LUKAS 19
19
I Yesus dingang i Zakheus
1Su tempo I Yesus nurating u Yerikho, i Sie nul᷊umal᷊eng sarang turusi nuhupusi soa e'e. 2Su soa e'e pia singkatau tumbonang u mananuntu balasteng ko kala. Arenge i Zakheus. 3I sie mo mutuhung ko isai I Yesus e'e, kateho ual᷊ingu taumata tumaniu maul᷊i dang i sie sisane masana, kute i sie ta nakawua si Yesus. 4Inau, i sie nutumal᷊ang nangihoro apang taumata, mbuhue naawi su kau, tadeau makawua si Yesus ko singkodo l᷊ai sarung sumahe su se'e. 5Suapang I Yesus nurating u pungu kau e'e, I Sie nutuhung sintarai bou e'e nangul᷊i, “Zakheus, kehong te lintu! Watu'u Ia mambeng makoa sarang wal᷊e ngu silou i'i.”
6I Zakheus dingang u l᷊imintu dang nanomahi si Yesus dingang u kal᷊al᷊uasi. 7Kaul᷊iu apang taumata ko nakawua hal᷊i e'e natita nukal᷊ibubu. I sire nangul᷊i, “Sih! I sie tamai nukisake su wal᷊e ngu taumata ko dal᷊ai!”
8Bou e'e su wal᷊enge, i Zakheus nurumarisi dang nangul᷊i si Yesus, “Mawu simbahageang bou rarotong ku sarung daku i onggo su tau ko susa, dang i sai-sai ko l᷊inau bou daku niakal᷊eng, sarung sau daku waehang si sie paka pa susul᷊enge!”
9Bou e'e I Yesus nangul᷊i, “Su silou i'i i kau dingang u kaul᷊i u tataho u wal᷊e ngu nipakasal᷊amat u Mawu Ruata dang nionggol᷊ang u puwawiahi ko wuhu, watu'u i kau l᷊ai hintou ngi Abraham. 10#Mat. 18:11Ahusu Taumata sumongo guna ngu mundea dingang u manal᷊amati taumata ko napal᷊iri.”
Papinintu doi wul᷊aeng
(Mat. 25:14-30)
11 #
Mat. 25:14-30
Su tempo ngu taumata mborong kapundaringihe si Yesus kapudidatonge, I Sie nuweke ngu simbau papinintu. Watu'u, su tempo e'e i sie seng masandighu Yerusalem, dang taumata manika Mawu Ruata seng maehong mamarenta kere Ratu su dunia. 12I Yesus nangul᷊i, “Pia singkatau papung ko nul᷊umal᷊eng sarang wanua ko marau guna ngu hengketang makoa ratu, bou e'e napul᷊e. 13Suhoro u nuwua, i sie nukui mapul᷊ongkatau paparentange, bou e'e nangonggo si sire singkatau-singkatau pusimbau doi wul᷊aeng. ‘Pudagangte dingang u doi i'i tintal᷊a ia rumal᷊eng’. I sie nangul᷊i si sire. 14Kateho tataho u soa e'e nubinsi si sie. Inau, suapang i sie nuwua, i sire nundoi taumata puhabari, ‘I kami mandi taumata i'i makoa ratu ngi kami.’
15Kateho papung e'e nihengke nakoa ratu, mbuhue nusul᷊e sarang soange. I sie dingang nukui apang paparentange pasongo, guna ngu pakinateng minsang pira kauntungang ko seng nikarea i sire. 16Paparentang kahimotonge nusumandighi dang nangul᷊i, ‘Tuang, doi wul᷊aeng simbau ko nionggo i Tuang e'e, seng daku nikoa mapul᷊o.’ 17‘Masidada’, angkung i tuang e'e, ‘i kau paparentang ko mapia! Ual᷊ingu su hal᷊i ko dio, i kau ikapangumbang, i kau sarung daku koateng mangangawasa soa mapul᷊o.’ 18Paparentang karuange himaung dingang u nangul᷊i ‘Tuang, doi wul᷊aeng simbau ko nionggo i Tuang e'e, seng daku nikoa l᷊ima.’ 19Su paparentang e'e ratu e'e nangul᷊i, ‘I kau daku koateng mangangawasa su soa l᷊ima.’ 20Paparentang ko wal᷊inge himaung dang nangul᷊i, ‘Tuang i'i doi ngi Tuang; daku nireso nipikung u l᷊enso. 21Ia mataku i Tuang, watu u i Tuang singkatau ko mahasa. I Tuang mangal᷊a apa ko wal᷊inge koa i Tuang, dang i Tuang mangal᷊a l᷊uange su tampa ko tani suangeng i Tuang.’ 22Ratu e'e nangul᷊i si sie, ‘I kau paparentang ko dal᷊ai! Nuhino kere su didato ngu sisane ia sarung muhukung i kau. I kau matitong ia ko singkatau ko mahasa; ia mangal᷊a apang ko wal᷊inge koa ku dang mangal᷊a hasil᷊e su tampa ko ta daku nisuangeng. 23Boko kere e nakurawe doiku e'e ta nipasu su bank tadeau su tempo ngu ia musul᷊e ia makatarima doi e'e dingang u rentenge?’ 24Bou e'e ratu e'e nangul᷊i su apang taumata ko kararisi su se'e, ‘Al᷊a doi e'e bo i sie dang onggo e su paparentang ko pia doi wul᷊aeng mapul᷊o e'e.’ 25Arawe manga taumata e'e nangul᷊i, ‘Tuang, i sie seng pia mapul᷊o.’ 26#Mat. 13:12; Mrk. 4:25; Luk. 8:18Ratu e'e nusumimbahi, ‘Putinaung: taumata ko seng pia, si sie sarung onggol᷊ang l᷊ai lebe maul᷊i. Arawe taumata ko takoae apa, apang ko pia si sie sarung al᷊akeng l᷊ai boi sie. 27Dang su orasi i'i wawate mai manga rokaku e'e ko mandi ia makoa ratu ngi sire. Patete i sire kaul᷊ie su saruangku!’ ”
