Matayi 6
6
Kufumiuʼipwa shikunzi kukwilu
1Mwandaje lelo izya vugolosu vwinyu mutazivombelaje mwe vakwenyʼavantu, lwe mukuti vasukumilaje vuvo, shenga lwe mukuhonzya vovulo, pe mutali niṿwa kuvalipila uSo kumwanya. 2Ilelo ingʼuvusilʼukuvapʼiṿwa shikunzʼavantu, utayihomelajʼamasaji inza she shima vakuhonzya avalumilenga mumasinagogi namumasolo, ve vakuti vatwenyelezyajʼavantu vatutimaje. Nalyoli lyoli nkuvavuzya nkuti: Vayinyatuliye nzila iṿwa kuvalipila. 3Nkandʼiwe ingʼuvusilʼukuvapʼavantu iṿwa shikunzi, pʼumuhono waho wa kumumongo atalolaje huho hʼakuvombʼuwamwavo wa kumulilo, 4iṿwa shikuku ṿwaho ṿivanje ṿwa kukwilu. PʼuwenʼuSo wʼakwenya nakukwilu alikulipila.
Uluputo lwa kukwilu
5Pope lwe mukuputa mutahaputaje inza she vakuputʼavalumilenga. Avene vakuyisevelʼukwimilila mumasinagogi namunkomano zya madala ga munkaya, she vakuti vatulolajʼavantu. Nalyoli lyoli nkuvavuzya nkuti: Vayinyatuliye nzila iṿwa kuvalipila. 6Nkandʼiwe ingʼuvusilʼukuputa, pʼuyinjile muhayumba haho aha kuziho, uyigalile nakushilyango, kwʼuputaje kwa So wʼali kukwilu, pʼuSo wʼakwenya nakwe kukwilu alikupanga. 7Inga mukuputa mutahazumajʼahalanga inza shʼavakunzi vakuzumʼahalanga shʼavene vakuti pʼakutejelezya inga tukwatʼamazwi aminji. 8Mutaholanaje navo. ShʼuSo aṿimanyile nzila ṿiṿwo ṿwe mukwanza lwe mushilʼukulava.
“Uluputo lwa Mwene”
9Ilelʼimwe inga mukuputa pe mutinji:
Tata witu wa kumwanya;
izina lyaho lifinjilwaje,
10uvumwene vwaho vwinzaje,
zyʼukasimʼiwe zye zivombelwaje napansʼipa fwe kwe kumwanya.
11Niṿwa musanyʼunʼiṿintʼutupanje, tuyanane naṿwo.
12Uswile namalandu gitu,
inza she naswe tukuswilʼamalandu ga vamwitu.
13Utahatuvishe mulutazyo, nkandʼutuposhe nakumbivi.
[She vwahʼuvumwene, namaha gaho, nuvupiti vwaho wenewe shimashima. Amen.]
14Shengʼavantu mukuswilʼamalandu gavo, pe namwʼuSo wa kumwanya wope akuswilʼaginyu. 15Nkandʼinga mutakuswilʼimwʼavantʼagavo, pe wope nuSo atakuswila ginyu.
Ukusitakulyʼiṿintu
16Shenga mukufungʼiṿwa kulya, mutayiholanyaje navalumilenga ve vakuyiswimilizya kuminso shʼavene vakuyigalula kuṿweni she vakuti, mwe vatumanyilajʼavantu ukuti vafunzilʼiṿwa kulya shinishi. Nalyoli lyoli nkuvavuzya nkuti: Vayinyatuliye nzila iṿwa kuvalipila. 17Nkandʼiwe ingʼukufungʼiṿwa kulya, pʼupahalaje kwitwe, ugezaje nakuminso, 18ukuti avantu vatamanyaje ukuti ukufungʼiṿintu, akumanyaje weka we So wʼali kukwilu. PʼuSo wʼakwenya nakukwilu alikulipila.
Insavo ya nalyoli
19Mutayilonchelʼiṿwuma iṿwa kulundila munsi umu, mwe ninyenze zikudovola nuvusimu vukulya, mwe naviva vakuhana vakwiha. 20Simuyilonchelʼiṿwuma iṿwa kulundila kumwanya, kwe ninyenze zitakudovola nuvusimu vutakulya, kwe naviva vatakubana vatakwiva. 21She kwe shilʼishuma shaho, kwʼali wopʼumwoyo waho.
Uvuzelu nishisi
22Inyale ya muvili waho lye lyinso. Ilelo shengʼilyinso lyaho lizelu, pe wope numuvili waho akuva muzelu. 23Nkandʼingʼilyinso lyaho livivi, pe wope numuvili waho akuva nishisi. Nkandi inyale yʼili mumwaho inga ye shisi, pʼishisi shikulusyʼuvumwamu! 24Numʼatamanyile ukuvavombelʼavamwene vavili. Pamo angamupata wokʼuno, pʼangamukundʼuwamwavʼula; pamo angamwumishizya wokʼuno, pʼangamusyoshelʼuwamwavʼula. Mukupotwʼukuvavombela ve vavili nuMulungu nuvudumbwe.
Amaganigani nukumusuvilʼuMulungu
25-33: Luk. 12,22-31.
25Mwe mumwo nkuvavuzya nkuti: Mutakutanajʼuvulanzi vwinyu iṿwa kulya niṿwa kungʼwela, havili namavili ginyu aga kuzwala. Nuvulanzi niṿintu, amwe vute vupiti vwe vulanzi, numuvili naga kuzwala, amwe ate mupiti we muvili? 26Simwenyʼinyunyi zya kumwanya. Shʼizyene pope nashe zitakuvwala, nashe zitakuṿuna, nashe munkoma zitakusezezya, popʼuwenʼuSo wa kumwanya akuzizuvilʼiṿintu. Imwe lelo mutakuzilusyʼizyenʼuvugomu? 27Unanu mulʼimwe amanyilʼukuyonjezya inga hahono hoka vwelele kuvutali kuvulanzi vwakwe? 28Namenda ga kuzwala mukukutana shonu? Simunyatulʼinjele muvwezya vwa mwilala she vukumela. Shʼuvwene vutakuyimbʼimbombo, vutakupota. 29Nkandʼine nkuvavuzya nkuti: Wope nawe Solomoni muvupiti vwakwe vwonti atakwasite nalumo fwe vwokʼuvwezyʼuvu. 30Apene lelʼuMulungu ingʼazwisile vovulo isole lya mwilala lyʼumusanyʼuno lilipo lye indavi likupwʼulupwa, pʼatinji asitʼukupitilizyʼukuvazwihʼimwe lelo, mwe valwitihʼulupupusʼimwe? 31Mwe mumwo nkuti mutakutanaje ukuti: Tuṿwaje kwi niṿwa kulya niṿwa kungʼwela, tugaje kwi naga kuzwala? 32She ṿwonti ṿiniṿi ṿwe vakwanzʼavakunzi, shʼimwʼuSo wa kumwanya aṿimanyile nzila ṿwontʼiṿwa kuti muve naṿwo. 33Nzila mwanzajʼishinamwene shakwe Mulungu nuvugolosu vwakwe, vwe vutalile vuvwo, pe muliyaga ṿwonti naṿiniṿi akuvonjezya pamwanya. 34Mwe mumwo mutakutanaje nzila iṿwa ndavi, shʼilya ndavi likuyikutanilʼiṿwakwe. Amanda gonti gali nuvupotwe ilʼuvwakwe ilʼuvwakwe.
Nu geselecteerd:
Matayi 6: NYi1965
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Nyiha New Testament © British and Foreign Bible Society, 1965.