Luka 6
6
Kĩũria kĩgiĩ ntukũ ya Sabatũ
(Mat 12.1-8; Mar 2.23-28)
1Ntukũ ĩmwe ya Sabatũ, Jesũ na arutwa bae bakũrũkĩĩrĩte mĩgũndani ya ngano, arutwa nĩ bathijaga bakiunaga ngano, bakajikitha bakairĩa. 2Afarisai bamwe bakĩũria arutwa, “Nĩmbi ĩgũtũma bũrũtha bũrĩa Watho bwetũ bũtĩtĩkĩĩrĩtie kũrũthwa ntukũ ya Sabatũ?”
3Jesũ akĩbaũria atĩrĩ, “Nĩka bũtanathoma bũrĩa Daudi na antũ barĩa aarĩ nabo barũthire rĩrĩa baarĩ baũtu? 4Daudi atonyiĩre nyomba ya Ngai, ajũkia mĩgate ĩrĩa yathũrĩrĩtwe Ngai, amĩrĩa, acoka anenkera barĩa baarĩ amwe nawe, o na kethĩrwa watho bũtetĩkĩrĩtie antũ bangĩ bamĩrĩa o tiga athĩnjĩri Ngai.”
5Na nĩkĩo akĩbeera atĩrĩ, “Mwana wa Muntũ nĩ we Mwathani wa Sabatũ.”
Jesũ kũragithia muntũ warĩ na njara mbonju
(Mat 12.9-14; Mar 3.1-6)
6Ntukũ ĩngĩ ya Sabatũ, Jesũ nĩ aatonyire sinagoguni, na akĩrutana. O kũu sinagoguni nĩ kwarĩ na muntũ warĩ mwonju njara yae ya ũrĩo. 7Na rĩ, arutani ba Watho na Afarisai nĩbacũaga gĩtũmi kĩrĩa bankĩthitanga Jesũ nakĩo. Kwogu bagĩĩkara bamũtuĩrĩtie bona kana akaragithia muntũ ũu ntukũ ya Sabatũ. 8Ĩndĩ Jesũ nĩ amenyire bũrĩa beciragia, na akĩĩra muntũ ũu, “Ũkĩra wĩje ũrũngame aa gatagatĩ.” Muntũ ũu agĩũkĩra akĩrũngama arĩa Jesũ amwonererie. 9Jesũ akĩbaũria, “Tiga ndĩbũrieni, Watho bwĩtĩkĩrĩĩtie kũrũthagwe atĩa ntukũ ya Sabatũ? Kũrũthĩra muntũ maũntũ marĩa mega kana kũmũrũthĩra marĩa mathũku? Kwonokia ũtũũro bwa muntũ kana kũbũthũkangia?” 10Akĩthiũrũrũkia metho kĩrĩ bo bonde, agĩcoka akĩĩra muntũ ũu warĩ na njara mbonju atĩrĩ, “Kũnjũra njara yaku.” Agĩkũnjũra njara, na ĩkĩragia.
11Ĩndĩ Afarisai na arutani ba Watho bakĩĩgua marũrũ mũno na bakĩambĩĩria kũũrania bũrĩa bankĩrũtha Jesũ.
Jesũ kũthuura atũmwa ĩkũmi na baĩrĩ
(Mat 10.1-4; Mar 3.13-19)
12Ĩndĩ o ĩu Jesũ nĩ aitirie kĩrĩmani kũromba na akĩrara kũu akĩrombaga Ngai. 13Gwakĩa Jesũ agĩĩta arutwa bae na kuuma kĩrĩ bo akĩthuura ĩkũmi na baĩrĩ, akĩbeta atũmwa. 14Nabo nĩbo baba: Simoni, ũrĩa atuĩrĩre riĩtwa Petero, na mũruagina Enderea, na Jakubu na mũruagina Johana, na Filipu, na Bathoromeo; 15na Mathayo, na Toma, na Jakubu mwana wa Alufayo na Simoni (ũrĩa wetagwa Ziloti), 16na Judasi mwana wa Jakubu, na Judasi Mũsikarioti, ũrĩa wakunyanĩĩre Jesũ.
