Luka 12
12
Jesũ gũkanania Ũinga
(Mat 10.26-27)
1Ĩndĩ o ĩu, nĩkwethĩranĩte antũ baingĩ mũno, magiri na magiri bagakinyanganaga nĩ kwingĩa. Rĩu Jesũ akĩambĩĩria kwarĩria arutwa bae akĩbera, “Ĩmenyagĩĩreni ndawa ya kwimbia mĩgate ya Afarisai, tau ũinga. 2Gũtĩ ũntũ bũkunĩkĩre bũtĩgakunũrĩrwa, na gũtĩ ũntũ bwithe bũtĩkaĩthũrwa. 3Kwogu, ũntũ bunde bwanaarĩria ntumani bũkaarua kũrĩ mũthenya, na bũrĩa bwanaciiranĩria nyomba bwĩithĩte bũkaugĩrĩrua nĩ muntũ atũĩte ĩgũrũgũrũ rĩa nyomba.
Ũrĩa ũbwĩrĩte gũkĩrwa
(Mat 10.28-31)
4“Ndĩbwĩra atĩrĩ acoore bakwa, tigagani gũkĩra antũ barĩa baũragaga mwĩrĩ ĩndĩ gũtĩ bũngĩ bankĩũmba kũrũtha. 5Ĩndĩ ka ndĩbwĩre ũrĩa bũbatiĩ gũkĩra: kĩragani ũrĩa ũrĩ na inya ya kũũraga mwĩrĩ na acoke aũgere ĩcamarĩro. Ndĩbwĩra na ma atĩrĩ, mũkĩreni!
6“Anga tũbiribiri#12.6 tũbiribiri Tũnyoni tũnini mũno. tũtano tũtiumaga tũabu#12.6 tũabu Mbeca irĩa jiarĩ nini mũno. twĩrĩ? No gũtĩ kanyoni o na kamwe ga tu kariganagĩra mbere ya Ngai. 7O na nkinya njuĩrĩ jia jiongo jienu nĩ jijĩwe ni Ngai. Nĩkĩo bũtĩkamake, nĩũntũ bũrĩ na bata nkũrũki ya tũbiribiri twingĩ.
Kumbũra na gũkana Kristũ
(Mat 10.19-20,32-33; 12.32)
8“Ndĩbwĩra atĩrĩ, muntũ wonde ũrĩa ũkambumbũra mbere ya antũ, o nawe Mwana wa Muntũ akamumbũra mbere ya araika ba Ngai. 9Ĩndĩ ũrĩa ũgankana mbere ya antũ no agakanwa nĩ Mwana wa Muntũ mbere ya araika ba Ngai.
10“Muntũ wonde waragia nteto jia kũregana na Mwana wa Muntũ akarekerwa; ĩndĩ ũrĩa ũcambagia Roho Mũtheru atĩkarekerwa.
11“Rĩrĩa bakabwira kũgambithĩrua sinagoguni nĩ anene kana athani bũtĩgetange bũkĩũragia bũrĩa bũkauga, 12nĩũntũ Roho Mũtheru akabũrutana kagiitani o kau bũrĩa bũbatiĩ kuga.”
Ngerekano ya gĩtonga kĩrĩa kĩarĩ kĩriitu
13Muntũ ũmwe kuuma kũu kĩrĩ antũ akĩĩra Jesũ atĩrĩ, “Mũrutani, ĩra mũruaiya angaĩre into irĩa twatigĩrwe nĩ baba.”
14Ĩndĩ Jesũ akĩmwĩra, “Muntũ ũũ, nũũ ũntuĩte mũgambithania kana mũbũgaanĩria into?” 15Agĩcoka akĩĩra antũ bonde ũũ, “Ĩmenyereeni kuumania na ũkoroku bwa mĩthemba yonde; nĩũntũ ũtũũro wa muntũ tĩ wingĩ wa into ĩria arĩ najio.”
16Agĩcoka akĩbaa ngerekano, “Muntũ ũmwe gĩtonga nĩ arĩmire mũgũnda, na ũkĩjiara irio nyingĩ mũno. 17Akĩũria atĩrĩ, ‘Nĩ atĩa nkũrũtha rĩu, na ntĩ na gwa gũkethera maketha mama monde?’ 18Akĩĩra, ‘Ndĩrũtha ũũ, ndĩtharia makũmbĩ makwa mbake mangĩ marĩa manenanene. Mbige mbemba ino jiakwa jionde na into jiĩngĩ jiakwa ku. 19Ncoke mbĩre nkoro yakwa atĩrĩ, nkoro yakwa, ũrĩ na into nyingĩ jia gũkwĩgana kũrĩa mĩaka mingĩ; ĩkara ndĩ, ũrĩe na ũnyue na wĩkenere.’ 20Ĩndĩ Ngai akĩĩra gĩtonga kĩu atĩrĩ, ‘Kĩaa gĩkĩ! Ũrĩkua ũtukũ bwa ũmundĩ; into irĩa jionde wĩigĩrĩte igatuĩka jia ũ?’”
