LUKAS 13
13
Boko ta mutobati bou dosa, sarung mawinasa
1Su tempo e'e taumata nuwuke si Yesus hal᷊i u tau Galilea pirangkatau ko nipate ngi Pilatus, su tempo ngi sire kapangonggoe sasumba su Mawu Ruata. 2Kaputinda u wuke e'e, I Yesus nangul᷊i, “Ual᷊ingu tau Galilea e'e nipate kere e, sinaung i kumu e'e ko mupakal᷊ahe i sire lebe bardosa bou kaul᷊i u tau Galilea kowal᷊inge? 3Ta, wal᷊inge kere e! Kateho putinaungte, boko i kumu ta mutobati bou manga dosa ngi kumu, i kumu kaul᷊ie l᷊ai sarung mate kere i sire. 4Kirapa we l᷊ai dingang i sire mapul᷊o wal᷊u ko nate su Siloam, su tempo ngu manara e'e nangumpisi si sire? Sunaung i kumu e'e ko manode i sire lebe bardosa bou kaul᷊i taumata kowal᷊inge ko natana su Yerusalem? 5Tinga-tingari ta. Sau l᷊ai Daku i habari: Boko i kumu ta mutobati bou apang dosa ngi kumu, i kumu kaul᷊ie sarung mate l᷊ai kere i sire e'e.”
Papinintu kau ara ko ta nuwua
6Bou e'e I Yesus l᷊ai nuwukengu papinintu i'i, “Pia singkatau ko pia kau ara su anseru anggore. Pia su silou i sie tarai mundea wua ngu kau e'e, kateho ta nakarea sarang simbau. 7Inau, i sie nangul᷊i su mul᷊ahal᷊i anseri, ‘Tuhungete, seng tilu taung ia nusumongo mundea wua ngu kau ara i'i, kateho mang ta nakarea sarang manga simbau. Mapiang tuwangte kau e'e! I sie kitang manginsue tawa ngu tana!’ 8Kateho mul᷊ahal᷊i anseri e'e nusumimbahi, ‘Balate i sie patuwo sintaung i'i l᷊ai, Tuang. Hindo daku bongkareng tanange pakal᷊iku, dingang tahonang u pupuki. 9Pari i sie hindo muwua su taung maie'e. Arawe boko ta, mbuhue botonge I Tuang mangoro panuwang.’ ”
I Yesus nupakaul᷊e ngu singkatau kowawine ko bongko su l᷊ou ngu Sabati
10Pia su sil᷊ou ngu Sabati, I Yesus nanintiro su simbau wal᷊e pukakal᷊iomanengang. 11Su se'e pia tau kowawine seng mapul᷊o wal᷊u su taunge masaki, ual᷊ingu pia roh ko dal᷊ai su badange. Tau kowawine e'e ko bongko dang ta makararisi matei. 12Su tempo I Yesus nakawua si sie, i sie nukui tau kowawine e'e, “Tau, i kau nal᷊iwiri bou saki u!” 13Bou e'e I Yesus nanimbo l᷊ima-Nge su tau kowawine e'e, dang singkatempo e'e l᷊ai i sie nurumarisi matei, bou e'e nundalo Mawu Ruata.
14 #
Kel. 20:9-10; Ul. 5:13-14 Tumbonang u wal᷊e pukakal᷊iomaneng e'e nuwawal᷊uang, himoneu I Yesus nupakaul᷊e ngu taumata su l᷊ou ngu Sabati, watu'u e'e i sie nangul᷊i su manga taumata, “Pia nungu l᷊ou guna ngu muhal᷊i; songo te su l᷊ou-l᷊ou e'e guna ngu i pakaul᷊e, ari we l᷊ou ngu Sabati!”
15Mawu nusumimbahi, “I kumu tal᷊umpangki! Su l᷊ou ngu Sabati apang taumata mamilo sapi dingang u keledaingi sire bou kandang dang mupasuwang guna ngu onggol᷊ang u inung i sire. 16Ho, su si'i, su tempo i'i pia singkatau kowawine hintou ngi Abraham, seng mapul᷊o wal᷊u sutaunge l᷊iwuenge mal᷊aiki su setang. Apa i sie ta wotonge ipilo bou l᷊aikie e'e su l᷊ou ngu Sabati?” 17Sasimbahi Yesus e'e nakakoa manga roka I Yesus namea kahingang; arawe kaul᷊i u taumata ko wal᷊inge mal᷊uasi nakawua kaul᷊i u ko makal᷊aherang ko nikoa I Yesus.