Jesũ kũrutana na kũragithania
(Mat 4.23-25)
17Jesũ akĩĩmana kuuma kĩrĩmani arĩ amwe na atũmwa bae, akĩrũngama antũ kwarĩ mũgwandĩ. Na nĩ kwarĩ na gĩkundi kĩnene mũno kĩa arutwa bae na antũ baingĩ barĩa baumĩte Judea na Jerusalemu, o na bangĩ bakauma nteere jia ĩria ntũũrani jia Tiro na Sidoni. Antũ baba bonde bejĩte nĩkenda bathikĩĩria ũrutani bwa Jesũ na baragithua mĩrimũ. 18Barĩa baathĩnagua nĩ nkoma o nabo nĩbaragithirue. 19Antũ nĩ bageragia gũtongithia Jesũ, nĩũntũ nĩ kwarĩ na inya yaumaga ndani yae ĩkabaragithia bonde.
Itharimo na irumi
(Mat 5.1-12)
20Jesũ nĩ araithire arutwa bae na akĩbeera atĩrĩ.
“Gũkena nĩ bwiũ nkĩa,
nĩkwĩthĩrwa Ũnene bwa Ngai nĩ bwenu.”
21“Gũkena nĩ bwiũ bũũti rĩu,
nĩ kwĩthĩrwa bũkanyirithua!”
“Gũkena nĩ bwiũ bũkũrĩra rĩu,
nĩ kwĩthĩrwa bũgakena!”
22“Gũkena nĩ bwiũ rĩrĩa antũ bakabũmena, babũrege, babũthũũre na babũcambie, nĩũntũ bwa Mwana wa Muntũ! 23Rĩrĩa bakabũrũtha ũgu rĩ, bũkene na bũrũgarũge nĩkwĩthĩrwa bũrĩ na kĩewa kĩnene ĩgũrũ. Nĩ tontũ ũgu no bu bethe bao barũthire iroria.”
24“Ĩndĩ rĩ, ũinanũ kĩrĩ bi itonga!
Nĩkwĩthĩrwa nĩbũrĩkĩtie kũgwata ikeno jienu.”
25“Ũinanũ kĩrĩ bi anyiru rĩu!
Nĩkwĩthĩrwa kagiita gagakinya bũũte.”
“Ũinanũ kĩrĩ bwi bũgũkena rĩu!
nĩkwĩthĩrwa bũkethikĩra na bũrĩre.
26“Ũinanũ kĩrĩ bwi rĩrĩa antũ bakũbũkumia! No bu bethe bao bakumirie iroria jia ũrongo.
Endagani anthũ benu
(Mat 5.38-48; 7.12)
27“Ĩndĩ bwiũ bũndikĩrĩtie ndĩbwĩra atĩrĩ, endagani anthũ benu na barĩa babũthwĩre bũbarũthage wega. 28Tharimagani barĩa babũrumaga na bũrombagĩre barĩa babũcambagia. 29Muntũ akeja gũkũringa rũĩ rwa rũthĩa mũgarũkĩrie o na rũu rũngĩ. Na muntũ angĩgũtunya ĩgoti o na sati mũnenkere. 30Muntũ angĩkũromba gĩntũ mũnenkere; na ũrĩa ũgagũtunya into jiaku ũtĩkamwĩtie jio. 31Na o bũrĩa bũnkĩenda antũ barĩa bangĩ babũrũthage, barũthageni bu.
32“Bũngĩetera kwona baita ĩrĩkũ kũngĩtuĩka bwendaga o barĩa babwendaga? Tontũ rĩ, o na eyia nĩ bendaga barĩa babendete. 33Kũrĩ na baita ĩrĩkũ gũngĩtuĩka bũrũthaga wega o barĩa babũrũthaga wega? 34Na rĩ, bũkona baita ĩrĩkũ kethĩrwa bũkobithagia antũ o barĩa bankiũmba kũbũrĩa? O na eyia nĩbakobithagia eyia barĩa bangĩ berĩgĩĩrĩte bakarĩwa ĩrandũ rĩao. 35Ĩndĩ bwiũ endagani anthũ benu, na bũbarũthage maũntũ marĩa mega. Kobithanagiani bũtĩkwĩrĩgĩĩra kũrĩwa, na bũkagwata kĩewa kĩnene na bũtwĩke jiana jia Ngai ũrĩa ũrĩ Ĩgũrũ Mũno. Tontũ rĩ, Ngai nĩegujagĩra kĩao o na barĩa batĩ nkatho na eendi. 36Kwogu ĩgujanagĩrani kĩao o ta bũrĩa Baba wenu egujanagĩra kĩao.
