Kut 12
12
1Mbwenu Nyakubaho akagira Aburahamu ati: Ruga omu nsi yaanyu, n'omu b'oruganda rwanyu, n'omu ka ya sho, oze omu nsi ei ndaakworekye. 2Ndyakwihamu eihanga rihango, nkuhe omugisha, ndeetere eiziina ryawe kurangaanwa, haza obone kuhaisa abandi emigisha. 3Ndyaha omugisha abarikwendeza emigisha, nkyeene abarikukukyeena. Omuriiwe enganda zoona ez'omu nsi nimwo ziriheerwa emigisha.
4Atyo Aburahamu yaagyenda nk'oku Nyakubaho yaamuragiire, na Looti yaagyenda nawe. Aburahamu akaba ahikize emyaka makumi mushanju n'etaano obu yaaruga Harani. 5Kandi Aburahamu akatwara Sarai omukazi we, na Looti mutabani w'omurumuna, n'ebintu byabo byona ebi baabaire batungire, n'abantu abu baatungiire omuri Harani. Mpaho baimutsya kuza omu nsi ya Kanaani. 6Aburahamu akaraba omuri egyo nsi, yaahika omu mwanya ogurikwera oguri Shekemu, aha muti gw'Omuvure ogwa Morehi. Haza omu bunaku obwo Abanyakanaani nibo baabaire bari omuri egyo nsi. 7Bwanyima Nyakubaho yaabonekyera Aburahamu, yaamugira ati: Egi nsi niyo ndiha baijukuru baawe. Atyo Aburahamu ayombeka aho eitambiro, eri yaayombekyeire Nyakubaho owaamubonekyeire. 8Ku yaarugire aho, yaaza omu nshozi aha rubaju rwa burugwa-izooba bwa Beteli, yaateerayo eihema. Obwo Beteli emuri burengyerwa-izooba na Aayi emuri burugwa-izooba. Okwo nayo yaayombekyerayo Nyakubaho eitambiro, yaamuramizayo. 9Aburahamu yaagumizamu, naatoora ogurikuza Negebu.
Aburahamu omuri Misiri
10Mbwenu egyo nsi ekateerwa enjara mpango, Aburahamu nikwo kushuuma akaza Misiri kushuuhuukirayo, ahabw'okuba enjara ekaba eri nyingi omuri egyo nsi. 11Ku yaabaire ari haihi kuhika Misiri, yaagira Sarai omukazi we ati: Nimmanya ku ori omukazi murungi munonga. 12Mbwenu Abanyamisiri ku baraakureebe, nibaija kugira ngu ogu n'omukazi we; haza baanyite, iwe bakurekye. 13Mbwenu ogume obagire oti ori munyaanyazi, mbone kugira omugisha ahabwawe, n'okukiza amagara. 14Aburahamu ku yaahikire Misiri, Abanyamisiri baareeba ogwo mukazi ari murungi munonga. 15Kandi abategyeki ku baamureebire bati, baamusiimira Faraaho. Ogwo mukazi nikwo kutwarwa omwa Faraaho. 16Haza ahabwe, Faraaho yaatwaza gye Aburahamu. Kandi okwo Aburahamu akatungirayo amasyo g'entaama n'embuzi n'ag'ente n'endogoya n'abahuuku n'abazaana n'engamira.
17Kwonka Nyakubaho yaabonabonesesa Faraaho n'eka ye enfu mbi, naamutura Sarai muka Aburahamu. 18Faraaho nikwo kweta Aburahamu, akamugira ati: Beitu shi okantura ki? Ahabw'enki otarangambiire ku ari omukazi waawe? 19Ahabw'enki okagira oti: Ni munyaanyazi? Haza naanye nkamushwera! Mbwenu nu, omukazi waawe ngugu omutware, ogyende. 20Mpaho Faraaho yaamuha abashaija, baamushendekyereza n'omukazi we, n'amatungo ge goona; baamuhitsya aha mwatano.
Aburahamu okutaana na Looti
Nu geselecteerd:
Kut 12: RKK2008
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.