Papinintu watu ngu Sawi
(Mat. 13:31-32; Mrk. 4:30-32)
18I Yesus nukina, “Boko Mawu Ruata mamarenta, kirapa kakakoae? Dingangu apa Daku i kasul᷊ung? 19Kakakoae musul᷊ung u papinintu i'i. Simbau watu ngu sawi#13:19: sawi: Sawi i'i sasuang ko botonge tumuwo range e patehang botonge manga tilu meteri. nial᷊a u taumata, bou e'e nisuang su ansere. Watunge e'e nutumuwo, bou e'e nakoa kau, dang manga burung nukoa sal᷊ehi sire su manga lelang u kau e'e.”
Papinintu ragi
(Mat. 13:33)
20Paghisa l᷊ai I Yesus nukina, “Boko Mawu Ruata mamarenta, dingang u apa Daku i kasul᷊ung kakakoae? 21Kakakoae musul᷊ung u ragi ko nial᷊a u singkatau kowawine, bou e'e nil᷊au dingang u tapong paupul᷊o su litere sarang nutumuwo kaul᷊i u e.”
Tukari ko mahepo
(Mat. 7:13-14,21-23)
22Su l᷊al᷊al᷊engang sarang Yerusalem, I Yesus nusumahe apang soa dingang u kampong apiru kapanintironge. 23Bou e'e pia taumata ko nukina si Sie, “Tuang, apa kitang singkodo taumata ko ipakasal᷊amati?”
I Yesus nusumimbahi, 24#Mat. 7:13-14“Putawakal᷊ite sumu bou tukari ko mahepo. Watu'u, putinaung! Maul᷊i taumata mutawakal᷊i sumu, kateho ta makasu. 25Su tempo tataghuang u wal᷊e nuwangung, dang mangunsi tukari, i kumu kararisi su l᷊ikure dang manita manengkohi dingang nangul᷊i, ‘Tuang, bukako tukari si kami!’ I Tuang e'e sarung sumimbahi, ‘Ia wugha ngi kumu e'e ko bou apa!’ 26#Mat. 7:22-23I kumu sarung nusumimbahi, ‘I kami seng buae nukumang nanginung dingang I Tuang dang I Tuang l᷊ai seng nanintiro su manga l᷊al᷊eng su soa ngi kami!’ 27#Mzm. 6:9Arawe I Tuang e'e sarung muhabari l᷊ai, ‘Ia wugha ngi kumu bou apa! Pangenso bou i'i, i kumu ko mukoa ko dal᷊ai!’ 28#Mat. 22:13, 25:30 #Mat. 8:11-12Su tempo i kumu makawua si Abraham, si Ishak dingang i Yakub dang apang nabi kapural᷊uase su Wanua-Ngu Mawu Ruata ko Wuhu, i kumu sarung mumpal᷊ehe, dang mutatahang u singsara watu'u i kumu ha niuseri sarang l᷊ikure! 29Apang taumata sarung sumongo bou pungu raki dingang u wahe, bou pungu sawunahi dingang u timuhi, dang sarung mahul᷊uasi su l᷊al᷊ung u Dunia-Ngu Mawu Ruata ko Wuhu. 30#Mat. 19:30, 20:16; Mrk. 10:31Mambeng tingari, pia taumata ko kasamuriange sarung makoa kahimbotongange, dang pia taumata ko kahimbotongange sarung makoa kasamuriange.”
I Yesus nukumindaghi u Yerusalem
(Mat. 23:37-39)
31Su tempo e'e l᷊ai, pia tau Farisi pirang katau nusumongo sarang koa I Yesus dang nangul᷊i, “Ari katana si'i! Dakote tamai sarang tampa ko wal᷊inge, watu'u i Herodes mo mamate si Kau.”
32I Yesus nusumimbahi, “Dako tamai habari su taumata ko takoae gunange e'e, ‘Silou i'i dingang u dol᷊ou Ia manguseri roh ko dal᷊ai dang mupakaul᷊e ngu taumata ko masaki, arawe su l᷊ou katilunge, Ia sarung manginsue hal᷊i-Ku.’ 33Maning kere'e Ia mambeng manurusi l᷊al᷊al᷊engang-Ku su silou i'i, dol᷊ou dang karumaheng, watu'u ko dal᷊ai singkatau nabi pateng sul᷊ikuru Yerusalem.
34Yerusalem, Yerusalem! Manga nabi seng nipatengu! Manga raroi u Mawu Ruata nipal᷊o i kumu dingang u watu sarang nate! Seng pakapira Ia mo mangomol᷊i kaul᷊i u kawanua ngu, kere i mau manu mundiaga manga ana e su al᷊ung u tataila e, kateho i kau mandi! 35#Mzm. 118:26Ual᷊ingu e'e Mawu Ruata seng ta muhundingang dingang u. Katitongte, manita bou tempo i'i i kau sarung ta makawua si Sia sau, sarang i kau muhabari, ‘Al᷊amate si Sie ko ruminta su areng u Mawu.’ ”
Nu geselecteerd:
LUKAS 13: LAISXN
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
2014 Indonesian Bible Society (Lembaga Alkitab Indonesia)