LUKAS 10
10
I Yesus nundoi tumatuhu-E pitumpul᷊o sukataunge
1Bou e'e Mawu namile tumatuhu-E pitumpul᷊o#10:1: pitumpul᷊o: pirambau wohe horo: pitumpul᷊odua. mbuhue nundoi sire taha duang katau pangihoro si Sie sarang apang soa dingang u tampa ko tamai-Nge. 2#Mat. 9:37-38“Wua ko sarung i tipo maul᷊i,” angkung-E si sire, “arawe mananiponge kitang singkodo. Ual᷊ingu e'e pundote su tataghuang u anseri e'e tadeau I Sie mundohongu mul᷊al᷊aha i guna ngu panipo hasilu sasuang-E. 3#Mat. 10:16Ho, dal᷊engte! Ia mundoi si kumu musul᷊ung u domba su tal᷊oara u sarigala. 4#Mat. 10:7-14; Mrk. 6:8-11; Luk. 9:3-5Kumbahang mumbawa dompeti arako pondi arako sapatu. Kumbahang mangiro su tal᷊oara u l᷊al᷊eng guna ngu munggile adati sarang su singkatau. 5Boko i kumu sumu su wal᷊e simbau, puhabari horo, ‘Mal᷊umbako purarame ene su l᷊al᷊ung u wal᷊e i'i.’ 6Boko su se'e pia taumata ko mou purarame, kute al᷊amatu e'e sarung matatapi dingange; boko ta sul᷊e sau al᷊amati e'e. 7#1Kor. 9:14; 1Tim. 5:18Katanae su wal᷊e simbau kadongki. Tarima e apang ko nisadiangi sire su se'e si kumu, watu'u taumata ko muhal᷊i pia hakie manarima wawaehe. Kumbahang mupapangal᷊ing bou wal᷊e simbau sarang wal᷊e kowal᷊inge. 8Boko i kumu su mongo su soa simbau, dang su se'e i kumu i tarima dingang u mapia, kang te apang ko nisadia si kumu su se'e. 9Pakaul᷊ete taumata ko masasaki su soa e'e, dang puhabari su apang taumata su se'e, ‘Mawu Ruata seng maehong mamarenta kere Ratu su tal᷊oara i kumu.’ 10#Wuk. 13:51Arawe boko i kumu sumongo su soa simbau dang se'e i kumu ta itarima, suwang te sarang l᷊al᷊eng dang puhabari, 11‘Sarang awun gu soangi kumu ko nurumike su l᷊airi kami, itontong i kami tadeau makoa kere l᷊aonggo ingati si kumu. Kateho katitong te himoneu seng masandighi temponge Mawu Ruata manita mamarenta kere Ratu su tal᷊oara i kumu!’ 12#Kej. 19:24-28; Mat. 10:15, 11:24Putinaung te, su L᷊ou Kiamati, taumata ngu Sodom mborong nangilebe mal᷊owo ampungangu Mawu Ruata bou taumata su soa e'e!”
Apang soa ko ta mangimang
(Mat. 11:20-24)
13 #
Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 “Silaka si kumu, Korazim! Dang silaka si kumu Betsaida! Kiko manga ko makal᷊aherang ko nikoa su tal᷊oarai kumu e'e seng nikoa su soangu Tirus dingang u Sidon, nal᷊ahe apang taumata pai se'e seng mal᷊iwue nutobati bou dosa ngi sire, dang nul᷊oho l᷊aku mul᷊al᷊utu dingang nanimbo ngu awu su timbo i sire. 14Su L᷊ou Kiamati, manga tau Tirus dingang u Sidon sarung nangilebe mal᷊owo ampungang u Mawu Ruata bo i kumu. 15#Yes. 14:13-15Dang i kumu, Kapernaum! I kumu musipiri, i kumu sarung ipakarange sarang sorga? Ta! I kumu katewe i rume sarang naraka!”
