TAUNET 2
2
1Kigiges anyun yaetab kipsengwetisiek ak ng’ony ak chang’indanywa tugul. 2Kiiges Kamuktaindet boisionikyik che kiga koyai eng’ betut ne bo tisab; ak kiimuuny eng’ betut ne bo tisab eng’ boisionikyik tugul che kiga koyai. 3Ak kiiberur Kamuktaindet betutab tisab, kotaban: amu kiimuuny eng’ betunoto eng’ boisionikyik tugul che kitoi Kamuktaindet koyai.
Komi Adam ak Awa mbaretab Eden
4Chu taunaik che bo kipsengwetisiek ak ng’ony eng’ betunoto ne kiyai Jehovah Kamuktaindet kipsengwetisiek ak ng’ony. 5Kitomo kobiit ket ne bo kewet eng’ ng’ony, ak kitomo kobityo ketik alak tugul che mengechen che bo kewet: amu kitomo kogochi Jehovah Kamuktaindet korobonji ng’ony, ak kima komi chi ne ibati ng’ony. 6Ago kitogosta kibungweret eng’ ng’ony, ak kobis ng’ony komugul. 7Ak kiyai Jehovah Kamuktaindet chito eng’ ng’ung’unyek, ak kobusyi serunekyik kabuset ne bo sobondo; kiek anyun chichoto, chito ne sobei. 8Kigol Jehovah Kamuktaindet mbaret eng’ Eden eng’ komostab kong’asis, ak konde oloto chichoto kiga koyai. 9Ak kiigochi Jehovah Kamuktaindet kobit ket age tugul eng’ ng’ony ne kararan eng’ keeret, ak ne mie eng’ amet; ak ketit ne bo sobondo eng’ kwenutab mbaret, ak ketit ne bo naet ne kinae ne mie ak ne ya. 10Ak kimong’une Eden ainet ne ibisi mbaret; yeityo kopcheigei eng’ oloto, koek ainosiek ang’wan. 11Kainetab ne bo tai ko Pison: noto ne yiemei emet komugul ne bo Abila ole mi tahabu; 12miachen tahabu che bo emonoto: mitei oloto bedola ak soam. 13Kiguure ainet ne bo aeng’ Gion: noto ne yiemei emet komugul ne bo Kus. 14Kiguure ainet ne bo somok Hidikel, noto ne wendi komostab kong’asis ne bo Asuria. Kiguure ainet ne bo ang’wan Euprate. 15Kiimut Jehovah Kamuktaindet chito kwo kotebe mbaretab Eden si kobiit kosemberi ak koribei. 16King’at Jehovah Kamuktaindet chichoto kolenji, Imuchi iam logoek che bo ket age tugul ne imache ne mi mbaret; 17ago amat iam che bo ketit ne bo naet ne kinae ne mie ak ne ya; amu eng’ betut ne keam che bo ketoto, imee ne matiny.
18Kimwa Jehovah Kamuktaindet kole, Ma mie kotebi chi inegei; ayachini ne toreti ne kergei ak inendet. 19Kiyai anyun Jehovah Kamuktaindet tiony age tugul ne bo ng’ony eng’ ng’ung’unyek, ak tarit age tugul ne bo barak, ak kokwerichi chichoto tiong’ichoto kogeer ole tochindoi kainaik; ak kainet ne kiguure chichoto kiy age tugul ne sobei, ko kiek kainennyi noto. 20Ak kitochi chichoto tuga tugul kainaik, ak taritik che bo barak, ak tiony age tugul ne bo ng’ony; ago kima biit ne toreti chichoto ne kergei ak inendet. 21Kiigochi anyun Jehovah Kamuktaindet chichoto ruondo ne nyigis, konuuch: ak konem karasta agenge, ak kotuge yoto banyek kogeere karasato: 22ak koyai Jehovah Kamuktaindet karasto kiinemune chichoto, koek kwondo; ak komutyi chichoto. 23Ak komwa chichoto kole, Ni anyun nguno ko kowet ne bo kowekyuk, ak banyek che bo banyekab bortanyu: kiguure kainennyi Kwondo, amu kaginemune Muren. 24Amu noto anyun, bagaktoi mureno kwandanyi ak kamennyi, ak konamgei ak kwondanyi; ak koek ichek borto agenge. 25Ak kitebyei tuwai ach ngor, chichoto ak kwondanyi, ak kima kolilandos.
Nu geselecteerd:
TAUNET 2: BUKUIT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
God's word open for all
©Bible Society of Kenya, 2020