Malakai 2
2
NA SOPENA 2.
1O amiu ra varese hi na lotu, aaso na leo naano ta meamiu. 2Va amiu otovotoa na rohoe, va otovotoa na lavia me na lolomiu, sura ninima tahonae na hiseu, Iehova moaso, inau aiaso vasoosoo meamiu, aiaso vasoosoo me ra semiu sanu tahonae: io, aaso vasoosoo mera mine, suria amiu otosalavi na leo me na lolomiu. 3Aivei oso na oni suriamiu, aivusi na pahomiu hi na tena sanu, na tena sanu taha ape suri na lotu; inie ilavituhe amiu. 4Tau amiu otopinisi inau asula na leo naano meamiu, suri na loeu me Livai itoho tohoreji, Iehova moaso. 5Na loeu mea mine inie na loeu suri na mauri me na lolotamautu; inau arahu ra sanu naa ta mea suria inie iine, tau inie moine nau, moine tohova na hiseu. 6Na taharahu motoho me na vavana, mosaaso na sanu pahilu: molahovaluiau me na lolotamautu me na vei tataholo, morahu liliu ra tajua ra tari ture na vei vasoosoo. 7Suria motahonae na varese hi na lotu ilolorani, motahonae ra tajua tetuhae sura leo hi Atua: suria inie na varisula hi Iehova. 8Maa amiu otoara me na rio; otove ra tajua ra tari tejovi me na leo hi Atua; otovei leelee na loe i Livai, Iehova moaso. 9Inau mono aveiamiu otosanu tipa me na pahora tajua suria, rotea amiu otosave ra pilau sanu, maa otomeje na valura tajua me na leo hi Atua.
10Hije vunuvunu tamaja motea hasa, e mojoa? na Atua motea hasa motaija vunuvunu, e mojoa? surasava tove ra sanu jihajiha me ra tuaja, tovei oso na loera tamaja? 11Juta move ra sanu jihajiha mine, teve na sanu oso me Israel me Jerusalem; suria Juta movei oso na tahonae se Iehova momejeia, motalahia me matuna hajae hi na atua mositea. 12Iehova ilavituhe na tajua taha riorio me na tajua taha tami me ra pea i Jekop me na tajua movei pale a, ilavituhe na tajua taha lavi na rahuvuso me Iehova mea mono. 13Vahatea maa otove na sanu naano: otolopori horo na avaava pile Iehova hi na tihisimiu, hi na tahi, hi na sarihe hi na mahosomiu, mosameje na rahuvuso suria, mosaejieji sura lavia hi ra havemiu. 14Maa amiu otoaso, Surasava? Suria Iehova inie na taha reni himurua me tupumu; inie tuamu, inie tupumu hi na loemu, maa ovei jihajiha mea. 15Mosavei morua motea hasa, na talume tahonae ae? Surasava moverarua motea hasa? Momej e ra m atura titahonae. Suria motahonae otomata na talumemiu, moso itea ivei jihajiha me tupuna. 16Suria na lolou mohaharana rahutuahi, Iehova na Atua hi Israel moaso, na lolou mohahara itea na taha visihoro na visivisina hi na vei oso, Iehova moaso: motahonae otomata na talumemiu suria, moso otovei jihajiha.
17Amiu otove Iehova morohoejei na loemiu. Maa otoaso, Amamavea moroho ejei paleve? Palero otoaso, Itea va ivei vasoosoo inie motahonae me na paho i Iehova, na lolona moejieji suria: e otoaso, Na Atua taha ve ra sanu tataholo monie veae?
Nu geselecteerd:
Malakai 2: TLM9109
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
This is a historic text maintained by the British and Foreign Bible Society.