16 #
Mat. 10:40; Mrk. 9:37; Luk. 9:48; Yoh. 13:20 Bou e'e I Yesus nangul᷊i su manga tumatuhu-E, “Taumata ko mundaringihi si kumu, mundaringihi si Sia. Taumata ko manolaki kumu, manolaki si Sia. Dang taumata ko monalaki sia, monalaki si Sie l᷊ai ko nundoi si Sia.”
Pusasul᷊engi sire Pitungpul᷊o tumatuhu
17I sire pitumpul᷊o#10:17: pitumpul᷊o: pirambau wohe horo: pitumpul᷊odua (putuhung ay. 1) tumatuhu e'e seng nusul᷊e dingang u karal᷊uasi. “Mawu”, angkung i sire, “Manga roh ko dal᷊ai l᷊ai nutumuhu si kami boko i kami muparenta si sire dingang u areng u Mawu!”
18I Yesus nusumimbahi, “Ia nakawua setang nanawo bou l᷊angi musul᷊ungu kila. 19#Mzm. 91:13Katitongte! I kumu seng Daku nionggol᷊ang u kawasa tadeau i kumu makatoto katoang l᷊au i ma u l᷊ipang dang mamare kaul᷊i u katatoghasu roka, sarang takoae ko makasilaka si kumu. 20Maning kere'e kumbahang i kumu l᷊umiaghi ual᷊ingu roh ko dal᷊ai nutumuhu si kumu. Mapiang i kumu l᷊iaghi ual᷊ingu arengu mawawohe su sorga.”
I Yesus nal᷊uasi
(Mat. 11:25-27, 13:16-17)
21Su tempo e'e l᷊ai, I Yesus nal᷊uasi ual᷊ingu nikawasa ngu Roh u Mawu Ruata.#10:21: bou Roh u Mawu Ruata: pirambau wohe horo: bou Roh; pia l᷊ai: su l᷊al᷊ung u Roh-E. I Yesus nangul᷊i, “Yamang, Mawu ko makawasa su l᷊angi dingang su dunia! Ia mutarimakase si Kau watu'u Kaul᷊iu e'e nipakarumasi-U bou apang taumata ko pande dang pia titongi sire, kateho nipakal᷊ahe-U su taumata ko takoae sikol᷊ang i sire. E'e nakal᷊uasi naung I Yamang.
22 #
Yoh. 3:35, 10:15 Kaul᷊iu patiku seng nisarakang Yamang si Sia. Takoae singkatau ko matitongu Ana su l᷊iukuri Yamang. Takoae l᷊ai ko matitong Yamang su l᷊ikuru Ana; dang manga taumata si sai Ana e mo mupakal᷊ahe Yamang.”
23Bou e'e I Yesus nuwihu su manga tumatuhu-E, bou e'e nangul᷊i si sire ha, “Untung i kumu watu'u seng nakawua ko nituhungang i kumu su tempo i'i. 24Watu'u tinaunge: Maul᷊i nabi dingang u ratu mo makawua ko nikawua ngi kumu su tempo i'i kateho i sire ta nakawua e'e. I sire mo makaringihi ko nikaringihi kumu su tempo i'i, kateho i sire ta nakaringihi.”
Papinintungu tau Samaria ko mapia naunge
25 #
Mat. 22:35-40; Mrk. 12:28-34 Bou e'e singkatau meteru agama nu sumongga mundea sal᷊a-Ngi Yesus. I sie nukina, “Tuang Guru, ia mambeng mukoa apa tadeau makatarima puwawiahi kahingang dingang u kakal?”
26I Yesus nusumimbahi, “Apa ko mawawohe su l᷊al᷊ung u Buki Susi? Kirapa su titong u hal᷊i e'e?”
27 #
Im. 19:18; Ul. 6:5 Tau e'e nusumimbahi, “ ‘Kindaghitete Mawu Ruata ngu dingang u kaul᷊i u naungu, dingang u kauliu jiwangu, dingang u kaul᷊i u katatoghasu, dang dingang u kaul᷊i u sipirangu,’ dang ‘Kindaghitete singsul᷊ungu kere i kau kumindaghiu watangengu sisane.’ ”
28 #
Im. 18:5
“Sasimbahu e'e nuhino,” angkung I Yesus. “Koate e'e, kute i kau sarung muwiahi.”
