Joni 12
12
Jesu mbwaakananikwa mafuta
(Mateyo 26.6-13; Maako 14.3-9)
1Nikwakasyaala mazuba aali cisambomwe kuti Pobwe lya Kwiindilila lisike, Jesu wakasika kumunzi waku Betani oomo mwakali kukkala Lazalo ooyo ngwaakabusya kuzwa kubafu. 2Mumunzi oomu bakamujikila cakulya, nkabela Maata nguwakali kubapa zyakulya. Lazalo wakali umwi wabaabo bakali kulya. 3Mpawo Maliya mucizi wa Lazalo wakabweza kasazi kamafuta aatalidulili, alimwi aakabambwa ansende iini-ini iinunkilila kabotu, wakananika zituta zya Jesu akuzisyoba amasusu aakwe. Eelyo ŋanda eeyo mubakabede yakazula kununkilila kubotu kwamafuta aayo. 4Mpoonya Judasi Isikaliyoti umwi wabasikwiiya ba Jesu (ooyo nguwenya wakali sikuyooomwaaba) wakaamba kuti, 5“Nkaambo nzi mafuta aaya naatauzigwa mali aali myaanda yotatwe, nkabela mali aaya kaapegwa kubacete?” 6Ncaakaamba boobu takali kaambo kamoyo wakugwasya bacete pe, pele nkaambo wakali mubbi, lino mbwaakali nguwakali kubamba ciyobwedo camali wakali kunga ulatola mali amwi akwaabba. 7Jesu wakati kulinguwe, “Komuleka mukaintu ooyo. Aaya mafuta waabambilila kuzikkwa kwangu. 8Bacete mulaabo lyoonse, pele mebo tamuli ambebo lyoonse pe.”
9Lino bantu banji nibakaziba kuti Jesu nkwabede ooko, bakainka, kwalo tiibakainkilide kuyoobona Jesu buyo pe, pele akuyoobona Lazalo ooyo Jesu ngwaakabusya kuzwa kubafu. 10Aboobo bapaizi basilutwe bakatalika kukanza kujaya Lazalo awalo, 11nkaambo kakuti bantu banji nibakali kubona Lazalo, bakatalika kukaka njiisyo zyabo akusyoma Jesu.
Jesu mbwaakanjila mbuli Mwami mu Jelusalemu
(Mateyo 21.1-11; Maako 11.1-11; Luka 19.28-40)
12Nibwakaca nkamu mpati yabantu bakazide ku Pobwe lya Kwiindilila yakamvwa kuti Jesu ulaboola ku Jelusalemu. 13Bakatema malala akuunka kuyoomucinga. Bakali kuya bwiimba cakupozomoka kabati,
“Aalumbaizigwe Leza!
Ulilelekedwe ooyo uuboola muzina lya Mwami Leza,
nguwe Mwami wa Isilayeli!”
14Lino Jesu wakalijanide mwanaa mbongolo akutanta, mbubonya mbuli mbokulembedwe kuti,
15“Utayoowi omunzi wa Ziyoni,
kolanga Mwami wako ngooyo ulaboola,
katantide amwanaa mbongolo!”
16Kusaanguna basikwiiya bakwe taakwe nibakaamvwisya makani aaya, kusikila Jesu naakabusigwa mubulemu. Ndendilyo nibakaibaluka kuti anu makani aaya akalembedwe akali kwaamba zyanguwe, alimwi zintu eezyo zyakali kucitilwa nguwe.
17Bantu banji bakali aanguwe ciindi naakaita Lazalo mucuumbwe bakaba bakamboni bazintu eezyo. 18Nkankakaako ncobakainkila kuyoomucinga, bakamvwa kuti nguwakacita citondezyo canguzu eeco. 19Aboobo Bafalisi bakaambilana kuti, “Taakwe ancomucita! Amubone, cisi coonse caguumukila kulinguwe.”
Bagiliki mbobakayandaula Jesu
20Lino kwakali Bagiliki bamwi akati kabaabo bakainkide kuyookomba kupobwe eelyo. 21Aaba bakaza kuli Filipo uuzwa kumunzi wa Betesaida mucisi ca Galilii akuzoomwaambila kuti, “Banene tuyanda kubona Jesu.” 22Mpoonya Filipo wakaakwaambila Andulu makani aaya, eelyo Andulu wakainka a Filipo kuyooambila Jesu. 23Jesu wakati, “Ciindi casika cakuti Mwanaa Muntu alemekwe. 24Ncobeni, ndamwaambila masimpe kuti, naa nseke yamaila kiitalokeli muvu kutegwa ifwe, inga inookkede lyoonse kiili yomwe buyo. Pele kuti naa yafwa muvu, inga iyoozyala zimwi zinji. 25Ooyo uuyandisya buumi bwakwe uyoobusweekelwa, pele ooyo utayandisyi buumi bwakwe bwamunyika muno uyooba abuumi butamani. 26Naa muntu kayanda kundibelekela, uleelede kunditobela, nkabela ooko nkwebede awalo mubelesi wangu uyoobako. Naa muntu wandibelekela unoolemekwa kapati a Taata.
