Joni 13
13
Jesu mbwaakasanzya zituta zyabasikwiiya bakwe
1Kacitanasika ciindi ca Pobwe lya Kwiindilila, Jesu wakaziba kuti ciindi cakwe cakuzwa munyika muno akuya kuli Wisi cakali aafwiifwi. Walo wakali kuyandisisya bakwe aabo bakali munyika, ncobeni wakabayandisisya kapati. 2Jesu a basikwiiya bakwe nibakali kulya cilalilo, Saatani wakali njizizye kale mumoyo wa Judasi Isikaliyoti mwanaa Saimoni, muyeeyo wakwaaba Jesu kuli basinkondonyina. 3Jesu wakalizi kuti Wisi wakalipede zintu zyoonse mumaanza aakwe. Wakalizi alimwi kuti wakazwa kwa Leza akuti wakeelede kubweeda alimwi. 4Wakanyamuka aawo nibakali kulalila, watula zyakusama zyakwe ambali, wabweza cisani cakulipukutya, ucimana walyaanga mucibuno kulibambilila kucita ncaakali kuyanda. 5Mpoonya wakatila maanzi mumutiba akutalika kusanzya zituta zyabasikwiiya bakwe akubapukuta acisani eeco. 6Lino naakasika kuli Saimoni Pita, Pita wakati, “Mwami, sena nduwe weelede kusanzya zituta zyangu na?” 7Jesu wakati kulinguwe, “Tocizi ncecita pe, pele musule akooku uyookonzya kucimvwa ncocaamba.” 8Pele Pita wakati, “Peepe, utandisanzyi mebo pe!” Jesu wakati, “Kuti intakuzanzyi tojisi lubazu andime.” 9Amvwe boobo, Pita wakati, “Naa mbuboobo Mwami, utasanzyi zituta buyo, kondisanzya kumaboko akumutwe.” 10Jesu wakati, “Muntu wasamba kale ulasalala, ino ucisambila nzi alimwi ccita zituta buyo? Ono anywebo mwasalala, nikuba boobo kutali nyoonse pe.” 11Nkaambo wakalimuzi ooyo uutimwaabe ncaakaamba kuti, “Kutali nyoonse pe.”
12Lino Jesu naakamana kubasanzya zituta, wakakkala abusena bwakwe, eelyo wakababuzya kuti, “Sena mulicizi eeci ncindamucitila? 13Mundiita kuti, ‘Mwiiyi’ akuti ‘Mwami.’ Nomwaamba boobo mundaamba kabotu, nkaambo mbombubo oobo mbwebede ncobeni. 14Lino mwabona mebo nde Mwiiyi a Mwami wanu ndime ndamusanzya zituta, anywebo muleelede kuti kamusanzyanya zituta. 15Ono mebo ndamupa citondezyo, eelyo anywebo muleelede kuti kamucitilana mbubonya oobo. 16Ncobeni ndamwaambila kuti, muzike tali mupati kwiinda simalelo wakwe, awalo sikutumwa tali mupati kwiinda yooyo wakamutuma. 17Naa mulizi zintu eezi, mulilelekedwe kuti kamuzicita akuzilondola. 18Tandaambi ndinywe nyoonse pe, pele ndilibazi aabo mbindakasala. Eezi zyeendelana abwaamba Malembe kuti, ‘Ooyo ngwelya aawe mutiba omwe wandibukila.’ 19Ndamwaambila zyamakani aaya kaatanacitika kutegwa aakucitika mukasyome kuti ndendime nguwe. 20Ncobeni ndamwaambila kuti ooyo uutambula umwi wabaabo mbindatuma watambula ndime, nkabela ooyo uunditambula watambula ayooyo wakandituma.”
Jesu mbwaakaamba kuti Judasi nguutimwaabe
(Mateyo 26.20-25; Maako 14.17-21; Luka 22.21-23)
21Naakamana makani aaya, Jesu wakapenga kapati mumoyo, mpoonya wakaamba kuti, “Ncobeni ndamwaambila kuti umwi wanu ulandaaba.” 22Lino basikwiiya bakatalika kulangana-langana kumeso kabatazi naa nguni ooyo ngwaamba. 23Umwi wabasikwiiya bakwe, ooyo ngwaakali kuyandisisya, wakaliyeeme aali. 24Aboobo Pita wakadokola sikwiiya ooyu akwaamba kuti, “Mubuzye, ino nguni ngwaamba?” 25Lino sikwiiya wakayeeme aali Jesu wakati, “Ino nguni, O Mwami?” 26Jesu wakaingula kuti, “Ngooyo ngwetipe kankwa nketisunse.” Jesu naakamana kusunsa kankwa wakakapa Judasi mwanaa Saimoni Isikaliyoti. 27Mbwaakapegwa buyo Saatani wakamunjilila limwi. Jesu wakati kulinguwe, “Eeco ncoyanda kucita cicite kufwambaana.”
28Lino beenzinyina bakali kulya anguwe taakwe wakaziba naa nkaambo nzi ncaakaambila boobu kuli Judasi. 29Bamwi bakayeeya kuti mbwanga Judasi nguwakali mubambi waciyobwedo cabo, ambweni Jesu wakali kumwaambila kuti, “Kaule ziyandika kupobwe,” naa kuti ape zimwi zintu kubacete. 30Lino mbwaakakatambwida buyo kankwa aako, Judasi wakanyamuka akuzwida anze. Ciindi eeco akali masiku kale.
Jesu mbwaakaambila Pita kuti ulamutama
31Judasi naakainka, Jesu wakaamba kuti, “Ono Mwanaa Muntu walemekezegwa, awalo Leza walemekezegwa mulinguwe. 32Lino naa Leza walemekezegwa mu Mwanaakwe, nkokuti Leza lwakwe mwini uyoolemya Mwanaakwe. Eelyo ulacita oobu lino-lino. 33Nobana bangu, ndinooli aandinywe kwakaindi kasyoonto buyo. Muyoondiyandaula, pele mbubonya mbundakabaambila bantu, anywebo ndamwaambila kuti, ‘Ooko nkweya tamukonzyi kusika pe.’ 34Ndamupa mulawo mupya wakuti, ‘Amuyandane mbubonya mbuli mbwemuyandisya mebo, anywebo mbubonya amuyandane. 35Kuti naa kamuyandana mulilwanu, bantu bayooziba kuti muli basikwiiya bangu.’”
36Saimoni Pita wakati kulinguwe, “O Mwami, ino uya kuli?” Jesu wakaingula kuti, “Ooko nkwenja tamukonzyi kundiccilila ono, pele muyoondiccilila aakale.” 37Pita wakati kulinguwe, “Mwami, ino nkaambo nzi ncetakonzyi kukuccilila ono? Akaambo kanduwe ndilakonzya nikuba kwaaba buumi bwangu.” 38Jesu wakati, “Sena uyeeya kuti inga wakonzya kwaaba buumi bwako akaambo kangu? Ncobeni ndakwaambila kuti sunu masiku aano mukombwe katanalila, unoonditamide kale ziindi zyotatwe.
Nu geselecteerd:
Joni 13: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.
