Luka 15
15
Imbelele yakasweeka
(Mateyo 18.12-14)
1Kabacili mulweendo oolu basimutelo abatakali kubamba milawo ya Mozesi bakasika kuli Jesu kuti bazooswiilile kwiisya kwakwe. 2Mpawo Bafalisi abamayi ba Mulawo bakatalika kutongooka bakati, “Ooyu muntu utambula bantu bali boobu akulya ambabo.” 3Aboobo Jesu wakabaambila cikozyanyo eeci wakati, 4“Kuti naa umwi wanu kajisi mbelele zili mwaanda, nkabela yomwe yasweeka, sena takoosiya zili makumi aali fuka afuka musokwe kuti ainke kuyooyandaula eeyo yomwe yasweeka mane kusikila naijana? 5Eelyo aijana ulabotelwa kapati akwiibweza amakuko aakwe, 6wiitola kuŋanda. Mpoonya asika ulaita beenzinyina abasimunzinyina akuti, ‘Amusekelele andime, nkaambo ndaibona mbelele yangu yasweekede.’ 7Ndamwaambila kuti mbubonya oobo akwalo kujulu kulaba kusekelela kupati nkaambo kasizinyonyoono omwe wasanduka, kwiinda baluleme bali makumi aali fuka afuka basandukide kale.
Idi lyakasweeka
8“Naa ndaambe mukaintu uujisi mali aansiliva aali kkumi, ino ulacita buti kuti wasweekelwa lyomwe lyangawo? Sena takoomunika lambe, kukukula muŋanda, akulangaula koonse-koonse kusikila mane alibone? 9Nkabela alijana, ulaita beenzinyina mbobabambene akuti, ‘Amusekelele andime nkaambo ndalibona di lyangu lyandisweekede!’ 10Ndamwaambila kuti mbubonya oobo kunooli kusekelela kupati kubangelo ba Leza nkaambo kasizinyonyoono omwe wasanduka!”
Mwana mulombe wakasweeka
11Alimwi Jesu wakaamba kuti, “Kwakali muntu umwi, wakajisi bana balombe bobilo. 12Muniini wakati kuli wisi, ‘Taata, kondipa lubono ndweelede kwaabilwa.’ Mpawo wisi wakaabanya lubono lwakwe kubana bakwe bobilo. 13Naakamana mazuba mace buyo, muniini wakabungika lubono lwakwe, watola lweendo lwakuya kucisi cili kulaale, ooko wakaakusangaula lubono muzintu zyabufuba-fuba. 14Nkabela naakamana kulusowaila, kwakaba nzala mpati mucisi eeco, nkaako wakatalika kupenga. 15Wakaya kumuntu umwi wamucisi eeco kuti akabelekele cakulya. Lino muntu ooyo wakamupa mulimo wakusanina ngulube. 16Mulombe ooyu wakali kufwa nzala cakuti wakali kulya busenga bwangulube, nkaambo taakwe muntu wakali kumupa cakulya. 17Abone boobo wakaliyeeya wati, ‘Babelesi bataata boonse balalya balakkuta akulilekela, pele mebo kuno mfwa nzala! 18Ani, ndainka kuli taata, nkaambe kuti, “Taata, ndakabisizya Leza anduwe, 19aboobo nsiceelede kwiitwa kuti ndimwanaako, undilele buyo mbuli umwi wababelesi bako.” ’ 20Mpoonya wakanyamuka akubweeda kuli wisi. Eelyo naakacili kuza alaale-laale, wisi wakamubona, nkabela wakeetela, wakamuzuzaanina, waakumufumbata akumumyonta cakukondwa. 21Mpoonya mulombwana ooyo wakaambila wisi kuti, ‘Taata, ndakabisizya Leza anduwe, nsiceelede kwiitwa kuti ndimwanaako.’ 22Pele wisi wakaita babelesi bakwe wati, ‘Amufwambaane kweeta cakusama cibotu kapati, mumusamike. Mumusamike anweenwe, alimwi andyasyo. 23Lino kamuya mukalete moombe uuneneede kwiindilila, mumujaye kuti tulye tusekelele. 24Nkaambo mwanaangu wakalifwide, wabuka, wakalisweekede wabonwa.’ Mpoonya aawo bakatalika kulya pobwe akusekelela.
25“Ciindi eeco mwanaakwe mupati wakali mumuunda. Naakasika afwiifwi aŋanda, wakamvwa kwiimba akuzyana. 26Aboobo wakaita mubelesi umwi akumubuzya cakali kucitika. 27Mubelesi wakati, ‘Mwanookwanu waboola, lino uso wamujaila moobe uuneneede, nkaambo waboola kali muumi.’ 28Pele mupati wakanyema akukaka kunjila. Mpoonya wisi wakazwida aanze akumukombelezya kuti anjile. 29Walo wakaambila wisi kuti, ‘Langa! Eeyi myaka yoonse njindakubelekela mbuli muzike, taakwe nindatakakuswiilila aaniini pe. Ino wakandipa nzi? Taakwe nokaba kapongo buyo kakuti ndipobole, ndilye abeenzuma! 30Pele mbwaasikila buyo ooyu mwanaako wakaakunyonyoona lubono lwako loonse mukupa bavuule, wamujaila moombe uuneneede.’ 31Wisi wakati kulinguwe, ‘O Mwanaangu ulaandime mazuba oonse, zyoonse nzejisi nzizyako. 32Pele kuleelede kuti tusekelele akubotelwa, nkaambo musyoonto wako wakalifwide, wabuka, wakalisweekede, wabonwa.’”
Nu geselecteerd:
Luka 15: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.