Jesu mbwaakaamba zyalufu lwakwe
27“Akaka moyo wangu wapenga kapati. Ino ndaambe buti? Sena ndaambe kuti, ‘Taata, kondivuna kumapenzi aaciindi cino?’ Peepe, nkaambo kupenga ooku nkundakazida. 28Taata, ‘Tondezya bulemu bwako.’” Mpoonya kwakamvwigwa jwi kujulu lyaamba kuti, “Ndabutondezya kale, nkabela nciyoobutondezya alimwi.”
29Bantu banji bakaimvwi aawo bakalimvwa jwi eelyo, bakati, “Kwazuma.” Pele bamwi bakati, “Mungelo nguwakanana kulinguwe.” 30Jesu wakati, “Eeli jwi lyamvwigwa akaambo kanu, takali kaambo kangu pe. 31Ono lwasika lubeta lwanyika, ono muleli waansi aano watandwa. 32Pele mebo ndakwaanzikwa ndiyookwela bantu boonse kulindime.” 33Jesu wakaamba boobu kutondezya lufu ndwatikafwe mbolubede. 34Bantu bakamwiingula kuti, “Tee mu Mulawo wa Mozesi kulilembedwe kuti Munanike wa Leza unoopona lyoonse alyoonse. Ino yebo waamba nzi noti ‘Mwanaa Muntu uleelede kwaanzikwa?’ Nguni Mwanaa Muntu ooyo ngoamba?” 35Jesu wakati kulimbabo, “Mumuni ucili aandinywe kwakaindi kali mbokabede. Amweendele mumumuni nimucili aanguwo kutegwa mudima utamweenzyi, nkaambo muntu weendela mumudima taboni nkwaya. 36Ono nimucili aamumuni, amusyome mumumuni kutegwa mube bantu bamumuni.”
Jesu naakamana kwaamba makani aaya, wakainka waakulisisa.
Bamwi mbobatakamusyoma Jesu
37Nikuba kuti Jesu wakacita zitondezyo zyanguzu zinji kabalangilizya, taakwe nibakamusyoma pe. 38Eeci cakaba boobu mukweendelana abwakalemba musinsimi Izaya kuti,
“O Mwami, ino mbaani bakuusyoma mulumbe wesu,
alimwi nguzu zya Mwami Leza zyakayubununwa kuli bani?”
39Aboobo tiibakasyoma. Nkankakaako Izaya ncaakati,
40“Leza wakaboofwaazya akuyumya mitwe yabo,
cakuti tabakonzyi kubona ameso aabo,
nikuba kukonzya kuzibisya mumyoyo yabo,
nikuba kukonzya kusandukila kuli ndime kutegwa ndibaponye.”
41Izaya wakaamba boobu nkaambo wakabona bulemu bwa Jesu, akubulungulula.
42Pele bunji bwabapati ba Bajuda bakasyoma Jesu. Nikuba boobo tiibakaamba lusyomo lwabo antangalala akaambo kakuyoowa Bafalisi kuti inga balabatanda mucikombelo. Bapati aaba, 43bakali kuyandisya kulumbaizigwa abantu kwiinda kuzuminwa a Leza.
44Mpoonya Jesu wakoompolola akuti, “Ooyo uundisyoma tasyomi ndime buyo pe, pele ulasyoma amuliyooyo wakandituma. 45Alimwi kufumbwa muntu uundibona wamubona ayooyo wakandituma. 46Ndakasika munyika akuba mumuni wayo, kutegwa kufumbwa uundisyoma ateendi mumudima. 47Kufumbwa uumvwa majwi aangu wamana kataabambi, nsimuzuli pe, nkaambo tiindakazida kuzoobeteka bantu, ndakazida kuzoobafutula. 48Ooyo uundikaka uutatambuli majwi aangu, ulijisi uumubeteka. Majwi ngindakaambilizya ngaati kamuzule mubuzuba bwamamanino. 49Nkaambo taakwe nindalungulula majwi aangu munguzu zyangu ndemwini pe. Taata wakandituma nguwakandipa malailile aanzyeelede kwaamba. 50Nkabela ndizi kuti malailile aakwe apa buumi butamani. Aboobo zyoonse nzendaamba ndilazyaamba mbuli mbundakalaililwa a Taata.”
Nu geselecteerd:
Joni 12: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.