29Kateho meteru agama e'e mo mupuhinongu watange nge. I sie nukina, “Ko i sai singsul᷊ung ku e'e?”
30I Yesus nusumimbahi, “Pia singkatau koese ka rusunge bou Yerusalem sarang Yerikho. Su tal᷊oara u l᷊al᷊eng i sie nihombangeng u taha pangaho, nihampasi kaul᷊i u rarotonge, bou e'e nirarihang maturu-turu, mbuhue niwala watang-watang su l᷊al᷊eng dingang u l᷊esie ko l᷊abo. 31Nusarita u e'e singkatau imam nul᷊umal᷊eng l᷊ai su l᷊al᷊eng e'e. Su tempo ngi sie nakawua tau e'e, i sie nul᷊umihi sarang simbukangu l᷊al᷊eng, mbuhue l᷊imal᷊eng turusi. 32Kere'e l᷊ai singkatau tau Lewi ko kasahenge se'e; su tempo ngi sie nakawua tau e'e, nisandighange dingang nituhungange. Kateho i sie l᷊ai nul᷊umihi sarang simbuka ngu l᷊al᷊eng, bou e'e nul᷊umal᷊eng turusi. 33#2Taw. 28:15Arawe bou e'e pia singkatau Samaria ko su l᷊al᷊ung u l᷊al᷊al᷊engang, nusumahe su se'e l᷊ai. Su tempo nikawuange tau e'e, i sie nukumindaghi kahingang. 34Kute nisandighange tau e'e, bou e'e niuhase manga l᷊esie dingang u anggori dang niudangenge dingang u l᷊ana, mbuhue nipikunge manga l᷊esi e'e. Nasue e'e, niruie tau e'e su wabou keledainge, mbuhue niwawae sarang simbau katanakeng mbuhue nital᷊ungange. 35Ndai mal᷊ou i sie nupasuwang u doi sal᷊aka darua nionggoe su tataghuang u katanakeng e'e, dingang u nangul᷊i, ‘Tal᷊ungete i sie, dang boko pia manga wawaehe ko wal᷊inge hindo daku waehang boko ia musul᷊e mai.’ ”
36Bou e'e I Yesus nanginsue wuke e'e dingang u kakina i'i, “Bo i sire tilu e'e sude e, tumuhu sipirang u, ko nakoa singsul᷊ungu taumata ko nipangahong e'e?”
37Meteru agama ko nipakinateng e'e nusumimbahi, “Taumata ko seng nutul᷊ung tau e'e.”
“Ho, dako te dang pukoate l᷊ai kere e!” angkung I Yesus.
I Yesus nutiwo si Marta dingang i Maria
38 #
Yoh. 11:1
Bou e'e I Yesus dingang u manga tumatuhu-E nanurusi ral᷊al᷊engi sire, sarang nuratingu kampong simbau. Su se'e pia singkatau kowawine arenge i Marta, nunoti si Sie sarang wal᷊enge. 39I Marta pia tuaringe arenge i Maria. I Maria i'i kakangiang su sindihang u Mawu Yesus kapundaringihe apang tintiro-Nge. 40Arawe i Marta mangkate kapusasibungu hal᷊i u l᷊al᷊ung u wal᷊enge. I sie nusumandighi si Yesus dingang nangul᷊i, “Mawu, apa I Kau ta musumpi makawua si Maria namalangu ia puhal᷊i sisaneku? Roiko i sie pusumbala si sia!”
41“Marta, Marta!” sasimbahu Mawu. “I kau ghughagha dang musasibu mupikiru haghi-haghi; 42sumbal᷊i kal᷊abokange mang simbau. Dang i Maria seng namile ko kapiange, ko ta sarung al᷊akeng bo i sie.”
Nu geselecteerd:
LUKAS 10: LAISXN
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
2014 Indonesian Bible Society (Lembaga Alkitab Indonesia)