MATIUS 20
20
Taida Kei Tai Bagee Ena Dani Awe-tai Mana
1„Epaawado ka jakimakita makiida kou ko owaa ipuwe me idaana abata didéé podomijake uta taida jakei te-tijake me eedaja dani bukaa.
2Okai eedata bagee ma agapeena ko dinar ena mana wegajawijake uta taida ebadikumii.
3Tegemiida gaa okai podomijake me ino akaada te-taida ojaa to jooni-toojogo edou.
4Tijake okeepa eteete mana, ’Ikii maija uta taida uwijake enaa agijo kiniipiga,’ etijake okei uwii.
5Dagi epouda ma amouwe dagiida gaa ma podomijake kei tipi dani kodo kei tai.
6Meuka mijo ogoogiida gaa podomijake me ino maija ojaa joonidaa ti-toojogo edou. Tijake okeepa eteete mana, ’Magijo taine ikii kiija naago woja ojaa to joonidaa tijake topa?’
7Etijake okeija eteete mana, ’Me idaana ka ma needai beu kouja,’ etii. Tijake okai eteete mana, ’Ikii maija uta taida uwii.’ etii.
8Uwaataa digii ipuwe me kidaa douto-tai me manaa-tijake eteete mana, ’Kei tipai bagee manaa-tijake mege menii. Nemouga kei teegai bagee tiga menijake edoga mepai bagee nemouga menii,’ etii.
9Meuka mijo ogoogiida eedata bagee mejake me gakita dinar ena motii.
10Edoga mepai bagee mejake, okeija gai ko abuma motiipage, gai. Kodeja okei gakita mege nana to motii.
11Motijake táí ipuwe me kidi kitigi motigi etai,
12eteete mana, ’Kei muumai jago ka bagee mijo gaa to kei tijake inii ma ena dani nitijaweege, inii naagoona gobi wunaaga kei tai umina kodeja,’ etii.
13Kodeja okai me idaanaapa wo eteete mana, ’Kowaa ke, ani peepu kitai beu. Beu, mee? dinar ena mana naawegape kodo ko.
14Aki didee motijake uwii. Ikii kineega dani nemouga bagee meniine kouja.
15Anija agijo maida anija gata danite kei tija kodo, beu mee? Mee? ani bunu enaa kouja be nagaage?’ etii.
16Kou danite nemouga ka bagee okei tiga kaitai, daana okei tiga bagee nemouga kaitai.”
Kigi Widaago Jesus Bokaitagi Mana Eti-menita
17Jesus Jerusalim doodouga wado uweetigo gaa etope-tai wija ma gaati kede wo ouwijake ita maida make eteete mana,
18„Juwidowei, inii Jerusalim wado uwii. Me Joka kidi imam iboudo ma, kapogeije epi bagee maapa eekegajawijake wagiine mana wegaitai;
19tijake ojaa bageepa eekegajawijake ewidogai ma, godijai ma etijake pija boko maida edajawiitai, daana widaago naago anigou,” etii.
Jahja ma Jakub ma Aediimita Mana
20Zabdi jokaane ukame kodo jokaaneija kede ma enaimo mejake, Jesus jumaapa migaakobe etijake tumaana agijo ediimai.
21Jesus wo eteete mana, „Aki magijo ide?” Etijake wo eteete mana, „Ani joka wija kei ke, me idaana ki akija etikaato gebo, daana me idaana ki akija akaato gebo akija jakimakita makiida aanimake-tijake naaetijawii,” etii.
22Kodeja Jesus wo eteete mana, „Ikiija ka nadiimeega agijo ikii gai beu. Anija naita uwaawe ikai aanomake, mee?” Etijake joko aeteete mana, „Enaa, aanomake,” aetai.
23Okai wo eteete mana, „Anija uwaawe ikai aanaita, kodeja anija etikaato gebo akaato gebo aanimakai mana kou ko anija menija ko beu. Kodeja Naitaija epeepi jatijawita bageepa kaita,” etii.
24Joko ka gaati kede kou mana kodo juwijake okejai kenekaija emoge egai.
25Kodeja Jesus etope-taido manaa-tijake eteete mana, „Ikii epi ojaa bagee ejakimake-tai bagee kedaa bida peu etimakai, daana okeija ka iboudo kedaa boko jaduwajawii.
26Kodeja ikii jupi kou dani ko beu. Kodeja meija ikii jupi ibo kaine gapi, kijakei te-tai me kai.
27Daana meija ikii jupi okai tiga kaine gapi, kijakei te-tai to.
28Me Joka maija meta danite, me ka jakei te-tijake ko beu, kodeja meepa jakei tijake me wedaba komoka jaawiine tijake dimi mana ekegajawii.”
Peka Wanee Me Ida Wija Beu Jaawita
29Okei Jericho make podomeetigo gaa me wedaba eepei.
30Peka wanee bagee okejai wija ita watija aanimaki-toojogo. Jesus jaweete mana aajuwijake emeeme aeteete mana, „Ei, Tuhan, ipa nigai, kowaa ke, Daud Joka,” aetai.
31Me wedaba ewidogijake gabo aatowei etii. Kodeja okejai umina kidi emeeme to aetigoo, „Tuhan, ipa nigai, ei, Daud Joka!” aetai.
32Tijake Jesus joonidoke tijake manaa-teete mana, „Ikai magijo ide ani kijakei tai ko?” etii.
33Okejai wo aeteete mana, „Ei, Tuhan, peka nijakadijawii kadiimai,” aetai.
34Jesus ipa egajake peka jawinikidou. Okai kou gaa kodo maija peka kadidaa tijake Jesus aepei.
Nu geselecteerd:
MATIUS 20: EKG
Markering
Deel
Kopiëren
Wil je jouw markerkingen op al je apparaten opslaan? Meld je aan of log in