Gũtuĩra barĩa bangĩ
(Mat 7.1-5)
37“Bũtĩgatujagĩre antũ barĩa bangĩ, nabwi bũtĩgatuĩrwa nĩ Ngai. Bũtikengagĩĩre antũ barĩa bangĩ, nabi bũtĩkengĩĩrwa nĩ Ngai. Rekagirani antũ barĩa bangĩ, nabi bũkarekerwa nĩ Ngai. 38Ejanagani, nabwi bũkaewa nĩ Ngai nyingĩ, irĩ nkindĩre nkinya igetĩka. Nĩũntũ rĩ, kĩthimi kĩrĩa bũthĩmanagĩra nakĩo nĩkĩo bũkathimĩrwa nakĩo.”
39Jesũ agĩcoka akĩbaa ngerekano: “Anga mũtumuumu aũmba gũtongoreria mũtumuumu ũrĩa ũngĩ? Tĩka bonde bakagwa ĩrimani? 40Gũtĩ mũrutwa mũnene nkũrũki ya mũmũrutani, ĩndĩ muntũ wonde mũrutane wega nĩatukagia mũmũrutani.
41“Nĩmbi ĩgũtũma wona gatĩ karĩa karĩ ritho rĩa muntũ ũrĩa ũngĩ ĩndĩ ũtĩone ndingĩ ĩrĩa ĩrĩ ritho rĩaku? 42Kana nĩ atĩa ũnkĩĩra muntũ ũrĩa ũngĩ, ‘Tiga nkũrute gatĩ kau karĩ ritho rĩaku,’ rĩrĩa gwe gwengwa ũtĩkwona ndingĩ ĩrĩa ĩrĩ ritho rĩaku? Mpinga ĩno! Amba ũrute ndingĩ ĩrĩa ĩrĩ ritho rĩaku nĩkenda ũmba kwona wega ũkĩruta gatĩ karĩa karĩ ritho rĩa muntũ ũrĩa ũngĩ.
Mũtĩ na majiaro mau
(Mat 7.16-20; 12.33-35)
43“Gũtĩ mũtĩ mwega ũjiaraga matunda mathũku, na gũti mũtĩ mũthũku ũjiaraga matunda mega. 44O mũtĩ ũmenyekaga na matunda marĩa ũjiaraga. Nkũũ itĩkethagwa kuuma mĩguani, kana ndabibũ ikethwa kuuma mũtareni. 45Muntũ mwega aaragia ũtonga bwa wega bũrĩa bũrĩ nkoroni yae, na muntũ mũthũku aaragia ũtonga bwa ũthũku bũrĩa bũrĩ nkoroni yae. Nĩ kwĩthĩrwa kanyua karutaga kĩrĩa kĩjũrĩte nkoroni.
Aaki baĩrĩ
(Mat 7.24-27)
46“Rĩu rĩ, bũmbĩtaga ‘Mwathani, Mwathani,’ nĩkĩ na bũtĩrũthaga maũntũ marĩa ndĩbwĩraga? 47Nĩnkũbwonia bũrĩa muntũ wonde ũrĩa wĩjaga kĩrĩ ni, akegua jiugo jiakwa na akarũtha bũrĩa jiugĩte akari. 48Akari ta mwaki wa nyomba ũrĩa enjĩĩre nyomba yae mũsingi ndĩ buru nkinya rwarani rwa ĩiga; na rĩrĩa mũuro wejũrire waunũka, mũguũ nĩwaringire nyomba. Ĩndĩ rĩ, ũtainainia nyomba ĩu, nĩũntũ mũmĩaki nĩ amĩakĩte wega. 49Ĩndĩ muntũ ũrĩa wĩgujaga jiugo jiakwa na akarega kũrũtha bũrĩa jiugĩte akari ta mwaki ũrĩa wakire nyomba ĩndĩ atenjĩĩre mũsingi mwega. Rĩrĩa mũuro wejũrire mũguũ wejire waringa nyomba wamiomorania. Naku kwaragana kwa nyomba ĩu kwarĩ kũnene.”
Nu geselecteerd:
Luka 6: LUKA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
God's word open for all
©Bible Society of Kenya, 2021