21Jesũ akĩrĩkĩĩria akiuga, “Ũgu nĩ bu gũgekara kĩrĩ muntũ ũrĩa wĩigagĩra ũtonga bwae we mwene, ĩndĩ tĩ gĩtonga mbere ya Ngai.”
Gwĩoka Ngai
(Mat 6.25-34)
22Jesũ agĩcoka akĩĩra arutwa bae, “Kwogu ndĩbwĩra atĩrĩ, bũtĩkethĩnie nĩ kĩrĩa bũkarĩjaga nĩkenda bũtũũra mwoyo, kana nguo jia gwĩkĩra mĩĩrĩ yenu. 23Nĩũntũ ũtũũro bwenu nĩ bwa bata nkũrũki ya irio, na mĩĩrĩ yenu ĩrĩ ba bata nkũrũki ya nguo irĩa bwĩkagĩra. 24Tecirieni bwa inyoni: itĩandaga kana iketha; itĩ na makũmbĩ kana mĩrũrũ#12.24 makũmbĩ... mĩrũrũ: Nyomba jia tene jia kwiga maketha. , ĩndĩ amwe na ũgu Ngai nĩ aireraga. Anga bwiũ bũtĩ na baita nkũrũki ya inyoni! 25Na rĩ, nũũ wajienu ũnkiũmba kwĩongera ntukũ o na ĩmwe kĩrĩ ũtũũro bwae na gwĩtanga? 26Kwogu, kethĩrwa bũtĩũmba gaũntũ kanini ta kau rĩ, nĩmbi ĩgũtũma bwĩtanga nĩ mau mangĩ? 27Eneeni maũa ma kĩthaka bũrĩa makũraga; matĩrutaga wĩra kana metumĩra nguo. Ĩndĩ ndĩbwĩra atĩrĩ, o na gũtuĩka Solomoni nĩ arĩ na mwago mũnene, atagemete ta rimwe rĩa mo. 28Kethirwa Ngai nĩ akengagia ria rĩa mĩgũndani rĩrĩa rĩkũraga ũmundĩ na rũ rĩkaũma rĩkagerwa mwankini rĩ, anga atĩnkĩũmba kũbwĩkĩra nguo wega nkũrũki, bwiũ antũ baba ba wĩtĩkio mũnini!
29“Kwogu bũtĩkethĩnagie meciria nĩũntũ bwa kĩrĩa bũkarĩa na bũkanyua. 30Nĩkwĩthĩrwa ino nĩjio into irĩa antũ bonde ba ndĩ, barĩa batiijĩ Ngai, benganaga najio. Baba wenu nĩaijĩ nĩbũkũbatara into iu. 31Ĩndĩ biũ ambani bũcũe Ũnene bwa Ngai, na akabũejaga into iu jiĩngĩ jionde o najio.
Utonga bũrĩa bũrĩ ĩgũrũ
(Mat 6.19-21)
32“Tigani gũkĩra, bwiũ ndĩthia nini, nĩũntũ Baba wenu nĩ onete kũrĩ wega abũnenkere Ũnene. 33Endiani into jienu, na bunenkere nkĩa mbeca iu. Ĩthondekereni ibeti irĩa itĩkathiraga mbeca, bwĩigĩre ũtonga bwenu ĩgũrũ kwa Ngai, kũrĩa ũtĩkathira, nĩũntũ gũtĩ mwamba angĩũkinyĩra kana ndungu iũthũkangia. 34Nĩkwĩthĩrwa arĩa mũthithũ waku ũrĩ nĩ o, o na nkoro yaku ĩthagĩrwa ĩrĩ.
Ntungata irĩa jiĩkaraga jiĩũgĩte
35“Ĩkaragani bwĩũgĩte kagiita o konde, bwĩoete wega na taa jienu igĩakanaga. 36Bwĩkare ta ntungata irĩa jiĩthagĩrwa jieterete mwathi wajio auma kĩathoni kĩa ũiki, nĩkenda rĩrĩa akaringaringa mũrango imũrugũrĩra orio. 37Kũtharimwa nĩ ntungata irĩa ikethĩĩrua itĩmami nĩ mwathi wajio rĩrĩa agacoka. Ndĩkwĩra na ma atĩ mwathi ũu akearĩĩria, abekarie ndĩ methani acoke abatungate. 38O na angĩtuĩka akeeja ũtukũ gatagatĩ kana thaa kenda jia ũtukũ, ethĩre itĩmami, ntungata iu nĩ ndathime. 39Ĩndĩ menyani atĩrĩ, kethĩrwa mwene nyomba nĩ ethagĩrwa aijĩ thaa irĩa mwamba akeja, atĩnkĩreka nyomba yae ĩbunjwa. 40O nabwi ĩkaragani bwĩũgĩte nĩ tontũ Mwana wa Muntũ akeja ĩthaa rĩrĩa bũtĩmwĩrĩgĩrĩĩte.”