I Yesus nusumu su Yerusalem Dingang u Kawawantughi
(Mat. 21:1-11; Mrk. 11:1-11; Yoh. 12:12-19)
28Suapang I Yesus mbuae nangul᷊i kaul᷊i e'e I Sie nurumal᷊eng suhoro i sire sarang Yerusalem. 29Su tempo masandighu Betfage dingang u Betania su wul᷊uru Zaitun, i Sie nangoro duang katau tumatuhu-E pal᷊al᷊eng horo. 30“Dakoe tamai sarang kampong su saruang pai e'e,” nihabari Yesus si sire, “Boko i kumu sumu pai se'e, i kumu sarung makawua anau kaledai simbau mal᷊aiki. Kaledai e'e mborong tanisakenang u taumata. Piloe kaledai e'e dang wawa mai. 31Boko taumata makina si kumu, ‘Nakurawe i kumu mamilo kaledai e'e?’ Puhabari ‘Mawu#19:31: Mawu: arako tataghuange. muperlu.’ ”
32Tumatuhu I Yesus darua e'e natamai, dang nakarea kaul᷊ie mang nuhino kere ko nihabar-E. 33Tintal᷊a i sire rua kapamukange anau kaledai e'e, tataghuange nangul᷊i si sire rua, “Nakura kaledai e'e i pilo i rua?”
34I sire nusumimbahi, “Mawu mupake.” 35Bou e'e i sire rua numbawa ana u kaledai e'e sarang ko I Yesus. Bou e'e i sire nangumpahi juba ngi sire suwabou kaledai e'e dang nutul᷊ung nupaawi I Yesus su wawo e. 36Tintal᷊a I Sie nusumahe sake-sake su kaledai e'e, manga taumata namila juba ngi sire su l᷊al᷊eng.
37Su tempo I Yesus seng masandighi u Yerusalem, su l᷊al᷊eng karusunge su Wul᷊uru Zaitun, kaul᷊ie apang tumatuhu-E i sire maul᷊i nanita nukumiha nundalo su Mawu Ruata dang nutarima kase si Sie ual᷊ingu i sire seng nakawua kaul᷊i u tatia ko makal᷊aherang. 38#Mzm. 118:26I sire nangul᷊i, “Al᷊amati su Ratu ko ruminta su areng u Mawu! Purarame su sorga, dang dalo su Mawu Ruata!”
39Pirang katau taumata ngu Farisi bou tal᷊oara u taumata maul᷊i e'e nangul᷊i si Yesus, “Tuang Guru, roiko paka rumasi manga tumatuhu I Tuang e'e.”
40I Yesus nusumimbahi, “Pangimangte! Boko i sire i'i marumasi, manga watu i'i sarung kumiha.”
I Yesus nusumangi u Yerusalem
41Su tempo I Yesus kasasandighu Yerusalem, dang nakawua soa e'e, i Sie nusumangi. 42Angkung-E, “Pirua, wal᷊inge gampang kapiange kiko silou i'i i kau matitong apa ko maka songo purarame! Kateho i'i i kau ta makawua e'e. 43I kau sarung musombang u simbau tempo, su apang roka u makoa manga sasahaghe i pul᷊iku sikau; i sire sarung mul᷊iwung si kau dang manise si kau bou apang tampa. 44I sire sarung mupakalul᷊e ngi kau dingang u kaul᷊i u kawanua ngu; dang ta koa e watu sarang simbau sarung i wala ngi sire matana masasusung su tampae, watu'u i kau ta nusumpi u tempo su tempo ngu Mawu Ruata nusumongo mupakasal᷊amati kau!”
I Yesus nusumu su Wal᷊e-Ngu Mawu
(Mat. 21:12-17; Mrk. 11:15-19; Yoh. 2:13-22)
45I Yesus nusumu su Wal᷊e-Ngu Mawu dang nanita nanguseri apang mudadagang su se'e. 46#Yes. 56:7; Yer. 7:11“Su l᷊al᷊ung u Buki Susi,” angkung-E, “Mawawohe kiri i: Mawu Ruata nangul᷊i, ‘Wal᷊e-Ku sarung makoa wal᷊e tampa pukakal᷊iomanengang.’ Kateho nikoa i kumu sal᷊ehu taha puhampasi!”
47 #
Luk. 21:37
Sintinia l᷊ou I Yesus manintiro su l᷊al᷊ung u Wal᷊e-Ngu Mawu. Manga tumbonang u imam, dang manga meteru agama, dingang u manga pangaha u tau Yahudi mo mamate si Sie, 48kateho ta nakarea l᷊al᷊eng guna ngu mukoa hal᷊i e'e, ual᷊ingu kaul᷊i u taumata mangkate turusi kitang mundaringihi si Sie, dang mo u apang didato-Nge.
Nu geselecteerd:
LUKAS 19: LAISXN
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
2014 Indonesian Bible Society (Lembaga Alkitab Indonesia)