beeiy to lo guibcawy bwieꞌ to byni-ro,
no meññ-nu beeiy lo ximble guîlguhty,
güyuꞌ to byni-ro par lee.#4:15-16 Is. 9:1-2
17No guzlo gahc Jesúz gaya me meññ:
―Lâ csaan ni nahcsy ni nac laꞌd, porni ba bydziñgahsh dze-ctzoo Dioz mdad neꞌ.
Pquee Jesúz riedz tahp meññ-rnahzy mbaḻ
(Mr. 1:16-20; Lc. 5:1-11)
18Gadedy Jesúz coo nisdoo ni le Galilea, no bwieꞌ me chohp mpyquie; to me le Simóṉ ni zegahc ra yâme lee Pedr, no sto me le Ndréz, behtzy Simóṉ; galee yâme gueshmbaḻ lo nzeꞌ, porni meññ-rnahzy mbaḻ leeyâme. 19No ra Jesúz leeyâme:
―Lâ te náḻ laꞌd naa, no naa ctzon laꞌd meññ ni guidno zrieñ yahc ni gac dmeññaꞌ.
20No psaꞌn gahc yâme xgueshmbaḻ yâme, no za yâme no Jesúz.
21Güdedy Jesúz uga, bwieꞌ me schohp mpyquie ni nac yahc xiiñ Zebedeu; to me le Jacob, no behtzy me le Juaṉ. Nu yâme leññ barcü no xtad yâme; gaquieedy yâme gueshmbaḻ. Pquee Jesúz riedz leeyâme, 22no luxu psaꞌn gahc yâme barcü no xtad yâme uga, no za yâme no Jesúz.
Bluu Jesúz xtahl meññ no psiaḻ me meññ-gayac-ure
(Lc. 6:17-19)
23Güya Jesúz gyre guiedzy ni nu lo ṟegioṉ-Galilea, galuu me meññ xtiidz Dioz leññ xiydoo yâme cad guiedzy, no gayuno me meññ diidz de ni rtzoo Dioz mdad, no gasiaḻ me meññ-gayac-ure de gyre guîlguihdz no de gyre yoob ni rdedy meññ. 24Byzaꞌzy ru meññ diidz de Jesúz lo ṟegioṉ-Siry; no riyno yâme gyre meññ ni rahc gyrehzy, ni gayac-ure de gyre gyzasy guîlguihdz no yoob, no meññ ni nu mbenahcsy lee, no meññ-rnahzy mbeꞌ lee, no meññ-di raḻ gyniꞌby; psiaḻ me gyre yâme. 25No xtahl meññ-byruu lo ṟegioṉ-Galilea, no zegahc meññ-byruu lo ṟegioṉ-Decápolis, no meññ-Jerusaléṉ, no meññ-byruu lo ṟegioṉ-Judea, no meññ-nu stiby chehsh guiagü-Jordáṉ, náḻ yâme ru za Jesúz.
Nu geselecteerd:
MATEO 4: zpg
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2019, Wycliffe Bible Translators, Inc. All rights reserved.