Ntungata mbĩtĩkua na ĩtĩ mbĩtĩkua
(Mat 24.45-51)
41Petero akĩũria Jesũ, “Mwathani, nĩtwi twinka ũkwĩra ngerekano ĩno kana ũrĩra antũ bonde?”
42Mwathani akĩmũcokeria akĩmwĩra atĩrĩ, “Ntungata ĩrĩa mbũgĩ na mbĩtĩkua nĩ ĩrĩkũ? Nĩ ĩrĩa mwathi wayo atigagĩra ntungata irĩa jiĩngĩ airũngamĩĩre na ainenkagĩre irio thaa irĩa jiagĩĩrĩte. 43Kũtharimwa nĩ ntungata ĩrĩa ĩkethĩrwa ĩkĩrũthaga ũgu! 44Ndĩbwĩra na ma atĩ mwathi wayo akamĩtua mũrũngamĩĩri wa into jiae jionde. 45Ĩndĩ ntungata ĩu ĩkeĩra atĩrĩ ‘Mwathi wakwa nĩ ekarire mũno atĩmũcoku,’ na yambĩĩrie kũria ntungata irĩa jiĩngĩ, jia arũme na jia aka, ĩkĩrĩjaga na ĩkanyua, nkinya ĩkarĩka, 46mwathi wayo agacoka ntukũ ĩrĩa ntungata ĩu ĩtĩmwĩrĩgĩĩrĩte, na ĩthaa rĩrĩa ĩtijĩ, amĩerithie, acoke amĩngate ĩthi ĩgekare na barĩa batĩ etĩkua.
47“Ntungata ĩrĩa iijĩ bũrĩa mwathi wayo endaga ĩrũtha ĩndĩ ĩtĩrũthe bu, ĩkarumua ndumio yongwa. 48Ĩndĩ ntungata ĩrĩa ĩtĩthagĩrwa ĩkĩmenya bũrĩa mwathi wayo endaga, ĩkarũtha ũntũ bũngĩtũma ĩriwe, ĩkaringwa iboko niini. Muntũ ũrĩa mũnenkere into nyingĩ agetua nyingĩ, na ũrĩa mũnenkere nyingĩ nkũrũki agetua nyingi nkũrũki.
Jesũ kũreta ngaũkano
(Mat 10.34-36)
49“Mbĩjĩte kũmuntia ndĩ mwanki; ndĩngĩkena atĩa kethĩrwa mwanki ũu nĩmwambĩĩru gwakana! 50Ndĩ na ũbatithio nkũbatithua, na ngatiga kũinyĩrĩka rĩrĩa bũkarũthĩka. 51Nĩka bũgwĩciria mbĩjĩte kũreta ũkiri ndĩ? Arĩ; mbĩjĩte kũreta ngaũkano. 52Kwambĩĩria rĩu antũ batano ba nyomba ĩmwe bakethagĩrwa bagaũkanĩte; bathatũ bamenane na baĩrĩ na baĩrĩ bamenane na bathatũ. 53Ĩthe akamenana na mwana wae nawe mwana amenane na ĩthe; mwarĩ amenane na gina nawe gina amenane na mwarĩ wae, mũthoni amenane na mũka wa mwana nawe mũka wa mwana amenane na mũthoniwe.”
Gũtaũra magiita
(Mat 16.2-3)
54Jesũ agĩcoka akĩĩra antũ atĩrĩ, “Rĩrĩa bwona matu maumĩte bwa rũgũrũ bugaga, ‘Mbura ĩkaura’, na nĩ ma ĩkaura. 55Na rĩrĩa bwona rũkũngi rũkiurutana rumĩte bwa gaĩti bũkauga, ‘Gũkagĩa ũrugarĩ mũno;’ na gũgekarĩka bu. 56Mpinga ino! Nĩbũkũmba mũno gũtaũra bũrĩa gũgekarĩka bwaraitha ndĩ na ĩgũrũ. Nĩmbi ĩkũgiria bũmba gũtaũkĩrwa nĩ maũntũ marĩa magũtuĩkĩka kagiitani gaka?”
Ĩgujanani na mũnthũ waku
(Mat 5.25-26)
57“Bũregaga gwĩtuĩra bwiũ eene ũntũ bũrĩa bũbatiĩ kũrũtha nĩkĩ? 58Muntũ mwĩrandũ angĩkwira kotini gũkũthitanga, geria bwĩgujanĩre njĩrani, nĩũntũ bwakinya kotini mugambithania agagũtwĩra, akũnenkanĩre kĩrĩ mũthigari nawe akũingĩre njera. 59Ndĩkwĩra atĩrĩ na ma, kũu njera ũtiuma ũtĩrĩĩte nkinya ciringi ya mũthia ya randũ ĩu ũgwatĩrĩtwe.”
Nu geselecteerd:
Luka 12: LUKA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
God's word open for all
©Bible Society of Kenya, 2021